Read Koonzime 1 Kórɨnt 6 Bible Online

1 Kórɨnt 6 - Koonzime bible

1 Kórɨnt 6

¹Ɨ́ jɔʼ mʉ̂r sɔ́má yɨ́n dí e lɔ̌b e mɨ́ɔɔ́ wé yɨ́, nzê nyě tó pur mɨ́ɔɔ́ waá kwá bʉr o mé Nzyɛ̌m ɛ́? Heʼé! Nyě bánǎ tó pur nyé ó, kwá onzyɛ́h ó bʉ̂r.

²Nzê bɨ̌n bé agʉ́a ó, bʉr o mé Nzyɛ̌m ó ngá lwib mílɔ̌b mi bʉ̂r ó sí yɨ̂ʼ ɛ̌? Bɨ̌n pǎ nyɛɛ́ lwib mílɔ̌b mi bʉ̂r ó sí yɨ̂, á dwɛʼra e bwá mílɔ̌b mi dí tîtííǎ mî!

³Nzê bɨ̌n bé agʉ́a ó, mɨná bé ólwib gá milɔ̌b bééngeles? Mɨná pǎ nyɛɛ́ lwib gá milɔ̌b mínɨ́nɨ́ɨ́ myaá, á dwɛʼra e myaá mi bʉ̂r ó sí yɨ̂!

⁴Bɨ́n óbe e milɔ̌b mí twǐʼ sí yɨ̂ʼ nó, bɨ̌n bé óbɛ̌m pɛ̂h ótîʼ o mílɔ̌b bé ótíʼe bɨ́n myǎ bá, ɨ́ sɔ́má bʉ̂r o dí abuú gbáŋɔɔ ɨ́ nkɔb ɨ́ Mbɛ̌r-Nzyɛ̌m bá.

⁵Mě lɛ́ɛ́ nó ó, lɨ́ esú lé égbâ bɨ́n sôn ɨ́ nyʉ̂l. Nzê ɨ́ sɔ́má yɨ́n, yé lɨ́ elúʼǒ pɨpɨ́ʼ ngwár dí e nkul elwib mílɔ̌b páʼ bɨ́ɔɔ́ e bɨ́ɔɔ́ nyá ɛ́?

⁶Nzê yé ɨ́ mbɨa ó, mɨ́ɔɔ́ e mɨ́ɔɔ́, bé tôʼ e lɔ̌b wɔ́ɔ́ ɨ́ mpǒm me lɔ̂b swîh, dí ntémé mʉr dí adyɛ̂ʼwo e Nzyɛ̌m nyá ɛ́?

⁷Yé ó nó: yê bɨ̌n ó dyɛʼ ɨ́ jɔʼ bɨ́n sáá ótîʼ o mílɔ̌b kʉ̌l ɨ́ jɔʼ bɨ́n dí e milɔ̌b páʼ nyɨ́n yɨ́. Bɨ̌n bé lɨ́ ebene édûhwo ó, bʉr sâʼ bɨ̌n ebébe ɨ́ yé? Bɨ̌n bé lɨ́ ebene édíbɔɔ ɨ́ yé?

⁸Yé nyɨ́n ó, bɨ̌n ó dí onzyɛ́h ó bʉ̂r ti e mindíblʉ̌. Bɨ̌n sá ébébe laá ó, bɨ́ɔɔ́ bɨ́n!

⁹Bɨ̌n bé lɨ́ egʉ́ǎ tyeetye ó, osyɛ̂l o mísyóm, bé ákóʼó nʉǎ diá ɨ́ Mpóʼo mé Nzyɛ̌m, jala e nkɔb líʼe nyɔ́ɔ́. Mʉ̌r sá ajéʼě sɨ̂: ntʉ mʉ̂r nyɨnyɛ̂h dí e nkɔb ɨ́ Mpóʼo mé Nzyɛ̌m. Bʉr o sâ bímolá bá, baá o dí edwe bíkpɛʼkpɛ̂ʼ bí ónzyɛ̌m kûm bá, osyɛ̂l o médyɛ̂n, otɛba o bʉ́rʉ̂m, bʉrʉ̂m bé dí etɛb bá,

¹⁰mindíblʉ̌, bʉr o bígwɨ́má, minyʉnyóʼ, bʉr o mélwɨ́ɨ, baá dí edɛn bímɔnɨ́ byé onkán bá: bʉr baá, bé álîʼ e nkɔb nyɔ́ɔ́ ɨ́ Mpóʼo mé Nzyɛ̌m.

¹¹Nó ntémé ó, bʉ́ʉ́ bʉ̂r ó sɔ́má yɨ́n, bé á be yɨ́! Sâ gwár, bɨ̌n bé á si sohlɔɔ, pubɔɔ, le edweŋɔɔ nkâm ɨ́ míh mé Nzyɛ̌m ɨ́ díé mé Tî Yésʉs-Krîst, cɨɨ e nzɨ̌ Sísǐm mé Nzyɛ̌m gá wɨ́ná.

¹²Me óbɛ̌m lɛ́ɛ ó: «Mě e nkul esâ syɛ́ɛla yɨ́yɛ̂h.» Yé ó nó. Sâ gwár, ntʉ̌ syɛ́ɛla yɨ́yɛ̂h dí me e nyɔm. Me óbɛ̌m lɛ́ɛ ó: «Mě e nkul esâ syɛ́ɛla yɨ́yɛ̂h.» Nó ó, me ábîr ó, me díʼee túʼǎ yʉ́ʉ́ sɔ̂ʼ.

¹³Bé lɨ́lɛ́ɛ́ ntémé ó: «Mede, mê tɨ̂ʼ ó, lɨ́ esú é mo. Mo ntémé, lɨ́ esú é méde.» Yé ó nó. Sâ gwár, Nzyɛ̌m ógbah bíbyɛ̂h, ebě, nyʉ̂l mʉr, nyé abe ó, nye díʼee lœʼá ɨ́ nzɨ̌ bijoó. Nye tɨ̂ʼ ó, lɨ́ esú lé éséa e Tî Yésʉs syɛ́ɛ́. Tî Yésʉs, ntémé, nye tɨ̂ʼ ó, lɨ́ esú é ményʉ́l gá mɨ́ná.

¹⁴Nzyɛ̌m, mʉr á pɛh Tî Yésʉs, dwih nyé lɨ́ odwe nyá, ópɛh ntémé mɨná gâ, dwih lɨ́ odwe, e nkul nyé.

¹⁵Nzê bɨ̌n dína apǎ gʉ́a ó, menyʉ́l mɨ́n, mé ó bitíl bí nyʉ̂l mé Krîst? Nzê me óbánǎ nʉǎ tíl nyʉ̂l mé Krîst, tó pûhla yé e bitíl bí nyʉ̂l sadága mʉ́má ɛ́? Yé sá abá kúnwo ɨ́ páʼ wâm ó, me sâʼ nó!

¹⁶Nzê bɨ̌n bé agʉ́a ó, mʉr dí epûhla e sadága mʉ́má nyá, bé e nɔ́ɔ́ bɨ́bɛ̂h, bé mû ó nyʉ̂l mpwár ɛ́? Ebě, yê cɛmá ó: Bé e nɔ́ɔ́, bé ódi ó, ebɔ̂b e nzyeŋle, pʉ́m le ebo, púno gwár.

¹⁷Nó ó, mʉr dí etiʼe ɨ́ mpúhlá e Tî Yésʉs nyá, óbe ó e sísǐm ngwár, bé e nɔ́ɔ́.

¹⁸Syɛ́hláá gá esâ bímolá. Myúú mísyóm bʉ̂r dí esɨsâ mí, myé sísyɛ́ɛ́lɨ́ ó, ɨ́ mʉ̌r kʉ̌l. Tó kœb ó, ɨ́ jɔʼ mʉ̂r sá bímolá yɨ́, nyě sá syóm waá ó, ɨ́ nkǒ pâʼ nyʉ́l nyé nye mʉr tɨ̂.

¹⁹Nó ó, nzê bɨ̌n bé agʉ́a ó, menyʉ́l mɨ́n, mé ó mpáh mé Sísǐm mé Nzyɛ̌m ɛ̌? Sísǐm dí ɨ́ bɨ̌n wɨ́, wé ó waá Nzyɛ̌m á ntɨh bɨ̌n wɨ́. Bɨ̌n bé agúmo e bɨ̌n bʉr o tɨ̂,

²⁰ebě, Nzyɛ̌m á si jána myɛ́na ɨ́ bwaʼ bwaʼ ɨ́ jɔʼ nyé á sâ ó, bɨ̌n gúmaa e né yɨ́. Nó, dwéʼ gá Nzyɛ̌m kûm, lɨ́ ebaʼle ményʉ́l mɨ́n ti.