Read Koonzime 2 Kórɨnt 7 Bible Online

2 Kórɨnt 7 - Koonzime bible

2 Kórɨnt 7

¹Nó, bɨ́ɔɔ́ o kpɛ̌l bâm ɛ̌! Mpʉ mɨ́ná gá dí e menkɛ̌ʼ ménɨ̌ yɨ́, mɨná púbaa gá mɨná bʉr o tɨ̂. Mɨná pɛ́ʼɛɛ gá bilœ̌ʼ bi dí ɨ́ mɨná gá ɨ́ menyʉ̂l ti e miléme bí. Mɨná kómlaa gá kʉ̌ tyen gá wɨ́ná, ó wé díʼee sá dí ti yɨ́, ɨ́ ndwááwá mɨ́ná dí edwáawo gá Nzyɛ̌m wɨ́.

²Sáŋáá gá nzɨ̌ ó, bɨ̌n kpɛ́lɨɨ bɨ̌h. Bɨ̌h bé á bé abyaʼ nyʉ́ʉ́ mʉ̂r. Bɨ̌h bé á bé alɛ̂ʼle nyʉ́ʉ́ mʉ̂r njwɨr ɨ́ bébe bébe. Bɨ̌h bé á bé adíbe mʉ̂r sɔ̂ʼ.

³Mé alɛ́ɛ nó, ó bɨ̌n bíʼee mebě, ebě, me sí boó lɛ́ɛ ó, bɨ̌h bé lɨ́ ekpɛl bɨ́n kpɛ̌l ápurapúra; damá be lɨ́ eswie, damá be ɨ́ twiʼ.

⁴Mpûʼla, nye ó me ɨ́ léme ɨ́ lɔ̌b wɨ́n. Bɨ̌h bé e nkul enkʉ́na ɨ́ buo buo ɨ́ lɔ̌b wɨ́n. Me mû ó lwɨ́ŋlá e nkul ɨ́ léme. Damá jóʼǒ mpʉ bɨ́h dídí ɨ́ bintɨ́ʼá tʉ́ŋlʉ̌ yɨ́, bisʉhʉʉ byâm, byé lɨ́ entaa sʉ́ŋa.

⁵Ebě, ɨ́ jɔʼ bɨ́h á pyâl ɨ́ sí Masedónia yɨ́, bɨ̌h á bé abi égbalá ɨ́ nkǒ páʼ bípúnó bíh. Bɨ̌h bé á si dûhwo mitúú ɨ́ mipáʼ mímyɛ̂h. Ɨ́ nkǒ páʼ ményʉ́l mɨ́h, bɨ̌h bé á bɔma ó e bitɔm; á dwií ɨ́ milémé míh tʉ́ŋlʉ̌ nɛ́ɛ: bɨ̌h bé á jóʼo ó bʉ́á.

⁶Tó kœb ó, Nzyɛ̌m, nye lɨ́ ekɛm bʉ̂r o dí ɨ́ twíaaa e metyɛʼ me nyʉ̂l bá. Nye á si gbâ bɨ̌h nkul ɨ́ miléme ɨ́ jɔ̌ʼ Títos á pyâl yɨ́.

⁷Abě njɨ lɨ́ epyál lé, lé omér. Nye á gbâ me nkul ɨ́ léme ntémé ó, lɨ́ elɛ́ɛ mé mpʉ nyé á nyɛɛ súʼɔɔ kwá nyɨ́n yɨ́. Me á ka bi nkul ɨ́ léme píe tɨ̂ʼ ntémé ó, ɨ́ jɔʼ nyé á lɛ́ɛ bɨ̌h bigwɨ́má mílémé mín yɨ́, le elɛ́ɛ̌ mpʉ bɨ́n á jɨ medwê ɨ́ lɔ̌b wâm, le mpʉ bɨ́n dí ekpɛl mé ɨ́ buo buo yɨ́. Lɔ́ɔ waá ó b'á bu gbâ me bisʉhʉʉ ɨ́ léme wɨ́.

⁸Damá be ó, mekaná mé á cɛma bɨ̌n má, mé á si to kwɨ́ɨ mebúʼ mɨ́n, mé ajʉbǎ sɔ̂ʼ tɨ̂. Yé bé, me á si nyɛɛ jʉba, dumo e mekaná maá nó, yé á be ó, ɨ́ jɔʼ mé á bee mpʉ mé á to kwɨ́ɨ mebúʼ mɨ́n ɨ́ mâ jɔʼ yɨ́.

⁹Nó ó, me lɨ́ esoho mékaná maá ɨ́ báánâ. Mé asoho mé ebe mé á sâ ó, bɨ̌n jóʼaa mebúʼ, bɨ̌n ntɔ̂ʼ jʉba ɨ́ lɔ̌b bísyɛ́ɛla bín. Mě soho ó, ebě, ɨ́ jɔʼ bɨ́n á jóʼo mebúʼ maá, ntɔ̂ʼ jʉba yɨ́, mé á si dib bɨ̌n nzɨ̌ edwira míléme. Tó kœb ó, syɛ́ɛla yaá, yé á duho bɨ̌n ó kwá mé Nzyɛ̌m. Nó yaá ó bɨ́n á be adímle sɔ̂ʼ ɨ́ lɔ̌b syɛ́ɛla yɨ́h e yʉ́ʉ́ yɨ́.

¹⁰Ebě, mebúʼ Nzyɛ̌m dí egbâ mɨ́ná gá ɨ́ miléme má, mé sɨ́sá ó, mʉr túmaa koo le mebébe mé, ndu e l'edwirǎ léme. Ndwirá míléme waá sɨ́sá ó, mɨná bíʼee gá twǐʼ njʉ̌m dǐ. Mʉr á gbáŋɔɔ ebúʼ laá ɨ́ léme nyá, nyé abe lɨ́ ejʉba ébúʼ nyé á pa jóʼo lɨ́, píe tɨ̂. Tó kœb ó, jɔʼ bʉ̂r ó sí yɨ̂ʼ gbɨ́gbá mʉ̂r ebúʼ ɨ́ léme yɨ́, lé jaá jʉ̂ nyɨ́haá ó, jʉ̂ jʉ́ʼóo.

¹¹Jwɛ́ʼɛ́ɛ́ gá sɔ̂ʼ njɨ sá Nzyɛ̌m á gbâ bɨ̌n ɨ́ miléme yɨ́. Ebúʼ e dí esâ ó, mʉr jʉ́baa, duho ɨ́ bisyɛ́ɛla byé lɨ́, lé á be ɨ́ sâ ó: bɨ̌n díʼee e léme ngwár ɨ́ báná báná ó, bɨ̌n sâʼ embɨa, bɨ̌n sáŋaa nzɨ̌ dí ó, me tɨ́ʼee bibaa bí ébébe mé á niʼe bɨ̌n bí, bɨ̌n bíʼee túú le bʉ́á ɨ́ miléme, bɨ̌n bíʼee mimpaŋ bígwɨ́má, bɨ̌n díʼee e sɨ́n ɨ́ miléme, bɨ̌n dwêʼ nye bintɨ́ʼá ɨ́ lɔ̌b wé. Ɨ́ menzɨ̌ maá mɨ́mɛ̂h, bɨ̌n bé á lɛ̂ʼle ó, bɨ̌n bé á be ó otîtyěl, abe e mebě ɨ́ lɔ̌b waá.

¹²Mekaná maá, mé á bé acɛmɔɔ, ɨ́ lɔ̌b mʉ̂r á byaʼ nyá, nkʉ̂ ɨ́ lɔ̌b waá á byaʼɔɔ ɨ́ lɔ̌b waá nyá. Me á cɛma bɨ̌n mekaná maá ó, yé nkʉ̂ gʉ́a nyɨ̂n mpʉ bɨ́n dí ekpɛl bɨ́h ɨ́ buo buo yɨ́. Bɨ̌n bʉr o tɨ̂, dwɛ́ʼɛ́ɛ́ gá mpʉ bɨ́n dí yɨ́, ɨ́ míh mé Nzyɛ̌m.

¹³Sá tɨ̂ʼ ó mílémé míh mû sí sula sí yɨ́. Bɨ̌h damá soho ɨ́ lɔ̌b nkûl bɨ́h dí e né ɨ́ miléme nyɨ́, sá dí ebuú gbâ bɨ́h bisʉhʉʉ ɨ́ miléme yɨ́, yé ó bisʉhʉʉ mé Títos, ebě, lémé wé, wé á be ó, wé mû sí lóno ɨ́ bisʉhʉʉ ɨ́ lɔ̌b wɨ́n, bɨ̌n bɨ́bɛ̂h.

¹⁴Yê tyeetye ó, me á si nkʉ́na ɨ́ lɔ̌b wɨ́n. Sâ gwár, me á bé asɔ́ma, ɨ́ lɔ̌b bísyɛ́ɛla bín. Mpʉ bɨ́h á lwib lɨ́ otyeetye ɨ́ jɔʼ yɨ́yɛ̂h yɨ́, Títos á ka bee píe tɨ̂ʼ ó, mbi bɨ́h á be lɨ́ enkʉ́na ɨ́ lɔ̌b wɨ́n wɨ́, wé á be ntémé ó tyeetye.

¹⁵Nye lɨ́ ebuú kpɛl bɨ́n ɨ́ jɔʼ nyé dí esímsa méjóʼo mɨ́n, bɨ̌n óbɛ̂h yɨ́, le ɨ́ jɔʼ nyé símsá mpʉ bɨ́n á nʉa nye e bʉ́á le osâʼsâʼ yɨ́.

¹⁶Me mû kǎ buú soho ó, bɨ̌n bɨɛ, ebě, bɨ̌n bɨ́ sâ ó, me bûʼlaa bɨ̌n ɨ́ milɔ̌b mímyɛ̂h.