Read Koonzime 2 Kórɨnt 10 Bible Online

2 Kórɨnt 10 - Koonzime bible

2 Kórɨnt 10

¹Nó ó, mɛm mʉr tɨ̂, Pɔ̂l, me lɨ́ ejɨʼla e bɨ̌n ɨ́ metala le mpam mé Krîst,... Mɛm, mʉr bɨ́n dí epǎ lɛ́ɛ ó: «Nye ɨ́ jɔr nyʉ̂l ɨ́ jɔʼ mɨ́ná gá le onɔ́ɔ́ dí gúmo gwár yɨ́», waá bɨ́n dí epǎ lɛ́ɛ ntémé ó: «Nyě e lémé ébɨ̌h e mɨná gá ɨ́ jɔʼ mɨ́ná gá le onɔ́ɔ́ dí e ncɛrá yɨ́» nyá.

²Mě jɨʼlá e bɨ̌n ó, mé ónze gʉ̂ʼ nó, bɨ̌n sá asâ ó, me lɛ̂ʼlaa bɨ̌n lémé ébɨ̌h wâm. Me ólɛ̂ʼle ébɨ̌h laá ó, bʉr o dí elɛ́ɛ ó, mě dúdú ó, kʉ̌ tyen bʉ̂r ó sí yɨ̂ʼ bá. Me ólɛ̂ʼle bɨ́ɛ mpʉ mé dí e nkul elwib ɨ́ kpɛŋlɛm, abáawo mʉ̂r yɨ́.

³Yê tyeetye ó, mɨná tiʼe gá ó, ɨ́ nyʉ̂l bipúno. Sâ gwár, dɔm mɨ́ná dí elwímla gá lɨ́, mɨná bé abe lɨ́ elwímla gá lé e nkul bipúno nyaá.

⁴Ebě, bisá bí dɔ̂m gá bíná, byé abe míkwɨmlá e nkul dí eduho ɨ́ bipúno nyɨ́. Nkul dí ɨ́ bisá bí dɔ̂m gá bíná nyɨ́, nyě duhó ó kwá mé Nzyɛ̌m. Nkul nyaá ó dí esâ ó, mɨná búʼaa gá mikóʼ mí dɔ̂m.

⁵Sá yɨ́yɛ̂h dí ebɨ̂r lʉ̂, kamle bʉ̂r lɨ́ egʉ́ǎ Nzyɛ̌m yɨ́, mɨná bé lɨ́ enkɛŋ gá yé sí. Mɨná lwímlá gá ó, mɨná dwírɨɨ gá sá yɨ́yɛ̂h bʉ̂r dí ejwɨʼ ɨ́ milémé myɔ́ɔ́ yɨ́, yé díʼee yaá dí esâ Krîst mejóʼo yɨ́.

⁶Ɨ́ jɔʼ bɨ́n óbe, bɨ̌n mû sí sâ Nzyɛ̌m mejóʼo e menzɨ̌ mɨ́mɛ̂h yɨ́, bɨ́h ókœb bʉ́ʉ́ bʉ̂r dína lɨ́ egbɔba e Nzyɛ̌m nó, bɨ̌h bé obe ó ɨ́ cǎr lɨ́ edwe bé bintɨ́ʼá.

⁷Gwá dwɛ̂ʼ gá bisâ bi dí enyɨ̂n ɨ́ mîh ɨ́ ponó bí. Mʉ̂r kʉ́ gwá gʉ́a ó, nye ó mʉr mé Krîst nó, nye gʉ́ŋaa ntémé ó, mɨná gá le onɔ́ɔ́ bɨ́bɛ̂h ó dí egúmo e Krîst ngwár waá.

⁸Tî Yésʉs á si dwe me nkul jwɨ́ɨ. Nye á dwe me nyǎ ó, me gbâʼ bɨ̌n nkul ɨ́ miléme, abe lɨ́ esú lé éndáma bɨ́n. Me óbɛ̌m nkʉ́na ɨ́ lɔ̌b nkûl jwɨ́ɨ nyǎm nyaá, me l'abi sôn.

⁹Mé akpɛl ó, bɨ̌n béyɨɨ ó, me lɨ́ ebɛ̂ŋ bɨ́n e nzɨ̌ mekaná mé dí ecɛma bɨ́n má.

¹⁰Ebě, bé lɨ́lɛ́ɛ́ ó: «Jɔ̌ʼ Pɔ̂l dí ecɛma bɨ́h mekaná yɨ́, nyě cɨcɛma ó, milɔ̌b mi dí ɨ́ kɔbla lɨ́ ejóʼo mí. Nyě cɛmá mɨ́ná gá ó e lémé ébɨ̌h. Tó kœb ó, ɨ́ jɔʼ nyé dí ɨ́ sɔ́má gá yɨ́ná yɨ́, nye ó mpʉ̌ tyɛʼbol; lwǐb yé ntémé, lwǐb épyéhɔɔ.»

¹¹Mě lɛ́ɛ́ e waá dí elwib nó nyá ó: «Ɨ́ jɔʼ bɨ́h dí lɨ́ ejaa, cɛma bɨ́n mekaná, dumo e sâ swîh, nkʉ̂ sâ kɛl yɨ́, jɔʼ bɨ́h ópyâl kwá nyɨ́n yɨ́, sâ gwár yaá ó bɨ́h ónyɛl ésâ ntémé yɨ́.»

¹²Yé díʼee abá kúnwo ɨ́ páʼ wâm ó, me lɛ́yɨɨ ó, bɨ̌h e bʉr o dí esêʼle bé bʉr o tɨ̂ʼ bá, bé ó mityé. Damá jóʼo nó, bʉr o dí esêʼle bé bʉr o tɨ̂ʼ ónɨ̌, bé abá be e pɨʼ, ebě, bé nʉǎ jwɨʼ ó e bé bʉr o tɨ̂ʼ lɨ́ esú lé égʉ́ǎ bím bé mû lɨ́ ejaa kʉ́ yɨ́.

¹³Ɨ́ wɨ́h pâʼ, bɨ̌h bé ánkʉ́na ɨ́ bɨ̌h bʉr o tɨ̂ʼ, ntaa sʉ́ŋa. Bɨ̌h bé ójaá nkʉ́na ó, njɨ ɨ́ lɔ̌b syɛ́ɛ́ Nzyɛ̌m á kab bɨ̌h yɨ́, abe ɨ́ bisâ biswîh. Juo bísyɛ́ɛ́ Nzyɛ̌m á lyáŋle bɨ̌h yɨ́, yé á bɨbe ó, táare wâ, tó kumo gʉ̂ʼ kwá nyɨ́n.

¹⁴Bɨ̌h bé antaa mínjɨ̌ Nzyɛ̌m á lyáŋle mí. Ntʉ bɨ́h á nyɛɛ to lɛ́ɛ lɔ́ɔ́ mé Krîst waá kwá nyɨ́n ɛ̌? Bɨ̌h ó bé á kʉ tô le etúnǒ Mbɨambɨa Lɔ́ɔ́ mé Krîst waá, kumo kwá nyɨ́n!

¹⁵Nó ó, bɨ̌h bé antaa mínjɨ̌ Nzyɛ̌m á lyáŋle mí. Bɨ̌h bé ankʉ́na ɨ́ syɛ́ɛ́ yé onkán. Sá dí tɨ̂ʼ yɨ́, yé ó: búʼó yɨ́n, yé ótô le egwɨ́e nó, bɨ̌h bé obi nkûl ebǔl syɛ́ɛ́ dí ɨ́ buǒ nyɔm yɨ́. Syɛ́ɛ́ yaá, yé óswîʼ njɨ ɨ́ minjɨ̌ Nzyɛ̌m á boo lyáŋle mí.

¹⁶Yé odib bɨ́h nzɨ̌ etô dóló le etutúnǒ Mbɨambɨa Lɔ́ɔ ɨ́ mesí me dí ɨ́ buú cɛra má. Bɨ̌h bé akpɛl énkʉ́na ɨ́ bɨ̌h bʉr o tɨ̂ʼ ɨ́ lɔ̌b syɛ́ɛ́ yé onkán.

¹⁷Ebě, yê cɛmá ó: Mʉr dí ekpɛ̌l lɔ̌b énkʉ́na nyá, nye ɨ́ jala le enkʉ́na ó, ɨ́ sá Dâ Nzyɛ̌m á sâ yɨ́!

¹⁸Ebě, ntʉ waá dí esêʼle nyé mʉr tɨ̂ʼ nyá, Dâ Nzyɛ̌m dí ekam. Nyě kǎm ó, waá nyé mʉr tɨ̂ dí epǎ sêʼle nyá.