Read Koonzime 2 Kórɨnt 3 Bible Online

2 Kórɨnt 3 - Koonzime bible

2 Kórɨnt 3

¹Nzê bɨ̌h mû ó lɨ́ ebáʼǎ nyɛl ésêʼle bɨ́h bʉr o tɨ̂ʼ ɛ̌? Nzê bɨ̌h bɨɛ ó jálá le elɛ̂ʼle bɨ́n mekaná me dí elɛ́ɛ bɨ́n mbi bʉ̂r bɨ́h dí wɨ́ má ɛ́? Nzê bɨ̌n ó jálá le elɛ̂ʼle bɨ́h mekaná me dí elɛ́ɛ bɨ́h mbi bɨ́n dí wɨ́ má ɛ́? Yé abe mɨ́ná gá e nyɔm ó, mɨná sâʼ gá nó.

²Bɨ̌n bʉr o tɨ̂ʼ ó dí mekaná mɨ́h mé á cɛmɔɔ ɨ́ milémé míh tʉ́ŋlʉ̌ má. Mʉr nyɨnyɛ̂h óbɛ̌m láa le egʉ́a mékaná maá.

³Bɨ̌n lɛ́ʼlé ɨ́ kpɛŋlɛm ó, bɨ̌n bé ó mekaná Krîst á cɛma má. Mekaná maá, mé lɛ́ʼlé ntémé ó, syɛ́ɛ́ bɨ́h á sâ ɨ́ sɔ́má yɨ́n yɨ́. Bɨ̌n bé abe mékaná mé á cɛmɔɔ e medíbé mé lwâb má. Mbi mékaná bɨ́n dí wɨ́nɨ̌, wé ó mekaná mé á cɛmɔɔ e Sísǐm mé Nzyɛ̌m dí kublakúbla wɨ́ má. Mé á bé acɛmɔɔ lɨ́ otéble o mékóʼ tʉ́ŋlʉ̌. Mé á cɛmɔɔ ó, ɨ́ milémé mí bʉ̂r tʉ́ŋlʉ̌.

⁴Krîst á si gbâ bɨ̌h pîm ɨ́ búʼó. Nó ó bɨ́h dí ecɛma bɨ́n ɨ́ mpǒm mé Nzyɛ̌m yɨ́.

⁵Yé abá kúnwo e bɨ̌h ó, bɨ̌h lɛ́yɨɨ ó, bɨ̌h bé ó bʉr o jálá le eséǎ syɛ́ɛ́ yaá bá. Nkul dí ó, bɨ̌h séaa yé nyɨ́, nyé aduho ɨ́ bɨ̌h. Nyě duhó ó, njɨ kwá mé Nzyɛ̌m.

⁶Nye ó b'á dwe bɨ̌h nkul ó, bɨ̌h díʼee bʉr o jálá le eséa nyé syɛ́ɛ́ bá. Bɨ̌h mû ó osyɛ̂l o mésá bé, lɨ́ eníŋle bʉ̂r lɨ́ edwán é sáá. Nye á sâ saá nyaá ó e nzɨ̌ Sísǐm wé, abe e metié me dí micɛmá má. Ebě, metié mɨ́ɛ, mé jaá jʉ̂jʉ ó jʉ́ʼóo; Sísǐm mé Nzyɛ̌m wɨ́ɛ dwe bʉ̂r twǐʼ njʉ̌m dǐ e njʉ̌m dǐ.

⁷Ɨ́ jɔ̌ʼ Moyɨ̂z á tyêl bʉr metié mé á be mikpɛʼá ɨ́ mekóʼ má yɨ́, bé á jaa gbah mé ó, gbaháa, bé ntɔ̂ʼ dwe. Ɨ́ jɔʼ nyé á séa bé syɛ́ɛ́ yaá yɨ́, yé á be ó e kûm Bʉr o b'Ɨ́zraɛ̂l, bé á bé abe e nkul egwá dwɛ̂ʼ mpóm mé Moyɨ̂z ɨ́ tooobó, ɨ́ lɔ̌b méntyɛnwa mé á be ɨ́ mpǒm nyé má, damá jóʼǒ mpʉ méntyɛnwa maá, mé á to le edíme mé omér yɨ́.

⁸Syɛ́ɛ́ yé á ntɛŋ eswie ɨ́ bʉr yɨ́, yé pǎ nyɛɛ́ ntyɛnwa, á dwɛʼra e yaá Sísǐm mé Nzyɛ̌m mû lɨ́ eséa yɨ́! Syɛ́ɛ́ yé yaá, yé óbuú ntyɛnwa, laa yɨ́haá.

⁹Syɛ́ɛ́ Moyɨ̂z á séa ó, bʉr nkʉ̂ dweŋɔɔ mébě píe tɨ̂ʼ yɨ́, yé pǎ nyɛɛ́ ntyɛnwa, á dwɛʼra e yaá Nzyɛ̌m á séa ó, bʉr bíʼee nkam e tɨ̂ʼ yɨ́! Yé óbe ó, ɨ́ ntyɛ̌n ntî ntyɛ̌n, laa yɨ́haá.

¹⁰Mɨná bé óbɛ̌m lɛ́ɛ gá ó, mentyɛnwa mé á nyɛɛ be ɨ́ ntyɛ̌n ntî ntyɛ̌n ɨ́ jɔʼ mé Moyɨ̂z má, mé akǎ bě sɔ̂ʼ. Mentyɛnwa mû lɨ́ ekǎ nyɨ̂n ɨ́ syɛ́ɛ́ gá yɨ́ná ɨ́ báánâʼ má, mé lɨ́ entyɛnwa, laa yɨ́haá.

¹¹Sá yé á be e mentyɛnwa, mé á to le edíme mé omér má yɨ́, yé pǎ nyɛɛ́ dweŋɔɔ kûm, á dwɛʼra e yaá ngá dǐ njʉ̌m dǐ e njʉ̌m dǐ yɨ́! Yé ɨ́ jala le ebuú dweŋɔɔ kûm, laa yɨ́haá.

¹²Sâ yaá ó mílémé míh mû sí lóno ɨ́ mpûʼla yɨ́. Mpûʼla nyaá ó dí edwe bɨ́h nkul elwib ɨ́ hwɨ́m, adwáawǒ sɔ̂ʼ.

¹³Bɨ̌h bɨɛ, bé abě mpʉ mé Moyɨ̂z. Nye á si búblo kán mpʉ́ʉ ɨ́ mpǒm, lɨ́ ekamle bʉ̂r o b'Ɨ́zraɛ̂l ó, bé béyɨɨ mentyɛnwa me mpóm nyé, mé á to le edíme mé omér má.

¹⁴Tó kœb ó, ecwólwo lɔ́ɔ́, lé á be ó sí dwira édúrʉ́ʉ́. Pyâl ɨ́ dʉ́ó lɨ̂ʼ mûh, pɨʼ nyɔ́ɔ́, nye dína ó mbúblá e kán waá ɨ́ jɔʼ bé láá mékaná mé njʉ̌m sáá yɨ́. Kán mpʉ́ʉ waá, wé jaá pʉʼa mʉ̂r ɨ́ mpǒm ó, njɨ ɨ́ jɔʼ mʉ̂r waá púhlá e Krîst yɨ́.

¹⁵Jɔʼ yɨ́yɛ̂h bé láá ókálǎr Moyɨ̂z á cɛma bá yɨ́, kán waá dína ó, lɨ́ ebúblo pɨ̂ʼ nyɔ́ɔ́, nzě kumo ɨ́ dʉ́ó lɨ̂ʼ mûh.

¹⁶Tó kœb ó, jɔʼ mʉ̂r dwírá léme, dyɛ̂ʼwo e Dâ yɨ́, kán waá, wé lɨ́ epʉʼa.

¹⁷Nó ó, Dâ Nzyɛ̌m, nye ó sísǐm. Yé lɛ́ʼlé ó, gúmó Sísǐm mé Dâ dí yɨ́, okómó ntʉ́ʼ tɨ̂.

¹⁸Nó ó, kán mpʉ́ʉ waá, wɨ́ pʉʼa ɨ́ mpǒm gá nyɨ́ná. Sá tɨ̂ʼ ó mɨ́ná mû lɨ́ ekʉ́ bee gá kûm mé Tî Yésʉs ɨ́ sɔ́ɔ́ɔ́ yɨ́, mentyɛnwa me tɨ̂ʼ lɨ́ ekʉ́ pân ntémé, duho ɨ́ mɨná gâ. Mɨná mû ó lɨ́ edwirɔɔ gá lɨ́ esú ó, mɨná nkʉ̂ gʉ́a lɛ̂ʼle bʉ̂r kûm nyé. Dâ ó dí edwir mɨ́ná gá nó, nyɨɛ mʉr pǎ dí Sísǐm nyá.