Read Koonzime Éfɛsɔs 5 Bible Online

Éfɛsɔs 5 - Koonzime bible

Éfɛsɔs 5

¹Baŋaa gá Nzyɛ̌m, ebě, bɨ̌n mû ó bwân nyé dí ekpɛl bá.

²Kpɛlaa gâ, mpʉ̌ Krîst á kpɛl mɨná gá yɨ́. Nye á si syɛ́ɛla twiʼ yé lɨ́ esú é bícwiʼ gá bíná. Nye á dwe twiʼ yé ó, nye díʼee mpʉ tír bé dí etíʼě Nzyɛ̌m tâŋ ndwéá nyá. Ndwéá waá, wé e menumó Nzyɛ̌m dí ɨ́ buú kpɛl má.

³Sâ gwár, mʉ̌r sá ajóʼo lʉ́ʉ́ dʉ́o ó, yé e nyʉ́ʉ́ mʉ̂r sɔ́má yɨ́n dí esâ bímolá nyá, nkʉ̂ byúú bísyɛ́ɛla bi dí edulo mpîr ɨ́ nyʉ̂l bí. Yé sá abe ntémé e mʉr dí etyěn lémé wé ɨ́ nzɔ́ɔ́ bísâ nyá. Bibɨ́bla bísyɛ́ɛla byaá, byé ajala e bʉr o dí egúmo e Nzyɛ̌m bá.

⁴Yé ajala ntémé ó, bɨ̌n lwíbɨɨ mekǎn mé ésɔ́m, nkʉ̂ lwǐb ógʉ̌, nkʉ̂ lwǐb bíswóólʉ́. Yé ajɨ ó, bɨ̌n sâʼ nó. Yé mbɨa ó, bɨ̌n dwêʼ Nzyɛ̌m nzyǒo.

⁵Gʉ́ŋáá gá ó, mʉr dí elœʼ nyʉ́l nyé ɨ́ nzɨ̌ bijoó nyá, le waá dí edulo mpîr ɨ́ nye mʉr tɨ̂ʼ nyá, le waá dí egbâ mîh ɨ́ bisá byé onkán bá, mʉr dí e mbi bísyɛ́ɛla byaá nyá, nye ákóʼó bi nkɔ̂b ɨ́ Mpóʼo mé Krîst, dí nyaá mé Nzyɛ̌m nyɨ́. Ɨ́ jɔʼ mʉ̂r gbá mîh ɨ́ bisá byé onkán yɨ́, syɛ́ɛla yaá kʉ́ lɛ̂ʼle ó, mʉr waá, nye lɨ́ edwe bíkpɛʼkpɛ̂ʼ bí ónzyɛ̌m kûm.

⁶Mʉ̌r sá adímle bɨ́n e nzɨ̌ lwǐb dí abe e nyɔm yɨ́. Bisyɛ́ɛla bí ébébe bínɨ̌ ó ngá sâ ó, Nzyɛ̌m lɛ̂ʼlaa nkpaa nyé kwá bʉr o dí egbɔba e né bá.

⁷Nó, anʉa gá ntœ̌b ɨ́ bisyɛ́ɛla bi bʉ̂r ónɨ̌.

⁸Ɨ́ mimbú mí píhe, bɨ̌n bé á bɨbe ó, lɨ́ edúrʉ́ʉ́. Nó ó, ɨ́ báánâ mpʉ bɨ́n mû sí pûhla e Tî Yésʉs yɨ́, bɨ̌n mû ó ɨ́ myɛ́n. Nó ó, dúʼóó gá kʉ̌ tyen dí ejala e bʉr o dí ɨ́ myɛ́n bá wɨ́.

⁹Mě lɛ́ɛ́ nó ó, ebě, bʉr o dí ɨ́ myɛ́n bá bɨɛ, bé lɨ́ egúmo mímbi mi mpúmó mímyɛ̂h: membɨa, otîtyěl, le otyeetye.

¹⁰Gʉ́ŋáá gá sá Tî Yésʉs dí ebeě mbɨ̂mbɨá yɨ́.

¹¹Mʉ̌r sá akǎ báʼǎ nʉa ntœ́b ɨ́ bisyɛ́ɛla bí édúrʉ́ʉ́. Bisyɛ́ɛla byaá, byé abe e nyɔm. Tinaa gá nkɔb nyɨ́n nyaá. Bɨ̌n a gwíh syóm dí tɨ̂ʼ wɨ́.

¹²Yé ɨ́ buú sâ mɨ́ná gá sôn lɨ́ etwóolo bísyɛ́ɛla bé dí esâ ɨ́ mesǒ bí, damá be ó, mɨná jaá túbo gá ó, njɨ míe!

¹³Jɔʼ mɨ́ná pyél gá bisyɛ́ɛla byaá ɨ́ mesǒ, tyen byé ɨ́ myɛ́n yɨ́, njʉl, wé lɨ́ enzě kʉn byê.

¹⁴Ebě, sá yɨ́yɛ̂h njʉl dí ekʉn yɨ́, yé mû ó lɨ́ epan mímbah. Sá tɨ̂ʼ ó bé dí elɛ́ɛ ó: «Gua mʉr dí ɨ́ jô nyá, jɨmáa. Duhaa ɨ́ sɔ́má ódwe. Krîst pánaa go mimbah, tyen gó ɨ́ myɛ́n» yɨ́.

¹⁵Nó gwá dwɛ̂ʼ gá kʉ̌ tyen bɨ́n dí edû wɨ́. Atiʼe gá mpʉ bígʉʼlʉgʉ́. Tiʼaa gá mpʉ mípɨpɨ́ʼ.

¹⁶Séáá gá mbɨ̂mbɨá ɨ́ mpǎŋ bijɔʼ bi dí epyâl bɨ́n bí, ebě, melú mɨ́ná dí etiʼe gá mâ, mé ɨ́ bébe.

¹⁷Mʉ̌r sá agʉʼla. Sáŋáá gá ó, bɨ̌n jɨ́ʼɨɨ bisyɛ́ɛla Tî Yésʉs á tíʼe ɨ́ lémé wé ó, bɨ̌n sâʼ bí.

¹⁸Mʉ̌r sá apuro ményoʼ, ebě, mʉr dí elɔ̂ʼwa lɨ́ ede ményoʼ nyá, nyě dímlé ó lʉ́ wé. Diʼee gá lwɨ́ŋlá e Sísǐm mé Nzyɛ̌m.

¹⁹Jyɛyɨɨ gá meswɨ̂ʼlʉ lɨ́ esú é Nzyɛ̌m, le mejéme, ndu e mejémé Sísǐm wé dí elɛ̂ʼle bɨ́n ó, bɨ̌n dyɛ́yɨɨ má. Jyɛyɨɨ gá mé lɨ́ esêʼle Tî Yésʉs, e milémé mín mímyɛ̂h.

²⁰Ɨ́ jɔʼ yɨ́yɛ̂h, dwéʼ gá Nzyɛ̌m Sɔ́ŋ nzyǒo ɨ́ sá yɨ́yɛ̂h, le epɨr e díé mé Tî gá wɨ́ná, Yésʉs-Krîst.

²¹Sɨ́sáʼ gá mejóʼo páʼ nyɨ́n, ebě, bɨ̌n bé lɨ́ edwáawǒ Krîst.

²²Bɨ̌n bʉbá, sáʼ gá mejóʼo le ojʉ́m bɨ́n mpʉ bɨ́n dí esâ Tî Yésʉs mejóʼo yɨ́.

²³Ebě, mʉrʉ̂m, nye ó lʉ́ mʉ́má wé, mpʉ̌ Krîst dí lʉ́ Mbɛ̌r-Nzyɛ̌m yɨ́. Krîst mʉr tɨ̂ʼ ó dí Tiʼbʉr ɨ́ pâʼ Mbɛ̌r-Nzyɛ̌m, dí nyʉ̂l nyé wɨ́.

²⁴Nó ó, jwɨʼ gwár mpʉ̌ Mbɛ̌r-Nzyɛ̌m dí esâ Krîst mejóʼo yɨ́, bʉbá, bé ɨ́ jala le esâ ójʉ́m bɔ́ɔ́ mejóʼo ɨ́ sá yɨ́yɛ̂h.

²⁵Bɨ̌n bʉrʉ̂m, mʉr nyɨnyɛ̂h, nye kpɛ́lɨɨ mʉmá wé mpʉ̌ Krîst á kpɛl Mbɛ̌r-Nzyɛ̌m yɨ́. Nye á si dwe twiʼ yé, lɨ́ ebúra e Mbɛ̌r-Nzyɛ̌m.

²⁶Nye á sâ nó ó, wé nkʉ̂ gúmo e Nzyɛ̌m, nyé osí jwɨɨ wé e medíbé ti e lwǐb yé.

²⁷Ebě, nye á kpɛl ó, nye tyélɨɨ wé ɨ́ míh mé ɨ́ nkɛ́lɛm: abe le ebar, nkʉ̂ milur, nkʉ̂ yʉ́ʉ́ sɔ̂ʼ dí ɨ́ bébe yɨ́. Wé ójaá gúmo ó, njɨ e né, abe e sá ébébe nyé ónwâhle wé e tɨ̂.

²⁸Nó, ɨ́ páʼ ójʉ̂m, bé kpɛ́lɨɨ bʉbá bɔ́ɔ́ jwɨʼ gwár e gwár e mpʉ bé dí ekpɛl bé bʉr o tɨ̂ʼ yɨ́. Waá nyɨnyɛ̂h kpɛ́l mʉ́má wé nyá, nyě kpɛ̌l ntémé ó nyʉ̂l nyé nye mʉr tɨ̂.

²⁹Abe e mʉr dí enwim nyʉ̂l nyé, nye mʉr tɨ̂. Nye lɨ́ edwidwe nyʉ̂l nyé mede le ebaʼle nyê. Mbi ngwár waá ó Krîst dí ebaʼlě Mbɛ̌r-Nzyɛ̌m yɨ́.

³⁰Ebě, mɨná gá bɨ́bɛ̂h, bé ó bitíl bí nyʉ̂l byé.

³¹Yê cɛmá ó: Sá tɨ̂ʼ ó mʉ́rʉ̂m óbɔ́ʼa e sɔ́ŋ, bé e nyɔ̌ŋ wé, tó pûhla e mʉmá wé yɨ́. Bé e nɔ́ɔ́ obá, bé ójaá kǎ sûʼla ó, ebɔ̂b e nzyeŋle, pʉ́m le ebo, púno gwár.

³²Wâm mbeá, mɛm Pɔ̂l ó wɨ̂: mɛ̌m bee ó, lwǐb ódîm nɨ̌ lɛ́ʼlé mɨ́ná gá ó, mveʼlě sá nɨ́nɨ́ɨ́ yɨ̂: lɔ̌b ébâ, wé mveʼle ó, Krîst, bé e Mbɛ̌r-Nzyɛ̌m.

³³Yé ntémé, yê ɨ́ páʼ wɨ́n ó: mʉrʉ̂m nyɨnyɛ̂h, nye ɨ́ jala le ekpɛl mʉ́má wé ánta nye mpʉ nyé dí ekpɛl nyé mʉr tɨ̂ʼ yɨ́. Mʉmá, nye dwáawaa njʉ̂m wé.