Read Koonzime 2 Kórɨnt 11 Bible Online

2 Kórɨnt 11 - Koonzime bible

2 Kórɨnt 11

¹Á dǐ bee bɨ́n lɨ́ edûhwo ógʉ̌ wâm bá tîtííǎ ɛ̌! Sâ gwár, dúhwáá gá me lɨ́ ogʉ̌ waá.

²Ebě, me lɨ́ ebaʼ bɨ́n, mbɔʼ waá lɨ́ esyɛŋa e waá mé Nzyɛ̌m. Mbɔʼ waá, wé ó, ebě, sɔ́má yɨ́n, yé ó mpʉ̌ bíŋ éséhe mé á lîʼle kwá mé njʉ̂m wé yɨ́. Njʉ̂m waá, nye ó Krîst.

³Me lɨ́ ejóʼo bʉ́á. Mě kpɛ́ɛ́ ó, bɨ̌n ámû jaá kʉ́ŋɔɔ, ntɔ̂ʼ dwira e Krîst jɔʼ gwár ɨ́ dwirɨ̂, jwɨʼ gwár e gwár e mpʉ nyʉ́a á kʉ́a Éfa, nye ntɔ̂ʼ bil ɨ́ mikóo yɨ́. Bɨ̌n ámû jaá gwâʼ le edwě Krîst dúu ntinɨ̂ e ntinɨ̂.

⁴Bɨ̌n sá ó, kʉ́ bánǎ dûhwo ó, nyʉ́ʉ́ mʉ̂r ntáa nzě lɛ́ɛ bɨ́n lɔ́ɔ́ mé Yésʉs swîh, abě Yésʉs waá bɨ́h nyɨɛ dí etúno nyá. Bɨ̌n bé ɨ́ cǎr lɨ́ eníŋle gúú mbǐ sísǐm swîh ɨ́ menyʉ̂l mɨ́n, abě Sísǐm mé Nzyɛ̌m. Bɨ̌n ntémé bé ɨ́ cǎr lɨ́ ekam gúú lɔ́ɔ́ swîh, abě Mbɨambɨa Lɔ́ɔ bɨ́h nyɨɛ dí etúno wɨ́.

⁵Mbeá wâm, wé yɨ́ɛ ó wɨ̂: bʉr o dí epǎ nkʉ́na le elɛ́ɛ ó, bé ó dí bʉr o mílʉ́mlʉ́ ómpâ bá, sá bé dí e yé yɨ́, me ntémé, mě e yê.

⁶Yé bé mé abe mpáŋ lɔb nó, me yɨ́ɛ ó e ngwɨ́á bísɔ̂ʼ. Ɨ́ menzɨ̌ ménɨ̌ mɨ́mɛ̂h ó bɨ́h á lɛ̂ʼle bɨ̌n mbi bʉ̂r bɨ́h dí wɨ́, ɨ́ míh mɨ́n ɨ́ ponó.

⁷Me á si lɛ́ɛ bɨ̌n Mbɨambɨa Lɔ́ɔ́ mé Nzyɛ̌m, anʉa myɛ́na. Ɨ́ mpʉ mé á sâ nó yɨ́, me á si jɔr nyʉ̂l nyǎm, le ebɨ̂n bɨ́n kʉ́. Nzê syɛ́ɛla yaá, yé á be syóm mé á sâ wɨ́ ɛ́?

⁸Bʉr ó Mbɛ̌r-Nzyɛ̌m dí ɨ́ bigúmo biswîh bá, bé ó b'á jɨjána me. Me á si gbâ bé lɨ́ edyêb, lɨ́ eséǎ syɛ́ɛ́ lɨ́ esú lɨ́n.

⁹Ɨ́ jɔʼ mé á be kwá nyɨ́n ɨ́ sɔ́ɔlʉ̌ mɔnɨ́ yɨ́, me á bé agbâ nyʉ́ʉ́ mʉ̂r túú waá ɨ́ nyʉ̂l, ebě, bɨ́ɔɔ́ bâm bé á duhǒ sí Masedónia bá, bé á si nze me e mingúlá, lɨ́ edwe mé sá yɨ́yɛ̂h yé á sâ me sɔ́ɔlʉ yɨ́. Nó ó e menzɨ̌ mɨ́mɛ̂h, me á si baʼle me mʉr tɨ̂, agbâ bɨ́n túú ɨ́ nyʉ̂l. Me ótô dóló le ebaʼle mé mʉr tɨ̂ʼ nó.

¹⁰Mpʉ ótyeetye mé Krîst dí ɨ́ me yɨ́, mě lɛ́ɛ́ ó, me ótô le enkʉ́na ɨ́ sí Akayɨ̂ ɨ́ lɔ̌b kʉ̌ tyen waá. Abe e mʉr dí e nkul ekamle mé lɨ́ enkʉ́na ɨ́ lɔ̌b waá.

¹¹Me lɨ́ ebene énʉa bímɔnɨ́ bín ɨ́ yé? Nzê ebe mé dí akpɛl bɨ́n ɛ́? Nzyɛ̌m, nye lɨ́ egʉ́a ó, me lɨ́ ekpɛl bɨ́n!

¹²Syɛ́ɛla mé dí esâ bɨ́n yɨ̂, me ótô dóló le esâ yê, lɨ́ esú lé ékamle bʉ̂r o kpɛ́l épyâl kwá nyɨ́n e meswɨ̂ʼlʉ mɔ́ɔ́ bá. Bé gwɨ́m ó, bɨ̌h le onɔ́ɔ́, bé díʼee jwɨʼ gwár ɨ́ nkǒ páʼ sá bé dí enkʉ́na tɨ̂ʼ yɨ́.

¹³Ebě, mbi bʉ̂r waá, wé ɨ́ bébe. Bé ó bʉr o mílʉ́mlʉ́ o bíbɛr, osyɛ̂l o mésâ o míkóo. Bé lɨ́ edwir bé bʉr o tɨ̂ʼ bʉr o mílʉ́mlʉ́ mé Krîst.

¹⁴Nó ó, sâ yaá, yé abě sá ékâm, ebě, Sátan mʉr tɨ̂, nye lɨ́ eboó liliŋa éngeles mentyɛnwa.

¹⁵Nó, yé abě mpǎŋ sá ékâm ó, osyɛ̂l o mésá bé, bé nyɨ́nɨɨ ó, bé ó osyɛ̂l o mésâ o dí otîtyěl o bʉ̂r bá. Ndumló wɔ́ɔ́, wé ódû ó mpʉ bísyɛ́ɛla byɔ́ɔ́, byé á be yɨ́.

¹⁶Me lɨ́ ebáʼǎ lɛ́ɛ ó, mʉ̌r sá ajwɨʼ ó, me ó gʉʼlʉgʉ́! Bɨ́n páhlé mé ɨ́ mbi waá nó, nʉaa gá me bé mpʉ bɨ́n nʉ́nʉ́á bígʉʼlʉgʉ́ yɨ́. Nó yaá ó bɨ́n ódwe mé jɔʼ dí ó, me nkʉ́naa ɨ́ mɛm mʉr tɨ̂ʼ yɨ́!

¹⁷(Sá mé dí elɛ́ɛ yɨ̂, yé ó sá Tî Yésʉs dí akpɛl yɨ́. Ɨ́ jɔʼ mé dí enkʉ́na yɨ̂, mě lwǐb ó, mpʉ̌ gʉʼlʉgʉ́.

¹⁸Mě sá nó ó, ebě, bʉr ɨ́ buo buo, bé lɨ́ enkʉ́na ɨ́ bisyɛ́ɛla bípúnó byɔ́ɔ́. Me ntémé óbɛ̌m nkʉ́na ɨ́ me mʉr tɨ̂ʼ ntémé nó.)

¹⁹Ebě, bɨ̌n, mipɨpɨ́ʼ, bɨ̌n bé lɨ́ ekam édûhwo bígʉʼlʉgʉ́.

²⁰Bɨ̌n bé lɨ́ ebánǎ dûhwo mʉ̂r dí emɛ̂r bɨ́n lɨ́ okómó nyá. Bɨ̌n bé lɨ́ edûhwo ntémé mʉr dí ede bípúnó bín nyá, le waá dí esa bɨ́n nyá. Bɨ̌n bé lɨ́ edûhwo mélɛ́ɛ́-nyʉ̂l, le mʉr dí eŋmɛ̂h bɨ́n mempɛ̂h nyá.

²¹Yé lɨ́ esâ mé sôn lɨ́ ekam ó, etyɛʼ bé lwɨ́lwɨ́ɨ́ mé e lǎ lɨ́, lé ó b'á sâ ó, me ayɨ́ tû bɨ́n nó. Yé bé yé e nyʉ́ʉ́ mʉ̂r dí e nkul enkʉ́na ɨ́ lɔ̌b syɛ́ɛla yé e yʉ́ʉ́ nó, mɛm ntémé, me óbɛ̌m nkʉ́na ɨ́ mbi ngwár e ngwár waá. (Mě lwib náǎ ó, mpʉ̌ gʉʼlʉgʉ́.)

²²Nzê bɨ́ɛ bé ó bʉr o b'Ébrœ̂ ɛ̌? Me ntémé, me ó nye. Nzê bé ó bʉr o b'Ɨ́zraɛ̂l ɛ̌? Me ntémé, me ó nye. Nzê bé ó mpóʼo mé Abraham ɛ̌? Me ntémé, me ó mʉr tɨ̂.

²³Nzê bé ó osyɛ̂l o mésâ mé Krîst ɛ̌? (Mě kʉ́ lwib ó, mpʉ̌ gʉʼlʉgʉ́!) Mɛm ó b'á sahle. Ɨ́ páʼ bísyɛ́ɛ́, mɛm ó b'á sahle. Ɨ́ páʼ égbáŋɔɔ ɨ́ mbʉʼ, mɛm ó b'á sahle. Ɨ́ páʼ mébíʼé, yé abe e tólɔ́ɔ. Ɨ́ páʼ méswie, me á si jʉ́ŋɔɔ nzɔʼ nzɔʼ.

²⁴Nzɔʼ tɛ̂n, oYúden, bé á si ŋmɛ̂h me mingáhá mekám mélɛ̂l le ebǔ.

²⁵Bé á si kahle me mimbɨ́ŋ nzɔʼ lɛ̂l. Me á si lúmɔɔ mekóʼ jɔʼ gwár. Ɨ́ nzɔʼ lɛ̂l, me á si pam le eswie ɨ́ jɔʼ mɛ̂l, mé á bî ɨ́ medíbé yɨ́. Móhó ntinɨ̂ ndu e pum ntinɨ̂, me á si jáala lɨ́ obóʼó ó mâŋ kʉ́ e kʉ́.

²⁶Mɨ́ jaʼra e bityen nzɔʼ nzɔʼ. Me á duho ó sí, lɨ́ entaa méntíbé ménɨ́nɨ́ɨ́. Me á si pam le eswie ɨ́ mebó bínzilngǎn, le maá mé kúl yâm, le maá bíkúl bíswîh. Me á si gwa jʉ́ŋɔɔ ɨ́ binkana, le ɨ́ bilʉ̌n. Me á si jɨ́bla, gwá dwe ɨ́ mâŋ. Me á si pam le eswie ɨ́ mebó mé ókrǐsten o bíbɛr.

²⁷Me á si sia e túú bísyɛ́ɛ́, le mekɔbla. Me á si di doho nzɔʼ nzɔʼ. Me á si di ɨ́ nza ndu e dwéh médíbé. Me á si ti mede nzɔʼ nzɔʼ lɨ́ ejɨʼla e Nzyɛ̌m. Me á si jóʼo ejwóo, le edǐ suswáh.

²⁸Mé akǎ gúm láa byaá byúú bíɛ. Sá dí ekǎ kalwo tɨ̂ʼ kʉ́, yaá dí edihle mé sí, yé ó: dʉ́ó lɨ́lɛ̂h, me lɨ́ esyɛ̌l bá ɨ́ lɔ̌b bʉ̂r ó Mbɛ̌r-Nzyɛ̌m, ɨ́ bigúmó byɔ́ɔ́ bíbyɛ̂h.

²⁹Yé bé nyʉ́ʉ́ mʉ̂r, nye ɨ́ tyɛʼ nó, sɨ́ǎ yaá, yé lɨ́ etyeʼ mé nyʉ̂l. Bʉ̂r sí gbâ ébɔ̌ʼ ɨ́ nzɨ̌, nyʉ́ʉ́ mʉ̂r ntɔ̂ʼ bɨm lé nó, sɨ́ǎ yaá, yé lɨ́ ebuú kpaa mé ɨ́ léme.

³⁰Yé bé me ó lɨ́ bi ó, me nkʉ́naa nó, sá mé ónkʉ́na tɨ̂ʼ yɨ́, yé óbe ó etyɛʼ lâm.

³¹Waá dí Nzyɛ̌m mé Tî Yésʉs-Krîst, waá dí Sɔ́ŋ wé nyá, nye lɨ́ egʉ́a ó, mé alɛ́ɛ bíbɛr. Nye díʼee e kûm njʉ̌m dǐ e njʉ̌m dǐ.

³²Ɨ́ Damâs, ngóvina mé njwɨ́ɨbʉ̌r Arétas á be ɨ́ dible mébé mé Damâs ó, nyě mɛ́r ó me.

³³Nó mé á ntaa kóʼ nkana ó, ɨ́ wínɨ, sulɔɔ sí ɨ́ kwám tʉ́ŋlʉ̌, nzě sɔlwa bé ɨ́ mebô.