Read Koonzime Fílipi 1 Bible Online

Fílipi 1 - Koonzime bible

Fílipi 1

¹Yé ó mɛm Pɔ̂l, bɨ̌h e Timotɛ̂, osyɛ̂l o mésâ mé Yésʉs-Krîst. Bɨ̌h cɛmá ó bɨ̌n, bʉr bɨ́bɛ̂h o dí egúmo e Yésʉs-Krîst, baá bé á pûhla e né, le edǐ Fílipi bá. Bɨ̌h cɛmá ntémé ó, otyɛ̂b bé ésôʼ ó Mbɛ̌r-Nzyɛ̌m le odiâkɔn.

²Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ gá wɨ́ná, bé e Tî Yésʉs-Krîst.

³Me lɨ́ edwě Nzyɛ̌m wǎm nzyǒo jɔʼ yɨ́yɛ̂h mé dí esímsa bɨ́n yɨ́.

⁴Jɔʼ yɨ́yɛ̂h mé dí ejɨʼla lɨ́ esú lɨ́n yɨ́, mě jɨʼlá ó e bisʉhʉʉ.

⁵Ebě, mpʉ bɨ́n á syɛŋa mebô e me yɨ́, yé á be ɨ́ mbɨa. Bɨ̌n bé á si bâʼra e me lɨ́ etúnǒ Mbɨambɨa Lɔ́ɔ, táare ɨ́ dʉ́ó lé ésôʼ, kumo mûh.

⁶Me lɨ́ ekʉ́ gʉ́ǎ sá yɨ̂: ó Nzyɛ̌m, nyɨ́ táare édwir mílémé mín mbɨ̂mbɨá. Me lɨ́ egʉ́a ntémé ó, nye ótô le esâ nó, tó pyâl ɨ́ jɔʼ nyé ósîl ékomlo bɨ́n ɨ́ dʉ́ó Yésʉs-Krîst óbáʼǎ nze yɨ́.

⁷Yé jala ó, me pâhlaa lɔ̌b wɨ́n ɨ́ mbi waá, ebě, me lɨ́ ecwɨ́a e bɨ̌n ɨ́ buo buo. Nzyɛ̌m á si cwɨ́a e mɨná gá óbɛ̂h jwɨʼ gwár. Damá jóʼǒ mpʉ mé dí mbʉʼ yɨ́, damá jóʼǒ mpʉ mé dí eboʼlǒ Mbɨambɨa Lɔ́ɔ́ mé Nzyɛ̌m yɨ́, metyɛʼ me mpóm mé Nzyɛ̌m, mé lɨ́ eswɨɨ ɨ́ mɨná gá ó tɨ̂.

⁸Á dǐ bee mɨ́ná gá mû ó gúmo gwár! Nzyɛ̌m, nye me ó mboʼlo! Me lɨ́ ekpɛl bɨ́n bɨ́bɛ̂h mpʉ̌ Yésʉs-Krîst dí ekpɛl bɨ́n yɨ́.

⁹Minjɨʼla mé dí ejɨʼla lɨ́ esú lɨ́n mí, myé ó: ó kpɛ̌l yɨ́n, yé bwáʼaa bwaʼáa. Kpɛ̌l yɨ́n, yé gwɨ́aa lɨ́ ocwóó le pɨʼ.

¹⁰Sá tɨ̂ʼ ó bɨ́n ngá gʉ́a épɛ̂h bísâ bi dí ɨ́ buú mbɨa bí yɨ́. Ɨ́ jɔʼ Krîst óbáʼǎ nze yɨ́, nye ókœb ó, bɨ̌n mû ó e miléme ɨ́ sɔ́ɔ́ɔ́, abe e mebě.

¹¹Nó ó bɨ́n ngá di ótîtyěl o bʉ̂r lɨ́ edû kʉ̌ tyen mpâ ɨ́ mpúhlá nyɨ́n e Yésʉs-Krîst yɨ́. Bʉr, bé óbuú dwě Nzyɛ̌m kûm le esêʼle nyé ɨ́ lɔ̌b wɨ́n.

¹²Nó ó, bɨ́ɔɔ́ bâm, mě gwɨ́m ó, bɨ̌n gʉ́ŋaa ó, sá yé á pyâl me yɨ́, yé ó b'á tíne Mbɨambɨa Lɔ́ɔ ó, wé báʼa myaŋla.

¹³Odwéela o mímbʉʼ bɨ́bɛ̂h dí wâʼ kwá mé njwɨ́ɨ bá, bé e bʉr oswîh, bé mû ó lɨ́ eboó gʉ́a ó, me ó mbʉʼ ɨ́ lɔ̌b syɛ́ɛ́ mé Krîst mé dí eséa yɨ́.

¹⁴Mpʉ mé dí wâʼ ɨ́ mbʉʼ wɨ̂ʼ yɨ́, yé lɨ́ esâ ó, bʉ́ʉ́ bɨ́ɔɔ́ gá bɨ́ná, bé dyɛ̂ʼwaa e Tî Yésʉs. Bé lɨ́ ebánǎ lɛ́ɛ̌ lɔ́ɔ́ mé Nzyɛ̌m ɨ́ hwɨ́m, abáawǒ sɔ̂ʼ. Bé lɛ́ɛ́ wé ó, laǎ bím bé á nyɛɛ lɨlɛ́ɛ wé yɨ́.

¹⁵Yê tyeetye ó, bâʼ bʉ̂r, bé lɨ́ etúnǒ lɔ́ɔ́ mé Krîst ɨ́ lɔ̌b nzwíí, bɨ́ɛ lɨ́ edǐ pɨra e me, ebě, bé kpɛl ó, bé lwíbɨɨ, laa mê. Bʉ́ʉ́ bʉ̂r bɨ́ɛ tútúnó wé ó e mpǎŋ gwɨ́má.

¹⁶Bé sá nó ó, ɨ́ lɔ̌b kpɛ̌l bé dí ekpɛl mé yɨ́, lɨ́ egʉ́a ó, Nzyɛ̌m á dil me wâʼ ó, me nkʉ̂ kamle e Mbɨambɨa Lɔ́ɔ.

¹⁷Nó ó, bʉr ónɨ̌, bé lɨ́ etúnǒ lɔ́ɔ́ mé Krîst ó, lɨ́ epɨra e me. Sâ yaá, yé aduho bé ɨ́ milémé mímpâ. Bé lɨ́ epɨra e me, bɨ́ɛ lɨ́ ejwɨʼ ó, bé óko mé túú swîh tyé yɨ́yɛ̂h mé dína ɨ́ mbʉʼ yɨ́.

¹⁸Yé alɛ́ɛ mé sɔ̂ʼ. Me ó lɨ́ bisʉhʉʉ ɨ́ lɔ̌b waá, ebě, bé lɨ́ etúnǒ lɔ́ɔ́ mé Krîst. Wé mû ó lɨ́ etúnɔɔ e menzɨ̌ mɨ́mɛ̂h, damá jóʼo ó e nyaá mikóo, damá be ó e nyaá mpâ. Me óbáʼǎ tô dóló le esoho,

¹⁹ebě, me lɨ́ egʉ́a ó, me óbeě twiʼ, duho ɨ́ minjɨʼla mín, duho ntémé ɨ́ kɔmlʉ́ Sísǐm mé Yésʉs-Krîst dí ekamle e me wɨ́.

²⁰Mě e mpûʼla ɨ́ léme ó, me ákóʼó sɔ́ma bá ɨ́ yʉ́ʉ́ syɛ́ɛla yâm e yʉ́ʉ́. Me ntémé, mě e mpûʼla ó, me ótô le edû kʉ̌ tyen mpâ ɨ́ hwɨ́m, abáawǒ sɔ̂ʼ mpʉ mé á boo sɨsâ yɨ́, lɨ́ esú ó, bʉr tôʼ dóló le egúmlǒ Krîst. Mě damá tiʼe, nkʉ̂ ntémé dwe, bé ótô le egúmlǒ Krîst ɨ́ lɔ̌b wâm.

²¹Nó ó, ɨ́ wâm pâʼ, twiʼ yâm, yé ó Krîst. Myɛ́na mâm, mé ó eswie.

²²Mé ótô le etiʼe mʉ́ʉ́ mélû ɨ́ nkǒ páʼ nyʉ̂l bipúno nó, me óbee émbɨa tɨ̂ʼ lɨ́ eséa bísyɛ́ɛ́ bíswîh ɨ́ melû me dí enze má. Sá tɨ̂ʼ ó mé dí apǎ gʉ́ǎ sá mé ópɛ̂h yɨ́.

²³Me ó lʉ̂ ɨ́ nzamá páʼ ménzɨ̌ mebá maá. Ɨ́ wɨ̂ʼ pâʼ, me lɨ́ egwɨ̂m émɔa ɨ́ bʉ̂b, tó gbala kwá mé Krîst. Sâ yaá ó dí ɨ́ buú mbɨa.

²⁴Ɨ́ gúú pâʼ, yé lɨ́ ebuú jɨ ó, me báʼa tiʼe mʉ́ʉ́ mélû ɨ́ sí yɨ̂ʼ ɨ́ lɔ̌b nyɔm wɨ́n.

²⁵Ebe mé dí ekʉ́ gʉ́a nó, me lɨ́ egʉ́a ntémé ó, me ótô le etiʼe. Mɨná bé ódi gá ɨ́ twiʼ. Yé óbe bɨ́n e nyɔm, ó bɨ̌n tôʼ dóló le esoho ɨ́ búʼó.

²⁶Nó ɨ́ jɔʼ mé óbáʼǎ nzě dǐ bǎʼ e bɨ̌n yɨ́, bɨ̌n bé óbuú soho ɨ́ syɛ́ɛlǎ Yésʉs-Krîst dí esâ mé yɨ́.

²⁷Sâ gwár, dúʼóó gá kʉ̌ tyen dí ejala e bʉr o dí ebúʼlǎ Mbɨambɨa Lɔ́ɔ́ mé Krîst bá wɨ́. Bɨ́n sá nó wá, me ókpɛl éjóʼǒ lɔ́ɔ́ búʼó yɨ́n ó, bɨ̌n dína ó ɨ́ mpúhlá e nzɨ̌ Sísǐm ngwár. Bɨ̌n bé lɨ́ egbâ nkûl lɨ́ edi e léme ngwár, le etye ɨ́ nzɨ̌ búʼó mpʉ̌ Mbɨambɨa Lɔ́ɔ dí elɛ̂ʼle yɨ́. Mě damá nze, nzě bee bɨ́n, nkʉ̂ ntémé di wâ, me ójóʼo yɨ́ɛ lɔ́ɔ́ tɨ̂.

²⁸Mě kpɛl éjóʼo ntémé ó, bɨ̌n bé akǎ jóʼo ékɛ̂n lɨ́ ontɨ̂m le obɨn bɨ́n. Mpʉ bé dí ebene bɨ́n, bɨ̌n bɨɛ l'akpɛ́ɛ bé yɨ́, yé ó dǐm éswie lɔ́ɔ́, ó bé ódîm. Ɨ́ páʼ wɨ́n wɨ́ɛ, yé ó jwɨʼ dí elɛ̂ʼle ó, bɨ̌n bé e twǐʼ njʉ̌m dǐ Nzyɛ̌m dí edwe yɨ́.

²⁹Nzyɛ̌m á dib bɨ̌n nzɨ̌ ó, bɨ̌n gúmlaa Krîst, abě njɨ ɨ́ jɔʼ bɨ́n dí ebúʼla nyé yɨ́, kʉ́ buú be ntémé, ɨ́ jɔʼ bɨ́n dí esia e mitúú ɨ́ mpúhlá nyɨ́n e nɔ́ɔ́ yɨ́.

³⁰Nó ó, bɨ̌n mû ó lɨ́ elwímla dɔ̂m empwár bɨ́n á bee me lɨ́ elwímla lɨ́. Mpʉ bɨ́n dí egʉ́a yɨ́, me dína ó, lɨ́ etô dóló le elwímla lê.