Read Koonzime 2 Tesaloníka 2 Bible Online

2 Tesaloníka 2 - Koonzime bible

2 Tesaloníka 2

¹Bɨ́ɔɔ́ bɨ́h le okɛ́l bɨ́h, bɨ̌h bé lɨ́ edǐ tɨ́e bɨ́n yʉ́ʉ́ sɔ̂ʼ. Yé dumó ó e Tî gá wɨ́ná Yésʉs-Krîst, ɨ́ mpʉ nyé ópyâl, ntɔ̂ʼ syɛŋ mɨ́ná gá ɨ́ míh mé yɨ́.

²Bɨ̌h lɛ́ɛ́ bɨ́n ó nɛ́ɛ: akǎ twɨra gá dwêh. Nyʉ́ʉ́ mʉ̂r ólɛ́ɛ bɨ́n ó, Tî gá wɨ́ná Yésʉs, nyɨ́ báʼǎ pyâl nó, sɨ́ǎ yaá atɨ̂l bɨ́n mekʉ̌ sí. Mʉr waá damá lɛ́ɛ ó, lɛ́á wé waá, wé ó solá sɔ̂ʼ, duho kwá mé Nzyɛ̌m, yé abe nó. Nyě damá lɛ́ɛ ó, yé ó ekǎn nyʉ́ʉ́ mʉ̂r á lɛ́ɛ nye lɨ́. Yé ntémé, yé abe nó. Nyě damá boʼlo ó, lɛ́á waá, wé duho ɨ́ mekaná me dí enyɨ̂n ó, mé duho kwá nyɨ́h má, yé abe nó.

³Mʉ̌r sá adímle bɨ́n e nzɨ̌ lwǐb míkóo ɨ́ nyʉ́ʉ́ nzɨ́ e nyʉ́ʉ́, ebě, móhó waá, wé ányɛɛ́ pyâl nó. Bʉr ɨ́ buo buo, bé ónyɛɛ́ gbɔba e Nzyɛ̌m. Mʉr dí egbah métié mé Nzyɛ̌m nyá, nyé okǎ tyɛ̂b ɨ́ teʼwó ɨ́ míh mé bʉ̂r ɨ́ ponó ɨ́ jɔʼ yaá. Nye ó ngá tyɛ̂b ésôʼ e bʉr o ngá dîm kɔ́m ti e kɔ́m bá.

⁴Nye ólwímla e sá yɨ́yɛ̂h dí ejébɔɔ ó «Nzyɛ̌m» yɨ́. Nye ólwímla e bisá bíbyɛ̂h bi dí edweŋɔɔ̌ dúu bí. Nye ósûʼlǎ nʉǎ diá kûm ɨ́ mpáh Nzyɛ̌m tʉ́ŋlʉ̌, túno ɨ́ kpɛŋlɛm ó, nye ó Nzyɛ̌m.

⁵Nzê bɨ̌n bé asímsa ó, me á si boo lɛ́ɛ bɨ̌n nó, ɨ́ metááré, jɔʼ mɨ́ná bé á be gá sûm gwár yɨ́ ɛ́?

⁶Sá tɨ̂ʼ ó bɨ́n gʉ́á ntémé sá dí ekamle mʉ̂r waá lɨ́ epyâl ɨ́ jɔʼ yɨ̂ʼ yɨ́. Yé sá nó ó, nye pyálaa njɨ ɨ́ jɔ̌ʼ Nzyɛ̌m á boo tíʼe ó, nye ópyâl yɨ́.

⁷Tó kœb ó, bʉr o dí enwǐm Nzyɛ̌m bá, bé sá syɛ́ɛla yɔ́ɔ́ yaá ɨ́ báánâʼ ó e nkul dí anyɨ̂n bʉ̂r ɨ́ mîh nyɨ́. Sâ gwár, ɨ́ nkǒ páʼ mʉ̂r dí egbah métié mé Nzyɛ̌m nyá, mʉr dí ekamle nyé lɨ́ esâ ébébe nyá, ótô le esâ nó ó, tó kumǒ kumáa ɨ́ jɔʼ nyé ólíʼe nyé nzɨ̌ mběʼ yɨ́.

⁸Jɔʼ yaá ó nyɨ́ɛ, mʉr dí egbah metié mé Nzyɛ̌m nyá, ókǎ nyɨ̂n ɨ́ kpɛŋlɛm yɨ́, Tî Yésʉs, nyé okǎ jʉ̂ nyé e ngúl num wé. Nye óteʼle mʉ̂r waá ó, ɨ́ nzéá nyé ónze wɨ́.

⁹Nzéá ntɨ̂m e mbɨn mé Nzyɛ̌m ónze wɨ́, nye ólɛ̂ʼle bʉ̂r ó, nyě e nkul mé Sátan. Nye ósâ bísyɛ́ɛla bi nkûl mimbi mímyɛ̂h, ndu e mesimá, ndu e bisyɛ́ɛla míkóo bʉ̂r dí ekâm bí.

¹⁰Nye ógbah métié mé Nzyɛ̌m, le esâ bísyɛ́ɛla bi dí édímle bʉ̂r ɨ́ nzɨ̌ mikóo bí. Bisyɛ́ɛla byaá, byé ódímle baá ngá dîm ɨ́ nkɔb bʉr bá. Bé ódîm, ebě, bé á si bene otyeetye. Yé bé bé á be ɨ́ kpɛl wé nó, lɛ́ɛ́, wé á si gwa tíʼ bê.

¹¹Sá tɨ̂ʼ ó Nzyɛ̌m á nze lómlo bé mikóo mi dí ɨ́ nyan mí yɨ́. Nye á sâ nó ó, bé bûʼlaa bibɛr.

¹²Nó ó, bʉr o dí ebene ótyeetye, jaá kpɨkpɛ̌l njɨ bisyɛ́ɛla bi dí egbah métié bí bá, bɨ́bɛ̂h, bé ónʉa mébě tɨ̂.

¹³Bɨ́ɔɔ́ bɨ́h! Okɛ́l bɨ́h! Tî Yésʉs, nye lɨ́ ebuú kpɛl bɨ́n. Yé jala ó, bɨ̌h dwêʼ Nzyɛ̌m nzyǒo ɨ́ bijɔʼ bíbyɛ̂h ɨ́ lɔ̌b wɨ́n, ebě, nyɨ́ twâr bɨ́n, duho ɨ́ menyɛ̌l, ó bɨ̌n tíʼaa njʉ̌m dǐ e njʉ̌m dǐ. Nye mû ó lɨ́ etíʼ bɨ́n e nzɨ̌ Sísǐm mé Nzyɛ̌m wé á pubo bɨ̌n nyá. Bɨ̌n mû ó lɨ́ ebǐ twiʼ mpâ ɨ́ nzɨ̌ búʼó bɨ́n dí ebúʼla ótyeetye yɨ́.

¹⁴Nzyɛ̌m á si jébe bɨ̌n ɨ́ túnó bɨ́h á túno bɨ̌n Mbɨambɨa Lɔ́ɔ wɨ́. Nye á sâ nó ó, bɨ̌n dwéŋɔɔ kûm, jala e nkɔb líʼe nyɨ́n ɨ́ jɔʼ Tî gá wɨ́ná Yésʉs-Krîst ngá nyɨ̂n ɨ́ diá kûm yé yɨ́.

¹⁵Ebe nó, bɨ́ɔɔ́ bâm, tyɛ́bɨ́ɨ́ gá mekʉ̌ sí ɨ́ sɨ́ŋ. Búʼláá gá milɛ́ʼlá bɨ́h á dwe bɨ̌n mí, damá be ɨ́ minum, nkʉ̂ ɨ́ mekaná bɨ́h á cɛma má.

¹⁶Nó ó, Tî gá wɨ́ná Yésʉs-Krîst mʉr tɨ̂, ti e Nzyɛ̌m Sɔ́ŋ gá wɨ́ná, waá á lɛ̂ʼle mɨ́ná gá kpɛ̌l nyá, waá dí egbâ mɨ́ná gá nkul ɨ́ miléme, nyaá dí asíesie nyɨ́, waá dí elɛ̂ʼle mɨ́ná gá mpam, le egbâ mɨ́ná gá mpûʼla ɨ́ miléme nyá, nye gbâʼ bɨ̌n nkul ɨ́ miléme. Nye gbâʼ bɨ̌n pîm ɨ́ búʼó. Nye tyɛ́bɨɨ bɨ̌n ɨ́ miléme, ó bɨ̌n sâʼ bisyɛ́ɛla bimpâ, le elɛ́ɛ mílɔ́ɔ́ mímpâ, mimbi mímyɛ̂h.