Read Koonzime 1 Tesaloníka 3 Bible Online

1 Tesaloníka 3 - Koonzime bible

1 Tesaloníka 3

¹Mpʉ bɨ́h á be akǎ dûhwo édǐ njɨ nó yɨ́, bɨ̌h bé á ka bee ó, damá jóʼo ó, bɨ̌h bé ólîʼ wâʼ ɨ́ ntɛ̂ʼ ɨ́ Atɛ̂n,

²bɨ̌h bé ɨ́ jala yɨ́ɛ le elómǒ Timotɛ̂ kwá nyɨ́n. Nye ó mɨ́ɔɔ́ gá wɨ́ná ndu e syɛ̂l mesâ mé Nzyɛ̌m, dí etúnǒ Mbɨambɨa Lɔ́ɔ́ mé Krîst nyá. Bɨ̌h bé á lómo nye ó, nye lɨ́lɨɨ bɨ̌n ɨ́ búʼó, le esâ ó, bɨ̌n tôʼ dóló le edyɛ̂ʼwo e Krîst.

³Mpʉ bʉ̂r bóbló bɨ́n ɨ́ báánâʼ yɨ́, bɨ̌h bé á lómo nye ó, bɨ̌n sá adímlě búʼó ɨ́ lɔ̌b mébʉ́blá maá. Bɨ̌n bʉr o tɨ̂, bɨ̌n bé lɨ́ egʉ́a ó, bintɨ́ʼá bínɨ̌, byé ó sá Nzyɛ̌m á boo kab mɨná gá yɨ́.

⁴Jɔʼ bɨ́h á be páʼ nyɨ́n yɨ́, bɨ̌h bé á si baʼa lɛ́ɛ e bɨ̌n ó, bɨ̌h bé ósia e bintɨ́ʼá. Yé ntémé, yé á si pyâl nó mpʉ bɨ́n dí egʉ́a yɨ́.

⁵Nó ó mpʉ mé á be akǎ be e nkul edûhwo yɨ́, yé ó mé á lómo Timotɛ̂ ó, me gʉ́ŋaa tyé búʼó yɨ́n mû yɨ́. Léme, wé á si koro me ɨ́ lɔ̌b wɨ́n, ó yʉ́ʉ́ jɔʼ, mpʉ̌ Sátan á bóblo bɨ̌n yɨ́, bɨ̌n bé á si to dîm ɨ́ nyʉ́ʉ́ nzɨ́ swîh. Me á syɛl bá ntémé ó, yʉ́ʉ́ jɔʼ, syɛ́ɛ́ bɨ́h á séa páʼ nyɨ́n yɨ́, yɨ́ dwě ntuʼ.

⁶Nó ó, Timotɛ̂ alúno duho gʉ̂, le elɛ́ɛ bɨ́h mbɨambɨa milɔ́ɔ ɨ́ lɔ̌b wɨ́n. Nyɨ́ lɛ́ɛ̌ mpʉ bɨ́n dí edyɛ̂ʼwo e Yésʉs, le ekpɛla yɨ́. Nye lɨ́ elɛ́ɛ ntémé mpʉ bɨ́n dí etoŋlo bɨ́h bitɔŋlá bimpâ yɨ́, le elɛ́ɛ ntémé mpʉ bɨ́n dí e dwéh ébee bɨ́h jwɨʼ gwár mpʉ bɨ́h dí egwɨ̂m ébee bɨ́n yɨ́.

⁷Bɨ́ɔɔ́ bâm! Okɛ́l bâm! Damá jóʼo ó, bɨ̌h bé ɨ́ mitúú le bintɨ́ʼá tʉ́ŋlʉ̌, bɨ̌n bɨ́ sâ ó, bɨ̌h sóhaa, miléme sula sí, ebě, bɨ̌n bé lɨ́ edyɛ̂ʼwo e Yésʉs.

⁸Jɔʼ yɨ̂, bɨ̌h mû ó sí tíʼe, ebe bɨ́n dína lɨ́ etyɛ̂b mekʉ̌ sí ɨ́ sɨ́ŋ ɨ́ mpúhlá nyɨ́n e Tî Yésʉs.

⁹Bɨ̌h gʉ́ŋaa ó, bɨ̌h dwêʼ Nzyɛ̌m nzyǒo ɨ́ lɔ̌b wɨ́n nyá? Bɨ̌h bé lɨ́ esoho ɨ́ míh mé Nzyɛ̌m ɨ́ buo buo ɨ́ lɔ̌b wɨ́n.

¹⁰Móhó e pum, bɨ̌h kʉ́ buú jɨʼla e Nzyɛ̌m ó, mɨná béelaa gá mempǒm. Bɨ̌h bé lɨ́ egwɨ̂m ó, bɨ̌h swâhlaa lɔ́ɔ bɨ́h á nyɛl elɛ́ɛ bɨ́n ó, bɨ̌n bé ɨ́ jala le ebúʼla wɨ́.

¹¹Bɨ̌h bé lɨ́ ejɨʼla e Nzyɛ̌m gá wɨ́ná, waá dí ntémé Sɔ́ŋ gá wɨ́ná nyá, nye mʉr tɨ̂, ndu e Tî gá wɨ́ná Yésʉs ó, bé dwêʼ bɨ̌h nzɨ̌ ó, bɨ̌h kúmaa ɨ́ sɔ́má yɨ́n.

¹²Tî Yésʉs tyɛ́bɨɨ bɨ̌n ɨ́ miléme, ó kpɛ̌l bɨ́n dí ekpɛla páʼ nyɨ́n yɨ́, yé bwáʼaa. Nye sâʼ ntémé ó, bɨ̌n kpɛ́lɨɨ ntémé bʉr oswîh ɨ́ buo buo, kpɛ̌l yaá, yé nkʉ̂ bwaʼ. Yé syɛ́yɨɨ nó, bɨ̌n kpɛ́lɨɨ bé mpʉ bɨ́h dí ekpɛl bɨ́n yɨ́!

¹³Nye gbâʼ bɨ̌n nkul ɨ́ miléme ó, myé díʼee bɨ̌n ɨ́ sɔ́ɔ́ɔ́, abe e mebě ɨ́ mpǒm mé mʉr dí Nzyɛ̌m gá wɨ́ná, waá dí ntémé Sɔ́ŋ gá wɨ́ná nyá. Diʼee gá nó, tó kumo ɨ́ jɔʼ Tî gá wɨ́ná Yésʉs óbáʼǎ nze yɨ́. Nye ónze ó, bé e bʉr bɨ́bɛ̂h dí egúmo e né bá.