Read Koonzime 2 Kórɨnt 2 Bible Online

2 Kórɨnt 2 - Koonzime bible

2 Kórɨnt 2

¹Nó ó mé á tíʼe ɨ́ lémé wâm ó, me ákǎ báʼǎ tô kwá nyɨ́n. Me ámû jaá báʼǎ tó kwɨ́ɨ mébúʼ mɨ́n.

²Ebě, mé sí tó kwɨ́ɨ mébúʼ mɨ́n nó, nzé ngá kǎ báʼǎ dwe mé bisʉhʉʉ? Mʉr á gwa sâ ó, me sóhaa nyá, nye ó njɨ waá mé á kwɨ́ɨ ebúʼ lé nyá!

³Me á cɛma mekaná maá ó, mé ónze kwá nyɨ́n nó, me l'akǎ kpaa ébúʼ ɨ́ lɔ̌b bísyɛ́ɛla bín, bɨ̌n bʉr o jálá le egbâ mé bisʉhʉʉ ɨ́ léme bá. Me á bě e búʼó ɨ́ páʼ wɨ́n, bɨ̌n óbɛ̂h ó, ɨ́ jɔʼ bɨ́n óbe, sí láa yɨ́, mɨná bé obi gá bisʉhʉʉ jwɨʼ gwár.

⁴Yé ó nó! Me á cɛma bɨ̌n ó, lémé wâm, wé osí lóno lɨ́ ebúʼ, nyʉ̂l nyǎm, nyé osí buú tyɛʼ, e myɛ́ɛlé ɨ́ mîh. Me á bé acɛma bɨ́n mekaná maá lɨ́ esú ó, milémé mín lónaa lɨ́ ebúʼ. Me á jaa cɛma ó, njɨ lɨ́ elɛ̂ʼle bɨ́n kpɛ̌l ápurapúra mé dí e yé lɨ́ esú lɨ́n yɨ́.

⁵Mʉr á to sâ ó, bɨ̌n jóʼaa ebúʼ nyá, á bé asâ mé syɛ́ɛla yaá. Nye á sâ ó, bɨ̌n bɨɛ jóʼaa ebúʼ, bɨ̌n bɨ́bɛ̂h. Nkʉ̂ ntɔ̂ʼ, lɨ́ ebene éběʼ lɔ́ɔ, nye á sâ ó, bʉ́ʉ́ bʉ̂r ɨ́ sɔ́má yɨ́n jóʼaa ebúʼ.

⁶Bintɨ́ʼá bʉ̂r ɨ́ buo buo ɨ́ sɔ́má yɨ́n, bé á dwe mʉr waá bí, byé á si jala e bébebébe syɛ́ɛla nyé á sâ yɨ́.

⁷Nó ó, ɨ́ báánâ, yé mû ó jɔʼ dí ó, bɨ̌n pɛ́ʼɛɛ bibaa bí ébébe bɨ́n á láa nye bí yɨ́. Yé ó jɔʼ égbâ nyé pîm ɨ́ búʼó, ebě, nyʉ̂l, nye ámû jaá tyɛʼ nyê.

⁸Lɔ̌b waá ó mé dí ejɨʼla e bɨ̌n ó, bɨ̌n báʼa lɛ̂ʼle ó, bɨ̌n dína ó lɨ́ ekpɛl nyé yɨ́.

⁹Ɨ́ lɔ̌b waá ó mé á cɛma bɨ̌n mekaná maá yɨ́. Yé á be ó, me bóblaa bɨ̌n. Me á be lɨ́ ekpɛl égʉ́a ó, nkʉ̂ bɨ̌n dína ó lɨ́ esâ mé mejóʼo ɨ́ milɔ̌b mímyɛ̂h.

¹⁰Mʉr nyɨnyɛ̂h bɨ́n óbe, sí pɛʼ bíbaa bí ébébe byé nyá, bɨ̌n e gʉ́á ó, mɛm ntémé, mɨ́ pɛʼ nyé byaá mé á niʼe nye bí. Yé bé me á si niʼe nyʉ́ʉ́ mʉ̂r baa ébébe, me nzě pɛʼ nyé yǎ nó, lɛ́ɛ́, mě pɛ̌ʼ nyé yǎ ó, ɨ́ nyɔm wɨ́n, ɨ́ mpǒm mé Krîst.

¹¹Mɨná sá gá nó ó, Sátan nkʉ̂ be, antaa mɨ́ná gâ, ebě, mɨná bé ajéʼe gá mepɨʼ mé.

¹²Nó ɨ́ jɔʼ mé á to le etúnǒ Mbɨambɨa Lɔ́ɔ́ mé Krîst, tó kumǒ Troâs yɨ́, me á to kœb gʉ̂ʼ ó, Tî Yésʉs, nyé osí dwe mé nzɨ̌ mběʼ, ó me túnaa wé ɨ́ hwɨ́m.

¹³Damá jóʼǒ mpʉ mé á be e nkul dí ó, me lɛ́yɨɨ lɔ́ɔ́ wé waá nó yɨ́, lémé wâm, wé á bé abe mé ɨ́ mo ɨ́ puuu, ebě, me á bé akœb mɨ́ɔɔ́ wǎm Títos tɨ̂ʼ ɨ́ Troâs. Sá tɨ̂ʼ ó mé á ka nzoo jána e bé, me ntɔ̂ʼ duhǒ Troâs, tô sí Masedónia yɨ́.

¹⁴Mɨná dwêʼ gá Nzyɛ̌m nzyǒo. Nye ó dí esâ ó, mɨná gá e Krîst díʼee binkɔ́ɔ́ bi dí entaa ɨ́ jɔʼ yɨ́yɛ̂h bí. Nye ntémé ó dí esâ ó, mɨná dwêʼ gá bʉr milɛ́ʼlá mi dí esâ ó, bé gʉ́ŋaa nye mí. Nyě sá mɨ́ná gá nó ó, ɨ́ gúmó yɨ́yɛ̂h. Mɨná gá mû ó mpʉ̌ lɔbína dí epyêl mbɨambɨa numó yɨ́.

¹⁵Ebě, mɨná gá ó dí lɔbínǎ Krîst dí entɨh e mbɨambɨa numó yɨ́. Bʉ̂r o dí ebǐ twiʼ bá, bé jʉ́ʼrá mɨ́ná gá nó, njóʼá wɔ́ɔ́, wé ó: «Yé ó numó twiʼ.» Bʉr baá, bé otô dóló le etiʼe nó. Baá dí edîm bá bɨɛ, ɨ́ jɔʼ bé jʉ́ʼrá mɨ́ná gá yɨ́, bé ó: «Yé ó numó éswie.» Bɨ́haá bʉ̂r, bé otô dóló le edwě ntuʼ. Mɛm, mé abě tyé mʉ̂r dí ó, me séaa syɛ́ɛ́ yɨ̂. Nzé nyɨɛ dí ejala e yê?

¹⁷Nó ó, bɨ̌h bɨɛ, bé abě mpʉ óbɛ́ma o mílɔ̌b mé Nzyɛ̌m. Nzyɛ̌m á lómo bɨ̌h ó e lwǐb yé. Lwǐb yaá, yé abě mbáʼrá e mikóo. Bɨ̌h bɨɛ, bé ó baá Nzyɛ̌m á ntɨh bá. Bɨ̌h lwib mílɔ̌b myé ó, ɨ́ mpǒm mé Nzyɛ̌m, ɨ́ mpúhlá nyɨ́h e Krîst.