Read Koonzime 2 Kórɨnt 1 Bible Online

2 Kórɨnt 1 - Koonzime bible

2 Kórɨnt 1

¹Yé ó mɛm Pɔ̂l, mʉr milʉ́mlʉ́ mé Yésʉs-Krîst ɨ́ lɔ̌b gwɨ́má mé Nzyɛ̌m ó dí ecɛma bɨ́n mekaná mâ, bɨ̌h e Timotɛ̂, mɨ́ɔɔ́ gá wɨ́ná. Bɨ̌h cɛmá ó, Mbɛ̌r-Nzyɛ̌m dí Kórɨnt wɨ́, ti e bʉr o mé Nzyɛ̌m bɨ́bɛ̂h o dí ɨ́ sí Akayɨ̂ bá.

²Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ gá wɨ́ná, bé e Tî Yésʉs-Krîst.

³Mɨná gúmlaa gá waá dí Nzyɛ̌m mé Tî gá wɨ́ná, Yésʉs-Krîst, waá dí Sɔ́ŋ wé nyá. Nye ó Sɔ́ŋ gá wɨ́ná dí elɛ̂ʼle mɨ́ná gá mpam, waá dí egbâ bʉ̂r nkul ɨ́ miléme nyá.

⁴Nyě gbá bɨ́h nkul ɨ́ miléme ó, ɨ́ jɔʼ bɨ́h dí esia e mitúú yɨ́. Nye ó mʉr dí etyɛ̂b bɨ́h ɨ́ miléme, ó bɨ̌h gbâʼ bʉ́ʉ́ bʉ̂r nkul ɨ́ myɔ́ɔ́ míléme mbi ngwár waá nyá. Ɨ́ jɔʼ bé dí esia e myɔ́ɔ́ mítúú yɨ́, bɨ̌h ó dí ekɛm bé e nzɨ̌ menkɔ̌m bɨ́h bɨɛ bé á nyɛɛ sáŋɔɔ, mé á duho kwá mé Nzyɛ̌m má.

⁵Ebě, mpʉ bɨ́h dí ekabla mítúú mé Krîst yɨ́, jwɨʼ gwár yaá ntémé ó bɨ́h dí ebi ménkɔb ɨ́ nkul nyé dí egbâ bɨ́h ɨ́ miléme nyɨ́.

⁶Bɨ́h síá e mitúú nó, syɛ́ɛla yaá, yé e nyɔm ɨ́ páʼ wɨ́n, ebě, yé ógbâ bɨ́n nkul ɨ́ miléme, le esâ ó, bɨ̌n tíʼaa. Bɨ́h bí nkûl ɨ́ miléme nó, yé óbe ó lɨ́ esú ó, bɨ̌n díraa nyɔm e bɨ̌h ɨ́ yʉ́ʉ́ jɔʼ. Milémé mín, myé ódirǎ nyɔm e menkɔ̌m mɨ́h ó, ɨ́ jɔʼ bɨ́n bɨɛ ngá sia e mbi mítúú mímpwár myaá yɨ́. Myé ó bɨ́n ntémé á nyɛɛ bee bɨ̌h lɨ́ esia e myé mí.

⁷Bɨ̌h bé e mpûʼla ɨ́ miléme ɨ́ lɔ̌b wɨ́n; bɨ̌h bé apɨ́ŋla, ebě, bɨ̌h bé lɨ́ egʉ́a ó, jwɨʼ gwár e gwár e mpʉ bɨ́n dí ebi nkɔ̂b mitúú yɨ́, nó ntémé ó bɨ́n ngá bi étʉ́m mé Nzyɛ̌m yɨ́. Etʉ́m lé laá, lé ó nkul nyé ógbâ mɨ́ná gá ɨ́ miléme nyɨ́.

⁸Nó, bɨ́ɔɔ́ bɨ́h ɛ́, bɨ̌h kpɛl ó, bɨ̌n gʉ́ŋaa mitúú bɨ́h á sia e myé ɨ́ sí Azía mí. Bɨ̌h bé á si kʉ bu sia e mitúú. Myé á si gwa ntaa bɨ̌h ɨ́ nkul, tó pyâl ɨ́ jɔʼ mpûʼla nyɨ́h á gwa pʉʼa bɨ̌h ɨ́ miléme yɨ́. Mpûʼla nyaá á be ó, bɨ̌h bé óbáʼǎ tô dóló le etiʼe.

⁹Bɨ̌h bé á bee ó, go ó, bɨ̌h á ka dweŋɔɔ ó, mebě me jálá le eswie má. Yé á syɛ́ɛlɨ nó ó, bɨ̌h gwáʼaa ekǎ dyɛ̂ʼwo e bɨ̌h bʉr o tɨ̂ʼ lɨ́ esú ó, bɨ̌h dyɛ̂ʼwaa e Nzyɛ̌m, mʉr dí epɛh ódwe nyá.

¹⁰Nye ó mʉr á pɛʼ bɨ̌h lɨ́ eswie laá tʉ́ŋlʉ̌ nyá. Nye ntémé ó ngá báʼǎ dwih bɨ́h ɨ́ ka sóo. Yé ó nó: milémé míh, mí lóno ɨ́ mpûʼla ó, nye óbánǎ pɛʼ bɨ́h lɨ́ eswie ɨ́ yʉ́ʉ́ jɔʼ swîh,

¹¹ebě, bɨ̌n bé ósúʼo bɨ́h ɨ́ nzɨ̌ minjɨʼla mín. Nó Nzyɛ̌m ó ngá buú dweŋɔɔ nzyóo ɨ́ jɔʼ bʉ̂r ɨ́ buo buo, bé óbe, bé mû sí sâ nyé minjɨʼla ɨ́ lɔ̌b wɨ́h yɨ́.

¹²Sá bɨ́h dí enkʉ́na tɨ̂ʼ yɨ́, yé ó yɨ̂: kʉ̌ tyen dí tîtyěl, waá bɨ́h dí edû e milémé míh mímyɛ̂h ɨ́ míh mé Nzyɛ̌m wɨ́. Mipahlá mílémé míh, myé boʼlo ó, bɨ̌h bé e mbɨambɨa kʉ̌ tyen. Ɨ́ kʉ̌ tyen waá, bɨ̌h jaá sâ ó, njɨ bím mpâm mé Nzyɛ̌m dí ekpɛl ó, bɨ̌h sâʼ yɨ́. Kʉ̌ tyen ngwár waá ó bɨ́h á bu dû kwá nyɨ́n, le ɨ́ sí yɨ̂ʼ yɨ́yɛ̂h wɨ́. Wé abɔma e milɛ́ʼlá bʉ̂r ó sí yɨ̂ʼ dí edwe bʉ̂r mí.

¹³Bɨ̌h jaá cɛmá ó, njɨ bisá bɨ́n ngá láa, ntɔ̂ʼ kʉ́ gwá jóʼo mbɨ̂mbɨá bí. Mě bûʼlá ó, micɛmá myaá, myé ó sá bɨ́n ngá gʉ́a ɨ́ pébébé yɨ́.

¹⁴Bɨ̌n bɨ́ nyɛɛ́ gʉ́a bɨ́h pêh lɨ́ esú ó, bɨ̌n nkʉ́naa ɨ́ lɔ̌b wɨ́h ɨ́ móhó mé Tî Yésʉs. Bɨ̌h bɨɛ bé ónkʉ́na ɨ́ lɔ̌b wɨ́n ntémé ɨ́ móhó waá.

¹⁵Nó ó, me á tíʼe ɨ́ lémé wâm ɨ́ lɔ̌b búʼó yâm ó, me ónyɛɛ́ nze gʉ̂ʼ kwá nyɨ́n. Me á kpɛl esâ nó ó, bɨ̌n nkʉ̂ bi nkûl ɨ́ miléme nzɔʼ bá.

¹⁶Me á jwɨʼ ó, mě nyɛɛ́ pyâl ó, kwá nyɨ́n, nzě laa, tô ɨ́ sí Masedónia. Mpúla mé á gwa ka búlǎ sí Masedónia nyɨ́, nye ó mé á kpɛl ó, me báʼa tyɛ̂b kwá nyɨ́n yɨ́. Jɔʼ yaá ó bɨ́n á gwa súʼo me ɨ́ tyen yâm, ó me tôʼ sí Yʉ́da yɨ́. Sâ gwár, yé á bé abána nó.

¹⁷Ɨ́ jɔʼ mé á tíʼe ɨ́ lémé wâm, ntɔ̂ʼ kɛʼ ó, me ónze gʉ̂ʼ kwá nyɨ́n yɨ́, nzê nkɛ̌ʼ nyaá, nye á be ɨ́ dwɛ̂hwa ɛ̌? Nzê nye á duho ɨ́ pɨʼ bipúno ɛ̌? Nzê me á kɛʼ ó, le mesónó, le nkam ɛ́?

¹⁸Ɨ́ mekǎn bɨ́h á lɛ́ɛ bɨ̌n má, bɨ̌h á bé alɛ́ɛ bɨ́n «Eee!» ti e «Heʼé!» ɨ́ jɔʼ gwár. Nzyɛ̌m ó dí eboʼlo nó.

¹⁹Ebě, Yésʉs-Krîst, Mwân mé Nzyɛ̌m, nye ó waá bɨ́h á lɛ́ɛ lɔ́ɔ́ wé páʼ nyɨ́n nyá. (Náǎ, yé á be ó bɨ̌h e Silâs ti e Timotɛ̂.) Nzyɛ̌m á bé acâb ɨ́ jɔʼ nyé á lwib e mɨná gá yɨ́. Nye á bé alɛ́ɛ «Eee!» ti e «Heʼé!» ɨ́ jɔʼ gwár. Nye á jaa lɛ́ɛ ó, njɨ: «Eee!»

²⁰Ebě, menkɛ̌ʼ mɨ́mɛ̂h Nzyɛ̌m á kɛʼ má, mé jaá dira ó, njɨ ɨ́ nzɨ̌ mé Yésʉs. Sɨ́ǎ yaá ntémé ó mɨ́ná dí elɛ́ɛ gá ó «Amɛn!» yɨ́. (Nó yé lɛ́ʼlé ó: yé díʼee nó.) Mɨná dwé gá Nzyɛ̌m kûm ó tɨ̂, ɨ́ minjɨʼla myaá.

²¹Nó ó, Nzyɛ̌m mʉr tɨ̂ʼ ó dí etyɛ̂b mɨ́ná gá ɨ́ miléme, ó mɨná díʼee gá mekʉ̌ sí ɨ́ sɨ́ŋ ɨ́ mpúhlá gá nyɨ́ná e Krîst. Nye ó b'á lœm mɨná gá ntémé múlo.

²²Nye ntémé, nyɨ́ gbâ sitâm yé ɨ́ mɨná gâ. Nye á nyɛɛ ntɨh mɨná gá Sísǐm wé, dil wé ɨ́ milémé gá míná ó, mpʉ̌ jwɨʼ dí elɛ̂ʼlě mbɨambɨa metʉ́m nyé dí ekomo mɨ́ná gá má yɨ́.

²³Nó ó, mé dí ejébě Nzyɛ̌m, dí mboʼlo wǎm nyá ó: yé bé mě lɛ́ɛ́ ó bibɛr nó, nye dímlaa twiʼ yâm, ebě, sá yé á sâ ó, me ayɨ́ kǎ nze gʉ̂ʼ Kórɨnt yɨ́, yé á be ó gwɨ́má ébɛ̂ʼ bɨ́n túú.

²⁴Yé abe ó, bɨ̌h bé lɨ́ ejwɨ́ɨ bɨ́n ɨ́ lɔ̌b búʼó mɨ́ná dí gá e yé yɨ́. Bɨ̌h jaá kpɛl ó, njɨ ekɛm bɨ́n, ó bɨ̌n bíʼee bisʉhʉʉ ɨ́ miléme e nzɨ̌ nyɨ́h. Ebě, bɨ̌n tyɛ́b mekʉ̌ sí ɨ́ sɨ́ŋ, apɨ́ŋla ó, ɨ́ lɔ̌b búʼó yɨ́n.