Read Koonzime 1 Tesaloníka 1 Bible Online

1 Tesaloníka 1 - Koonzime bible

1 Tesaloníka 1

¹Yé ó mɛm Pɔ̂l ó dí ecɛma bɨ́n mekaná mâ, bɨ̌h e Silâs ndu e Timotɛ̂. Bɨ̌h cɛmá ó, bʉr ó Mbɛ̌r-Nzyɛ̌m o dí Tesaloníka, baá o dí egúmo e Nzyɛ̌m Sɔ́ŋ ndu e Tî Yésʉs-Krîst bá. Metyɛʼ me mpóm le mepyɛbla, mé díʼee e bɨ̌n.

²Bɨ̌h bé lɨ́ edwě Nzyɛ̌m nzyǒo ɨ́ bijɔʼ bíbyɛ̂h ɨ́ lɔ̌b wɨ́n, jɔʼ bɨ́h dí ejɨʼla e né yɨ́.

³Ɨ́ minjɨʼla bɨ́h dí ejɨʼla e waá dí Nzyɛ̌m gá wɨ́ná, waá dí ntémé Sɔ́ŋ gá wɨ́ná nyá mí, bɨ̌h bé lɨ́ esímsǎ syɛ́ɛ́ bɨ́n á séa ɨ́ lɔ̌b búʼó yɨ́n yɨ́. Yé á be ó, ɨ́ kpɛ̌l bɨ́n dí ekpɛ̌l Nzyɛ̌m yɨ́. Bɨ̌h símsá ntémé ó, mitúú bɨ́n á sia e myé ɨ́ nzɨ̌ mpûʼla Tî Yésʉs-Krîst á gbâ bɨ̌n ɨ́ miléme nyɨ́ mí. Bɨ̌h sá nó ó, ɨ́ mpǒm mé Nzyɛ̌m gá wɨ́ná, dí Sɔ́ŋ gá wɨ́ná nyá.

⁴Bɨ́ɔɔ́ bâm! Okɛ́l bâm! Bʉr ó Nzyɛ̌m dí ekpɛl bá! Bɨ̌h bé lɨ́ egʉ́a ó, nyɨ́ twâr bɨ́n, ó bɨ̌n díʼee bʉr bé.

⁵Ebě, ɨ́ jɔʼ bɨ́h á lɛ́ɛ bɨ̌n Mbɨambɨa Lɔ́ɔ́ mé Krîst yɨ́, bɨ̌n bé á bé anʉǎ lɔ́ɔ waá le epɨ̂h. Yé ó, ebě, ɨ́ jɔʼ yaá, Nzyɛ̌m á si lɛ̂ʼle bɨ̌n nkǔl nɨ́nɨ́ɨ́ nyé tɨ̂. Sísǐm wé, wé á si sulo ntémé ɨ́ bɨ̌n. Bɨ̌n bé á nze ka gʉ́a ɨ́ jɔʼ yaá ó, lɔ́ɔ waá, wé á kʉ be ó, tyeetye. Bɨ̌n bé lɨ́ egʉ́a ntémé mpʉ mɨ́ná bé á bɨbe gá yɨ́. Bɨ̌h bé á títíʼe nó ó, lɨ́ esú lé édi bɨ́n e nyɔm.

⁶Bɨ̌n ntɔ̂ʼ dû kʉ̌ tyen wɨ́h e boo Tî Yésʉs. Bɨ̌h bé á si bee bɨ̌n lɨ́ ebúʼlǎ Mbɨambɨa Lɔ́ɔ, damá jóʼo ɨ́ mitúú bɨ́n á sia e myé mí. Ɨ́ mitúú tʉ́ŋlʉ̌, bɨ̌n bé á si lóno ɨ́ bisʉhʉʉ̌ Sísǐm mé Nzyɛ̌m wé á ntɨh bɨ̌n bí.

⁷Nó ó mpʉ bɨ́n á tíʼe nó yɨ́, obûʼla bɨ́bɛ̂h dí ɨ́ sí Masedónia ndu e yaá Akayɨ̂ bá, bé mû ó lɨ́ egwɨ̂m ó, bicwiʼ byɔ́ɔ́, byé nwɨ́ɨlaa e byaá bín.

⁸Lɔ́ɔ́ dí edumo e Tî Yésʉs wɨ́, wé á myaŋla ó e bɨ̌n, bʉr o dí ebúʼlǎ Nzyɛ̌m bá. Ɨ́ bigúmó bíbyɛ̂h, bʉr, bé mû ó lɨ́ ejóʼo nó. Lɔ́ɔ́ dí edumo e búʼó yɨ́n wɨ́, wé á bé aswîʼ ɨ́ sí Masedónia, nkʉ̂ ɨ́ yaá Akayɨ̂. Bɨ̌h bé akǎ báʼǎ nʉǎ túú lɨ́ elɛ́ɛ bʉ̂r yʉ́ʉ́ sɔ̂ʼ dí edumo e syɛ́ɛla yɨ́n yɨ́.

⁹Bé bʉr o tɨ̂ʼ ó dí elɛ́ɛ bɨ́h mpʉ bɨ́n á soho bɨ̌h yɨ́, le mpʉ bɨ́n á túmo koo e bikpɛʼkpɛ̂ʼ bí ónzyɛ̌m, kǎ jaá dû njɨ̌ Nzyɛ̌m yɨ́. Bɨ̌n mû ó lɨ́ eséa e mpǎŋ Nzyɛ̌m dí kublakúbla nyá.

¹⁰Bé lɨ́lɛ́ɛ́ ntémé ó, bɨ̌n mû ó lɨ́ ebóno Mwân mé Nzyɛ̌m ngá duho ɨ́ jʉ́o kʉ́ nyá. Nye ó waá Nzyɛ̌m á pɛh, dwih lɨ́ odwe nyá. Yésʉs waá ó b'á tíʼ mɨná gâ, lɨ́ esâ ó Nzyɛ̌m sá alɛ̂ʼle mɨ́ná gá nkpaa nyé ɨ́ móhó nyé ótíʼe mílɔ̌b wɨ́. Móhó waá, wé mû ó kúno epyâl.