Read Koonzime 2 Tesaloníka 3 Bible Online

2 Tesaloníka 3 - Koonzime bible

2 Tesaloníka 3

¹Bɨ́ɔɔ́ bɨ́h! Okɛ́l bɨ́h! Bɨ̌h kǎ cɛmá bɨ́n ó, bɨ̌n jɨ̂ʼlaa e Nzyɛ̌m ɨ́ lɔ̌b wɨ́h, ó lɔ́ɔ́ dí edumo e Tî Yésʉs wɨ́, wé tôʼ dóló le emyaŋlǎ kám e kám, ó bʉr dwêʼ lɔ́ɔ waá dúu, dû mpʉ bɨ́n bɨɛ dí egúmlo wé yɨ́.

²Jɨʼlaa gá ntémé ó, Nzyɛ̌m pɛ́ʼɛɛ bɨ̌h ɨ́ mpêl bʉ̂r o dí ɨ́ bébe bá, ebě, ntʉ bʉ̂r bɨ́bɛ̂h dí obûʼla.

³Sâ gwár, Tî Yésʉs, nye ó mʉr jálá le ebúʼlɔɔ nyá. Nye ódwe bɨ́n nkul, le ekamle e bɨ̌n ɨ́ páʼ mé Sátan.

⁴Mɨ́ dyɛ̂ʼwo e Tî Yésʉs ɨ́ lɔ̌b wɨ́n, ebě, sá mé á tɨ́e bɨ̌n yɨ́, yé ó sá bɨ́n dí esɨsâ yɨ́. Yé ntémé, yé ó sá bɨ́n ngá tô le esɨsâ dóló yɨ́.

⁵Tî Yésʉs-Krîst tyɛ́bɨɨ bɨ̌n ɨ́ miléme, ó bɨ̌n kpɛ́lɨɨ Nzyɛ̌m. Nye sâʼ ntémé ó, bɨ̌n dûhwaa mebébe mpʉ nyé á sâ yɨ́.

⁶Bɨ́ɔɔ́ bɨ́h! Okɛ́l bɨ́h! Bɨ̌h bé lɨ́ etɨ́e bɨ́n ɨ́ díé mé Tî Yésʉs-Krîst ó: bɨ̌n syɛ̂hlaa mɨ́ɔɔ́ wɨ́n nyɨnyɛ̂h dí esâ épɨ̂h nyá. Cɛraa gá e né, ebě, nyé anʉa métum bɨ́h á líʼe bɨ̌n e mé má, gbâ ɨ́ nkɔb.

⁷Ebě, bɨ̌n bʉr o tɨ̂, bé lɨ́ ekʉ́ gʉ́ǎ mpʉ bɨ́n jálá le enwɨɨla e bɨ̌h yɨ́. Bɨ̌h bé á bé asâ épɨ̂h ɨ́ jɔʼ bɨ́h á be páʼ nyɨ́n yɨ́.

⁸Bɨ̌h bé á bé ade méde mé nyʉ́ʉ́ mʉ̂r dwêh, ajána. Bɨ̌h bé á be lɨ́ entɨntɨ̂ʼ ntémé menyʉ́l mɨ́h, le eséǎ syɛ́ɛ́ móhó e pum. Bɨ̌h bé á sâ nó ó, bɨ̌h sá agbâ nyʉ́ʉ́ mʉ̂r ɨ́ bɨ̌n túú ɨ́ nyʉ̂l lɨ́ enkɛ́ɛ̌ mbeʼ wɨ́h.

⁹Bɨ̌h bé e nkul jwɨ́ɨ dí ó, bɨ̌h díraa nyɔm lɨ́ enʉnʉa bísá bín. Bɨ̌h bé á be ó, bɛ̌m sâ nó. Sâ gwár, bɨ̌h bé á si kpɛl elɛ̂ʼle bɨ̌n mveʼle, lɨ́ esú ó, bɨ̌n báŋaa bɨ̌h.

¹⁰Damá jóʼo ɨ́ jɔʼ mɨ́ná bé á be gá yɨ́, bɨ̌h bé á tɨ́e bɨ̌n ó: «Yé bé nyʉ́ʉ́ mʉ̂r, nyé akpɛl éséa nó, nye díʼee ntémé ade.»

¹¹Bɨ̌h bê sí lwib nó ó, ebě, bɨ̌h jʉ́ʼrá ó, bʉ́ʉ́ bʉ̂r ó sɔ́má yɨ́n, bé lɨ́ esâ épɨ̂h. Bé jaá sɨsâ ó, njɨ mpǔʼ.

¹²Nó ó, ɨ́ nkǒ páʼ bʉ̂r baá, bɨ̌h tɨ́tɨ́é bé ɨ́ díé mé Tî Yésʉs-Krîst ó, bé séaa bisyɛ́ɛ́ byɔ́ɔ́ ɨ́ puuu. Bé obi méde mɔ́ɔ́, duho ɨ́ bisyɛ́ɛ́ mébó mɔ́ɔ́.

¹³Ɨ́ páʼ wɨ́n, bɨ́ɔɔ́ bâm, menyʉ́l sá atyɛʼ bɨ́n píe bisyɛ́ɛla bimpâ bɨ́n dí esâ bí.

¹⁴Mʉ̂r bé asâ bɨ́h mejóʼo ɨ́ jɔʼ bé jóʼó métwɨ́ɨ́ bɨ́h dí etɨ́e bɨ́n ɨ́ mekaná mâʼ má nó, nʉaa gá nye díe. Bɨ̌n bé ayɨ́ be e ndwáala e né. Ɨ́ mbi waá ó nyé ójóʼo sôn yɨ́.

¹⁵Sâ gwár, abee gá nye mpʉ̌ sá lɛ́ɛ ó, nye bɨ̌n ó, ntɨ̂m e mbɨn wɨ́n. Cɨ́lɨ́ɨ́ gá nye, ebě, nye ó mɨ́ɔɔ́ wɨ́n.

¹⁶Nó ó, Tî gá wɨ́ná, mʉr dí egbâ mɨ́ná gá mepyɛbla ɨ́ miléme nyá, nye gbâʼ bɨ̌n mepyɛbla ɨ́ miléme ɨ́ bijɔʼ bíbyɛ̂h, le menzɨ̌ mɨ́mɛ̂h. Tî gá wɨ́ná díʼee e bɨ̌n óbɛ̂h.

¹⁷Mě cɛmá bɨ́n mekǎn mâʼ ó e mbó wâm. Meswɨhlɨ mâʼ, mé ó, ɨ́ micɛmá mé Pɔ̂l. Mbǐ nɨ̌ ó mé dí esân mékaná mɨ́mɛ̂h mé dí ecɛma má. Mpʉ mê cɨcɛma yaá ó yɨ̂.

¹⁸Tî gá wɨ́ná Yésʉs-Krîst, nye sʉ́ʼoo bɨ̌n óbɛ̂h metyɛʼ me mpóm.