Read Koonzime Galásia 6 Bible Online

Galásia 6 - Koonzime bible

Galásia 6

¹Bɨ́ɔɔ́ bâm! Okɛ́l bâm! Bɨ́n óbee mʉ̂r lɨ́ esâ syóm nó, bɨ̌n bʉr o dí e Sísǐm mé Nzyɛ̌m ɨ́ miléme bá, kɛmɨɨ gá nye ó, nye pʉ́ʼaa ɨ́ nzɨ̌ nyaá. Sâ gwár, tɨ́áá gá nye e mekǎn ɨ́ tala tala. Mʉr nyɨnyɛ̂h ɨ́ sɔ́má yɨ́n, nye dwɛ́ʼɛɛ ntémé mpʉ nyé mʉr tɨ̂ʼ dí yɨ́, ebě, nye ntémé ámû duma ɨ́ mebʉ́blá.

²Nkɛ́yɨ́ɨ́ gá mimbeʼ mi bʉ́ʉ́ bʉ̂r. Bɨ́n sá nó wá, lɛ́ɛ́, bɨ̌n bɨ́ dû étié Krîst á líʼe mɨná e lé lɨ́.

³Ebě, nɛ́ɛ: nyʉ́ʉ́ mʉ̂r bé lɨ́ ejwɨʼ ó, nye ó mpǎŋ sɔ̂ʼ, nyɨɛ yɨ́ɛ abě mpaŋ mʉ̂r nó, mʉr waá, nyě dímlé ó, nye mʉr tɨ̂.

⁴Mʉr nyɨnyɛ̂h pâhlaa syɛ́ɛ́ yé, nye mʉr tɨ̂ʼ dí eséa yɨ́. Syɛ́ɛ́ yaá, yé óbě mbɨ̂mbɨá nó, nye mɛ́ɛlaa ɨ́ lɔ̌b syɛ́ɛ́ nyé mʉr tɨ̂ʼ á pa séa yɨ́ yaá. Nyě sá amɛɛla ebe nyé dí ejwɨʼa e nyʉ́ʉ́ mʉ̂r.

⁵Ebě, mʉr nyɨnyɛ̂h, nye ɨ́ jala le esâ syɛ́ɛlǎ Nzyɛ̌m á pa dwe nye yɨ́.

⁶Mʉr di ejɨ̂ʼ mílɔ̌b mé Nzyɛ̌m nyá, nye kábaa bisá bí émbɨa byé bíbyɛ̂h e mʉr dí edwe nyé milɛ́ʼlá nyá.

⁷Mʉ̌r sá ajéʼě sɨ̂: Nzyɛ̌m ápyéhɔɔ! Mpeʼ mbêl pemé dí ebe yɨ́, yé ó ngá sûʼla méde nyé ókpɛm má.

⁸Mʉr dí edû njwɨr myâ gá wɨ́ná nyá, óbi éswie duho ɨ́ bisyɛ́ɛla bi tɨ̂. Tó kœb ó, waá dí edû sá Sísǐm mé Nzyɛ̌m dí ekpɛl yɨ́ nyá, óbǐ twǐʼ njʉ̌m dǐ. Sísǐm mé Nzyɛ̌m ó dí entɨh nyé twiʼ yaá.

⁹Mɨná tôʼ dóló le esɨsâ gá bisyɛ́ɛla bimpâ, akâr. Mɨ́ná bé abîr gá bisyɛ́ɛla byaá nó, mɨná bé ódira gá nyɔm tɨ̂, píe mâ jɔʼ.

¹⁰Ɨ́ mpʉ yé dí nó yɨ́, mɨ́ná bí gá epʉ́la e tɨ̂ʼ nó, mɨná gbâʼ gá nkul ó, mɨná cwɨ́aa gá e bʉr bɨ́bɛ̂h. Sâ gwár, kʉ́ buú cwɨ́a gá e bʉr ó Mbɛ̌r-Nzyɛ̌m gá wɨ́ná, dí bʉr ó búʼó gwár bá.

¹¹Paá bee gá bikaŋá bínɨ́nɨ́ɨ́ mé mû lɨ́ ecɛma bɨ́n ɨ́ báánâʼ e mbó wâm mɛm mʉr tɨ̂ʼ bí!

¹²Bʉr o dí ekpɛl ényɨ̂n ótîtyěl bá, bé ó dí etíne bɨ́n ó, bɨ̌n tíʼaa mpʉ́n. Bé sá nó ó, bʉr nkʉ̂ bîr bɨ́ɛ l'atíblɔɔ. Bé lɨ́ ekpɛ́ɛ bʉ̂r o dí ebeně lɔ́ɔ dí edumo le eswie Krîst á dwe ɨ́ kolôs kʉ́ lɨ́.

¹³Tɔʼ e mʉr ngwár dí ebaʼle métié mé Moyɨ̂z. Damá jóʼǒ baá o dí etíne bɨ́n ó, bɨ̌n tíʼɔɔ mpʉ́n bá, bé bʉr o tɨ̂ʼ ntémé, bé abaʼle mê. Bé kpɛl yɨ́ɛ ó, bɨ̌n tíʼɔɔ mpʉ́n. Nó ó, bé ónkʉ́na ɨ́ bibam byé ólîʼ ɨ́ bipúnó bín bí.

¹⁴Yé sá abá kúnwo ɨ́ páʼ wâm ó, me nkʉ́naa ɨ́ sâ swîh. Me nkʉ́naa ɨ́ sɔ̂ʼ njɨ mbi éswie Tî gá wɨ́ná, Yésʉs-Krîst á dwe ɨ́ kolôs kʉ́ wɨ́. Eswie lé laá, lé ó b'á sâ ó, bisá bí sí yɨ̂, byé ayɨ́ kǎ be mé e nyɔm. Lɨ́ sâ ntémé ó, bʉr ó sí yɨ̂, bé ayɨ́ kǎ nʉa mé, gbâ ɨ́ nkɔb.

¹⁵Yé asyɛ́ɛlǎ sɔ̂ʼ nkʉ̂ mʉr, nyɨ́ tíʼɔɔ mpʉ́n, nkʉ̂ nyé atíʼɔɔ nyê. Bwaʼbwǎʼ sɔ̂ʼ, yé ó njɨ twiʼ édwán Nzyɛ̌m dí edwe mɨ́ná gá yɨ́.

¹⁶Bʉr bɨ́bɛ̂h o dí edû nzɨ́ nyɨ̂ʼ bá, bé ó dí ɨ́ mpǎŋ bʉr o b'Ɨ́zraɛ̂l mé Nzyɛ̌m. Nzyɛ̌m gbâʼ bé mepyɛbla ɨ́ miléme. Nye jɨ́ʼɨɨ bé nkoó.

¹⁷Táare ɨ́ báánâ, mʉr akǎ báʼǎ kɛl mé túú swîh, ebě, bibam mé dí e tɨ̂ʼ ɨ́ nyʉ̂l nyǎm bî, byé lɛ́ʼlé ó, me lɨ́ egúmo e Yésʉs.

¹⁸Bɨ́ɔɔ́ bâm! Okɛ́l bâm! Tî gá wɨ́ná, Yésʉs-Krîst, nye sʉ́ʼoo bɨ̌n metyɛʼ me mpóm mé ɨ́ milémé mín. Amɛn.