Read Koonzime Fílipi 3 Bible Online

Fílipi 3 - Koonzime bible

Fílipi 3

¹Bɨ́ɔɔ́ bâm! Okɛ́l bâm! Me lɨ́ esûʼlǎ lɛ́ɛ bɨ́n ó, sohaa gá ɨ́ mpúhlá nyɨ́n e Tî Yésʉs. Yé akɔbla mé ó, me báʼa cɛmǎ sá mê nyɛɛ cɛmá bɨ́n yɨ́. Yé ntémé ó mé múo nzě sâ lɨ́ esú é nyɔm wɨ́n yɨ́.

²Cɨ́áá gá bibɨ̂bla bílóbila byaá. Cɨ́áá gá ompyê baá. Cɨ́áá gá bʉr o dí etíʼe bʉ̂r mpʉ́n lɨ́ ebébe bá.

³Mɨná gá bɨɛ ó dí e mpǎŋ tíʼá mpʉ́n, waá Nzyɛ̌m mʉr tɨ̂ʼ dí etíʼe wɨ́. Mɨná gá ó dí edwě Nzyɛ̌m kûm ɨ́ Sísǐm wé tʉ́ŋlʉ̌. Mɨná jaá nkʉ́na gá ó, njɨ ɨ́ Yésʉs-Krîst. Mɨná bé adyɛ̂ʼwo gá e bisyɛ́ɛla bi bʉ̂r ó sí yɨ̂.

⁴Me óbɛ̌m bûʼla mɛ̂m mʉr tɨ̂. Yé bé yé e nyʉ́ʉ́ mʉ̂r dí e nkul egúmlo nyé mʉr tɨ̂ʼ ɨ́ lɔ̌b bípúnó byé nó, lɛ́ɛ́, me ó dí elaa nyê.

⁵Me á byɛ̂l ó, ɨ́ kúl bʉ̂r o b'Ɨ́zraɛ̂l, ɨ́ mbɛ̌r bʉ̂r mé Benjamin, nyɛ̂r Ebrœ̂. Me á tíʼɔɔ mpʉ́n ó, me mû e melû mwom lɨ́ ebyɛ̂l lâm. Me á si nî ɨ́ sɔ́má óFarizyɛ̂n, lɨ́ esâ sɨ́n lɨ́ ebaʼle métié.

⁶Me á si bu tíble Mbɛ̌r-Nzyɛ̌m. Ɨ́ nkǒ páʼ métié, me á be ó tîtyěl mʉr, abe le etié egwár lé á mɛ̂r me.

⁷Me á dwɛ̂ʼ ɨ́ jɔʼ yaá ó, bisâ byaá. Me nzě kǎ bee ó, Krîst ó dí e nyɔm, laa byê. Bíɛ, byé ó tʉ̂toʼó.

⁸Yé ó nó! Me mû lɨ́ ebee bísâ byaá bíbyɛ̂h ó, byé ó dwêh, ebě, sá dí ɨ́ buú mbɨa yɨ́, yé ó, me dúʼoo Yésʉs. Me á si gwa sû mpǎŋ bisɔ̂ʼ, ebě, sá dí ɨ́ buú mbɨa yɨ́, yé ó, me gʉ́ŋaa Tî wǎm Yésʉs-Krîst. Ebe mé dí edyɛ̂ʼwo e né, me á si bîr bisá bíbyɛ̂h byé á nyɛɛ be e nyɔm ɨ́ páʼ wâm bí. Nó ó, me mû bee byé ó, mpʉ̌ sá jálá le emyahɔɔ̌ dwǐʼ yɨ́. Mě bír byé nó ó, jáŋá me nkʉ̂ bi mâm myɛ́na. Mé óbe ó Krîst.

⁹Mě gwɨ́m ó, yé nyɨ́nɨɨ mpʉ bɨ́h e Krîst mû ɨ́ mpúhlá yɨ́. Mé agwɨ̂m ébi nkâm ɨ́ míh mé Nzyɛ̌m ɨ́ lɔ̌b mbaʼlá métié. Mě gwɨ́m ó, Nzyɛ̌m dwêʼ me nkam ɨ́ lɔ̌b búʼó mé dí ebúʼlǎ Krîst yɨ́.

¹⁰Sá mé dí egwɨ̂m yɨ́, yé ó, me gwâ gʉ́ǎ Krîst. Mě gwɨ́m ntémé ó, Nzyɛ̌m séaa ɨ́ me mpʉ nyé á séa e nkul lɨ́ epɛ̌h Yésʉs-Krîst yɨ́. Me síaa e mitúú mímpwár Krîst á bi mí. Eswie lâm nkʉ̂ nwɨɨla ntémé e laá lé.

¹¹Ebě, mpûʼla, nye me ɨ́ léme ó, me ntémé, me ópah, bǐ twiʼ.

¹²Mé apǎ be e nkul elɛ́ɛ ó, me mû ó sí swim, pyâl lɨ́ odumo. Sâ gwár, me lɨ́ etô dóló le egbâ nkûl ó, me nkʉ̂ jala le myɛ́na mé kám, ebě, Yésʉs Krîst mû ó sí boó mɛ̂r mê.

¹³Bɨ́ɔɔ́ bâm! Okɛ́l bâm! Mé apǎ bûʼla ó, mɨ́ nʉa myɛ́na mé dí egwɨ̂m má. Sá mé dí ejaá sœ̂ŋ yɨ́, yé ó, me jɨ́haa bisá bí píhe, kǎ tyěn lémě nko bísá dína me dóló bí.

¹⁴Me lɨ́ egbâ nkûl lɨ́ etô dóló, tó pyâl lɨ́ odumo. Me lɨ́ egwɨ̂m ébi myɛ́na mé Nzyɛ̌m nyé dí ejébe mɨ́ná gá ó, mɨná tô bi gá, cɨɨ ɨ́ nzɨ̌ mé Yésʉs-Krîst má. Mé ó komá ɨ́ jʉ́o kʉ́.

¹⁵Mɨná gá óbɛ̂h, bʉr o mû sí tɔ́ma bá, mɨná bé ɨ́ jala le edi gá e mbǐ jwɨʼ gwár nɨ̌. Nzyɛ̌m ntémé ó ngá lɛ̂ʼle bɨ́n jwɨʼ yaá.

¹⁶Mɨná dúʼoo gá nzɨ̌ mpwár mɨ́ná dí gá tɨ̂ʼ ɨ́ báánâʼ nyɨ́, jɔʼ yɨ́yɛ̂h.

¹⁷Bɨ́ɔɔ́ bâm! Okɛ́l bâm! Baŋaa gá me, bɨ̌n óbɛ̂h. Mɨ́ dwe bɨ́n mveʼle. Nó ó, bɨʼɨɨ gá míh mɨ́n ɨ́ bʉr o dí etiʼě mpʉ̌ mveʼle yaá dí yɨ́ bá. Bɨ̌n e dú bê.

¹⁸Me lɨ́ eboó lɛ́ɛ bɨ́n sɨ̂ʼ yɨ̂ʼ jɔʼ yɨ́yɛ̂h. Me lɨ́ ebáʼǎ bâʼle yé ɨ́ báánâʼ e myɛ́ɛlé ɨ́ mîh: buobuo obûʼla, bé ó tɨ̂, baá dí edû bébebébě kʉ̌ tyen bá. Bé lɛ́ʼlé e nzɨ̌ nyaá ó, bé lɨ́ entémlě lɔ́ɔ́ mé Krîst, á dwe ɨ́ kolôs nyá.

¹⁹Bɨ́haá, ndumló wɔ́ɔ́, wé ó edîm tyeetye. Bé lɨ́ ejaá gʉ́ǎ njɨ nzyɛ̌m ngwár ɨ́ sí yɨ̂: mimo myɔ́ɔ́. Bé gúgúmló ó, bisâ bi dí ɨ́ buú sámle bé bí. Sâ gwár dí etirwo bé ɨ́ miléme yɨ́, yé ó njɨ bisá bí sí yɨ̂.

²⁰Ɨ́ páʼ gá wɨ́ná, mɨná gá bɨ́ɛ bé ó bʉr o dí egúmo e jʉ́o kʉ́ bá. Mɨná mû ó lɨ́ ebóno gá Tiʼbʉr gá wɨ́ná. Nye ó dí Tî Yésʉs-Krîst, ngá duho ɨ́ jʉ́o kʉ́, nze kâʼ ɨ́ sí yɨ̂ʼ nyá.

²¹Nye ódwir bísá ményʉ́l gá mɨ́ná mâ. Menyʉ́l gá mɨ́ná, mé ókǎ nwɨɨla e nyʉ̂l nyé, dí e kûm nyɨ́. Nyě e nkul egbâ bísá bíbyɛ̂h ɨ́ jwɨ́ɨ́ yé. Nó ntémé ó nyé dí e nkul edwe mɨ́ná gá menyʉ̂l maá yɨ́.