Read Koonzime Kolósia 1 Bible Online

Kolósia 1 - Koonzime bible

Kolósia 1

¹Yé ó mɛm Pɔ̂l, mʉ̌r Nzyɛ̌m á jébe ɨ́ lɔ̌b gwɨ́má yé ó, me díʼee mʉr milʉ́mlʉ́ mé Yésʉs-Krîst nyá. Bɨ̌h e mɨ́ɔɔ́ gá wɨ́ná Timotɛ̂ ó dí ecɛma bɨ́n mekaná mâ. Bɨ̌h cɛmá ó,

²bʉr o dí egúmo e Nzyɛ̌m, baá o dí ɨ́ Kolósia bá. Bɨ̌n bé ó bɨ́ɔɔ́ bɨ́h ɨ́ Krîst tʉ́ŋlʉ̌, bʉr o bé ébûʼlɔɔ. Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ gá wɨ́ná.

³Ɨ́ jɔʼ yɨ́yɛ̂h bɨ́h dí ejɨʼla e Nzyɛ̌m lɨ́ esú lɨ́n yɨ́, bɨ̌h bé lɨ́ edwe nyé nzyǒo, nyɨɛ mʉr dí Sɔ́ŋ mé Tî gá wɨ́ná Yésʉs-Krîst nyá.

⁴Nó ó, bɨ̌h bé á si jóʼo lɔ́ɔ́ búʼó bɨ́n dí ebúʼlǎ Yésʉs-Krîst, le kpɛ̌l bɨ́n dí ekpɛl óbûʼla yɨ́.

⁵Búʼó le kpɛ̌l yɨ́n yaá duho ó, ɨ́ mpûʼla dí bɨ̌n ɨ́ miléme, ó bɨ̌n bé óbǐ sá dí bɨ̌n komá ɨ́ jʉ́o kʉ́ yɨ́. Mbɨambɨa Lɔ́ɔ dí le otyeetye wɨ́, wé ó b'á nyɛɛ lɛ̂ʼle bɨ̌n syɛ́ɛla yaá.

⁶Mbɨambɨa Lɔ́ɔ, wé lɨ́ emyɛma le etɨ́e bʉ̂r metum medwân ó, ɨ́ sí yɨ́yɛ̂h mpʉ wé dí esâ ɨ́ sɔ́má yɨ́n, táare ɨ́ jɔʼ ésôʼ bɨ́n á nyɛɛ jóʼo wé yɨ́. Bɨ̌n bé á be ó sí jóʼo bʉ̂r lɨ́ elwǐb lɔ̌b mpâm mé Nzyɛ̌m. Bɨ̌n bé á si gwa kʉ jɨ̂ʼ le egʉ́a lɨ́ otyeetye sá nyé dí yɨ́.

⁷Yé ó mpʉ bɨ́n á jóʼo lɔ́ɔ waá e nzɨ̌ mé Epafrâs yɨ́. Nye ó mʉr bɨ́h e né dí eséǎ syɛ́ɛ́ Nzyɛ̌m, waá bɨ́h dí ekpɛl nyá. Nye ó mʉr ebúʼlɔɔ dí ekʉ́ séa e Krîst lɨ́ esú lɨ́n nyá.

⁸Nye ó b'á lɛ́ɛ bɨ̌h kpɛ̌l Sísǐm mé Nzyɛ̌m wé á dwe bɨ̌n lɨ́ esú é bɨ́ɔɔ́ gá bɨ́ná yɨ́.

⁹Sá tɨ̂ʼ ó bɨ́h jɨʼlá e Nzyɛ̌m lɨ́ esú lɨ́n, agwâʼ yɨ́. Táare ɨ́ móhó bɨ́h á jóʼo bé lɨ́ elwib, dumo e bɨ̌n wɨ́, nzě kumǒ kumáa mûh, bɨ̌h jɨʼlá e Nzyɛ̌m ó, nye lóŋlaa bɨ̌n pɨʼ dí ó, bɨ̌n gʉ́ŋaa sá nyé á tíʼe ɨ́ lémé wé yɨ́. Nye dwêʼ bɨ̌n ocwóó wɨ́wɛ̂h, le esâ ó, bɨ̌n gʉ́ŋaa milɛ́ʼlá Sísǐm mé Nzyɛ̌m dí edwe mí.

¹⁰Nó ó, bɨ̌n bé óbɛ̌m tyě mpʉ Tî Yésʉs dí ekpɛl yɨ́, le esâ ɨ́ jɔʼ yɨ́yɛ̂h sá nyé dí ekpɛl yɨ́. Bɨ̌n bé ótô dóló le egúmo mímpaŋ mi mpúmó ɨ́ bisyɛ́ɛla bimpâ bín bíbyɛ̂h. Tóʼ gá dóló le egwɨ́e ɨ́ pɨʼ le ngwɨ́á mé Nzyɛ̌m.

¹¹Bɨ̌h jɨjɨʼlá e né ntémé ó, nye tyɛ́bɨɨ bɨ̌n ɨ́ miléme, ó bɨ̌n séaa bisyɛ́ɛ́ bí nkûl mimbi mímyɛ̂h e nkul ɨ́ buo buo nyé dí e né nyɨ́. Bɨ̌n sɨ̂sea nó ó e bíhwó, le esia e mitúú, ti e bisʉhʉʉ.

¹²Bɨ̌h bé lɨ́ edwě Nzyɛ̌m Sɔ́ŋ nzyǒo, ebě, bɨ̌n bé á si bi nyɨ́n nkɔ̂b líʼe ɨ́ Mpóʼo nyé, jwɨʼ gwár e gwár e bʉ́ʉ́ bʉ̂r bɨ́bɛ̂h o dí egúmo e né bá. Bɨ̌n le onɔ́ɔ́ ó b'á tyenɔɔ ɨ́ myɛ́n.

¹³Nzyɛ̌m, nyɨ́ dwih mɨ́ná gá le onɔ́ɔ́ ɨ́ mpél édúrʉ́ʉ́, ntɛŋ mɨ́ná gá ɨ́ mpóʼo Mwâ kpɛ̌l wé dí ejwɨ́ɨ nyɨ́.

¹⁴Nzyɛ̌m á táa góo, le edwih mɨ́ná gá ɨ́ mpila ébébe ó, ɨ́ nzɨ̌ Mwân wé. Mwân waá ó b'á sâ ó, Nzyɛ̌m pɛ́ʼɛɛ bibaa bí ébébe nyé á niʼe bɨná gá bí.

¹⁵Yésʉs-Krîst ó dí gulo mé Nzyɛ̌m Sɔ́ŋ. Nzyɛ̌m waá, nyé abe lɨ́ ebeɔɔ yɨ́ɛ. Nzyɛ̌m á tyêl nye ó ɨ́ dǐ médwéʼé mé mʉ̂r, kʉ́ sá yɨ́yɛ̂h nyé á komlo yɨ́.

¹⁶Ebě, Nzyɛ̌m á komlo sá yɨ́yɛ̂h ó, ɨ́ nzɨ̌ nyé. Damá jóʼo bísâ bi dí ɨ́ jʉ́o le ejwoo bí, damá be byaá bi dí ɨ́ sí yɨ̂ʼ bí, bisá bi dí enyɨ̂n, ndu e byaá bi dí anyɨ̂n bí, misísǐm mí édúrʉ́ʉ́ mi dí ɨ́ mɔ́ɔ́ mécwɨ́ɨ́ mí, le myaá mi dí e menkul ménɨ́nɨ́ɨ́ mí, le myaá mi dí milʉ̂ mí, le myaá mi dí e nkul jwɨ́ɨ mí. Sâ yɨ́yɛ̂h, yé á komlɔɔ ó, ɨ́ nzɨ̌ nyé. Bíbyɛ̂h, byé á jaa komlɔɔ ó, njɨ lɨ́ ebeʼ kûm nyé.

¹⁷Nye á boo be ó tɨ̂, sâ gwár apǎ bě kuhá. Bisá bíbyɛ̂h bi dí tɨ̂ʼ bí, byé jaá di ó, njɨ ɨ́ lɔ̌b syɛ́ɛ́ yé.

¹⁸Mɨ́ná jwɨ́ʼ gá Mbɛ̌r-Nzyɛ̌m e nyʉ̂l mʉr nó, lɛ́ɛ́, Krîst ó dí lʉ̂. Twiʼ dwân, yé á táare ó e nye. Nye ó mʉr esôʼ á pah, duho lɨ́ odwe nyá. Mpʉ nyé dí nó yɨ́, nye ó dí elaǎ sá yɨ́yɛ̂h ɨ́ medile.

¹⁹Nyě tyɛ́b bísá bíbyɛ̂h esôʼ ó, ebě, Nzyɛ̌m á bee embɨa ɨ́ páʼ wé ó, nyě dǐ ntinɨ̂ e ntinɨ̂ ó, ɨ́ nye.

²⁰Nye á tíʼe ntémé ɨ́ lémé wé ó, milɔ̌b mi dí páʼ bé e bʉr bɨ́bɛ̂h mí, nyě komló myé ó, ɨ́ nzɨ̌ Mwân wé. Nzyɛ̌m á sâ saá e bʉr ó, ɨ́ nzɨ̌ metié me Mwân wé á dwe ɨ́ kolôs kʉ́ nyá. Damá jóʼo bísâ bi dí kâʼ sí bí, damá be byaá bi dí ɨ́ jʉ́o kʉ́ bí: Nzyɛ̌m á gbâ bʉr bɨ́bɛ̂h mepyɛbla ɨ́ miléme ó, duho lɨ́ eswɨɨ e métié mé Krîst mé á swɨɨ sí lɨ́.

²¹Ɨ́ mimbú mí píhe, bɨ̌n bé á be ó e ncɛrá e Nzyɛ̌m. Táare e mbi écwólwo bɨ́n á be e lé lɨ́, kumǒ kumáa e bisyɛ́ɛla bí ébébe bɨ́n á sɨsâ bí, bɨ̌n bé á jaa bɨbe ó, njɨ ontɨ̂m le obɨn mé Nzyɛ̌m.

²²Nó ó, ɨ́ báánâ, Nzyɛ̌m, nyɨ́ sâ sáá páʼ nyɨ́n le onɔ́ɔ́, ó bɨ̌n nkʉ̂ pyâl ɨ́ míh mé e miléme ɨ́ sɔ́ɔ́ɔ́, abe e mebě, abe e sá ébébe nyé ódwe bɨ́n mebě e tɨ̂ʼ yɨ́. Nye á sâ saá nyaá ó, ɨ́ nzɨ̌ Mwân wé ɨ́ jɔʼ nyé á bîr twiʼ yé, le ekam ó, nyʉ̂l bipúno nyé, nye dwêʼ yɨ́.

²³Bɨ́n ótô dóló le edyɛ̂ʼwo e Tî Yésʉs, le etyɛ̂b mekʉ̌ sí ɨ́ sɨ́ŋ nó, go ó, milémé mín, myé odi ɨ́ puuu. Mʉr apɨ́ŋla gâ! Mʉ̌r sá abîr ó, bé sâʼ ó, bɨ̌n léhee, nkʉ̂ sóŋlǒ Mbɨambɨa Lɔ́ɔ bɨ́n á jóʼo wɨ́. Mbɨambɨa Lɔ́ɔ waá, wé mû lɨ́ etúnɔɔ ó, ɨ́ sí yɨ́yɛ̂h, ɨ́ páʼ bʉ̂r bɨ́bɛ̂h dí sí jʉ́o bá. Mɛm Pɔ̂l á tyélɔɔ ɨ́ syɛ́ɛ́ ó, me lɛ́yɨɨ bʉr wǎ.

²⁴Báánâ, me mû ó e bisʉhʉʉ ɨ́ léme ɨ́ lɔ̌b mítúú mé dí esia e myé lɨ́ esú lɨ́n mí. Mitúú Yésʉs-Krîst á be asia e myé mí, míɛ ó mɛ̂m dí ekǎ sia e myé ɨ́ bipúno byâm bî. Mě jóʼó mégunwa me tɨ̂ʼ ó, lɨ́ esú é nyʉ̂l mé Krîst, dí Mbɛ̌r-Nzyɛ̌m nyɨ́.

²⁵Me mû ó syɛ̂l mesâ mé Mbɛ̌r-Nzyɛ̌m. Nzyɛ̌m ó b'á tyêl me ɨ́ dǐ yaá. Nye á tyêl me tɨ̂ʼ ó, me séaa lɨ́ esú lɨ́n, lɨ́ etúnǒ lɔ́ɔ́ wé wɨ́wɛ̂h.

²⁶Wé á nyɛɛ bɨbe ó, ɨ́ lwǐb ódîm, sá Nzyɛ̌m á sol ɨ́ mimyǎ mi bʉ̂r, duho myâ yɨ́. Tó kœb ó, nyɨ́ kǎ lɛ̂ʼle wé ɨ́ kpɛŋlɛm kwá bʉr o dí egúmo e né bá.

²⁷Ebě, Nzyɛ̌m á be lɨ́ ekpɛl élɛ̂ʼle bé jwɨʼ nyé á be e yé mesǒ yɨ́, jwɨʼ dí ɨ́ buú mbɨa, yaá dí e nyɔm lɨ́ esú é bíkúl bíbyɛ̂h yɨ́. Solá jwɨʼ yaá, yé ó: Krîst, nye mû ó sí pûhla e bɨ̌n. Bɨ̌n mû e mpûʼla ɨ́ miléme ó, bɨ̌n óbi kûm tɨ̂.

²⁸Sá tɨ̂ʼ ó bɨ́h dí etúnǒ lɔ́ɔ́ mé Krîst páʼ bʉ̂r bɨ́bɛ̂h yɨ́. Bɨ̌h bé lɨ́ ecɨ̂l mʉ̂r nyɨnyɛ̂h. Bɨ̌h bé lɨ́ elɛ̂ʼle bʉ̂r bɨ́bɛ̂h le ocwóó wɨ́wɛ̂h, ó bɨ̌h nkʉ̂ tyêl bé ɨ́ míh mé Nzyɛ̌m, bé osí pǎ gwá tɔ́ma ɨ́ mipáʼ mímyɛ̂h ɨ́ nzɨ̌ mé Krîst.

²⁹Sá tɨ̂ʼ ó mé dí eséǎ syɛ́ɛ́ yɨ̂ʼ yɨ́. Mě séá yé ó e nkul. Tó kœb ó, nkul mé dí eséa e né nyɨ́, nyě duhó ó, kwá mé Krîst. Nkul nyé nyaá ó dí eséa ɨ́ me tʉ́ŋlʉ̌ nyɨ́.