Read Koonzime 2 Tesaloníka 1 Bible Online

2 Tesaloníka 1 - Koonzime bible

2 Tesaloníka 1

¹Yé ó mɛm Pɔ̂l ó dí ecɛma bɨ́n mekaná mâ, bɨ̌h e Silâs ti e Timotɛ̂. Bɨ̌h cɛmá ó, bʉr ó Mbɛ̌r-Nzyɛ̌m o dí Tesaloníka, baá o dí egúmo e Nzyɛ̌m Sɔ́ŋ ndu e Tî Yésʉs-Krîst bá.

²Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ, bé e Tî Yésʉs-Krîst.

³Bɨ́ɔɔ́ bɨ́h le okɛ́l bɨ́h, bɨ̌h bé ɨ́ jala le edwě Nzyɛ̌m nzyǒo ɨ́ bijɔʼ bíbyɛ̂h ɨ́ lɔ̌b wɨ́n. Yé ɨ́ jala nó, ebě, búʼó bɨ́n dí ebúʼlǎ Krîst yɨ́, yé lɨ́ etô le egwɨ́e. Kpɛ̌l bɨ́n dí ekpɛl bʉ̂r yɨ́, yé bwaʼ ó bwaʼáa.

⁴Nó ɨ́ páʼ wɨ́h, jɔʼ yɨ́yɛ̂h bɨ́h dí epyâl gúmó bʉ̂r ó Mbɛ̌r-Nzyɛ̌m dí yɨ́, bɨ̌h bé lɨ́ enkʉ́na ɨ́ lɔ̌b bíhwó le búʼó bɨ́n dí e byé bí. Ebě, bɨ̌n bé lɨ́ edûhwo ɨ́ jɔʼ bé dí etíble bɨ́n le ebóblo bɨ́n yɨ́. Ɨ́ bijɔʼ byaá bíbyɛ̂h, bɨ̌n bé lɨ́ etô dóló le edyɛ̂ʼwo e Nzyɛ̌m.

⁵Yé ó jwɨʼ dí elɛ̂ʼle mɨ́ná gá ó, Nzyɛ̌m, nyě e nkam ɨ́ mbi nyé dí etíʼe bʉ̂r milɔ̌b myɔ́ɔ́ wɨ́ yɨ́. Ɨ́ mpʉ bɨ́n dí esâ bíhwó nó yɨ́, yé lɨ́ esâ ó, bɨ̌n jálaa e bidiá ɨ́ Mpóʼo mé Nzyɛ̌m. Sá tɨ̂ʼ ó bɨ́n dí esia e mitúú e mindɛ̌l myaá yɨ́.

⁶Ebě, yé ó syɛ́ɛla mpâ ɨ́ míh mé Nzyɛ̌m ó, nye ntɨ́ʼɨɨ baá o dí entɨ̂ʼ bɨ́n bá.

⁷Yé ntémé, yé óbe ó syɛ́ɛla mpâ ɨ́ jɔʼ nyé ódwe mɨ́ná gá óbɛ̂h egbalá píe bintɨ́ʼá bín yɨ́, ebě, mɨná bé ógbala gá ɨ́ jɔ̌ʼ Tî Yésʉs ónyɨ̂n, duho ɨ́ jʉ́o kʉ́ yɨ́. Bé e beéngeles bé, baá o dí ɨ́ lele ménkul bá, bé ópyâl ɨ́ njʉ̌l siʼe tʉ́ŋlʉ̌.

⁸Bé e boo nɔ́ɔ́, bé ónze, nzě dwe mínjéʼe-Nzyɛ̌m bintɨ́ʼá, bé e bʉr o b'á be asâ mejóʼo ɨ́ jɔʼ bé á jóʼo Mbɨambɨa Lɔ́ɔ́ mé Tî Yésʉs yɨ́ bá.

⁹Bé ósia e bintɨ́ʼá. Nye ódímle bê. Bé ódîm ó, kɔ́m ti e kɔ́m. Bé ótyenɔɔ lɨ́ ejaa, akǎ pyâl ɨ́ míh mé Tî Yésʉs. Bé ákǎ kúnwo e gúmó nkûl e kûm nyé dí yɨ́.

¹⁰Nye ónzě sâ bé nó ɨ́ móhó bʉ̂r bé, bé ódwe nyé kûm wɨ́. Bʉr bɨ́bɛ̂h o dí egúmo e né bá, bé ókâm nyê. Bɨ̌n ntémé bé óbe ó tɨ̂ʼ ɨ́ sɔ́má yaá, ebě, bɨ̌n bé á si bûʼla mboʼlá wɨ́h.

¹¹Ɨ́ pâʼ waá ntémé ó bɨ́h dí ejɨʼla ɨ́ bijɔʼ bíbyɛ̂h ɨ́ lɔ̌b wɨ́n yɨ́. Bɨ̌h jɨʼlá e Nzyɛ̌m ó, nye béyɨɨ mbɨ̂mbɨá, ó bɨ̌n bé lɨ́ edû kʉ̌ tyen nyé á jébe bɨ̌n ó, bɨ̌n dúʼoo wɨ́. Bɨ̌h jɨʼlá ntémé ó, nye gbâʼ nkul nyé ó, bɨ̌n lóŋlaa bisyɛ́ɛla bɨ́n dí ebúʼla ó, bɨ̌n jálá le eséa nyé bí.

¹²Nó ó bɨ́n ódwe Tî gá wɨ́ná Yésʉs kûm, nyɨɛ ntémé dwe bɨ́n kûm yɨ́. Mɨná bé ógúmlo gá nye, le egúmlɔɔ ntémé ó, ɨ́ lɔ̌b mpâm mé Nzyɛ̌m gá wɨ́ná le Tî Yésʉs-Krîst.