Read Koonzime Éfɛsɔs 3 Bible Online

Éfɛsɔs 3 - Koonzime bible

Éfɛsɔs 3

¹Nó, mɛm Pɔ̂l, mʉr dí mbʉʼ ɨ́ syɛ́ɛ́ mé Krîst ɨ́ lɔ̌b nyɔm wɨ́n, bʉr o dí abe óYúden bá nyá...

²Nzê bɨ̌n bé á bé así jóʼǒ mpʉ̌ Nzyɛ̌m á sâ ó, me díʼee syɛ̂l mesâ wé lɨ́ esú lɨ́n yɨ́ ɛ́? Nye á si kʉ sâ me mpam nyé, me nkʉ̂ di bɨ́n e nyɔm.

³Nye á níŋle me ɨ́ syɛ́ɛ́ yaá ó, ɨ́ jɔʼ gwár e gwár nyé á dwe me pɨʼ lɨ́ esimá yɨ́. Nye á sâ nó ó, me nkʉ̂ pâʼla bɨ́n lwǐb ódîm yé. Bɨ̌n gʉ́á nó ó e nzɨ̌ bwá mékǎn mé dí ecɛma bɨ́n mâ.

⁴Bɨ́n láá mékaná mâʼ nó, bɨ̌n bé ojʉ̂ʼrǎ sá mé mû sí gʉ́a ɨ́ pébébé, dumo e Krîst yɨ́. Sâ yaá, yé á nyɛɛ be ó lwǐb ódîm.

⁵Ɨ́ mimbú mí píhe, mimyǎ mi bʉ̂r ɨ́ buo buo, bé á bé agʉ́a épâʼlǎ solá lɔ̌b waá. Ɨ́ báánâ, Nzyɛ̌m mû kǎ gwîh wé ó e nzɨ̌ Sísǐm wé. Sísǐm mé Nzyɛ̌m nyɨɛ, nyě gwíh wé ó, kwá bʉr o mílʉ́mlʉ́ mé Yésʉs-Krîst, bé le ogwíha o mílɔ̌b mé Nzyɛ̌m. Bé gúmó ó e Nzyɛ̌m.

⁶Misolá mílɔ̌b myaá míɛ, myé ó mî: Mbɨambɨa Lɔ́ɔ mɨ́ná dí etúno gá wɨ́, wé sá ó, bɨ̌n, bʉr o bíkûl, bíʼee ntémé mepwaʼ mé Nzyɛ̌m, jala e nkɔb líʼe nyɨ́n, jwɨʼ gwár e gwár le oYúden. Bɨ̌n le onɔ́ɔ́ ó dí bitíl bí nyʉ̂l mpwár. Bɨ̌n le onɔ́ɔ́ ntémé bé óbeě mpʉ̌ Nzyɛ̌m ngá dira ménkɛ̌ʼ mé yɨ́.

⁷Nzyɛ̌m á si kʉ bu séa e nkul nyé kwá nyǎm ɨ́ buo buo, e nzɨ̌ mpam nyé. Nye á si dwe me sɔ̂ʼ, abe e myɛ́na. Sá tɨ̂ʼ, yé á be ó dǐ syɛ̂l mesâ wé.

⁸Ɨ́ sɔ́má bʉ̂r o bɨ́h le onɔ́ɔ́ dí egúmo e Nzyɛ̌m bá, bʉ́ʉ́ bɨ́bɛ̂h ó dí ejala le enyɛɛ́ gbáŋɔɔ ɨ́ nkɔb. Damá jóʼo nó, Nzyɛ̌m á si lɛ̂ʼle me mpam nyé, ó me túnaa Mbɨambɨa Lɔ́ɔ́ mé Yésʉs-Krîst kwá bʉr o dí abe óYúden bá, ó bé gʉ́ŋaa okúm le ogbaǎ Krîst dí enze mɨ́ná gá e wǎ wɨ́, nzamedwah e mpʉ wé dí agʉ́ŋɔɔ wɨ́wɛ̂h yɨ́.

⁹Nye á dwe me syɛ́ɛ́ ntémé ó, me pâʼlaa jwɨʼ nyé á boo tíʼe ɨ́ lémé wé yɨ́, pyêl yé ɨ́ myɛ́n. Nzyɛ̌m, mʉr á kuho bisá bíbyɛ̂h nyá, á nyɛɛ sol jwɨʼ yé yaá ɨ́ mimbú mí píhe ó, bʉr jóʼaa sɔ̂ʼ njɨ lwǐb ódîm, yé omér.

¹⁰Yé ka lîʼ ɨ́ báánâʼ ó, njɨ epâʼlǎ jwɨʼ yé yaá, pyêl yé ɨ́ myɛ́n lɨ́ esú lé écɨ̂l mísísǐm mí édúrʉ́ʉ́ mi dí e jwɨ́ɨ mí le myaá mi nkûl, myaá mi dí páʼ jʉ́o le ejwoo mí. Myé mû ó lɨ́ ekǎ jɨ̂ʼ yé kwá gá nyɨ́ná, bʉr ó Mbɛ̌r-Nzyɛ̌m, le egʉ́ǎ mpʉ ócwóó mé Nzyɛ̌m dí ɨ́ buo mímbi wɨ́.

¹¹Ɨ́ jɔʼ kʉ́ e sí, byé á be apǎ bě kuhá yɨ́, Nzyɛ̌m á boo tíʼe ɨ́ lémé wé ó, nye ónzě dirǎ jwɨʼ yaá ó, cɨɨ ɨ́ nzɨ̌ Tî gá wɨ́ná, Yésʉs-Krîst.

¹²Ɨ́ mpúhlá gá nyɨ́ná e Krîst, ɨ́ jɔʼ mɨ́ná dyéʼ gá koo e né yɨ́, mɨná bé lɨ́ epyâl gá kwá mé Nzyɛ̌m, abáawǒ sɔ̂ʼ, abe ntémé e yʉ́ʉ́ sá ngá ntɨ̂ʼ yɨ́.

¹³Sá tɨ̂ʼ ó mé dí ebene ó, bɨ̌n jóʼaa mebúʼ ɨ́ mitúú mé dí esia e myé lɨ́ esú lɨ́n mí yɨ́. Lɨ́ otyeetye, myê bɨ̌n ó sá bɨ́n jálá le enkʉ́na tɨ̂ʼ yɨ́.

¹⁴Sɨ́ǎ yaá ó mé dí ebɨʼ mébóó ɨ́ míh mé Nzyɛ̌m Sɔ́ŋ, jɨʼla e né ɨ́ lɔ̌b wɨ́n yɨ́.

¹⁵Mbɛ̌r bʉ̂r wɨ́wɛ̂h dí ɨ́ jʉ́o kʉ́ le kâʼ ɨ́ sí yɨ̂ʼ wɨ́, wé ó mbɛ̌r bʉ̂r Nzyɛ̌m Sɔ́ŋ á dwe njwɨr wé wɨ́.

¹⁶Mě jɨʼlá e né ó, nye gbâʼ bɨ̌n nkul ɨ́ milémé mín tʉ́ŋlʉ̌ e nzɨ̌ Sísǐm wé lɨ́ esú ó, bɨ̌n díʼee e nkul nyaá ɨ́ miléme lwɨ́ŋlá, lɨ́ edû mpwâʼ kûm nyé.

¹⁷Mě jɨʼlá ntémé e né ó, Krîst nʉ́aa odiá wé tʉ́ŋlʉ̌ milémé mín ɨ́ nzɨ̌ búʼó yɨ́n. Mě jɨʼlá e né ntémé ó, bɨ̌n kpɛ́laa páʼ nyɨ́n, bɨ̌n nkʉ̂ tyɛ̂b ɨ́ búʼó gá yɨ́ná ɨ́ lyahwó. Bɨ̌n tyɛ́bɨɨ tɨ̂ʼ mekʉ̌ sí ɨ́ sɨ́ŋ.

¹⁸Nó ntémé ó, bɨ́n e bʉr o mé Nzyɛ̌m bɨ́bɛ̂h ngá bi nkûl egʉ́ǎ kpɛ̌l ápurapúrǎ Krîst dí e yé ɨ́ páʼ gá nyɨ́ná yɨ́. Bɨ̌n gʉ́ŋaa mpʉ̌ kpɛ̌l yé dí esúʼo mɨ́ná gá ɨ́ menzɨ̌ mɨ́mɛ̂h yɨ́: le ebére kʉ́, le esulo sí, le ebwǎʼ bwaʼáa, le ejaá jaŋáa yɨ́.

¹⁹Mě jɨʼlá ntémé e Nzyɛ̌m ó, bɨ̌n gʉ́ŋaa mpwaʼ kpɛ̌l mé Krîst dí elaǎ sá yɨ́yɛ̂h mɨ́ná dí e nkul egʉ́a gá yɨ́, tó pyâl ɨ́ jɔ̌ʼ Nzyɛ̌m óbe, nye mû sí lóŋlo bɨ́n e sá nyé mʉr tɨ̂ʼ dí lwɨ́ŋlá e yé yɨ́.

²⁰Kûm díʼee e Nzyɛ̌m, waá dí e nkul esâ sá yɨ́yɛ̂h, laǎ bím mɨ́ná dí edî gá, nkʉ̂ jwɨʼ yɨ́ nyá. Nyě sá sá yɨ́yɛ̂h ó, dû nkûl nɨ́nɨ́ɨ́ dí eséa ɨ́ mɨná gá nyɨ́.

²¹Kûm díʼee e né e nzɨ̌ Mbɛ̌r-Nzyɛ̌m ti e Yésʉs-Krîst ntémé, tó pyâl ɨ́ mimyǎ mi bʉ̂r mímyɛ̂h njʉ̌m dǐ e njʉ̌m dǐ. Amɛn.