Read Koonzime Éfɛsɔs 6 Bible Online

Éfɛsɔs 6 - Koonzime bible

Éfɛsɔs 6

¹Bwân, sáʼ gá obyɛ̂l bɨ́n mejóʼo, ɨ́ mpúhlá nyɨ́n e Tî Yésʉs. Nó, yé ó tîtyěl.

²Etié e dí ó: «Dwéʼ sʉ́ŋ e nyʉ̌ŋ dúu» lɨ́, lé ó b'á nyɛɛ nze e menkɛ̌ʼ lɨ́ metié mɨ́mɛ̂h.

³Lé á dumlo ó: «Yé nkʉ̂ bě mbɨ̂mbɨá ɨ́ páʼ gô. Melú mé twiʼ gó ótiʼe ɨ́ sí yɨ̂ʼ má, mé nkʉ̂ buo.»

⁴Bɨ̌n osɔ́ŋ ó bwân, akóblokoblo gá bwán bɨ́n ebúʼ. Cɨ́lɨ́ɨ́ gá bê, lɨ́ edwe bé mpǎŋ lɛ́ʼlá mé Tî Yésʉs.

⁵Bitúʼǎ, bɨ̌n bé ɨ́ jala le esâ ójwɨ́ɨ bɨ́n, baá o dí bʉr ó sí yɨ̂ʼ bá, mejóʼo. Jwááwáá gá bê, le edwe bé dúu. Séáá gá bé e milémé mímyɛ̂h, mpʉ̌ sá lɛ́ɛ́, bɨ̌n séá ó Krîst syɛ́ɛ́.

⁶Mʉr aséa gá syɛ́ɛ́ njɨ ɨ́ jɔʼ bé dí epála nyé yɨ́. Mʉ̌r sá aséa lɨ́ esú é méswɨ̂ʼlʉ me bʉ̂r. Mpʉ bɨ́n mû osyɛ̂l o mésâ mé Krîst yɨ́, séáá gá bé syɛ́ɛ́, lɨ́ elóŋlǒ gwɨ́má mé Nzyɛ̌m, e milémé mín mímyɛ̂h.

⁷Séáá gá bé syɛ́ɛ́ e mpǎŋ gwɨ́má, mpʉ̌ sá lɛ́ɛ́, bɨ̌n séá ó Tî Yésʉs syɛ́ɛ́ yaá.

⁸Gʉ́ŋáá gá ó, mʉ̂r séá mpǎŋ syɛ́ɛ́ nó, Tî Yésʉs ódwe nyé myɛ́na tɨ̂, nyě damá bě túʼǎ, nkʉ̂ mʉr dí nzyɛh nyá.

⁹Bɨ̌n ojwɨ́ɨ, sáʼ gá bitúʼǎ bín bisyɛ́ɛla bimpwár bínɨ̌. Akǎ bɛ̂ŋ gá byê. Bɨ̌n bé ɨ́ jala le egʉ́a gá ó, njwɨ́ɨ wɨ́n le onɔ́ɔ́, bɨ̌n óbɛ̂h, nye ɨ́ jʉ́o kʉ́. Nye ádwááwó bʉ̂r mempǒm.

¹⁰Ekǎn lé épíhé mé mû o nzě lɛ́ɛ bɨ́n lɨ̂, lé ó, bɨ̌n gbâʼ nkul ɨ́ mpúhlá nyɨ́n e Tî Yésʉs. Biʼee gá pîm nɨ́nɨ́ɨ́, duho e né.

¹¹Bwáráá gá mimbór mí dɔ̂m Nzyɛ̌m dí edwe bɨ́n mí, mbi dí ó, jɔʼ sɔ́ŋ meleme ónzě sáa édímle bɨ́n ɨ́ nzɨ̌ mikóo myé yɨ́, bɨ̌n tyɛ́bɨɨ mekʉ̌ sí ɨ́ sɨ́ŋ.

¹²Ebě, yé abe ó, mɨná tɛ́l gá ó e bʉr ó sí yɨ̂. Mɨná lwímlá gá ó, le misísǐm mi dí milʉ̂ mí, le myaá mi nkûl, le myaá mi dí ejwɨ́ɨ ɨ́ mpóʼo edúrʉ́ʉ́ lɨ̂ʼ mí, le meleme me dí páʼ jʉ́o le ejwoo má.

¹³Sá tɨ̂ʼ ó mé dí elɛ́ɛ bɨ́n ó, nʉaa gá bisá bí dɔ̂m ɨ́ mebó mé Nzyɛ̌m yɨ́. Bébebébe móhó, wé ópyâl bɨ́n nó, bɨ̌n bé óbe e nkul elwímla. Bɨ́n óbe, sí lwímla, ɨ́ lwímla lwímla, ntaǎ sá yɨ́yɛ̂h nó, bɨ̌n bé otyɛ̂b mekʉ̌ sí ɨ́ sɨ́ŋ, apɨ́ŋla ɨ́ jɔʼ ébébe yaá.

¹⁴Nó, tyɛ́bɨ́ɨ́ gá ɨ́ tyé dɔ̂m, mekʉá ɨ́ binyâ. Bɨ̌n a dí le otyeetye. Wé óbe bɨ́n ó mpʉ káná dɔm, dí yémlá ɨ́ sɨ́ŋ lɨ́ odyɛ́m nyá. Diʼee gá ntémé otîtyěl o bʉ̂r. Otîtyěl waá, wé díʼee bɨ̌n mpʉ mímbór bínkóho bé dí ebwâr, myaá dí ekamle e bɨr mí.

¹⁵Diʼee gá minkʉmsá lɨ́ esú ó, bɨ̌n túnaa Mbɨambɨa Lɔ́ɔ dí egbâ bʉ̂r mepyɛbla ɨ́ miléme wɨ́. Túnó waá, wé díʼee bɨ̌n mpʉ óngʉb.

¹⁶Dyɛ́ʼwáá gá e Nzyɛ̌m. Ndyɛ́ʼwá waá, wé díʼee bɨ̌n mpʉ nkúo dɔm ngá dímě siʼe mékʉá me dɔ̂m mé Sátan nyɨ́.

¹⁷Biʼee gá twǐʼ njʉ̌m dǐ. Yé díʼee bɨ̌n mpʉ̌ ntʉ́m dɔ̂m. Bɨ̌n e nʉ́á lwǐb mé Nzyɛ̌m. Yé díʼee bɨ̌n mpʉ pâsôŋ Sísǐm mé Nzyɛ̌m dí etímle bɨ́n nyá.

¹⁸Sáʼ gá sâ yaá yɨ́yɛ̂h e minjɨʼla, le edî ó, Nzyɛ̌m súʼaa bɨ̌n. Jɨʼlaa gá ɨ́ jɔʼ yɨ́yɛ̂h ɨ́ mpʉ̌ Sísǐm mé Nzyɛ̌m dí etɨ́e bɨ́n yɨ́. Tɨ̂ʼ ntémé, atyɛʼ gá lɨ́ edi ɨ́ doho. Ɨ́ jɔʼ yɨ́yɛ̂h, tirwaa gá e syɛ́ɛ́ mínjɨʼla lɨ́ esú é bʉ̂r o mé Nzyɛ̌m bɨ́bɛ̂h.

¹⁹Jɨʼlaa gá ntémé e Nzyɛ̌m ɨ́ lɔ̌b wâm, ó nye dwêʼ me mekǎn mé lwíbɨɨ ɨ́ hwɨ́m, abáawǒ sɔ̂ʼ má. Me pâʼlaa lwǐb ódîm dí edumo e Mbɨambɨa Lɔ́ɔ yɨ́, bʉr gʉ́ŋaa yê.

²⁰Me, mʉr milʉ́mlʉ́, mû kɛ́ʼá ménkara ó, ɨ́ lɔ̌b Mbɨambɨa Lɔ́ɔ. Jɨʼlaa gá e Nzyɛ̌m, ó me pâʼlaa wé ɨ́ hwɨ́m mpʉ wé jálá le epâʼlɔɔ yɨ́.

²¹Tisikôs, mɨ́ɔɔ́ kpɛ̌l gá wɨ́ná, dí diâkɔn ɨ́ Tî Yésʉs nyá, nye ntémé ó dí mʉr ebúʼlɔɔ. Nye ólɛ́ɛ bɨ́n sá yɨ́yɛ̂h dí edumo e me yɨ́, le ɨ́ lɔ̌b syɛ́ɛ́ mé mû lɨ́ eséa yɨ́.

²²Mě lómló bɨ́n nyǎ ó, nye tôʼ lɛ́ɛ bɨ́n milɔ́ɔ́ mí twiʼ yɨ́h, le enzě gbâ bɨ́n pîm ɨ́ búʼó.

²³Nzyɛ̌m Sɔ́ŋ, bé e Tî Yésʉs-Krîst, bé gbâʼ bɨ̌n, bɨ́ɔɔ́ bɨ́h, mepyɛbla ɨ́ miléme, ti e kpɛ̌l ndu e búʼó.

²⁴Nzyɛ̌m sʉ́ʼoo bʉr bɨ́bɛ̂h o dí ekpɛl Tî gá wɨ́ná Yésʉs-Krîst, kpɛ̌l ápurapúra bá metyɛʼ me mpóm.