Read Koonzime Fílipi 2 Bible Online

Fílipi 2 - Koonzime bible

Fílipi 2

¹Búʼó bɨ́n dí ebúʼlǎ Yésʉs-Krîst yɨ́, yé así gbâ bɨ̌n nkul ɨ́ miléme ɛ̌? Kpɛ̌l yé, yé así dwe bɨ́n nkul ɨ́? Nzê bɨ̌n bɨ́ pûhla e Sísǐm mé Nzyɛ̌m? Bɨ̌n bé así kpɛla le ejɨ̂ʼ nkóó páʼ nyɨ́n? Mpʉ yé dí nó yɨ́,

²diʼee gá e lwǐb gwár. Kpɛlaa gá páʼ nyɨ́n. Diʼee gá e léme ngwár, twíí mpwár. Bɨ́n sá nó wá, yé óbuú dwe mé bisʉhʉʉ.

³Apɨra gá páʼ nyɨ́n. Ankɛ́ɛ gá menyʉ̂l páʼ nyɨ́n. Mʉr nyɨnyɛ̂h, nye dwêʼ bʉ́ʉ́ bʉ̂r dúu, laǎ mpʉ nyé dí ebee nyé mʉr tɨ̂ʼ yɨ́.

⁴Mʉr nyɨnyɛ̂h ɨ́ sɔ́má yɨ́n, nyě sá agwɨ̂m sá yé óbe nyé e nyɔm yɨ́. Mʉr nyɨnyɛ̂h ɨ́ sɔ́má yɨ́n, nye tóŋlaa ntémé sá bʉ́ʉ́ bʉ̂r, bé ódirǎ nyɔm e tɨ̂ʼ yɨ́.

⁵Diʼee gá e lémé kpɛ̌l, mpʉ̌ Yésʉs-Krîst á kpɛl bɨ̌n yɨ́!

⁶Nye á boo be ó, mbi mʉ̂r wé á be jwɨʼ gwár e gwár e Nzyɛ̌m wɨ́. Nó, nye á bé abee ó mpʉ bé e Nzyɛ̌m, bé á be mityé yɨ́, nye á dɛn dǐ tyé Nzyɛ̌m yé yaá ó, dɛnɨ́ɨ.

⁷Líʼe nó, nye á si dwih nyʉ̂l ɨ́ tyé mbi mʉ̂r waá ɨ́ menzɨ̌ mɨ́mɛ̂h, kǎ sûʼlǎ dǐ tyé túʼǎ mʉ̂r. Náǎ yé ó, nye á be ó, nye mû mʉr mpʉ mɨ́ná gâ.

⁸Ɨ́ twiʼ mʉ̂r nyé á nʉa yɨ́, nye á si jɔr nyʉ̂l nyé. Nye á si sâ Nzyɛ̌m mejóʼo, damá jóʼo nyé á lómo nye ó, nye ntáa dwě bébebébe eswie ɨ́ kolôs kʉ́.

⁹Sá tɨ̂ʼ ó Nzyɛ̌m á bu bɨ̂n nye kʉ́, dwe nyé nkul jwɨ́ɨ ɨ́ bisá bíbyɛ̂h yɨ́.

¹⁰Nye á dwe nye byǎ ó, mʉr nyɨnyɛ̂h bɨ́ʼɨɨ nye mebóó sí, dwe nyé kûm. Bisá bíbyɛ̂h, byé ódwě Yésʉs kûm, táare e bisá bíbyɛ̂h bi dí ɨ́ jʉ́o kʉ́ bí, kala e byaá bi dí ɨ́ sí yɨ̂ʼ bí, dumlo e byaá bi dí tʉ́ŋlʉ̌ bwǎh bí.

¹¹Nó ntémé ó mʉ̂r nyɨnyɛ̂h ókam ó, Yésʉs-Krîst ó dí Tî yɨ́. Nye ósâ nó ó, lɨ́ ebeʼ kûm mé Nzyɛ̌m Sɔ́ŋ.

¹²Nó, osó bâm ɛ̌, bɨ̌n bé á be ó sí sâ Nzyɛ̌m mejóʼo ɨ́ jɔʼ mɨ́ná bé á be gá gúmo gwár yɨ́. Nó ɨ́ báánâ, ɨ́ mpʉ mé dí akǎ be kwá nyɨ́n yɨ́, bɨ̌n bé ɨ́ jala le etô dóló le esâ nó. Nzyɛ̌m, nyɨ́ tiʼ bɨ́n. Nó, séáá gá e bʉ́á le osâʼsâʼ lɨ́ esú ó, bɨ̌n dúʼoo kʉ̌ tyen waá.

¹³Ebě, Nzyɛ̌m ó dí edwe bɨ́n gwɨ́má édû nzɨ́ mpâ nyaá. Nye ntémé ó dí edwe bɨ́n nkul ó, bɨ̌n jánaa tɨ̂ʼ mbɨ̂mbɨá.

¹⁴Sáʼ gá sá yɨ́yɛ̂h abe e ntʉ̌, nkʉ̂ mpɨ̌r!

¹⁵Sá tɨ̂ʼ ó bɨ́n óbe, abe e mebě yɨ́. Bɨ̌n bé óbe ó e miléme ɨ́ sɔ́ɔ́ɔ́, kwahaá bwán mé Nzyɛ̌m. Bɨ̌n bé ábe e sá ébébe bé ónwâhle bɨ́n e tɨ̂. Témé memɔ́ʼ mé ónzyɛ́h ó bʉ̂r o b'á dîm bá, bɨ̌n bé óbuú pǎn myɛ́n mpʉ ócwícwén ɨ́ jʉ́o kʉ́.

¹⁶Bɨ̌n bé ólɛ̂ʼle bé milɔ̌b mí twiʼ. Nó ó mé óbe e sá énkʉ́na tɨ̂ʼ ɨ́ móhó Krîst óbáʼǎ nze wɨ́. Me ógʉ́a ɨ́ jɔʼ yaá ó, lelelelě syɛ́ɛ́ mé á séa yɨ́, yé á bé adwě ntuʼ.

¹⁷Bɨ̌n mû ó lɨ́ esâ Nzyɛ̌m sá nyé dí egwɨ̂m yɨ́, duho ɨ́ búʼó yɨ́n. Bɨ̌n bé lɨ́ ekɛha bítwiʼ bín ɨ́ nzɨ̌ búʼó nyaá e bisʉhʉʉ ɨ́ miléme, lɨ́ ekʉ mɛɛla ebe míndwéá mín myaá. Me lɨ́ esoho e bɨ̌n, metié mâm lɨ́ eswɨɨ̌ si ntémé, ó mé pûhlaa e mindwɛ́á mín.

¹⁸Jwɨʼ gwár e gwár yaá ntémé e bɨ̌n, bɨ̌n bé lɨ́ esoho e me ɨ́ jɔʼ mé ndɨ́ ɨ́ bisʉhʉʉ yɨ́.

¹⁹Tî Yésʉs, nye lɨ́ egbâ mé mpûʼla ɨ́ léme ó, me mû ó kúno elómlo bɨ́n Timotɛ̂. Me óbuú soho ɨ́ jɔʼ mé ójóʼǒ lɔ́ɔ́ wé óduho gʉ̂, dumo e sɔ́má yɨ́n wɨ́ yɨ́.

²⁰Mé abe e mʉr swîh mpʉ mé Timotɛ̂. Bisyɛ́ɛla bi dí edwɛ̂ʼ nyɔm wɨ́n bí, byé lɨ́ ekʉ́ pálwo nyé ɨ́ léme.

²¹Ebě, bʉ́ʉ́ bʉ̂r bɨ́ɛ sáá ó, njɨ minyɔm myɔ́ɔ́. Bé ójóʼǒ sá dí edumo e Yésʉs-Krîst yɨ́ nó, bé anʉa yé, gbâ ɨ́ nkɔb.

²²Bɨ̌n bʉr o tɨ̂, bé lɨ́ egʉ́ǎ mbɨambɨa kʉ̌ tyěn Timotɛ̂ á dû wɨ́ le mpʉ nyé dí me mpʉ mwân yɨ́, ebě, nyɨ́ dûhwǒ syɛ́ɛ́ bɨ́h e né dí eséa lɨ́ etúnǒ Mbɨambɨa Lɔ́ɔ yɨ́.

²³Nó ó, nye ó waá mé dí ebúʼla ó, me óntɨh bɨ́n nyǎ ɨ́ jɔʼ mé óbeě mpʉ mílɔ̌b myâm ngá tíʼɔɔ yɨ́.

²⁴Tî Yésʉs, nyɨ́ gbâ mé mpûʼla ɨ́ léme ó, me ntémé ónzě bee bɨ́n kám e kám.

²⁵Nó ó, yé á jɨ ó, me bwóolaa bɨ̌n Epafrɔ́ditɔs, mɨ́ɔɔ́ gá wɨ́ná. Bɨ̌h e nɔ́ɔ́ ó dí eséǎ syɛ́ɛ́ le elwímla ɨ́ lɔ̌b mé Yésʉs-Krîst. Bɨ̌n bé á ntɨh me nyǎ ó, ɨ́ lʉ́mlʉ́ wɨ́n, ó nye ntáa nzě súʼo mé e bisá byé á sâ me sɔ́ɔlʉ bí.

²⁶Nye lɨ́ ekpɛl ébee bɨ́n óbɛ̂h. Nye á be ntémé ó, lɨ́ esyɛ̌l bá ɨ́ léme, ebě, bɨ̌n bé á si jóʼo ó, nye á be ó mbêl.

²⁷Nye á si kʉ bíle! Nye á duho ó ɨ́ ka sóo. Sâ gwár, Nzyɛ̌m á si jɨ̂ʼ nye nkoó. Abe nyé e nye, ndu e mɛm mʉr tɨ̂ʼ ntémé. Nye á tiʼ nye ó, ebě, nye á si kamle e me. Nye á bé akam ó, me báʼa kǎ buú jóʼo ébúʼ, ntaǎ njɨ.

²⁸Nó ó, léme, wê me ɨ́ báná báná ó, me bwóolaa bɨ̌n nyǎ, bɨ̌n nkʉ̂ báʼǎ soho ɨ́ buo buo ɨ́ jɔʼ bɨ́n óbee nyé yɨ́. Mɛm ntémé, me ákǎ buú syɛ̌l bá ɨ́ páʼ wɨ́n.

²⁹Nó ó, jɔʼ nyé ópyâl ɨ́ sɔ́má yɨ́n yɨ́, bɨ̌n e nʉ́á nyé e bisʉhʉʉ bíbyɛ̂h ebe nyé dí mɨ́ɔɔ́ gá wɨ́ná ɨ́ mpúhlá e Tî Yésʉs. Dwéʼ gá mbi bʉ̂r o dí mpʉ mé Epafrɔ́ditɔs bá dúu.

³⁰Ebě, nye á be ó sí gwá dwe ɨ́ lɔ̌b syɛ́ɛ́ mé Krîst. Nye á gwa dwe ó, lɨ́ enzě kɛm mê, lɨ́ enze mé e mingúlá bɨ́n á be abe e nkul edwe mé mí.