Read Koonzime 2 Kórɨnt 6 Bible Online

2 Kórɨnt 6 - Koonzime bible

2 Kórɨnt 6

¹Ebě, Nzyɛ̌m lɛ́ɛ́ ó nɛ́ɛ: «Ɨ́ jɔʼ yé á jala yɨ́, me á si jóʼo go. Ɨ́ móhó mé á tiʼ bʉ́ʉ́ bʉ̂r wɨ́, me á si kɛm go ntémé.» Nó mpʉ bɨ́h dí esɨséǎ Nzyɛ̌m syɛ́ɛ́ gwár yaá yɨ́, bɨ̌h bé lɨ́ ejɨʼla e bɨ̌n ó, bɨ̌n ayɨ́ bi mpâm mé Nzyɛ̌m dwêh. Jɔ̌ʼ Nzyɛ̌m á kam ó, nye óyala mɨ́ná gá yɨ́ ó yɨ̂. Móhó nyé á tyêl lɨ́ esú lé étiʼ mɨ́ná gá wɨ́ ó wɨ̂.

³Bɨ̌h bé agbâ mébɔ̌ʼ ɨ́ nzɨ̌, lɨ́ ebene ó, mʉr ámû jaá twe. Nó ntémé ó bɨ́h ngá séǎ syɛ́ɛ́, mʉr adwe bɨ́h mebě tɨ̂ʼ yɨ́.

⁴Bɨ̌h lɛ́ʼlé e nzɨ̌ bisyɛ́ɛla bíh ó, bɨ̌h kʉ́ bě tyeetye ó osyɛ̂l o mésâ mé Nzyɛ̌m. Bɨ̌h sá nó ó e menzɨ̌ mâ: esâ sɨ́n damá jóʼo ɨ́ mitúú e mindɛ̌l tʉ́ŋlʉ̌, edûhwo édi ɨ́ bi bísyɛ́ɛ́,

⁵edûhwo ébíʼé, edûhwo mímbʉʼ, edûhwo bíntʉ̌, edûhwo mítútúú, edûhwo móho, edûhwo nzâ,

⁶edile e nyʉ̂l lɨ́h, ngwɨ́á wɨ́h, bíhwó nyɨ́h, mpam nyɨ́h, bisyɛ́ɛla bɨ́h dí esâ e nzɨ̌ Sísǐm mé Nzyɛ̌m bí, kpɛ̌l yɨ́h dí abě mbáʼrá e mikóo yɨ́,

⁷túnó bɨ́h dí etúno ótyeetye wɨ́, nkǔl nɨ́nɨ́ɨ́ mé Nzyɛ̌m, bisá bí mɔ̂m bɨ́h dí elwímla dɔ̂m lɨ́ esú lé ótîtyěl mé Nzyɛ̌m e tɨ̂ʼ bí, bîʼ le ejʉ̂m, byúú le emyɛ̌l,

⁸ɨ́ jɔʼ bé dí edwe bɨ́h kûm nkʉ̂ sâ bɨ́h pyêh yɨ́, ɨ́ jɔʼ bé dí eswêʼ míé mɨ́h nkʉ̂ gúmlo bɨ́h yɨ́, ɨ́ jɔʼ bé dí eláa ó, bɨ̌h bé ó bʉr o dí edímle bʉ̂r e nzɨ̌ mikóo, bɨ̌h bɨɛ yɨ́ɛ olɛ́a bé ótyeetye bá yɨ́,

⁹ɨ́ jɔʼ bé dí eláa bɨ́h ɨ́ sɔ́má bʉ̂r o dí agʉ́ŋɔɔ, bɨ̌h bɨɛ yɨ́ɛ bʉr o dí egʉ́ŋɔɔ bá yɨ́, ɨ́ jɔʼ bé dí eláa ó, bɨ̌h bé ó mimúu, bɨ̌h bɨɛ yɨ́ɛ bʉr o dí ɨ́ twiʼ bá yɨ́, ɨ́ jɔʼ bɨ́h dí edweŋɔɔ bíntɨ́ʼá, bɨ̌h bɨɛ yɨ́ɛ ajʉ́ŋɔɔ yɨ́,

¹⁰ɨ́ jɔʼ bé dí egbâ bɨ́h ebúʼ ɨ́ miléme, bɨ̌h bɨɛ yɨ́ɛ bʉr o dí esoho ɨ́ jɔʼ yɨ́yɛ̂h bá yɨ́, ɨ́ jɔʼ bɨ́h dí lɨ́ edyêb, bɨ̌h bɨɛ lɨ́ edwe bʉ̂r ɨ́ buo buo okúm le ogbaa yɨ́, ɨ́ jɔʼ bɨ́h dí abe e sɔ̂ʼ, bɨ̌h bɨɛ yɨ́ɛ e sá yɨ́yɛ̂h yɨ́.

¹¹Bɨ́ɔɔ́ bɨ́h! Okɛ́l bɨ́h! Bʉr ó Kórɨnt ɛ̌! Bɨ̌h bé á si lwib e bɨ̌n ɨ́ hwɨ́m, asǒl sɔ̂ʼ. Bɨ̌h bé lɨ́ ekpɛl bɨ́n ɨ́ buo buo.

¹²Bɨ̌h bé atɛ́ɛ bɨ́n. Bɨ̌n ó dí etɛ́ɛ bɨ́h ɨ́ milémé mín.

¹³Nó mě lwǐb e bɨ̌n ó mpʉ bwán bâm. Sáʼ gá me syɛ́ɛla dí ejala e kpɛ̌l yaá yɨ́. Kpɛlɨɨ gá me ntémé ɨ́ buo buo.

¹⁴Akǎ báʼǎ bâʼra gá e bʉr o dí adyɛ̂ʼwo e Nzyɛ̌m bá, ebě, wáǎ mbi mpúhlá tîtyěl mʉr, bé e bɨ́bla mʉ̂r dí tɨ̂ʼ nyɨ́? Ngɨ́ngéŋ le edúrʉ́ʉ́, byé e nkul epûhla nyá?

¹⁵Krîst, bé e Béelzébul, bé e nkul edi twíí wáǎ mbi? Nkʉ̂ ntɔ̂ʼ ó, wáǎ mbi nkɔ̂b mbûʼla dí e nkul ebi, bé e hááden jwɨʼ gwár nyɨ́?

¹⁶Nzê bʉr o dí eséa ɨ́ mpáh Nzyɛ̌m bá, bé e baá o dí etʉ̂to ɨ́ menzaá bíkpɛʼkpɛ̂ʼ bí ónzyɛ̌m bá, bé e nkul esʉ nkâm mpwár ɛ́? Ebě, menyʉ́l gá mɨ́ná, mé ó mpáh Nzyɛ̌m dí kublakúbla nyɨ́. Yé ó kwahaá mpʉ̌ Nzyɛ̌m mʉr tɨ̂ʼ á lɛ́ɛ yɨ́, ó: Me ódi ɨ́ sɔ́má yɔ́ɔ́, le etiʼe ɨ́ sɔ́má yɔ́ɔ́ tʉ́ŋlʉ̌. Me óbe ó Nzyɛ̌m wɔ́ɔ́. Bɨ́ɛ, bé óbe ó bʉr bâm.

¹⁷Dâ Nzyɛ̌m, nye lɨ́ elɛ́ɛ ntémé ó: «Duhaa gá ɨ́ sɔ́má yɔ́ɔ́. Bɔ́ʼáá gá e bê. Anyamlě kúna gá e sá dí e tilá yɨ́. Nó ó mé ónʉa bɨ́n e bisʉhʉʉ yɨ́.»

¹⁸Dâ, dí Nzyɛ̌m nkul nyɨnyɛ̂h nyá, nye lɨ́ ebáʼǎ lɛ́ɛ ó: Me óbe ó sɔ́ŋ wɨ́n; bɨ̌n bé óbe mé ó, bwân, bwá ó bʉbá le bwá ó bʉrʉ̂m.