Read Koonzime Galásia 1 Bible Online

Galásia 1 - Koonzime bible

Galásia 1

¹Yé ó mɛm Pɔ̂l, mʉr milʉ́mlʉ́, ó dí ecɛma bɨ́n mekaná mâ. Mé abe ɨ́ milʉ́mlʉ́ mé nyʉ́ʉ́ mʉ̂r. Twárá mé á twárɔɔ wɨ́, wé á bé acɨɨ e nzɨ̌ mʉr. Yésʉs-Krîst, bé e Nzyɛ̌m Sɔ́ŋ, mʉr á pɛh nye, dwih nyé lɨ́ odwe nyá, bé ó b'á lómo me.

²Bɨ̌h e bʉ́ʉ́ óbûʼla o dí wâʼ bá, bé lɨ́ esoho bɨ́n, bʉr ó Mbɛ̌r-Nzyɛ̌m dí ɨ́ sí Galásia bá.

³Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ gá wɨ́ná, bé e Tî Yésʉs-Krîst.

⁴Yésʉs-Krîst mʉr tɨ̂ʼ á si dwe twiʼ yé, nzě búra e misyóm gá míná. Mpʉ nyé á jala e myé yɨ́, nyɨ́ dwih mɨ́ná gá ɨ́ sɔ́má ósyɛ̂l o mísyóm ó myǎ wɨ̂. Yésʉs á sâ nó ó, mpʉ̌ Nzyɛ̌m gá wɨ́ná, waá dí ntémé Sɔ́ŋ gá wɨ́ná nyá, á kpɛl yɨ́.

⁵Kûm díʼee e Nzyɛ̌m njʉ̌m dǐ e njʉ̌m dǐ. Amɛn.

⁶Me lɨ́ ekʉ́ kâm lɨ́ ejóʼǒ mpʉ bɨ́n mû sí kpâhwǎ túmǒ koo e Nzyɛ̌m, mʉr á jébe bɨ̌n ɨ́ mpam mé Krîst nyá yɨ́! Bɨ̌n bɨ́ bánǎ líʼe nyê, tyen mílémé mín nko gúú lɔ́ɔ́ swîh, waá bɨ́n dí ebee ó, wé ó gúú Mbɨambɨa Lɔ́ɔ swîh wɨ́.

⁷Sâ gwár, lɨ́ otyeetye, yé abe e gúú Mbɨambɨa Lɔ́ɔ swîh. Sá dí tɨ̂ʼ yɨ́, yé ó bʉr o dí egwɨ̂m écéně Mbɨambɨa Lɔ́ɔ́ mé Krîst bá. Mekǎn mɔ́ɔ́, mé mû ó lɨ́ etɨ̂l bɨ́n mekʉ̌ sí.

⁸Bɨ́h bʉr o tɨ̂, nkʉ̂ éngeles duho ɨ́ jʉ́o kʉ́, nzé túno bɨ́n «mbɨambɨa lɔ́ɔ», syɛ́ɛla e waá bɨ́h á túno bɨ̌n wɨ́ nó, Nzyɛ̌m syɛm mʉ̂r waá!

⁹Bɨ̌h bé á si boo lɛ́ɛ bɨ̌n. Nó ó, ɨ́ báánâ, me lɨ́ ebáʼǎ lɛ́ɛ bɨ́n yǎ ó, mʉ̂r túnó bɨ́n «mbɨambɨa lɔ́ɔ» swîh, syɛ́ɛla e waá bɨ́n á jóʼo e bɨ̌h wɨ́ nó, mʉr waá lîʼ e meswomlʉ.

¹⁰Nó ó, báánâ, nzê nó yé lɛ́ʼlé ó, nkam bʉr ó mé dí esáa ɛ̌? Nkʉ̂ ó, nyaá mé Nzyɛ̌m ɨ́? Mě cɛmá nó ó, lɨ́ esáa nkâm mé Nzyɛ̌m. Nzê me mû sáa ó, me sâʼ mpʉ bʉ̂r dí egwɨ̂m yɨ́ ɛ́? Yé bé mě dú ó, bigwɨ́má bí bʉ̂r nó, lɛ́ɛ́, mé akǎ be syɛ̂l mesâ mé Krîst.

¹¹Bɨ́ɔɔ́ bâm! Okɛ́l bâm! Me lɨ́ ekpɛl élɛ́ɛ bɨ́n, ó bɨ̌n gʉ́ŋaa ó, Mbɨambɨa Lɔ́ɔ mé dí etúno bɨ́n wɨ́, wé á bé aduho ɨ́ pɨʼ bʉr.

¹²Me á bé ajóʼo wé ɨ́ num nyʉ́ʉ́ mʉ̂r. Abe ntémé e mʉr á lɛ̂ʼle me wǎ. Yésʉs-Krîst mʉr tɨ̂ʼ ó b'á gwîh me wǎ.

¹³Bɨ̌n bé á be ó sí jóʼǒ lɔ́ɔ dí edumo e me wɨ́. Bɨ̌n bé lɨ́ egʉ́ǎ mpʉ mé á titiʼe mélú mé épíhe yɨ́, jɔʼ mé á be, me dína lɨ́ edû métum mé óYúden yɨ́. Bɨ̌n bé lɨ́ egʉ́ǎ mpʉ mé á titíble Mbɛ̌r-Nzyɛ̌m yɨ́. Me á bɨbe e gwɨ́má ó, mě gbǎh ó wê.

¹⁴Ɨ́ bʉr ó duo yâm, me ó b'á bu dû metum mé óYúden. Me á si gbâ nyʉ̂l nyǎm ɨ́ swííá lɨ́ ebaʼle métum bímpám bíh, byé á líʼe má.

¹⁵Sâ gwár, Nzyɛ̌m á ka bee embɨa ɨ́ páʼ wé ó, nye sâʼ me mpam. Nó ó nyé á jébe me, me dína ɨ́ mo mé áyo, lɨ́ esú lé éséa nyé syɛ́ɛ́ yé yɨ́. Nye á bee embɨa ɨ́ páʼ wé ntémé ó, nye lɛ̂ʼlaa me Mwân wé, le elómo mé ó, me túnaa Mbɨambɨa Lɔ́ɔ́ wé ɨ́ bikúl bíswîh. Le nyé á lɛ̂ʼle me Mwân wé, le mé ntɔ̂ʼ á nkɛ́ɛ, tô. Me á bé adî mʉ̂r ó, nye dwêʼ me metwɨ́ɨ́.

¹⁷Damá jóʼo baá bé á be bʉr o mílʉ́mlʉ́ mé Yésʉs-Krîst esôʼ e me bá, me á bé atô Yerʉ́zalɛm, tó bee bê. Me á jaa tô ó, njɨ ɨ́ sí Arabî. Píe tɨ̂, me á si baʼa tô Damâs.

¹⁸Ɨ́ jɔʼ mímbú mílɛ̂l, myé á laa yɨ́, nó ó mé á nze tô Yerʉ́zalɛm ó, me tô beě Kefâs, ó me gʉ́ŋaa nye. Me ntɔ̂ʼ jâ gʉ̂ melû kám e metɛ̂n, bɨ̌h e nɔ́ɔ́ lɨ́ elɛ́ɛla.

¹⁹Me á bé abee nyʉ́ʉ́ mʉ̂r milʉ́mlʉ́ swîh. Me á jaa bee ó, njɨ Jacques, waá dí mɨ́ɔɔ́ mé Tî Yésʉs nyá.

²⁰(Sá mé dí ecɛma yɨ̂, yé ó tyeetye. Ɨ́ míh mé Nzyɛ̌m, me lɨ́ ebáʼǎ lɛ́ɛ ó, mé asâ bíbɛr.)

²¹Píe tɨ̂, me nzě tô ɨ́ sí Sirî, ndu e yaá Silisía.

²²Tyé yaá yɨ́yɛ̂h, kâr tɔʼ e mʉr Mbɛ̌r-Nzyɛ̌m ngwár á be e nkul edweʼe mpóm nyǎm ɨ́ sí Yʉ́da.

²³Sâ gwár, bé á bě sí jóʼǒ sá bʉ́ʉ́ bʉ̂r, bé á lwilwib yɨ́ ó: «Mʉr á nyɛɛ titíble mɨná gá mélú mé épíhe nyá, nye mû lɛ̂ʼle mɨ́ná gá ɨ́ báánâʼ ó, búʼó nyé á kpɨkpɛl egbah yɨ́.»

²⁴Nó ó bʉ̂r ó Mbɛ̌r-Nzyɛ̌m baá, byé á nze dwe Nzyɛ̌m kûm ɨ́ lɔ̌b wâm.