Read Koonzime Galásia 4 Bible Online

Galásia 4 - Koonzime bible

Galásia 4

¹Me óbáʼǎ dwě mveʼle ɨ́ lɔ̌b waá ɨ́ mbi wɨ̂: mʉ̂r bé e mwân jálá le elîʼ e bisá byé nyá nó, ɨ́ jɔʼ mwân waá dína mâ ntwǒm yɨ́, yé abe e sá dí elɛ̂ʼle ɨ́ ponó ó, mwân waá ó dí e bisâ byaá bíbyɛ̂h. Yé jaá nyɨ̂n ó, njɨ nye ó túʼǎ.

²Jɔʼ yɨ́yɛ̂h nyé dína lɨ́ ontwǒm yɨ́, bâʼ bʉ̂r, bé lɨ́ edwidwe nyé metwɨ́ɨ́. Bʉ́ʉ́, bé lɨ́ etirwo e bisyɛ́ɛ́ byé. Bé ósɨ̂sa nó ó, tó pyâl ɨ́ jɔʼ sɔ́ŋ wé á tíʼe ɨ́ lémé wé ó, mwân óntaa yɨ́haá tyé yɨ́.

³Jwɨʼ gwár e gwár yaá ntémé, mɨná bé á be gá ó mpʉ bítúʼǎ, agʉ́a bísá bímpâ. Mɨná bé á nî gá lɨ́ otúʼǎ waá ó, mɨná dúʼoo gá milɛ́ʼlá bʉ̂r ó sí yɨ̂ʼ dí ekûhlo mí.

⁴Yé ntɔ̂ʼ kǎ pyâl mbɨambɨa jɔ̌ʼ Nzyɛ̌m á boo tyêl yɨ́. Jɔʼ yaá ó Nzyɛ̌m á nze ntɨh Mwân wé, ó nye ntáa nzě byɛ̂l ɨ́ mo nyʉ́ʉ́ mʉ́má. Mwân waá á be ó, ɨ́ mpila métié tʉ́ŋlʉ̌.

⁵Nye á jala le esâ nó ó, nye nkʉ̂ dwih bʉ̂r ɨ́ mpila métié. Nye á sâ mɨná gá nó ó, nye nkʉ̂ tyêl mɨ́ná gá ɨ́ tyé bwán mé Nzyɛ̌m.

⁶Nzyɛ̌m á ntɨh mɨná gá Sísǐm Mwân wé ó, ebe bɨ́n dí nye bwân. Nye mû ó sí nî ɨ́ milémé gá míná. Nye ó dí etitíne mɨ́ná gá ó, mɨná jɨ̂ʼlaa gá e Nzyɛ̌m, le elɛ́ɛ ó: «Abba, Dâ!»

⁷Gúmo yaá, gó akǎ bě túʼǎ. Go mû ó mwân wé. Yé bé go mû ó mwân wé nó, lɛ́ɛ́, Nzyɛ̌m, nyɨ́ kɛʼ gó bilíʼe.

⁸Ɨ́ mimbú mí píhe, bɨ̌n bé á bé apǎ gʉ́ǎ Nzyɛ̌m. Bɨ̌n bé á bɨbe ó mpʉ bítúʼǎ, lɨ́ edû bíkpɛʼkpɛ̂ʼ bí ónzyɛ̌m bi dí abe ónzyɛ̌m ompâ bí.

⁹Damá jóʼo nó, ɨ́ báánâ, bɨ̌n bɨ́ gʉ́ǎ Nzyɛ̌m mpâ. (Me bé lɨ́ edǐ lɛ́ɛ ó, Nzyɛ̌m, nyɨ́ gʉ́a bɨ́n mpʉ bwán bé.) Bɨ̌n bé lɨ́ ebáʼǎ dû mílɛ́ʼlá bʉ̂r ó sí yɨ̂ʼ dí ekûhlo, myaá dí abe e nkul mí ɨ́ yé? Bɨ̌n bé lɨ́ ebáʼǎ kpɛl édi bítúʼǎ byɔ́ɔ́ ɨ́ yé?

¹⁰Bɨ̌n bé lɨ́ edwáawo mʉ́ʉ́ mélû le bʉ́ʉ́ óngɔn, le byúú bíjɔʼ, ndu e myúú mímbû. Bɨ̌n bé lɨ́ etyêl ménzɔɔ ɨ́ bijɔʼ byaá, bɨ̌n bɨɛ lɨ́ ebúʼla ó, mé e nyɔm ɨ́ míh mé Nzyɛ̌m. Bɨ̌n jwɨjwɨʼ ó, bisâ byaá, byê milémé mín ó e nyɔm.

¹¹Me lɨ́ ejóʼo bʉ́á ɨ́ lɔ̌b wɨ́n, ebě, yé ámû kǎ nyɨ̂n ó, syɛ́ɛ́ mé á séa ɨ́ sɔ́má yɨ́n yɨ́, yé á be ó dwêh.

¹²Bɨ́ɔɔ́ bâm! Okɛ́l bâm! Diʼee gá mpʉ mê, jwɨʼ gwár e gwár e mpʉ mé mû sí dǐ mpʉ bɨ́n dí yɨ́. Bɨ̌n bé á bé asâ mé ebébe.

¹³Bɨ̌n bé lɨ́ egʉ́a ó, jɔʼ ésôʼ mé á lɛ́ɛ bɨ̌n Mbɨambɨa Lɔ́ɔ yɨ́, me á dwoowo ɨ́ sɔ́má yɨ́n ó, ɨ́ lɔ̌b mékpaa mâm.

¹⁴Damá jóʼǒ mpʉ bɨ́n á sia e mitúú ɨ́ lɔ̌b ésyɛ̂b lâm, bɨ̌n bé á bé apyêh mê, nkʉ̂ soŋɔɔ mê. Bɨ̌n bé á si nʉa me mbɨ̂mbɨá, go ó, me á be ó, nkʉ̂ éngeles mé Nzyɛ̌m, nkʉ̂ ntɔ̂ʼ Yésʉs-Krîst mʉr tɨ̂.

¹⁵Yé dí ekǎ kamle bɨ́n lɨ́ esoho mé mpʉ bɨ́n á nyɛɛ sʉsoho me yɨ́? Me lɨ́ ekʉ́ gʉ́ǎ mbɨ̂mbɨá ó, yé bé bɨ̌n bé á be ó e nkul epɛʼ míh mɨ́n, dwe mé mǎ nó, lɛ́ɛ́, bɨ̌n bé á be ɨ́ sâ mé syɛ́ɛla yaá.

¹⁶Mpʉ mé dí elɛ́ɛ bɨ́n otyeetye yɨ́, nzê yɨ́ kǎ sâ ó, bɨ̌n nʉ́aa me mpʉ ntɨ̂m e mbɨn wɨ́n ɛ̌?

¹⁷Bʉr o bíbɛr ónɨ̌, bé lɨ́ ebaʼ bɨ́n, bɨ́ɛ lɨ́ ekpɛl ó, bɨ̌n náraa e bê. Sâ gwár, gwɨ́má yɔ́ɔ́, yé ambɨa. Bé gwɨ́m ó, bɨ̌n bɔ́ʼaa e me, ebě, bɨ̌n nkʉ̂ bɨbaʼ bê.

¹⁸Yé mbɨa ó, ɨ́ jɔʼ mʉ̂r dí egwɨ̂m yʉ́ʉ́ sá dí ɨ́ mbɨa yɨ́; nyě sá asâ nó njɨ ɨ́ jɔʼ mé dí tɨ̂ʼ ɨ́ bɨ̌n yɨ́.

¹⁹Bwán bâm, me mû ó mpʉ mʉ́má mû lɨ́ ebáʼǎ jaʼra e mǐn nyá. Mekpaa mé ótô le emɨmɛ̂r mé nó ó, tó pyâl pyáláa ɨ́ jɔ̌ʼ Yésʉs-Krîst óbe, nye mû sí gwɨ́e ɨ́ menyʉ́l mɨ́n yɨ́.

²⁰Á dǐ bee mɨ́ná gá mû ó gúmo gwár! Ebě, ɨ́ jɔʼ yaá, me á gwa lwib e bɨ̌n ó e twíí swîh. Léme, wê me ɨ́ mo ó e bá ɨ́ lɔ̌b wɨ́n.

²¹Jóʼláá gâ, bɨ̌n bʉr o dí elɛ́ɛ ó, bɨ̌n kpɛl édi ɨ́ mpila métié tʉ́ŋlʉ̌ bá. Lɛ́yɨ́ɨ́ gá me sá yɨ̂: nzê bɨ̌n bé ajóʼǒ sá métié maá dí elɛ́ɛ yɨ́ ɛ́?

²²Yê cɛmá ó, Abraham á si byâ bwán óbá: nye á si byâ nyʉ́ʉ́ mwân ɨ́ bwâ baá, bé e túʼǎ mʉ́má yé. Nyʉ́ʉ́, nye á byâ ó, bé e dimé mʉ́má yé.

²³Mwân mé túʼǎ á byɛ̂l ó, mbyɛ́lá nyʉ̂l bipúno e bidwehé jwɨʼ gwár e gwár e mpʉ bwán bɨ́bɛ̂h pá boó bîbyɛl yɨ́. Nó ó, mwân waá mé dimé mʉ́má yé, nyɨɛ á si byɛ̂l dû mpʉ nkɛ́ʼ mé Nzyɛ̌m á be yɨ́.

²⁴Sâ yaá, yé ó mveʼle. Yé lɨ́ etɨ́e mɨ́ná gá yʉ́ʉ́ sɔ̂ʼ: bʉbá obá baá, Agâr bé e Sara, bé lɨ́ elɛ̂ʼle mímbi mimbá Nzyɛ̌m á tyêl saá páʼ bé e bʉr mí. Agâr, nye ó b'á be túʼǎ. Bím bwân nyé á bibyâ bá, bé á jaa bɨbe ó, njɨ bitúʼǎ. Agâr mʉr tɨ̂, nye ó mveʼle. Nye ó mpʉ sáá Nzyɛ̌m á boo sâ e nzɨ̌ mé Moyɨ̂z nyɨ́. Nye á ntɨh bʉr nyǎ ó, lɨ́ ecwɨ̂ʼ é Sináyɨ̂.

²⁵Agâr, nye ó mveʼle écwɨ̂ʼ é Sináyɨ̂, dí ɨ́ sí Arabî lɨ́. Nye ntémé, nye ó mveʼlě nkanǎ Yerʉ́zalɛm, yaá ɨ́ jɔʼ yɨ̂, ebě, bʉr bɨ́bɛ̂h o dí edi tɨ̂ʼ bá, bé ó bitúʼǎ.

²⁶Sâ gwár, mpǎŋ Yerʉ́zalɛm dí tɨ̂ʼ yɨ́, yé ó yaá dí ɨ́ jʉ́o kʉ́ yɨ́. Bʉr o dí tɨ̂ʼ bá, Nzyɛ̌m nyɨ́ táǎ góo, le edwih bé ɨ́ mpila métié, pɛʼ bé ɨ́ fá. Nkana yaá ó dí dimé nyɔ́ŋ gá wɨ́ná.

²⁷Ebě, yê cɛmá ó: Gua kǔn mʉ́má, wé á be abyâ mwân wɨ́, soháa. Gua mʉmá á be apǎ jóʼo mín nyá, sohaa kʉ́kʉ́. Ebě, mʉmá dí nzihle, abe e njʉ̂m nyá, nyě e bwân ɨ́ buo buo, laa waá dí e njʉ̂m nyá.

²⁸Bɨ́ɔɔ́ bâm! Okɛ́l bâm! Bɨ̌n bɨɛ bé ó bwán bé á byɛ̂l mpʉ̌ Nzyɛ̌m á kɛʼ yɨ́. Bɨ̌n bé ó mpʉ̌ Isaac, waá Nzyɛ̌m á taare ekɛʼ, ntɔ̂ʼ ntɨh nyá.

²⁹Jɔ̌ʼ Agâr á bě sí byâ wé mwân mpʉ bʉ́ʉ́ bwân dí eboó bibyɛ̂l yɨ́, mwân waá á si bu tíble mwân Sara á ka byâ e nkul Sísǐm mé Nzyɛ̌m nyá. Syɛ́ɛla gwár e gwár yaá ó mɨ́ná dí ebee gá, kumǒ báánâ.

³⁰Yé dí cɛmá ɨ́ Mekaná mé Nzyɛ̌m? Yê cɛmá ó: Sǒʼ túʼǎ, bé e mwân wé, ebě, mwân mé túʼǎ, nyé ajala le enʉa bílíʼé bí sɔ́ŋ wé. Mwân mé dimé mʉ́má ó jálá le enʉa bílíʼé bí sɔ́ŋ wé.

³¹Bɨ́ɔɔ́ bâm! Okɛ́l bâm! Mɨná bé abe gá bwán ó túʼǎ mʉ́má. Mɨná gá bé ó bwá ó dimé mʉ́má.