Read Koonzime 1 Kórɨnt 8 Bible Online

1 Kórɨnt 8 - Koonzime bible

1 Kórɨnt 8

¹Ɨ́ nkǒ páʼ ótír o dí ebaŋɔɔ ɨ́ nzaá bikpɛʼkpɛ̂ʼ bí ónzyɛ̌m bá, mɨná gá óbɛ̂h, bé ɨ́ buú gʉ́ǎ mpʉ bɨ́n dí elɛ́ɛ yɨ́. Tó kœb ó, ngwɨ́á dwídwé mʉ̂r ó, enkɛ́ɛ e nyʉ̂l. Bʉr, bé buú dirǎ nyɔm ó e kpɛ̌l.

²Mʉr dí ejwɨʼ ó, nyɨ́ gʉ́ǎ sɔ̂ʼ nyá, nyé apǎ gʉ́ǎ bím dí ejala yɨ́.

³Mʉr kpɛ́l Nzyɛ̌m nyá nyɨɛ ó dí waá Nzyɛ̌m dí egʉ́a nyá.

⁴Nó ó, ɨ́ nkǒ páʼ ndéá tír á pa baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá, mɨná bé lɨ́ egʉ́a gá ó, sɔ̂ʼ, yé abe ɨ́ bikpɛʼkpɛ̂ʼ bí ónzyɛ̌m. Nzyɛ̌m, nye ó njɨ ngwár.

⁵Yé yɨ́ɛ ó e bisɔ̂ʼ mebéʼé bi dí ejébɔɔ «ónzyɛ̌m», nkʉ̂ «ojwɨ́ɨ» bí. Yé damá be e byúú bísâ bi dí ejébɔɔ «ónzyɛ̌m» ɨ́ jʉ́o kʉ́, nkʉ̂ ɨ́ sí yɨ̂ʼ bí,

⁶ɨ́ páʼ gá wɨ́ná, mɨná gá bé ó, njɨ e Nzyɛ̌m ngwár, waá dí Sɔ́ŋ gá wɨ́ná nyá. Nye ó b'á komlo sá yɨ́yɛ̂h. Bicwiʼ gá bíná, byé dwɛ́ʼ ó nye. Yé ntémé, yé ó njɨ Njwɨ́ɨ ngwár: Yésʉs-Krîst. Sá yɨ́yɛ̂h, yé á kwɨmlɨ ó, ɨ́ nzɨ̌ nyé. Mɨná titiʼe gá ó, ɨ́ nzɨ̌ nyé nyaá.

⁷Sâ gwár, ntʉ bʉ̂r bɨ́bɛ̂h dí egʉ́a ótyeetye waá. Bʉ́ʉ́ bʉ̂r bɨ́ɛ, bɨ́ boó dyɛ̂m ɨ́ páʼ bíkpɛʼkpɛ̂ʼ bí ónzyɛ̌m. Kumǒ kumáa ɨ́ báánâ, jɔʼ bɨ́haá bʉ̂r dí ede tír waá yɨ́, bɨ́ɛ, bé sîsimsa ɨ́ jɔʼ yɨ́yɛ̂h ó, tír waá á si baŋɔɔ ɨ́ nzaá bikpɛʼkpɛ̂ʼ bí ónzyɛ̌m. Mipahlá mílémé myɔ́ɔ́, myé lɨ́ edwe bé mebě. Bé lɨ́ egʉ́a ó, bé óde tír waá nó, edɨ́ɨ́ é tír waá, lé ójaá lœʼ bé ó lœʼœ́œ ɨ́ míh mé Nzyɛ̌m.

⁸Mɨná bɨɛ, bé lɨ́ ekʉ́ gʉ́a gá ó, ntʉ̌ dœʼ ngá tyen mʉ̂r bǎʼ e Nzyɛ̌m. Mɨ́ná dí gá, akǎ de tír nó, mɨná bé adímle gá sɔ̂ʼ. Mɨ́ná bé óde gá nye nó, sɔ̂ʼ, yé ákɛlɔɔ tɨ̂ʼ kʉ́.

⁹Syɛ́ɛla bɨ́n dí e nkul esâ, agbah étié yɨ́, yé óbɛ̌m be ntémé ebɔ̌ʼ dí ejâ ɨ́ nzɨ̌ mé nyʉ́ʉ́ mʉ̂r lɨ́. Mʉr waá óbɛ̌m bɨm lé, ntɔ̂ʼ twe, ebě, nyé abe e mpǎŋ búʼó. Nó ó, kánwáá gá lɨ́ esâ syɛ́ɛla yaá.

¹⁰Go e bâʼ, gua mʉr dí ɨ́ buú gʉ́a nyá! Gó tó dě dína ɨ́ nzaá bikpɛʼkpɛ̂ʼ bí ónzyɛ̌m nó, go ámû jaá sâ syɛ́ɛla yaá, nyʉ́ʉ́ mʉ̂r ntɔ̂ʼ bánǎ baŋa yê, damá jóʼo ó, lémé wé, wé lɨ́ edwe nyé mebě tɨ̂.

¹¹Mʉr dí e mipahlá ɨ́ léme ɨ́ tɨ́ŋ nyá, nye ó mɨ́ɔɔ́ gá wɨ́ná Krîst á dwe lɨ́ esú lé nyá. Nyé ajala le edwe ɨ́ lɔ̌b sá gó dí ejébě «mpǎŋ ngwɨ́á» yɨ́.

¹²Ɨ́ jɔʼ bɨ́n sá syóm ɨ́ nkǒ páʼ bɨ́ɔɔ́ bɨ́n, le ebáʼǎ tyeʼ mílémé myɔ́ɔ́ dí ɨ́ tyɛʼ mí yɨ́, bɨ̌n bé lɨ́ esâ syóm ɨ́ nkǒ páʼ mé Krîst.

¹³Yé bé mede mâm, mé ó ebɔ̌ʼ e dí e nkul ebɨma mɨ́ɔɔ́ wǎm ɨ́ léme lɨ́ nó, me ónzoó kam ó, me díʼee akǎ de tír. Me ámû jaá sâ ó, mɨ́ɔɔ́ wǎm bɨ́mɨɨ ebɔ̌ʼ ɨ́ léme, twe.