Read Koonzime 2 Kórɨnt 8 Bible Online

2 Kórɨnt 8 - Koonzime bible

2 Kórɨnt 8

¹Bɨ́ɔɔ́ bɨ́h le okɛ́l bɨ́h, bɨ̌h bé lɨ́ ekpɛl ó, bɨ̌n gʉ́ŋaa lɔ̌b wɨ̂: Nzyɛ̌m á si kʉ sʉ metyɛʼ me mpóm mé ɨ́ bʉr ó Mbɛ̌r-Nzyɛ̌m dí ɨ́ sí Masedónia bá.

²Bé á si kʉ bóblɔɔ e nzɨ̌ mitúú bé á sia e myé mí. Damá be ɨ́ nyɨna le entéʼe lɔ́ɔ́, bisʉhʉʉ byɔ́ɔ́, byé á si kʉ nyɨ̂n ɨ́ ponó e nzɨ̌ mingúlá myɔ́ɔ́.

³Me ó dí mboʼlo wɔ́ɔ́. Mě lɛ́ɛ́ bɨ́n ó: bé á si bu gbâ, dû mpʉ nkûl mebi nyɔ́ɔ́ á be yɨ́. Bé á si kʉ gbâ, laǎ bím nkûl mebi nyɔ́ɔ́ á be yɨ́. Bé bʉr o tɨ̂, bé á tíʼe ɨ́ milémé myɔ́ɔ́ ó,

⁴bé jɨ̂ʼlaa e bɨ̌h e nkul ó, bɨ̌h nʉ́aa mingúlá myɔ́ɔ́, lɨ́ esúʼo bʉ̂r o mé Nzyɛ̌m o dí ɨ́ sí Yʉ́da bá. Nó ntémé ó bé á kpɛl esyɛŋa e mɨná gá ɨ́ mpúhlá miléme yɨ́.

⁵Bé á sâ syɛ́ɛlǎ nɨ̌ ó, laǎ mpʉ bɨ́h á gwa bûʼla ó, bé e nkul esâ yɨ́. Sá ésôʼ bé á sâ yɨ́, yé á be ó, etímle bé bʉr o tɨ̂ʼ ɨ́ mebó mé Tî Yésʉs. Píe tɨ̂ʼ ó bé á ka tímle bé bʉr o tɨ̂ʼ bɨ̌h, lɨ́ esú lé édû mítíʼá mé Nzyɛ̌m yɨ́.

⁶Sá tɨ̂ʼ ó bɨ́h á jɨʼla e Títos ó, nye tôʼ gʉ̂ʼ kwá nyɨ́n, le elóŋlǒ syɛ́ɛ́ nyé á pa nyɛɛ séa yɨ́. Syɛ́ɛ́ yaá, yé ó syɛ́ɛ́ ésîl ésyɛŋ míngúlá mín.

⁷Bɨ̌n bé ó okúmá ó bʉ̂r ɨ́ míh mé Nzyɛ̌m, laa bʉ́ʉ́ bʉ̂r. Bɨ̌n buú laa bʉ́ʉ́ bʉ̂r ó: ɨ́ mpwaʼ búʼó yɨ́n, ɨ́ lɛ́á bɨ́n bé lɨ́ elɛ́ɛ̌ lɔ́ɔ́ mé Nzyɛ̌m wɨ́, ɨ́ ngwɨ́á ótyeetye wɨ́n, ɨ́ bím bɨ́n dí egbâ ményʉ́l mɨ́n ɨ́ syɛ́ɛ́ mé Nzyɛ̌m yɨ́, le ɨ́ bím bɨ́n dí ekpɛl bɨ́h yɨ́. Mpʉ yé dí nó yɨ́, sɨ́sáʼ gá mbɨambɨa syɛ́ɛ́ yaá e milémé mín mímyɛ̂h, ntémé ntaa bʉ́ʉ́ bʉ̂r.

⁸Sá mé múo nzě lɛ́ɛ bɨ́n nɨ̌, yé abe bɨ́n bi ó, bɨ̌n sâʼ yê. Mě jaá kpɛl ó, njɨ elɛ̂ʼlě mpʉ̌ kpɛ̌l yɨ́n dí yaá mpâ yɨ́. Mě jwɨʼ yé ó e yaá bʉ́ʉ́ bʉ̂r, bé á be ɨ́ báná báná ó, bé lɛ̂ʼlaa Nzyɛ̌m yɨ́.

⁹Ebě, bɨ̌n bé lɨ́ egʉ́ǎ mpʉ Tî gá wɨ́ná, Yésʉs-Krîst á cwɨ́a e mɨná gá yɨ́. Nye á boo be ó kúmá. Nye nzě líʼe ókúm le ogbaa wé, nzě dwir nyé mʉr tɨ̂ʼ ántéʼenteʼe mʉr, ó bɨ̌n káa lîʼ le okúm le ogbaa waá e nzɨ̌ entéʼe lé.

¹⁰Mě lɛ́ɛ́ bɨ́n ɨ́ báánâʼ ó, sá mé dí ebee ó, yé óbuú be bɨ́n e nyɔm yɨ́. Ɨ́ mbú píhe, bɨ̌n ó b'á be bʉr o bé ésôʼ bé á tíʼe ɨ́ miléme ó, bé ósyɛ̌ŋ mɔnɨ́ yaá bá. Bɨ̌n ó b'á be bʉr o bé ésôʼ ntémé bé á táare nzyɛ̌ŋ bá.

¹¹Nó ó, ɨ́ báánâ, yé mbɨa ó, bɨ̌n swâhlaa syɛ́ɛ́ yaá. Menzyɛ̌ŋ, mé síaa mpʉ bɨ́n á nyɛɛ gwɨ̂m ó, bɨ̌n syɛŋ ó, syɛŋɨ́ɨ yɨ́. Syɛŋɨɨ gá bimɔnɨ́, dû mébi mɨ́n.

¹²Ebě, bɨ́n dwé mʉ̂r yʉ́ʉ́ sɔ̂ʼ e bisʉhʉʉ nó, Nzyɛ̌m ókǎm ndwéá waá, jwɨʼ e mebi bɨ́n dí e tɨ̂ʼ má. Nye ájwɨʼ wé e sá bɨ́n dí abe e yé yɨ́.

¹³Yé abe lɨ́ esú ó, bɨ̌n díʼee ɨ́ sɔ́ɔlʉ, bʉ́ʉ́ bʉ̂r bɨ́ɛ di ɨ́ twíha, duho ɨ́ syɛ́ɛ́ yɨ́n. Heʼé! Yé abe nó. Mě kpɛl ó, bʉr bíʼee bisâ mebím.

¹⁴Jɔʼ yɨ̂ʼ ó bɨ́n mû ɨ́ twíha. Yé mbɨa ó, bɨ̌n súʼaa bʉr o dí abe e tɨ̂ʼ bá. Bɨ́n bɨɛ óbe, akǎ be e tɨ̂, bɨ́ɛ e tɨ̂ʼ ɨ́ buo buo nó, bɨ́ɛ ntémé, bé ósúʼo bɨ́n. Jɔʼ yaá ó bɨ́n le onɔ́ɔ́, bé óbe ó e bisâ mebím yɨ́.

¹⁵Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Ɨ́ sɔ́má bʉ̂r o b'á to tœ̂ʼ mân bá, baá bé á bu tœ̂ʼ bá, bé á bé abe e mân ɨ́ buo buo ɨ́ jɔʼ bé á de yɨ́. Bʉr o b'á tœ̂ʼ bá tîtííǎ bá, bé á bé abe e mân, abuo.

¹⁶Nzyǒo e Nzyɛ̌m ɨ́ lɔ̌b syɛ́ɛla yé! Nye á si tyɛ̂b Títos ɨ́ léme ó, léme díʼee nye ɨ́ báná báná ó, nyě kɛ̌m ó bɨ̌n. Bɨ̌h e né, bé ó jwɨʼ gwár ɨ́ pâʼ waá.

¹⁷Títos á si kam mpʉ bɨ́h á jɨʼla e né ó, nye tôʼ bee bɨ́n yɨ́. Sâ gwár, nye á bé atô ɨ́ lɔ̌b lʉ́mlʉ́ wɨ́h wé omér. Nye á boo bě e léme ɨ́ báná báná ó, nyě tó ó gʉ̂ʼ kwá nyɨ́n, duho ɨ́ mitíʼá mí lémé wé.

¹⁸Bɨ̌h lómló bɨ́n nyǎ ó, bé e nyʉ́ʉ́ mʉ̂r. Bʉr ó Mbɛ̌r-Nzyɛ̌m bɨ́bɛ̂h, bé lɨ́ esêʼle nyê, ebě, nye lɨ́ elɛ́ɛ bʉ̂r Mbɨambɨa Lɔ́ɔ.

¹⁹Yé abě njɨ nó. Bé á pɛ̂h nye ntémé ó, nye níʼee ɨ́ sɔ́má tyen yɨ́h, ó bɨ̌h e boo nɔ́ɔ́ séaa syɛ́ɛ́ ɨ́ nzyɛ̌ŋ bimɔnɨ́ nyaá. Syɛ́ɛ́ yaá, yé ódwe Tî gá wɨ́ná kûm, le elɛ̂ʼlě gwɨ́má ésúʼo bʉ́ʉ́ bʉ̂r.

²⁰Mɔnɨ́ yaá, yé ɨ́ buo. Nó ó, bɨ̌h bi yé ó le ocwóó, ebě, nyʉ́ʉ́ mʉ̂r ámû jaá ntuhlo bɨ́h, lɨ́ elɛ́ɛ ó, bɨ̌h bé lɨ́ ejéʼe ébi bímɔnɨ́ byaá.

²¹Bɨ̌h bé lɨ́ egwɨ̂m ésâ sá dí ɨ́ mbɨa yɨ́. Abě njɨ ɨ́ míh mé Tî Yésʉs mé omér, ɨ́ maá me bʉ̂r ntémé.

²²Mʉr lɛ̂l bɨ́h ngá lómlo bɨ́n nyá, nye ó waá bɨ́h dí ebee ó, nye ó mʉr dí e nyɔm nyá, ebě, nyɨ́ ntaa mébʉ́blá mbɨ̂mbɨá, le egbâ nyʉ̂l ɨ́ dwííí bijɔʼ bíbyɛ̂h ɨ́ milɔ̌b mé Nzyɛ̌m. Nó ó, nyɨ́ kǎ buú gbâ nkûl ɨ́ yɨ̂ʼ jɔʼ, ebě, nyě e búʼó ɨ́ mipáʼ mímyɛ̂h ɨ́ milɔ̌b mi dí edwɛ̂ʼ bɨ́n mí.

²³Ɨ́ páʼ mé Títos, nye ó mʉr njoo yâm bɨ́h e nɔ́ɔ́ dí eboó séǎ syɛ́ɛ́ nyá. Ɨ́ páʼ bʉ́ʉ́ bʉ̂r obá o bé e boo nɔ́ɔ́ dí enze gʉ̂ʼ bá, bʉr ó Mbɛ̌r-Nzyɛ̌m ó dí elómlo bɨ́n bǎ. Jɔʼ bʉ̂r dí ebeě syɛ́ɛ́ yɔ́ɔ́ yɨ́, bé lɨ́ egúmlǒ Yésʉs-Krîst tɨ̂.

²⁴Nó ɨ́ jɔʼ bé ópyâl kwá nyɨ́n yɨ́, lɛ́ʼláá gá bʉr baá bijwɨʼ ngá lɛ̂ʼle bé ó, bɨ̌n bé lɨ́ ekpɛl bé bí. Bʉr ó Mbɛ̌r-Nzyɛ̌m, bé ójʉ̂ʼra ntémé kpɛ̌l yɨ́n yaá. Bʉr o ngá lómlɔɔ bɨ́n bá, bé okam ó, bilwǐb bɨ́h á lwib lɨ́ enkʉ́na e bɨ̌n bí, byé á be ó otyeetye.