Read Koonzime Kolósia 2 Bible Online

Kolósia 2 - Koonzime bible

Kolósia 2

¹Mě kpɛl ó, bɨ̌n gʉ́ŋaa bisyɛ́ɛ́ mé dí eséa lɨ́ esú lɨ́n bí. Yé ntémé, yé ó lɨ́ esú é bʉ̂r ó Laodiséa, ndu e baá bɨ́bɛ̂h dí apǎ bee mé mpǒm bá.

²Syɛ́ɛ́ mé dí eséa yɨ́, mě séá yé ó, me nkʉ̂ gbâ bɨ́n nkul ɨ́ miléme, le esâ ó, bɨ̌n kpɛ́laa, le egwá pûhla. Bɨ̌n nkʉ̂ gʉ́ǎ búʼó gá yɨ́ná ɨ́ pébébé, sá dí bɨ̌n e nyɔm ɨ́ buo buo yɨ́. Bɨ̌n gʉ́ŋaa ntémé Krîst, mʉ̌r Nzyɛ̌m á sol ɨ́ lwǐb ódîm nyá.

³Ocwóó le ngwɨ́á wɨ́wɛ̂h, bɨ̌n bé ɨ́ jala le esáa byé ó ɨ́ Krîst tʉ́ŋlʉ̌. Byé ó Nzyɛ̌m á sol ɨ́ nye bí.

⁴Mě lwib e bɨ̌n ɨ́ mbi wɨ̂ʼ ó, mʉ̌r sá akʉ́a bɨ́n ɨ́ nzɨ̌ mikóo dí ɨ́ buú kpɛlɔɔ mí.

⁵Mě damá cɛra e bɨ̌n ɨ́ nkǒ páʼ nyʉ̂l, me yɨ́ɛ ó bǎʼ e bɨ̌n ɨ́ nkǒ páʼ sísǐm. Me lɨ́ ejóʼo bísʉhʉʉ lɨ́ ebeě mpʉ̌ sɔ́má yɨ́n dí ɨ́ kpɨ́ɨ́ɨ́ yɨ́. Me lɨ́ esoho ntémé mpʉ bɨ́n dí edyêʼ koo e Krîst yɨ́.

⁶Mpʉ yê tyeetye ó, bɨ̌n bé á si bi Yésʉs-Krîst tâŋ Njwɨ́ɨ wɨ́n yɨ́, diʼee gá ɨ́ mpúhlá e né.

⁷Búʼó bɨ́n dí e yé yɨ́, yé páhaa mikaalé. Yé tôʼ le egwɨ́e, le ebwaʼ. Dyɛ́ʼwáá gá e búʼó gá yɨ́ná ɨ́ dyɛʼwó mpʉ bé á lɛ̂ʼle bɨ̌n yɨ́. Tóʼ le edwe gá Nzyɛ̌m nzyǒo dóló ɨ́ bisá nyé dí esâ bɨ́n bí.

⁸Akam gá mekǎn mé dí dwêh, maá me dí edímle bʉ́ʉ́ bʉ̂r ɨ́ nzɨ̌ mikóo myɔ́ɔ́ má. Ajóʼǒ sá bé dí ejébe ó, «ocwóó ó sí yɨ̂ʼ» yɨ́. Abîr gá ó, mʉr gbâʼ bɨ̌n lɨ́ okómó wé ɨ́ nzɨ̌ nyaá. Mekǎn ménɨ̌, mé duduho ó, ɨ́ metum me bʉ̂r ó sí yɨ̂, ndu e milɛ́ʼlá bʉ̂r ó sí yɨ̂ʼ dí ekûhlo mí. Milɛ́ʼlá myaá, myé aduho kwá mé Krîst.

⁹Ebě, Nzyɛ̌m di ntinɨ̂ e ntinɨ̂ ó, ɨ́ nyʉ̂l mé Krîst.

¹⁰Bɨ̌n bé á be ó sí dira mínyɔm mímyɛ̂h ɨ́ mpúhlá nyɨ́n e Krîst. Nye ó dí lʉ̂ kʉ́ misísǐm mí édúrʉ́ʉ́ mímyɛ̂h: le myaá mi dí milʉ̂ mí, le myaá mi dí e nkul jwɨ́ɨ mí.

¹¹Ɨ́ mpúhlá nyɨ́n e Krîst, bɨ̌n bé á si tíʼɔɔ mpʉ́n dí eduho kwá mé Krîst nyɨ́. Mpʉ́n nyaá ó dí elɛ̂ʼle ó, bɨ̌n bɨ́ dwǐh njwɨr myâ gá wɨ́ná. Bɨ̌n bé á bé atíʼɔɔ mpʉ́n mpʉ bʉ́ʉ́ bʉ̂r dí etîtiʼɔɔ yɨ́.

¹²Ɨ́ ndubó bɨ́n á duŋɔɔ wɨ́, bɨ̌n bé á si debe, bɨ̌n e Krîst ɨ́ jɔʼ gwár. Bɨ̌n e né ntémé ó b'á pah, ebe bɨ́n dí ebúʼla nkûl nɨ́nɨ́ɨ́ mé Nzyɛ̌m. Nkǔl nɨ́nɨ́ɨ́ nyaá ó b'á pɛh nye.

¹³Ɨ́ mimbú mí píhe, bɨ̌n bé á be ó odwe nkǒ páʼ sísǐm, tɨ̂ ɨ́ misyóm mín, le mpʉ bɨ́n á be apǎ teʼle nkûl njwɨr myâ gá wɨ́ná yɨ́. Nó ó, ɨ́ báánâ, Nzyɛ̌m, nyɨ́ sâ ó, bɨ̌n e boo Krîst, bé níʼee ɨ́ twiʼ mpâ sɔ́má gwár. Nzyɛ̌m, nyɨ́ pɛʼ bíbaa bí ébébe bíbyɛ̂h nyé á niʼe mɨná ɨ́ lɔ̌b mísyóm gá míná mímyɛ̂h.

¹⁴Micɛmá myé á lɨlɛ̂ʼle mebě gá mɨ́ná mí, nyɨ́ pɛʼ myé ɨ́ mɨná gá, bomlo myé e binzâŋ ɨ́ kolôs. Micɛmá myaá, myé ó b'á lɨlɛ̂ʼle mempéné mé á lwîlwimla e mɨná gá má.

¹⁵Nzyɛ̌m, nyɨ́ par mísísǐm mí édúrʉ́ʉ́ le meleme bisá bí dɔ̂m bé á be e byé bí. Nye á ntaa bé ó, ɨ́ jɔ̌ʼ Krîst á dwe ɨ́ kolôs yɨ́. Nyɨ́ líʼe mísísǐm myaá ɨ́ gœr gœ́r, lúʼo nkûl, ɨ́ míh mé bʉ̂r ɨ́ kpɛŋlɛm.

¹⁶Abîr gá ó, mʉr dwêʼ bɨ̌n mebě ɨ́ sá bɨ́n dí ede yɨ́: nkʉ̂ menyoʼ, nkʉ̂ mede. Bé ayɨ́ pahle bɨ́n ɨ́ lɔ̌b mbwalá ménzɔɔ wɔ́ɔ́, nkʉ̂ ɨ́ lɔ̌b ébʉ́ʼ lé ébám lé álomó. Bé ayɨ́ pahle bɨ́n ntémé ɨ́ lɔ̌b mbaʼlá móhó sábat.

¹⁷Milɔ̌b mínɨ̌ mímyɛ̂h, myé ó sisîm, dí elɛ̂ʼlě sâ mpâ dí enze yɨ́. Nó ó, otyeetye o tɨ̂ʼ wɨ́ɛ, wé ó Krîst.

¹⁸Mpʉ bɨ́n di ajɔr ményʉ̂l ɨ́ míh bééngeles, nkʉ̂ dwáawo bé yɨ́, mʉ̂r dwé bɨ́n mebě me mpéne, duho tɨ̂ʼ nó, anʉa gá lwǐb yé, gbâ ɨ́ nkɔb. Bisá bé dí ebee lɨ́ esimá bí ó bé dí enʉa, gbâ ɨ́ nkɔb. Mimbi mi bʉ̂r myaá, myé ó lwɨ́ŋlá e nkɛ́á nyʉ̂l. Bé nkɨ́nkɛ́ɛ́ ményʉ́l mɔ́ɔ́ ó, dwêh, ebě, bijwɨʼ byɔ́ɔ́, byé jaá duho ó, njɨ ɨ́ nkul misyóm myɔ́ɔ́ tʉ́ŋlʉ̌.

¹⁹Bé akǎ mɛ̂r Yésʉs-Krîst ɨ́ kpɨ́ɨ́ɨ́, nyɨɛ mʉr dí yɨ́ɛ lʉ̂, tíl nyʉ̂l dí ekab nkûl nyé ɨ́ bitíl bí nyʉ̂l biswîh yɨ́. Nye ó dí esyɛŋ byé, le elɛ̂ʼle byé mpʉ byé jálá le edira ɨ́ mebɨ̌l ndu e misihé yɨ́. Nye ntémé ó dí esâ ó, nyʉ̂l nyaá tôʼ le egwɨ́ě mpʉ̌ Nzyɛ̌m dí ekpɛl yɨ́.

²⁰Bɨ̌n e Krîst, bé á si dwe eswie empwár. Sá tɨ̂ʼ ó mílɛ́ʼlá bʉ̂r ó sí yɨ̂ʼ dí ekûhlo mí, dí abe lɨ́ ekǎ jwɨ́ɨ bɨ́n yɨ́. Ɨ́ tɨ̂ʼ, mʉ̌r sá akǎ dû mémpéné mé dí eduho ɨ́ milɛ́ʼlá myaá má, nkʉ̂ báʼǎ tiʼě mpʉ̌ sá lɛ́ɛ́, bɨ̌n gúmó ó e sí yɨ̂.

²¹Bé ó dí elɛ́ɛ ó: «Ade yɨ̂. Abóblo yɨ̂. Akúna e yɨ̂.»

²²Bʉr ó b'á tyêl mempéné maá, ti e milɛ́ʼlá myaá. Wɨ́nɨ̌ mbi mémpéné, wé jaá dwɛ̂ʼ ó, njɨ bisâ bi dí esíe ɨ́ jɔʼ bʉ̂r dí edira mínyɔm myɔ́ɔ́ e byé bí.

²³Mempéné mɔ́ɔ́, mé ajala le edweŋɔɔ̌ dúu. Mé jaá sâ ó, njɨ mʉr lóŋlaa bigwɨ́má bí nyʉ̂l bipúno nyé. Metié maá, mé kʉ́ nyɨnyɨ̂n ó, mpʉ̌ sá lɛ́ɛ́, mê le ocwóó tʉ́ŋlʉ̌, ebě, mé ó dí elɛ́ɛ ó, mʉ̌r mbɨa ó, dû yébé nyé mʉr tɨ̂ʼ pa kúhló wɨ́, le ejɔr nyʉ̂l nyé, le edwe nyʉ̂l nyé bintɨ́ʼá.