Read Koonzime 1 Tesaloníka 4 Bible Online

1 Tesaloníka 4 - Koonzime bible

1 Tesaloníka 4

¹Bɨ́ɔɔ́ bâm! Okɛ́l bâm! Bɨ̌h bé á si tɨ́e bɨ̌n mpʉ bɨ́n jálá le etíʼě mbǐ twǐʼ Nzyɛ̌m dí ekpɛl wɨ́ yɨ́. Bɨ̌n ntémé mû ó lɨ́ etíʼe nó. Damá jóʼo nó, bɨ̌h bé lɨ́ edî bɨ́n, le etɨ́e bɨ́n ɨ́ díé mé Tî Yésʉs ó, bɨ̌n tôʼ le esâ njɨ nó, ɨ́ buo buo!

²Bɨ̌n bé lɨ́ egʉ́a mílɛ́ʼlá bɨ́h á dwe bɨ̌n ɨ́ díé mé Tî Yésʉs mí.

³Ebě, sá Nzyɛ̌m dí ekpɛl yɨ́, yé ó, bɨ̌n díʼee bʉr o dí egúmo e né bá. Ebe nó, syɛ́hláá gá esâ bímolá.

⁴Nyě kpɛ̌l ntémé ó, mʉr nyɨnyɛ̂h, nye gʉ́ŋaa mpʉ mʉ̂r jálá le ebêm wé mʉ́má yɨ́. Nye bémɨɨ nye ɨ́ mbi dí elɛ̂ʼle ó, nye ó tí ɨ́ míh mé Nzyɛ̌m, nye ntémé e medile ɨ́ míh mé njʉ̂m wɨ́.

⁵Njʉ̂m nyɨɛ díʼee e mʉmá wé waá, abe ɨ́ tíná bígwɨ́má mébomo mpʉ mínjéʼe-Nzyɛ̌m dí esɨsâ yɨ́.

⁶Mʉ̌r sá abyaʼ mɨ́ɔɔ́ wé mʉr lɔ̌b ɨ́ mbi waá, nkʉ̂ sâ nyé ebébe. Bɨ̌h bé á si boo lɛ́ɛ bɨ̌n, cɨ̂l bɨ́n ó, Tî Yésʉs ódwě ntɨ́ʼá ó, baá o dí esâ syóm ɨ́ lɔ̌b waá bá.

⁷Ebě, Nzyɛ̌m á jébe mɨná gá ó, mɨná díʼee gá bʉr o dí gúmo e né bá. Nye á bé abáŋle mɨ́ná gâ lɨ́ esú ó, mɨná sâʼ gá bisyɛ́ɛla bi mpîr.

⁸Nó ó, baá o dí epyêh métwɨ́ɨ́ mâʼ ɨ́ lɔ̌b nɨ̌ bá, bé apyêh mʉ̂r. Bé pyéh ó Nzyɛ̌m, waá dí entɨh bɨ́n Sísǐm wé nyá.

⁹Ɨ́ lɔ̌b wɨ̂, ɨ́ lɔ̌b kpɛ̌l dí páʼ bɨ́ɔɔ́ e bɨ́ɔɔ́ yɨ́, yé abe e sá mé gúm kǎ cɛma bɨ́n, ebě, bɨ̌n bʉr o tɨ̂, bé á si jɨ̂ʼ ekpɛla. Nzyɛ̌m ó b'á lɛ̂ʼle bɨ̌n.

¹⁰Bɨ́ɔɔ́ bâm! Okɛ́l bâm! Bɨ̌n bé lɨ́ ekpɛl bɨ́ɔɔ́ bɨ́n dí ɨ́ sí Masedónia wɨ́wɛ̂h bá ɨ́ mbi waá. Sâ gwár, bɨ̌h tɨ́é bɨ́n ó nɛ́ɛ: tóʼ gá dóló le ekpɛla gâ.

¹¹Tyélɨ́ɨ́ gá esôʼ ó, bɨ̌n tíʼaa ɨ́ mepyɛbla. Mʉr dwɛ́ʼɛɛ njɨ bisyɛ́ɛ́ byé nye mʉr tɨ̂. Nye séaa bisyɛ́ɛ́ byé e mebó mé. Nó ó mé á boo tɨ́e bɨ̌n yɨ́.

¹²Dúʼóó gá kʉ̌ tyen mpâ bʉ̂r o dí ejéʼě Nzyɛ̌m bá, bé óbee mbɨ̂mbɨá wɨ́. Mʉ̌r sá abóno nkɔ́m ɨ́ ti ti ti.

¹³Nó ó, bɨ́ɔɔ́ bâm, mě kpɛ̌l ó, bɨ̌n gʉ́ŋaa esúʼlá é bʉ̂r o mû sí dwe bá ɨ́ pébébé. Bɨ́n ójéʼě lɔ̌b waá nó, nyʉ̂l ámû tyɛʼ bɨ́n ɨ́ mpʉ me bʉ̂r o dí abe e mpûʼla ɨ́ miléme ó, bé ópah bá.

¹⁴Ɨ́ mpʉ mɨ́ná dí ebúʼla gá ó, Yésʉs á si dwe, báʼǎ pah yɨ́, nó ó mɨ́ná dí ebúʼla gá ntémé ó, Nzyɛ̌m ópɛh ódwe ɨ́ nzɨ̌ mé Yésʉs, ntɔ̂ʼ dâʼre bé e boo Yésʉs jwɨʼ gwár yɨ́.

¹⁵Sá bɨ́h dí elɛ́ɛ bɨ́n wâʼ yɨ́, yé ó lɛ́á Tî gá wɨ́ná. Jɔʼ nyé óbáʼǎ nze yɨ́, mɨná gá, bʉr o dí ɨ́ twiʼ bá, mɨná bé átô gá esôʼ, odwe bɨ́ɛ lîʼ píhe.

¹⁶Ebě, Tî Yésʉs mʉr tɨ̂ʼ ósulo. Njwɨ́ɨ beéngeles, nye ólwib e twíí jwɨ́ɨ. Sébé mé Nzyɛ̌m ólwib. Odwe bé á boo pûhla e Yésʉs-Krîst bá, bé ónyɛɛ́ pah.

¹⁷Nó ó, píe tɨ̂, mɨná gá, bʉr o dí ɨ́ twiʼ, baá bé á lîʼ mikublakúbla bá, mɨná bé óbére gá ɨ́ dwiné tʉ́ŋlʉ̌, tó swálɔɔ e bé gúmo gwár. Nzyɛ̌m ósyɛŋ mɨ́ná gá le onɔ́ɔ́ gʉ̂. Mɨná gá le onɔ́ɔ́ bé óbɔma e Tî Yésʉs lɨ́ ejwoo kʉ́. Mɨná gá le Tî Yésʉs, bé ódidi ó, njʉ̌m dǐ e njʉ̌m dǐ.

¹⁸Sá tɨ̂ʼ ó bɨ́n jálá le egbâ bɨ́n bʉr o tɨ̂ʼ nkul ɨ́ miléme, lɨ́ elɛ́a mílɔ̌b mínɨ̌ páʼ nyɨ́n yɨ́.