Read Koonzime 1 Tesaloníka 2 Bible Online

1 Tesaloníka 2 - Koonzime bible

1 Tesaloníka 2

¹Bɨ́ɔɔ́ bâm! Okɛ́l bâm! Bɨ̌n bʉr o tɨ̂, bɨ̌n bé lɨ́ egʉ́a ó, nzéá mé á nze bee bɨ̌n wɨ́, wé á bé abě dwêh.

²Bɨ̌n bé lɨ́ egʉ́a ntémé mpʉ bɨ́h á bɔma e túú le cére ɨ́ Fílipi, bɨ̌h dína apǎ pyâl kwá nyɨ́n yɨ́. Jɔʼ bɨ́h á pyâl ɨ́ sɔ́má yɨ́n yɨ́, Nzyɛ̌m wɨ́h á si gbâ bɨ̌h menyan ɨ́ miléme ó, bɨ̌h lɛ́yɨɨ bɨ̌n Mbɨambɨa Lɔ́ɔ́ mé Krîst témé bʉr o dí elwímla e bɨ̌h bá.

³Mpʉ bɨ́h dí edwe bɨ́n nkul ɨ́ nzɨ̌ Mbɨambɨa Lɔ́ɔ́ wé yɨ́, yé á bé abě gwǐh ɨ́ wɨ́h pâʼ. Yé á bé aduho ɨ́ lémé mpîr, nkʉ̂ ɨ́ mikóo mé nyʉ́ʉ́ mʉ̂r.

⁴Yé á be ó mpʉ̌ Nzyɛ̌m dí ekpɛl yɨ́. Nye ó b'á nyɛɛ bóblo bɨ̌h, ntɔ̂ʼ kǎ gʉ́a ɨ́ pébébé ó, bɨ̌h bé ó bʉr o jálá le egwá baʼlě Mbɨambɨa Lɔ́ɔ́ wé bá. Sá tɨ̂ʼ ó bɨ́h dí etúno wé mpʉ nyɨ́ɛ ógwá kpɛl yɨ́. Bɨ̌h bé asáa élwib ɨ́ mbi bʉ̂r dí ekpɛl mí. Bɨ̌h túnó wé ó, lɨ́ edû gwɨ́má mé Nzyɛ̌m, nyɨɛ mʉr dí epahle bíjwɨʼ mílémé gá míná nyá.

⁵Gʉ́ŋáá gá ntémé ó, bɨ̌h bé á bé abe lɨ́ esêʼle bɨ́n. Bɨ̌h bé á bé asâ míkóo ɨ́ nyɔm énʉa bísá bín. Nzyɛ̌m, nye me ó mboʼlo!

⁶Bɨ̌h bé á bé asáa ó, bɨ̌n gúmlaa bɨ̌h. Bɨ̌h bé á bé asáa kûm, duho e bʉ́ʉ́ bʉ̂r. Tó kœb ó, bɨ̌h bé á be ó, bɛ̌m lɛ̂ʼle bɨ́n jwɨ́ɨ́ yɨ́h, ɨ́ mpʉ bɨ́h dí bʉr o mílʉ́mlʉ́ mé Krîst yɨ́.

⁷Sâ gwár, bɨ̌h bé á be kwá nyɨ́n ó e minjwɨr ɨ́ tala tala, nwɨɨla e ábyɛɛ́ dí etirwo e bwân nyá.

⁸Bɨ̌h bé á be ɨ́ buú kpɛl bɨ́n. Sá tɨ̂ʼ ó bɨ́h á be alɛ́ɛ bɨ̌n sɔ̂ʼ njɨ Mbɨambɨa Lɔ́ɔ́ mé Nzyɛ̌m wé omér yɨ́. Bɨ̌h bé á gwɨ̂m ó, bɨ̌n díraa minyɔm ɨ́ bicwiʼ bíh ntémé. Bɨ̌n á be ɨ́ buú nyan bɨ́h ɨ́ miléme.

⁹Bɨ́ɔɔ́ bâm! Okɛ́l bâm! Bɨ̌h bé á si kʉ séa bisyɛ́ɛ́ bí nkûl. Bɨ̌n bʉr o tɨ̂, bɨ̌n bé lɨ́ egʉ́a nó. Jɔʼ yɨ́yɛ̂h bɨ́h á lɨlɛ́ɛ bɨ̌n Mbɨambɨa Lɔ́ɔ́ mé Nzyɛ̌m yɨ́, bɨ̌h ntémé á be lɨ́ eséa bísyɛ́ɛ́ mébô, móhó e pum. Bɨ̌h bé á sâ nó ó, bɨ̌h sá agbâ bɨ́n túú ɨ́ nyʉ̂l lɨ́ enkɛ́ɛ̌ mbeʼ wɨ́h.

¹⁰Bɨ̌n bé e nkul eboʼlo, ti e Nzyɛ̌m mʉr tɨ̂ʼ ó: bɨ̌h bé á be ó miléme ɨ́ sɔ́ɔ́ɔ́ ɨ́ mîh mé Nzyɛ̌m. Bɨ̌h bé á be páʼ nyɨ́n, obûʼla ó, otîtyěl o bʉ̂r le bʉr o dí abe e mebě bá.

¹¹Bɨ̌n bé lɨ́ ekʉ́ gʉ́a ntémé ó, bɨ̌h bé á si cwɨ́a e mʉr nyɨnyɛ̂h ɨ́ sɔ́má yɨ́n mpʉ sɔ́ŋ dí ecwɨ́a e bwán bé yɨ́.

¹²Bɨ̌h bé á si cɨ̂l bɨ̌n, le epóblo bɨ́n, le eboʼlo ó, bɨ̌n bé ɨ́ jala le edû kʉ̌ tyěn Nzyɛ̌m dí ekpɛl wɨ́. Tiʼaa gá nó, ebě, nye á jébe bɨ̌n ó, bɨ̌n níʼee ɨ́ Mpóʼo nyé, gúmó kûm nyé dí yɨ́.

¹³Sá tɨ̂ʼ ó bɨ́h dí edwě Nzyɛ̌m nzyǒo ɨ́ bijɔʼ bíbyɛ̂h yɨ́, ebě, ɨ́ jɔʼ bɨ́h á lɛ́ɛ bɨ̌n lɔ́ɔ́ wé yɨ́, bɨ̌n bé á si bûʼla wê. Bɨ̌n bé á bé anʉa wé mpʉ̌ lɔ́ɔ́ dí eduho ɨ́ num mʉ̂r bipúno wɨ́. Bɨ̌n bé á kʉ nʉa wé ó, mpʉ̌ lɔ́ɔ́ mé Nzyɛ̌m lɨ́ otyeetye. Lɔ́ɔ́ mé Nzyɛ̌m waá, wé lɨ́ eséa ɨ́ bɨ̌n obûʼla.

¹⁴Bɨ́ɔɔ́ bâm! Okɛ́l bâm! Bʉr ó Mbɛ̌r-Nzyɛ̌m dí ɨ́ sí Yʉ́da bá, bé á si bee mitúú. Bɨ̌n ntémé mû ó lɨ́ esia e mitúú mímpwár myaá. Bɨ̌n le onɔ́ɔ́ mû ó lɨ́ ekʉ́ nwɨɨla ɨ́ pâʼ waá, ebě, bʉr ó kúl bʉ̂r yɨ́n, bɨ́ tíble bɨ́n mpʉ óYúden dí eboó titíble bɨ́ɔɔ́ bɔ́ɔ́ bé á bûʼla Yésʉs bá.

¹⁵OYúden baá, bé á si jʉ̂ Tî Yésʉs. Bé ó b'á nyɛɛ jʉjʉ̂ ogwíha o mílɔ̌b mé Nzyɛ̌m. Bé ntémé ó b'á so bɨ̌h ɨ́ sí yɔ́ɔ́. Bé ó bʉr ó Nzyɛ̌m dí ekpaa ébúʼ e bé bá. Bé lwímlá ó e bʉr bɨ́bɛ̂h.

¹⁶Mpʉ bɨ́h dí ekpɛl étô le elɛ́ɛ bíkúl bíswîh mpʉ̌ Nzyɛ̌m dí e nkul etíʼ bé yɨ́, oYúden bɨ́ɛ, bé lɨ́ ebene, ndu e l'ekamle bɨ́h lɨ́ esâ nó. Ɨ́ syɛ́ɛla yaá, bé mû ó sí lóŋlo bísyɛ́ɛla bí ébébe byɔ́ɔ́. Sá tɨ̂ʼ ó Nzyɛ̌m á ka lɛ̂ʼle nkpaa nyé ɨ́ páʼ wɔ́ɔ́ yɨ́.

¹⁷Bɨ́ɔɔ́ bâm! Okɛ́l bâm! Jɔʼ mɨ́ná bé á bɔ́ʼa gá, akǎ beela mémpǒm yɨ́, gʉ́ŋáá gá ó, yé á bé abe e mpɔ́ʼá miléme. Bɨ̌h bé á si bu gwɨ̂m ebee bɨ́n. Miléme, myé á be bɨ̌h ɨ́ báná báná ó, bɨ̌h báʼa pyâl kwá nyɨ́n.

¹⁸Bɨ̌h bé á si bu gwɨ̂m nó. Mɛm Pɔ̂l á si sâ nó, bijɔʼ bijɔʼ, abánabana, ebě, Sátan á be lɨ́ ekamle bɨ́h lɨ́ etô gʉ̂.

¹⁹Onzé dí egbâ bɨ́h mpûʼla ɨ́ miléme? Bisʉhʉʉ bɨ́h dí esoho bî, byé duhó le onzé? Ɨ́ jɔʼ Tî gá wɨ́ná Yésʉs ónze yɨ́, yáǎ syɛ́ɛ́ bɨ́h ngá lɛ̂ʼle nyé, lɨ́ esú ó, nye bórɨɨ bɨ̌h káráá dúu ɛ̌? Bɨ̌n ó ngá sâ ó, bɨ̌h nʉ́aa kûm ɨ́ jɔʼ yaá.

²⁰Bɨ̌h kʉ́ nkʉ́na le emɛɛla ó ɨ́ lɔ̌b wɨ́n.