Read Koonzime Éfɛsɔs 4 Bible Online

Éfɛsɔs 4 - Koonzime bible

Éfɛsɔs 4

¹Nó, mɛm mʉr dí mbʉʼ mé Tî Yésʉs nyá, mě jɨʼlá e bɨ̌n ó, bɨ̌n dúʼoo mbɨambɨa kʉ̌ tyěn Nzyɛ̌m á jébe bɨ̌n ó, bɨ̌n dúʼoo wɨ́.

²Jɔrɨɨ gá menyʉ́l mɨ́n páʼ nyɨ́n. Diʼee gá bʉr o dí ɨ́ talǎ njwɨr bá, le bʉr o bíhwó. Júdúhwáá gá páʼ nyɨ́n ɨ́ lɔ̌b kpɛ̌l bɨ́n dí e yé yɨ́.

³Sísǐm mé Nzyɛ̌m tyɛ́bɨɨ bɨ̌n ɨ́ miléme, ó bɨ̌n díʼee e mepyɛbla páʼ nyɨ́n. Mépyɛbla maá, mé ódi bɨ́n simá ɨ́ miléme nó, sɔ́má gá yɨ́ná, yé ójaá di ó, njɨ gwár. Gbáʼ gá nkul, ó bɨ̌n díʼee lémé ngwár nó.

⁴Nyʉ̂l mé Krîst, nye ó mpwár. Sísǐm mé Nzyɛ̌m, nye ó ngwár. Mpûʼla mpwár ó dí bɨ̌n ɨ́ miléme, táare ɨ́ jɔ̌ʼ Nzyɛ̌m á jébe bɨ̌n yɨ́.

⁵Njwɨ́ɨ gá wɨ́ná, nye ó ngwár. Mɨná kam gá ó, búʼó gwár. Mɨná duŋɔɔ gá ó, ndubó ngwár.

⁶Waá dí Nzyɛ̌m bʉ̂r bɨ́bɛ̂h, dí ntémé Sɔ́ŋ bʉr bɨ́bɛ̂h nyá, nyé ó njɨ ngwár. Nye lɨ́ ejwɨ́ɨ̌ sá yɨ́yɛ̂h. Nye ntémé ó dí eséa, cɨɨ e nzɨ̌ sá yɨ́yɛ̂h. Nye ɨ́ sá yɨ́yɛ̂h.

⁷Mɨná gá óbɛ̂h, bé á be ó sí bi míndwéá mimbi mimbi lɨ́ edû mpʉ̌ Krîst nyɨɛ á ntɨh mɨná gá myǎ yɨ́.

⁸Sá tɨ̂ʼ ó yé dí cɛmá ó: Jɔʼ nyé á bɨ́nɔɔ ɨ́ jʉ́o kʉ́ yɨ́, nye á si ntaa ontɨ̂m le obɨn bé. Nye nzě tô e bé lɨ́ okómó. Nye ntɔ̂ʼ kab bʉ̂r ó sí mindwéá.

⁹(Ekǎn e dí ó: Nye á si bɨ́nɔɔ ɨ́ jʉ́o kʉ́ lɨ́, lé lɛ́ɛ́ yé? Nó yé ó, nye á si sulo, nî ɨ́ sí yɨ̂, bánǎ tó kpâhla ɨ́ sí yɨ̂ʼ tʉ́ŋlʉ̌.

¹⁰Mʉr á sulo ɨ́ sí yɨ̂ʼ nyá, nye ntémé ó b'á bére, laǎ jʉ́o, le ejwoo le baántɛ́n. Táare ɨ́ tyé yaá, nzě kumo ɨ́ gúmó yɨ́yɛ̂h, nye ó ngá jwɨ́ɨ̌ sá yɨ́yɛ̂h.)

¹¹Nye á be ɨ́ dwe bʉ̂r mindwéá mimbi mimbi. Nye nzě sâ ó, bâʼ bʉ̂r, bé díʼee bʉr o mílʉ́mlʉ́ mé Yésʉs; bâʼ bɨ́ɛ, ogwíha o mílɔ̌b; bʉ́ʉ́ bɨ́ɛ, otúna ó Mbɨambɨa Lɔ́ɔ; bʉ́ʉ́ bʉ̂r ntémé, otyɛ̂b bé ésôʼ ó Mbɛ̌r-Nzyɛ̌m; bʉ́ʉ́, olɛ̂ʼla o mílɔ̌b mé Nzyɛ̌m.

¹²Nyě sá nó ó, lɨ́ esú é bʉ̂r o mé Nzyɛ̌m, ó bé díʼee bʉr o dí e nkul elóŋlǒ syɛ́ɛ́ yé bá. Nyě lɛ́ʼlé bé esâ nó ó, lɨ́ esú lé édwě Mbɛ̌r-Nzyɛ̌m (dí nyʉ̂l mé Krîst wɨ́) megwɨ́e.

¹³Ɨ́ mbi waá ó, mɨ́ná gá óbɛ̂h ngá be gá ɨ́ mpúhlá, cɨɨ ɨ́ nzɨ̌ búʼó gwár yɨ́. Mɨná bé ógʉ́a gá Mwân mé Nzyɛ̌m ɨ́ pébébé. Mɨná bé ópʉʼa gá lɨ́ ontwǒm, tô gá lɨ́ obwam. Mɨná bé ócéne gá ɨ́ mipáʼ mímyɛ̂h, lɨ́ esûʼlǎ nʉǎ tyé mé Krîst mʉr tɨ̂.

¹⁴Jɔʼ yaá ó mɨ́ná ngá pʉʼa gá ɨ́ tyé bwá ó ntwǒm ɨ́ nkǒ páʼ búʼó yɨ́. Milɛ́ʼlá míswîh, myé ákǎ ntyeŋ mɨ́ná gâ, nkʉ̂ dímle mɨ́ná gá ɨ́ nzɨ̌ mikóo. Baányâ-mikóo baá, bé gwɨ́m ó, bé mɛ́rɨɨ mɨná gá ɨ́ mpila mépɨʼ yɔ́ɔ́, le ntémé ó, mɨná nʉ́aa gá bidyɛʼ byɔ́ɔ́.

¹⁵Tó kœb ó, mɨ́ná lɛ́ɛ́ gá otyeetye tʉ́ŋlʉ̌ kpɛ̌l nó, mɨná bé ógwɨ́e le ebwaʼ gâ, tótôʼ, tó pyâl ɨ́ jɔʼ mɨ́ná ngá di gá mbɨmá ɨ́ Krîst tʉ́ŋlʉ̌, mʉr pá dǐ lʉ̂ gá wɨ́ná nyá.

¹⁶Nye ó mʉr dí epûhla mɨ́ná gá óbɛ̂h, ó mɨná díʼee gá nyʉ̂l mpwár nyá. Bitíl bí nyʉ̂l byaá, nyě dirá byé ɨ́ mebɨ̌l ó e misihé. Misihé myaá ó dí entɛŋ bítíl bí nyʉ̂l bisâ bi dí byé e nyɔm bí. Sihé wɨ́wɛ̂h, wé ɨ́ jala le esúʼo nyʉ̂l ó, lɨ́ edû mpʉ̌ Nzyɛ̌m á komlo wɨ́haá yɨ́. Nkul nyé ó dí esâ ó, nyʉ̂l nyaá gwɨ́aa mbɨ̂mbɨá. Mpúhlá obûʼla, nye lɨ́ etô le egwɨ́e dóló ɨ́ jɔʼ bʉ̂r o dí tɨ̂ʼ bá dí ekpɛla yɨ́.

¹⁷Nó sá mé múo nzě lɛ́ɛ bɨ́n, le eboʼlo ɨ́ díé mé Tî Yésʉs yɨ̂, yé ó: mʉr adû gá kʉ̌ tyen óhááden dí edû wɨ́. Bé jaá sâ nó ó, njɨ ebě, ocwóó wɔ́ɔ́, wé ó dwêh.

¹⁸Sá écwólwo lɔ́ɔ́, lé akǎ siŋa. Bé mû ó e ncɛrá e twiʼ mé Nzyɛ̌m, tɨ̂ lɨ́ egʉʼla bé dí e lé lɨ́, le elele e míléme lɔ́ɔ́.

¹⁹Ɨ́ sɔ́ɔlʉ pɨ̂ʼ wɔ́ɔ́, bɨ́ swâhle mímbi mébébé mɨ́mɛ̂h lɨ́ esâ. Bé lɨ́ esâ bímolá nzam le ekomo. Bé sá ntémé ó, bisyɛ́ɛla bi dí edulo mpîr ɨ́ nyʉ̂l bí, abe e njɨ.

²⁰Ntʉ̌ mbi waá bɨ́n á lɛ̂ʼlɔɔ ɨ́ jɔʼ bɨ́n á jɨ̂ʼ etiʼe ɨ́ Krîst yɨ́.

²¹Bɨ̌n bé á si gwa kʉ jóʼo sá yɨ́yɛ̂h dí edumo e né yɨ́. Bɨ̌n bé á si lɛ̂ʼlɔɔ ɨ́ díé lé tʉ́ŋlʉ̌. Bé á lɛ̂ʼle bɨ̌n ó, bɨ̌n dúʼoo otyeetye dí ɨ́ milɔ̌b mé Yésʉs wɨ́.

²²Bɨ̌n e túmó koo e kʉ̌ tyen myâ wɨ́n, myǎh njʉ̌m nyʉ̂l bɨ́n á nyɛɛ be e né nyɨ́. Bigwɨ́má bí njʉ̌m nyʉ̂l nyaá, byé lɨ́ edímle bʉ̂r ɨ́ nzɨ̌ mikóo myɔ́ɔ́, tyen bé lɨ́ eswie.

²³Yé jala ó, bɨ̌n bíʼee edwán é pɨ̂ʼ, ndu e sísǐm dwân.

²⁴Bé á lɛ̂ʼle bɨ̌n ntémé ó, eswam nyʉ̂l dwân Nzyɛ̌m á komlo bɨ̌n nyɨ́. Bɨ̌n bé osûʼla bʉ̂r odwân ɨ́ twǐʼ Nzyɛ̌m mʉr tɨ̂ʼ á komlo lɨ́ esú lɨ́n yɨ́. Bɨ̌n bé otyɛ̂b le otîtyěl ompâ ɨ́ míh mé Nzyɛ̌m le edi bʉ̂r bé lɨ́ otyeetye.

²⁵Nó ó, mʉr, nyé ajala le ekǎ lɛ́ɛ mɨ́ɔɔ́ wé mʉr bibɛr. Nye lɛ́yɨɨ nye sɔ̂ʼ njɨ otyeetye, ebě, mɨná gá bé mû ó bitíl bí nyʉ̂l mpwár.

²⁶“Lémé lónó bɨ́n ɨ́ nkpaa nó, sá asâ gá yɨ́ɛ syóm.» Mʉ̂r kóbló bɨ́n ebúʼ nó, sá abîr gá ó, ebúʼ laá díʼee bɨ̌n ɨ́ miléme, tó pyâl ɨ́ medwíne mé pum.

²⁷Mʉ̌r sá adwe sɔ́ŋ meleme gúmó étyêl ébo.

²⁸Mʉr á bɨbe ndíblʉ̌ nyá, nye gwáʼaa díbe. Nye séaa syɛ́ɛ́ dí e nyɔm yɨ́, e mebó mé, ɨ́ mbi dí ó, nye díʼee e sá nyé ósúʼo báántéʼenteʼe o bʉ̂r e yé yɨ́.

²⁹Mʉr alwib gá ekǎn e dí e bibol tɨ̂ʼ lɨ́. Nye lwíbɨɨ njɨ sá ngá be e nyɔm lɨ́ esú lé égbâ bʉ́ʉ́ bʉ̂r pîm ɨ́ búʼó yɨ́. Nye jáa lwǐb njɨ sá dí ɨ́ mbɨa yɨ́, lɨ́ esú ó, Nzyɛ̌m sʉ́ʼoo bʉr o dí ejóʼo nyé bá metyɛʼ me mpóm.

³⁰Mʉr agbâ gá Sísǐm mé Nzyɛ̌m ebúʼ ɨ́ léme. Sísǐm waá, wé ó mpʉ̌ jwɨʼ nyé á gbâ ɨ́ bɨ̌n yɨ́. Nzyɛ̌m á gbâ bɨ̌n jwɨʼ yaá ó, bɨ̌n nkʉ̂ gʉ́a tɨ̂ʼ ó, nye ótáǎ góo, le edwih bɨ́n ɨ́ mpila ébébe, pɛʼ bɨ́n ɨ́ fá.

³¹Akǎ sâ gá otié. Pɛʼɛɛ gá ebúʼ, le nkpaa ɨ́ miléme. Syɛ́hláá gá megô ndu e melwɨ́ɨ. Pɛʼɛɛ gá ebébe é léme ɨ́ milémé mín.

³²Lɨlɛ́ʼláá gá mpam páʼ nyɨ́n, bɨ̌n óbɛ̂h. Jɨ́ʼɨ́ɨ́ gá bʉr bɨ́bɛ̂h ekpaa nkóó. Pɛʼɛɛ gá bibaa bí ébébe bɨ́n á pa niʼla bʉ́ʉ́ bʉ̂r bí, mpʉ̌ Nzyɛ̌m á pɛʼ byaá nyé á niʼe bɨ̌n ɨ́ nzɨ̌ mé Krîst bí yɨ́.