Read Koonzime Galásia 5 Bible Online

Galásia 5 - Koonzime bible

Galásia 5

¹Krîst á pɛʼ mɨná gá ɨ́ dǐ ótúʼǎ ó, mɨná díʼee gá onzyɛh o bʉ̂r. Nó ó, gbáʼ gá nkul lɨ́ ebaʼlě dǐ yɨ́n yaá. Mʉ̌r sá akam ó, nye bâʼlaa di ɨ́ dǐ ótúʼǎ.

²Mɛ̌m Pɔ̂l, mě lɛ́ɛ́ bɨ́n ó: bɨ́n sí kpɛl ó, bʉr tíʼaa bɨ̌n mpʉ́n nó, lɛ́ɛ́, syɛ́ɛlǎ Krîst á sâ bɨ̌n yɨ́, yé ákǎ be bɨ́n e nyɔm.

³Mě báʼá lɛ́ɛ bɨ́n ó, mʉ̂r óbǐ tíʼá mpʉ́n nó, nyé olîʼ ɨ́ mpila métié maá tʉ́ŋlʉ̌. Náǎ yé ó, mʉr waá, nye ɨ́ jala le ebaʼle métié maá mɨ́mɛ̂h.

⁴Bɨ̌n, bʉr o dí elɛ́ɛ ó, bɨ̌n bé óbi nkâm ɨ́ míh mé Nzyɛ̌m ɨ́ lɔ̌b mbaʼlá métié wɨ́n bá, bɨ̌n e Krîst, bɨ́ bɔ́ʼa! Bɨ̌n bɨ́ pɔʼǎ súm Nzyɛ̌m á gwa be ó, nye ósʉ bɨ́n metyɛʼ me mpóm mé yɨ́.

⁵Bɨ̌h bɨɛ, bé á si dyɛ̂ʼwo e Nzyɛ̌m. Nyɨ́ gbâ bɨ́h mpûʼla ɨ́ miléme ó, nye ódwe bɨ́h nkam. Bɨ̌h bé e mpûʼla nyaá ó e nzɨ̌ Sísǐm mé Nzyɛ̌m.

⁶Nyʉ́ʉ́ mʉ̂r óbe ɨ́ mpúhlá, bé e Yésʉs-Krîst nó, lɛ́ɛ́, etíʼɔɔ mpʉ́n, lé ákǎ be nyé e nyɔm. Nyé óbe, atíʼɔɔ mpʉ́n nó, syɛ́ɛla yaá, yé ántɨ̂ʼ sɔ̂ʼ. Yé ó jwɨʼ gwár ɨ́ páʼ mʉ̂r waá. Sá dí e nyɔm yɨ́, yé ó búʼó dí enyɨ̂n ɨ́ bisyɛ́ɛla bi mpâm yɨ́.

⁷Bɨ̌n bé á nyɛɛ be ó, lɨ́ ekʉ́ swim ɨ́ duo bíjʉ́ʉ́. Nzé á ka kamle bɨ̌n lɨ́ edû ótyeetye?

⁸Ndulá mʉ̂r waá á dulo bɨ̌n píhe wɨ́, wé aduho kwá mé Nzyɛ̌m, mʉr á jébe bɨ̌n nyá.

⁹«Edye egwár, lé ó b'á bol medye mé num mɨ́mɛ̂h.»

¹⁰Tî Yésʉs, nyɨ́ gbâ mé mpûʼla ɨ́ léme ɨ́ páʼ wɨ́n ó, bɨ̌n bé ópɨpahlě mpʉ mé dí epahle yɨ́. Me lɨ́ egʉ́a ntémé ó, mʉr mû lɨ́ edwe mílɛ́ʼlá mi dí etɨ̂l bɨ́n mekʉ̌ sí mí nyá, ódweŋɔɔ mébě tɨ̂, nyě damá be wáǎ mbi mʉ̂r.

¹¹Bɨ́ɔɔ́ bâm! Okɛ́l bâm! Yé bé me lɨ́ etô le etíne bʉ̂r dóló ó, bé tíʼɔɔ mpʉ́n nó, lɛ́ɛ́, bé abe lɨ́ ekǎ tíble mê. Waá dí etíne bʉ̂r ó, bé tíʼɔɔ mpʉ́n nyá, nyě sáá ó, nye dwíhɨɨ ebɔ̌ʼ Nzyɛ̌m á gbâ ɨ́ nzɨ̌ lɨ́. Ebɔ̌ʼ laá, lé ó mbi éswiě Krîst á dwe ɨ́ kolôs kʉ́ lɨ́.

¹²Bʉr o dí entɨ̂ʼ bɨ́n bá, bé tôʼ dóló: bé cwɨ́hwɨɨ bé bʉr o tɨ̂.

¹³Bɨ́ɔɔ́ bâm! Okɛ́l bâm! Nzyɛ̌m á jébe bɨ̌n ó, nye pɛ́ʼɛɛ bɨ̌n lɨ́ mpila ébébe, bɨ̌n búlaa ɨ́ fá. Ɨ́ tyé yɨ́n yaá tʉ́ŋlʉ̌, akam gá ó, bɨ̌n sâʼ syóm njwɨr myâ gá wɨ́ná dí egwɨ̂m wɨ́. Kpɛlaa gâ. Séáá gá ntémé páʼ nyɨ́n.

¹⁴Metié mɨ́mɛ̂h, mé lɨ́ ebɔma le etié egwár ó: Kpɛlɨɨ mɨ́ɔɔ́ gǒ mʉr mpʉ gó dí ekpɛl gó mʉr tɨ̂ʼ yɨ́!

¹⁵Sâ gwár, bɨ́n ókoʼla, le etɛ̂l páʼ nyɨ́n mpʉ ótír ó méntwǐʼ dí esâ yɨ́ nó, bɨ̌n e bâʼ. Bɨ̌n bé ámû síe lɨ́ ejwɨ́ɨla páʼ nyɨ́n.

¹⁶Sá tɨ̂ʼ ó mé dí elɛ́ɛ bɨ́n ó, dúʼóó gá nzɨ̌ Sísǐm mé Nzyɛ̌m dí etɨ́e bɨ́n nyɨ́ yɨ́. Bɨ́n sí sâ nó nɛ́ɛ: bɨ̌n bé ákǎ lóŋlo bígwɨ́má bí njwɨr myâ gá wɨ́ná.

¹⁷Ebě, njwɨr myâ gá wɨ́ná, wé jaá gwɨgwɨ̂m ó, njɨ bisyɛ́ɛlǎ Sísǐm mé Nzyɛ̌m dí ebene bí. Sísǐm mé Nzyɛ̌m wɨ́ɛ, wé jaá kpɛl ó, njɨ byaá njwɨr myâ gá wɨ́ná dí ebene bí. Bigwɨ́má mé Nzyɛ̌m le byaá bí njwɨr myâ gá wɨ́ná, byé lɨ́ elwímla páʼ nyɔ́ɔ́. Tɨ̂ʼ ó bɨ́n dí abe e nkul esâ syɛ́ɛla dí epɨ̂palwo bɨ́n ɨ́ miléme yɨ́.

¹⁸Sísǐm mé Nzyɛ̌m, wé ótɨ́e bɨ́n nzɨ̌ nó, lɛ́ɛ́, bɨ̌n bé ákǎ be ɨ́ mpila métié tʉ́ŋlʉ̌.

¹⁹Bisyɛ́ɛla bí njwɨr myâ gá wɨ́ná, byé asâ dɨ̂ʼ. Byé ó dí: elœʼ nyʉ̂l ɨ́ nzɨ̌ bijoó, esâ bísyɛ́ɛla bi dí edulo mpîr ɨ́ nyʉ̂l bí, esâ bímolá nzam le ekomo,

²⁰ngúmlá bíkpɛʼkpɛ̂ʼ bí ónzyɛ̌m, sɛ́á mímǐr mí éleme, ntémé páʼ bʉ̂r e bʉr, megô, nzwíí, ebúʼ, gwɨ́má épɨra e bʉr, nzyɛ́ɛ́lá mecwíí, mpɔ́ʼá menkɔ̌m,

²¹gwɨ́má bísá byé onkán, mpur menyoʼ, elɔ̂ʼwa lɨ́ ede méde, tótôʼ. Mpʉ mé á boo lɛ́ɛ bɨ̌n ɨ́ metááré yɨ́, me lɨ́ ebáʼǎ cɨ̂l bɨ́n ó, bʉr o dí esâ mímbi bísyɛ́ɛla byaá bá, bé ákóʼó nʉǎ diá ɨ́ Mpóʼo mé Nzyɛ̌m, jala e nkɔb líʼe nyɔ́ɔ́.

²²Sâ gwár, Sísǐm mé Nzyɛ̌m, nyě e byé bísyɛ́ɛla nyé dí esâ ɨ́ mɨná gá bí. Byé ó dí: kpɛ̌l, bisʉhʉʉ, mepyɛbla, bíhwó, njɨ́ʼá nkóó, mpam, edira ménkɛ̌ʼ,

²³embɨa é njwɨr le emâr é léme. Abe le etié dí emɛ̂r mʉ̂r dí esâ bísyɛ́ɛla bínɨ̌ nyá.

²⁴Bʉr o dí egúmo e Krîst bá, bé á si jʉ̂ njwɨr myâ gá wɨ́ná. Bisyɛ́ɛla bí ébébe wé á gwɨ̂gwɨm bí, byé akǎ báʼǎ be. Bé ó mpʉ̌ sá lɛ́ɛ́, bɨ́ jʉ̂ njwɨr waá, lɨ́ ebomlo wé e binzâŋ, bɨ́nɔɔ byé ɨ́ kolôs kʉ́.

²⁵Yé bé yê tyeetye ó, mɨná dí gá ɨ́ mpúhlá e Sísǐm mé Nzyɛ̌m nó, mɨná dúʼoo gá nzɨ̌ Sísǐm mé Nzyɛ̌m dí etɨ́e gá mɨná nyɨ́.

²⁶Mɨná bé ayɨ́ nkɛ́ɛ gá menyʉ̂l gá mɨ́ná. Mɨná bé ajala le egbâ gá bʉ́ʉ́ bʉ̂r ebúʼ ɨ́ miléme. Mɨná bé ajala le egwɨ̂m gá bisá byé onkán.