Read Koonzime Galásia 2 Bible Online

Galásia 2 - Koonzime bible

Galásia 2

¹Píe mimbû kám e minâ, bɨ̌h e Banabâs, bé á si baʼa tô Yerʉ́zalɛm. Bɨ̌h bé á tô ntémé ó e Títos.

²Me á tô nó ó, ɨ́ pɨʼ Nzyɛ̌m á gwîh me nyɨ́. Jɔʼ mé á pyâl gʉ̂ʼ yɨ́, bɨ̌h le minjwɨ́ʼ mí Mbɛ̌r-Nzyɛ̌m nzě gwɨ̂hla. Me nzě lɛ̂ʼle bé mpʉ mé dí etúno bʉ̂r o bíkûl Mbɨambɨa Lɔ́ɔ yɨ́. Me á bé akpɛl ó, syɛ́ɛ́ mé á be lɨ́ eboó séa yɨ́, yé dwêʼ ntuʼ.

³Damá jóʼo ó mpʉ̌ Títos, mʉr minjoo wǎm, dí mʉr Grɛ̂s yɨ́, bé á bé atíne nyé ó, nye tíʼɔɔ mpʉ́n.

⁴Sâ gwár, bʉ́ʉ́ bʉ̂r, bé á si gwa tíne nye nó, ebě, bʉ́ʉ́ ókrǐsten o bíbɛr, bé á be ó ɨ́ sɔ́má yɨ́h yaá. Bʉr baá, bé á swama ɨ́ sɔ́má yaá ó, mesǒ, lɨ́ edǐ gʉ́a, nkʉ̂ bɨ̌h, bʉr o dí ɨ́ mpúhlá e Yésʉs-Krîst bá, bê tyeetye ó onzyɛh o bʉ̂r. Gwɨ́má yɔ́ɔ́, yé á be ó, bé báʼa liŋ bɨ́h bitúʼǎ.

⁵Sâ gwár, bɨ̌h bé á bé asâ bé mejóʼo, damá jóʼo ó, mâ jɔʼ tîtííǎ. Bɨ̌h bé á bé abîr ó, bé ndámaa Mbɨambɨa Lɔ́ɔ, pɛʼ ótyeetye wé. Bɨ̌h bé á kpɨkpɛl ó, bɨ̌n jóʼaa wé mpʉ wé á boo be yɨ́.

⁶Me nzě tó bee baá bé á nyɨ̂n ɨ́ mîh ó, bé ó otyɛ̂b bé ésôʼ bá. (Nkʉ̂ bé ó otyɛ̂b bé ésôʼ, nkʉ̂ bé abe bê, nó yé asâ mɛ̂m sɔ̂ʼ, ebě, Nzyɛ̌m, nyé abe lɨ́ edwáawo bʉ̂r mempǒm.) Bʉr o b'á bu nyɨ̂n nó bá, ɨ́ jɔʼ mé á lɛ́ɛ bé Mbɨambɨa Lɔ́ɔ mé dí etúno bʉ̂r wɨ́, bé á bé akɛl ékǎn egwár tɨ̂ʼ kʉ́.

⁷Yé á bé akúnwo nó, ebě, bé á kam ó, Nzyɛ̌m, nyɨ́ ntɨh mé lɔ́ɔ waá, ó me tôʼ le etutúno wé páʼ bʉ̂r o dí abě tíʼá mpʉ́n bá. Nye á dwe me wǎ ó, lɨ́ esú é bíkúl bíswîh mpʉ nyé á dwe Pétrus wǎ lɨ́ esú lé óYúden yɨ́.

⁸Mʉr ngwár e ngwár á séa e nkul ɨ́ Pétrus tʉ́ŋlʉ̌, ó nye tôʼ kwá oYúden nyá, nye ntémé ó dí eséǎ jɔʼ yɨ́yɛ̂h ɨ́ me lɨ́ esú é bíkúl bíswîh.

⁹Jacques, bé e Kefâs, ndu e Yʉánɛs, bé ó b'á bu nyɨ̂n ɨ́ mîh ó, bé ó dí «medwii me sɔ́ŋ» ɨ́ Mbɛ̌r-Nzyɛ̌m. Bé á si gʉ́a lɨ́ otyeetye ó, Nzyɛ̌m á si lɛ̂ʼle me mpam nyé. Bé ntɔ̂ʼ bára e bɨ̌h e Banabâs, lɨ́ elɛ̂ʼle ó, bɨ̌h á kʉ be ó, ɨ́ mpúhlá miléme, bɨ̌h le onɔ́ɔ́. Bɨ̌h ntɔ̂ʼ di twíí ó, bɨ̌h bé ótô kwá bʉr o dí abe óYúden bá. Bɨ́ɛ, bé ótô kwá oYúden.

¹⁰Bé á jaa lɛ́ɛ bɨ̌h ó, njɨ bɨ̌h sâʼ sâ gwár: esúʼo báántéʼenteʼe o bʉ̂r. Tó kœb ó, me á boo be e tiŋé ɨ́ léme ó, me báná sâ ó, syɛ́ɛla yaá.

¹¹Píe tɨ̂, ɨ́ jɔ̌ʼ Kefâs á nze kœb me ɨ́ Antiôs yɨ́, me á si lwímla e né, ebě, yé á si nyɨ̂n ɨ́ kpɛŋlɛm ó, nye á be ó e mebě.

¹²Ɨ́ metááré, bé e bʉr o bíkúl bíswîh, bé á dɨde mede ó, lɨ́ epûhla mébô gúmo gwár. Píe tɨ̂, Jacques á si lómo bʉr gʉ̂. Jɔʼ bʉ̂r o mílʉ́mlʉ́ bé baá, bé á pyâl yɨ́, Kefâs ntɔ̂ʼ dulo nyʉ̂l, akǎ de e bʉr ó Antiôs bɨ́bɛ̂h gúmo gwár. Yé á pyâl nye nó ó, ɨ́ bʉ́á nyé á jóʼo bʉr o bé á kpɛl ó, obûʼla díʼee tíʼá mpʉ́n bá.

¹³Bʉ́ʉ́ óbûʼla bé á byɛ̂l oYúden bá, bé á be ó e miléme mimbá mímbá, ɨ́ mpʉ mé Kefâs ntémé. Damá jóʼǒ Banabâs mʉr tɨ̂, nye á si twe ɨ́ metwɨ́ɨ́ mɔ́ɔ́. Bé e boo nɔ́ɔ́ bɨ́bɛ̂h, bé á si nyɛl esâ míkóo.

¹⁴Mpʉ mé á bee ó, bé á bé akǎ be lɨ́ etye lɨ́ otyeetye mpʉ̌ Mbɨambɨa Lɔ́ɔ dí etɨ́e mɨ́ná gá yɨ́, me nzě lwib e Kefâs, bɨ́bɛ̂h ɨ́ mediá. Me á lɛ́ɛ e né ó: «Gua mʉr dí Yúden nyá, gǒ tiʼé wâʼ ó mpʉ bʉ̂r o bíkúl bíswîh. Mpʉ yé dí nó yɨ́, gǒ kpɛ̌l étíne bʉ̂r bâʼ ó, bɨ́ɛ tíʼaa mpʉ óYúden ɨ́ yé ɛ́?

¹⁵«Mɨná gá ó dí mimbyɛ́lá mí óYúden. Mɨná bé abe gá bʉr o bíkúl bíswîh, osyɛ̂l o mísyóm.

¹⁶Sâ gwár, mɨná bé lɨ́ egʉ́a gá ó, mʉr, nyé abi nkâm ɨ́ míh mé Nzyɛ̌m ɨ́ lɔ̌b mbaʼlá métié. Mʉ̌r bi nkâm ó, ɨ́ lɔ̌b búʼó, lɨ́ edyêʼ koo e Yésʉs-Krîst. Mɨná bɨ́ dyɛ̂ʼwo ntémé e Yésʉs-Krîst. Búʼó gá yɨ́ná yaá, yé aduho ɨ́ mbaʼlá metié. Mʉr ákóʼó bi nkâm ɨ́ míh mé Nzyɛ̌m ɨ́ lɔ̌b mbaʼlá métié.

¹⁷Mɨná oYúden, mɨná bɨ́ bûʼla ó, mɨná bé lɨ́ ebi gá nkam ɨ́ míh mé Nzyɛ̌m ɨ́ lɔ̌b mpúhlá gá nyɨ́ná e Krîst. Yé mû lɨ́ enyɨ̂n ó, mɨná mû gá ó mpʉ baá mɨ́ná bé á jɨjébe gá «osyɛ̂l o mísyóm» bá. Nzê nó ó dí elɛ́ɛ ó, Krîst, nye lɨ́ etô e bʉr nko mísyóm ɛ̌? Heʼé, yé abá be nó.

¹⁸Mʉ̂r bɔ́ʼá le ebaʼle métié, nzě báʼǎ kǎ bee ó, mé e nyɔm nó, lɛ́ɛ́, mʉr waá, nye lɨ́ edwe nyé mʉr tɨ̂ʼ mebě.

¹⁹Ɨ́ páʼ métié maá, me ó múu tɨ̂. Metié maá, mé ó b'á jʉ̂ me, ó twiʼ yâm, yé jaá di, njɨ lɨ́ esú lé éséǎ Nzyɛ̌m syɛ́ɛ́. Ɨ́ jɔʼ bé á jʉ̂ Yésʉs-Krîst lɨ́ ebomlo nyé e binzâŋ, bɨ́nɔɔ nyé ɨ́ kolôs kʉ́ yɨ́, me ntémé á si bomlɔɔ tɨ̂, bɨ̌h e nɔ́ɔ́.

²⁰Ntʉ mé dí etiʼe ɨ́ báánâ. Yésʉs-Krîst ó dí etiʼe tʉ́ŋlʉ̌ nyʉ̂l nyǎm. Twiʼ mé dí etiʼe ɨ́ sí yɨ̂ʼ yɨ́, mě tiʼé yé ó, njɨ ebe mé dí edyɛ̂ʼwo e Mwân mé Nzyɛ̌m. Nye á si kpɛl me, nzě syɛ́ɛlǎ twiʼ yé lɨ́ esú é twiʼ yâm.

²¹Mé apyêh mpâm mé Nzyɛ̌m. Mʉ̂r bé mbɨ̂mbɨá ɨ́ míh mé Nzyɛ̌m ɨ́ lɔ̌b mbaʼlá nyé dí ebaʼle métié wɨ́ nó, lɛ́ɛ́, Yésʉs-Krîst á kʉ dwe ó, kwahaá dwêh.»