Read Koonzime 2 Kórɨnt 9 Bible Online

2 Kórɨnt 9 - Koonzime bible

2 Kórɨnt 9

¹Yé apʉgʉ́ be bɨ́n e mâ nyɔm ó, me báʼa cɛma ɨ́ lɔ̌b míngúlá mɨ́ná jálá le etô bʉ̂r o mé Nzyɛ̌m o dí ɨ́ sí Yʉ́da bá e myé mí.

²Ebě, me lɨ́ eboó gʉ́a ó, miléme, myê bɨ̌n ɨ́ báná báná ó, bɨ̌n súʼaa bê. Me lɨ́ enkʉ́na ɨ́ lɔ̌b wɨ́n ɨ́ míh mé bʉ̂r ó Masedónia. Mě lɨ́lɛ́ɛ́ bé ó: «Bʉr ó Mbɛ̌r-Nzyɛ̌m dí ɨ́ sí Akayɨ̂ bá, bé á boo táare mɔ́ɔ́ ménzyɛ̌ŋ ó ɨ́ mbú píhe.» Jɔʼ mé dí elwib e bé nó yɨ́, bʉr ɨ́ buo buo, bé lɨ́ esâ sɨ́n lɨ́ esúʼo bé ntémé.

³Nó mɨ́ lómo bʉ́ʉ́ bɨ́ɔɔ́ gá bɨ́ná kwá nyɨ́n. Mě sá nó ó, bilwǐb mé á lwilwib ɨ́ jɔʼ mé á nkʉ́na ɨ́ lɔ̌b wɨ́n bí, byé ayɨ́ kǎ nyɨ̂n ó, byé abe ótyeetye. Mě kpɛl ó, bɨ̌n díʼee minkʉmsá mpʉ mé á lɛ́ɛ bʉr ó, bɨ̌n mû ó minkʉmsá yɨ́.

⁴Yé ajala le ebe ó, jɔʼ bɨ́h e bʉr ó Masedónia bé ópyâl kwá nyɨ́n yɨ́, bɨ̌h kœ́bɨɨ bɨ̌n lɨ́ elûhwa. Bɨ̌h bé ámû jaá sɔ́ma ɨ́ míh mɔ́ɔ́. (Mé agúm lɛ́ɛ bɨ́n bɨɛ.) Bɨ̌h bé ámû nkɛ́ɛ sôn, ebě, bɨ̌h bé á si bûʼla bɨ̌n ɨ́ nkǒ páʼ jwɨʼ yɨ́n yaá.

⁵Nó, me á be ó lɨ́ bi ó, me lɛ́yɨɨ bʉ́ʉ́ bɨ́ɔɔ́ gá bɨ́ná ó, bé sámlaa, tô gʉ̂ʼ kwá nyɨ́n. Mě kpɛl ó, bɨ̌n bâʼlaa nkɛ̌ʼ bɨ́n á nyɛɛ dwe nyɨ́, ó bɨ̌n bé ósâ míndwéá mí mɔnɨ́. Bimɔnɨ́ byaá, byé díʼee komá lɨ́ ekʉ̌m. Sâ yaá, yé ólɛ̂ʼle ɨ́ jɔʼ yaá ó, bɨ̌n gbá míndwéá myaá ó, ɨ́ mpyaʼá, abe ɨ́ tíná bʉ̂r o bígwɨ́má.

⁶Gwá símsa gá sɨ̂: mʉr dí ebe mémpeʼ abuo nyá, nye ntémé ókpɛm ó, bwá méde abuo. Mʉr dí ebe mémpeʼ ɨ́ buo buo nyá, nyɨɛ ó ngá kpɛm méde ɨ́ buo buo.

⁷Yé jala ó, mʉr nyɨnyɛ̂h dwêʼ Nzyɛ̌m mindwéá, dû mpʉ nyé á pa tíʼe ɨ́ lémé wé yɨ́. Ayɨ́ dwe gá nye myǎ e miléme mi dí ejʉba mí, nkʉ̂ ɨ́ lɔ̌b tíná. Dwéʼ gá ɨ́ mpyaʼá, ebě, Nzyɛ̌m bee mbɨ̂mbɨá ó, mʉr dí edwe ɨ́ mpyaʼá nyá.

⁸Nzyɛ̌m, nyě e nkul esʉ bɨ́n metyɛʼ me mpóm mimbi mímyɛ̂h ó, bɨ̌n bíʼee ɨ́ jɔʼ yɨ́yɛ̂h sá yɨ́yɛ̂h dí bɨ̌n ɨ́ sɔ́ɔlʉ yɨ́. Nó ó bɨ́n ngá be ɨ́ tɨʼlɨ lɨ́ esú ó, bɨ̌n nʉ́aa nkɔb ɨ́ bisyɛ́ɛ́ bí émbɨa mimbi mímyɛ̂h yɨ́.

⁹Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Nye á si dwe baántéʼenteʼe o bʉ̂r bisɔ̂ʼ ɨ́ mpyaʼá. Otîtyěl nyé dí e wé wɨ́, wé ódi ó njʉ̌m dǐ e njʉ̌m dǐ. p

¹⁰Nzyɛ̌m ó dí edwe bʉ̂r mempeʼ me dí ebeŋɔɔ má. Nye ntémé ó dí ekab bʉ̂r mede bé ódɨde má. Nye ódwe bɨ́n mempeʼ ɨ́ mpyaʼá, sâ ntémé ó, mé búaa. Nye ósâ ó, bʉr ɨ́ buo buo, bé díraa nyɔm e bisyɛ́ɛ́ bɨ́n dí eséa lɨ́ otîtyěl bí.

¹¹Jɔʼ yaá ó bɨ́n ódi ókúmá ɨ́ menzɨ̌ mɨ́mɛ̂h, lɨ́ esú ó, bɨ̌n díʼee odwɛ́na lɨ́ esú é bʉ́ʉ́ bʉ̂r yɨ́, ɨ́ mbi dí ó, bʉr ɨ́ buo buo, bé dwêʼ Nzyɛ̌m nzyǒo, duho ɨ́ mindwéá mín, bɨ́h ngá tó kala bé mí.

¹²Ebě, ɨ́ jɔʼ bɨ́n séá bé syɛ́ɛ́ yaá yɨ́, yé abě njɨ lɨ́ esú ó, bɨ̌n súʼaa baántéʼenteʼe o bʉ̂r o mé Nzyɛ̌m. Heʼé, yé ósâ ntémé ó, bʉr ɨ́ buo buo dwêʼ Nzyɛ̌m nzyǒo.

¹³Syɛ́ɛ́ bɨ́n ngá séa yɨ́, yé ólɛ̂ʼle bʉ̂r ó, bɨ̌n bɨ́ sul bɨ́n bʉr o tɨ̂ʼ sí, sâ méjóʼo, táare ɨ́ jɔʼ bɨ́n á kam Mbɨambɨa Lɔ́ɔ́ mé Krîst yɨ́, kumo mûh. Bʉr, bé ódwě Nzyɛ̌m kûm tɨ̂. Bé ódwe nyé kûm ntémé ó, ɨ́ jɔʼ bé óbeě mpʉ bɨ́n ngá súʼo bé e mingúlá mín, kala e bʉr bɨ́bɛ̂h yɨ́.

¹⁴Bé óbee bɨ́n lɨ́ esâ nó wá, bé óbuú kpɛl bɨ́n, le ejɨʼla e Nzyɛ̌m lɨ́ esú lɨ́n ɨ́ buo buo. Bé ósâ nó ó, ɨ́ lɔ̌b mpâm nyé á bu sâ bɨ̌n nyɨ́.

¹⁵Mɨná dwêʼ gá Nzyɛ̌m nzyǒo ɨ́ lɔ̌b étʉ́m nyé á lómlo mɨná gá lɨ́. Membɨa me dí tɨ̂ʼ má, mé abe e tólɔ́ɔ.