Read Koonzime Galásia 3 Bible Online

Galásia 3 - Koonzime bible

Galásia 3

¹Bɨ̌n bʉr ó Galásia bé ó bigʉʼlʉgʉ́. Nzé á bana kʉ́a bɨ̌n? Báb, bé á si kʉ gwa lɛ̂ʼle bɨ̌n ɨ́ micɛmá, bɨ̌n nzě bee ɨ́ sʉ́lʉ́lʉ́ mpʉ̌ Yésʉs-Krîst á jʉ́ŋɔɔ ɨ́ kolôs kʉ́ yɨ́.

²Me ódî bɨ́n tíá mpwár nyɨ̂: nzê Nzyɛ̌m á ntɨh bɨ̌n Sísǐm wé jɔʼ bɨ́n á lóŋlo metié yɨ́ ɛ́? Nzê nye á bé antɨh wé ɨ́ jɔʼ bɨ́n á bûʼla Mbɨambɨa Lɔ́ɔ bé á lɛ́ɛ bɨ̌n wɨ́ ɛ́?

³Wáǎ mbi bígʉʼlʉgʉ́ bɨ́n dí wɨ̂? Bɨ̌n nyɨɛ sí pǎ táare étiʼe ɨ́ nkul dí eduho e Sísǐm mé Nzyɛ̌m nyɨ́. Nó ó bɨ̌n kǎ kpɛl éswâhle ó e nkul dí eduho ɨ́ nyʉ̂l bipúno nyɨ́?

⁴Nzê bɨ̌n bé á kʉ sia e mitúú ɨ́ buo buo ó, dwêh ɛ̌? Mé abûʼla ó, myé ó dwêh.

⁵Ɨ́ jɔ̌ʼ Nzyɛ̌m dí entɨh bɨ́n Sísǐm wé, le esâ mésimá ménɨ́nɨ́ɨ́ páʼ nyɨ́n yɨ́, nzê nyě sá nó ó ebe bɨ́n dí elóŋlo métié ɛ́? Nzê yé ó ebe bɨ́n dí ebúʼla Mbɨambɨa Lɔ́ɔ bɨ́n á jóʼo wɨ́ ɛ́?

⁶Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Abraham á si dyêʼ koo e Nzyɛ̌m. Nzyɛ̌m nzě beě mpʉ̌ Abraham á dyɛ̂ʼwo e né yɨ́, Nzyɛ̌m ntɔ̂ʼ láa ó, nye ó tîtyěl mʉr ɨ́ lɔ̌b búʼó yé yaá yɨ́.

⁷Gʉ́ŋáá gá bé ó, bʉr o dí edyɛ̂ʼwo e Nzyɛ̌m bá, bé ó dí bwán mé Abraham.

⁸Bé á si boo cɛma ɨ́ Mekaná mé Nzyɛ̌m ó, bʉr o bíkûl biswîh, bé óbi nkâm ɨ́ míh mé Nzyɛ̌m ó, ɨ́ lɔ̌b búʼó yɔ́ɔ́. Mbɨambɨa Lɔ́ɔ́ wɨ̂, wé á nyɛɛ túnɔɔ ó, Abraham! Nzyɛ̌m á lɛ́ɛ e né ó: Me ósʉ bíkúl bíbyɛ̂h metyɛʼ mé mpóm ó, ɨ́ koo gô.

⁹Abraham nzě dyêʼ koo e Nzyɛ̌m. Nó ó Nzyɛ̌m á sʉ nye metyɛʼ me mpóm yɨ́. Jwɨʼ gwár e gwár yaá ntémé ó Nzyɛ̌m ngá sʉ bʉ̂r bɨ́bɛ̂h o dí edyɛ̂ʼwo e né bá metyɛʼ me mpóm yɨ́.

¹⁰Ebě, mʉ̂r sí bûʼla ó, Nzyɛ̌m ódwe nyé nkam ɨ́ lɔ̌b mbaʼlá nyé dí ebaʼle métié wɨ́ nó, lɛ́ɛ́, nyě e meswomlʉ, ebě, yê cɛmá ó: Mʉr nyɨnyɛ̂h dí abaʼle métié Mékaná mé Nzyɛ̌m mɨ́mɛ̂h nyá, nyě e meswomlʉ.

¹¹Mɨná mû ó sí gʉ́a gá ɨ́ pébébé ó, yé abe e mʉr dí e nkul ebi nkâm ɨ́ míh mé Nzyɛ̌m ɨ́ lɔ̌b mbaʼlá métié. Mekaná mé Nzyɛ̌m, mé lɨ́ elɛ́ɛ tɨ̂ʼ ó: Tîtyěl mʉr, nye ótiʼe ó, ɨ́ lɔ̌b búʼó yé.

¹²Mʉr, nyé abaʼle métié ɨ́ lɔ̌b búʼó nyé dí ebúʼlǎ Nzyɛ̌m yɨ́, ebě, Mekaná mé Nzyɛ̌m, mé lɨ́ elɛ́ɛ ó: Waá nyɨnyɛ̂h dí ebaʼle métié nyá, óbǐ twiʼ ó e nzɨ̌ metié maá.

¹³Mpʉ mɨ́ná dí abaʼle gá metié yɨ́, nó ó, Nzyɛ̌m, nyɨ́ syɛm mɨ́ná gâ. Sâ gwár, Yésʉs-Krîst á si dwih mɨná gá ɨ́ mpila ébébe, le enʉa méswomlʉ maá mɨ́mɛ̂h ɨ́ nyʉ̂l nyé lɨ́ esú gá lɨ́ná, ebě, yê cɛmá ó: Mʉr nyɨnyɛ̂h á tyelɔɔ ɨ́ lɨ́ kʉ́ nyá, nye ó waá Nzyɛ̌m á syɛm nyá.

¹⁴Yésʉs-Krîst á dwih mɨná gá ɨ́ mpila ébébe nó ó, lɨ́ esú é bʉ̂r o bíkúl bíswîh. Nye mû ó lɨ́ enzě ntɛŋ bɨ́n metyɛʼ me mpóm Nzyɛ̌m á kɛʼ Abraham ó, nye ósʉ má. Nye á dwih mɨná gá le onɔ́ɔ́ ɨ́ mpila yaá ó, mɨná nkʉ̂ bi gá nkɛ̌ʼ mé Nzyɛ̌m. Nkɛ̌ʼ nyaá, nye ó Sísǐm wé, waá nyé á kɛʼ mɨná gá wɨ́. Nyě ntɨ̌h wé ó, ebe mɨ́ná dí edyɛ̂ʼwo gá e né.

¹⁵Bɨ́ɔɔ́ bâm! Okɛ́l bâm! Sá yɨ̂, yé ó kwahaá syɛ́ɛla bʉ̂r dí esɨsâ yɨ́. Mʉ̂r sí cɛma mékaná bílíʼe mpʉ bʉ̂r dí boó sɨ̂sa yɨ́ nó, abe e mʉr ókǎ gbɛ́ɛ mícɛmá myaá. Mʉr swîh, nyé abe e nkul ekǎ kɛl lʉ́ʉ́ ékǎn tɨ̂.

¹⁶Jwɨʼ gwár e gwár yaá ó Nzyɛ̌m á dwe Abraham bé e nta wé nkɛ̌ʼ yɨ́. Mekaná mé Nzyɛ̌m, mé alɛ́ɛ ó: «onta». Mé kʉ́ jaá lɛ́ɛ ó, njɨ «nta ngwár.» Nta mé Abraham waá ó dí Yésʉs-Krîst.

¹⁷Sá mé mû lɨ́ ejɨ̌ lɛ́ɛ yɨ́ ó yɨ̂: Nzyɛ̌m á si boo tyêl saá le Abraham. Píe mimbû minter minâ e mekám mélɛ̂l, nye nzě tyêl óYúden metié. Metié maá, mé á bé agwá gbɛ́ɛ sáá nyaá, nkʉ̂ dímle ménkɛ̌ʼ nyé á dwe Abraham tɨ̂ʼ má.

¹⁸Yé bé Nzyɛ̌m kab mʉ̂r embɨa lé ɨ́ lɔ̌b mbaʼlá mʉ̂r waá dí ebaʼle métié wɨ́ nó, lɛ́ɛ́, nyé antɨh nyé nyǎ ɨ́ lɔ̌b nkɛ́ʼ. Tó kœb ó, Nzyɛ̌m á dwe Abraham nkɔb membɨa nyé ó, ɨ́ nkɛ̌ʼ nyé á pa kɛʼ nye ɨ́ lɔ̌b mpâm nyé nyɨ́.

¹⁹Yé bé nó wá, Nzyɛ̌m á tyêl metié maá ɨ́ yé ɛ́? Nye á tyêl mé ó, ɨ́ lɔ̌b bísyɛ́ɛla bí ébébe, lɨ́ esú é mâ jɔʼ, tó swîʼ ɨ́ jɔʼ ntâ mé Abraham waá ónzě mpʉ̌ Nzyɛ̌m á kɛʼ yɨ́. Nye á tyêl bʉr metié maá ó, lɨ́ enyɛɛ́ tímle bééngeles bé mǎ; bɨ́ɛ kǎ nzě dwe mesaádɔm.

²⁰Mesaádɔm, nyě títyɛ́b ɨ́ jɔʼ yɨ́yɛ̂h ó, páʼ menkɔ̌m mebá. Sâ gwár, ɨ́ jɔ̌ʼ Nzyɛ̌m á kɛʼ Abraham membɨa yɨ́, Nzyɛ̌m, nye á bé alómo éngeles, nkʉ̂ mʉr ó, nye díʼee mesaádɔm páʼ nyɔ́ɔ́ le Abraham. Nye á séa ó, nye omér.

²¹Nzê yé lɨ́ elɛ́ɛ ó, metié le nkɛ̌ʼ mé Nzyɛ̌m nyaá, byé e mbɔ́ʼ ɛ̌? Heʼé, yé abá be nó. Mbɔ́ʼ ntʉ́ʼ tɨ̂. Yé bé yé á be ó e lʉ́ʉ́ étié, lé á gwa sâ ó, bʉr bíʼee twiʼ nó, lɛ́ɛ́, mʉr á gwa bi nkam ɨ́ míh mé Nzyɛ̌m e nzɨ̌ metié. Sâ gwár, yé abe e lʉ́ʉ́ étié e dí esâ mɨ́ná gá syɛ́ɛla mpâ yaá.

²²Gúmo yaá ó Mékaná mé Nzyɛ̌m dí elɛ́ɛ ó, bʉr ó sí yɨ̂ʼ bɨ́bɛ̂h, bé ɨ́ jwɨ́ɨ́ syóm yɨ́. Syóm wɔ́ɔ́, wé á si kâʼ bɨ́bɛ̂h menkara. Sâ gwár, Nzyɛ̌m dwe nkɛ́ʼ nyé ó, ɨ́ baá bɨ́bɛ̂h dí edyɛ̂ʼwo e Yésʉs-Krîst bá. Nyě dwé bé nyǎ ó, njɨ ɨ́ lɔ̌b búʼó yaá.

²³Ɨ́ mimbú mí píhe, Nzyɛ̌m á bé apǎ kar nzɨ́ ó, bʉr dyɛ̂ʼwaa e Yésʉs-Krîst. Jɔʼ yaá ó mɨ́ná bé á be gá ɨ́ mpila métié tʉ́ŋlʉ̌ yɨ́. Mɨná bé á be gá ɨ́ mpila yaá ó, tó pyâl ɨ́ jɔ̌ʼ Nzyɛ̌m á ka tɨ́e mɨná gá nzɨ̌ edyɛ̂ʼwo e Yésʉs-Krîst yɨ́.

²⁴Metié maá, mé á bɨbe ó mpʉ pála bwá ó ntwǒm, mʉr á lilîʼle mɨná gá kwá mé Krîst nyá. Nye á sâ nó ó, mɨná nkʉ̂ bi gá nkam ɨ́ míh mé Nzyɛ̌m ɨ́ lɔ̌b búʼó.

²⁵Ɨ́ báánâ, mpʉ̌ Nzyɛ̌m mû sí dib mɨ́ná gá nzɨ̌ edyɛ̂ʼwo e Yésʉs-Krîst yɨ́, pála waá, nyé akǎ jwɨ́ɨ mɨ́ná gâ.

²⁶Bɨ̌n bɨ́bɛ̂h mû ó bwán mé Nzyɛ̌m, ebě, bɨ̌n bé á si dyɛ̂ʼwo e Yésʉs-Krîst.

²⁷Ebě, mʉr nyɨnyɛ̂h ɨ́ sɔ́má yɨ́n á duŋɔɔ e medíbé, pûhla e Krîst nyá, nyɨ́ bwâr Krîst ɨ́ nyʉ̂l.

²⁸Sá tɨ̂ʼ ó dí akǎ buú syɛ́ɛlǎ sɔ̂ʼ páʼ óYúden le bwá ó bíkûl yɨ́. Gǒ damá bě túʼǎ, nkʉ̂ ntémé nzyɛh; damá be mʉ́má, nkʉ̂ mʉrʉ̂m, nzyɛ́ɛ́lá ntʉ́ʼ bá tɨ̂, ebě, bɨ̌n bɨ́ pûhla e Yésʉs-Krîst. Bɨ̌n bɨ́bɛ̂h mû kǎ di ó, tâŋ mʉr ngwár.

²⁹Yé bé bɨ̌n bé lɨ́ egúmo e Krîst nó, lɛ́ɛ́, bɨ̌n ntémé bé ó bwá bé ónta mé Abraham. Bɨ̌n ntémé bé ó bʉr o ngá bi ménkɔb ɨ́ mbɨambɨa bisá Nzyɛ̌m á kɛʼ Abraham bí bá.