Read Koonzime 1 Timotɛ̂ 1 Bible Online

1 Timotɛ̂ 1 - Koonzime bible

1 Timotɛ̂ 1

¹Pɔ̂l ó dí ecɛma gó mekaná mâ. Me ó mʉr milʉ́mlʉ́ mé Yésʉs-Krîst ɨ́ mitíʼá mé Nzyɛ̌m Sɔ́ŋ, Tiʼbʉr gá wɨ́ná, ti e Yésʉs-Krîst, waá dí egbâ mpûʼla ɨ́ miléme gá míná nyá.

²Mě cɛma mékaná mâʼ ó, gua Timotɛ̂, mʉr dí mpaŋ mwân wǎm ɨ́ búʼó nyá. Metyɛʼ me mpóm, le njɨ́ʼá nkóó le mepyɛbla, byé díʼee e go, duho e Nzyɛ̌m Sɔ́ŋ gá wɨ́ná, bé e Tî gá wɨ́ná Yésʉs-Krîst.

³Diʼeě Éfɛsɔs mpʉ mé á tɨ́e go, ɨ́ jɔʼ mé á be, me mû kúno etô sí Masedónia yɨ́. Diʼee náǎ, go e tɨ́é bʉ̂r ó, bé sá adweela gúú mbǐ lɛ́ʼlá swîh.

⁴Go e lɛ́ɛ́ bé ó, bé ayɨ́ dû nzɨ́ bikɨkɛna. Bé sá ajóʼo ólɔ́ɔ o bíntán ó mímbɛ̌r mi bʉ̂r, sá dí abe le odumo yɨ́. Bisâ byaá, byé dulo ó nzyɛ́ɛ́lá mecwíí. Ɨ́ páʼ mé Nzyɛ̌m, byé abe e nyɔm. Mɨná nyɨɛ́ lóŋló syɛ́ɛ́ yé ó, ɨ́ nzɨ̌ búʼó yɨ́ná.

⁵Ɨ́ metwɨ́ɨ́ ménɨ̌, ndumló tɨ̂, wé ó, mɨná kpɛ́laa gâ. Kpɛ̌l yaá, yé dúhaa ɨ́ miléme mi dí ɨ́ sɔ́ɔ́ɔ́ mí, le ɨ́ mipahlá míléme mi dí ɨ́ pyɛɛɛ mí. Kpɛ̌l yaá dúhaa ntémé ɨ́ mpǎŋ búʼó yɨ́ná dí abě mbáʼrá e mikóo yɨ́.

⁶Yé e bʉ́ʉ́ bʉ̂r o b'á sâ ebébe ɨ́ páʼ bísâ byaá bá. Bɨ́haá, bé á tyen megwǎl ó, lɨ́ olɛblɛ̂b bíbɨ́bla bí ólɛ̂ʼla, ntɔ̂ʼ dyɛ̂l ɨ́ mʉ́ʉ́ ménzɨ̌ meswîh.

⁷Bé gwɨ́m ó, bé díʼee olɛ̂ʼla o métié, bɨ́ɛ yɨ́ɛ agʉ́ǎ sá túʼ bé dí elɛ́ɛ yɨ́, nkʉ̂ pʉgʉ́ bá gʉ́a mílɔ̌b bé dí eboʼlo mí.

⁸Mɨná bé lɨ́ ekʉ́ gʉ́a ó, metié mé Moyɨ̂z, mé e nyɔm ó, njɨ ɨ́ páʼ mʉ̂r dí edwáawo mé, gbâ ɨ́ nkɔb nyá.

⁹Mɨná bé lɨ́ egʉ́a ntémé ó, metié maá, mé á bé atyélɔɔ lɨ́ esú lé ótîtyěl ó bʉ̂r. Mé á tyélɔɔ ó, lɨ́ esú é bʉ̂r bâ: ogbah o métié, baá o dí egbɔba le otyɛ̂b bé ésôʼ bɔ́ɔ́ bá, minjéʼe-Nzyɛ̌m, osyɛ̂l o mísyóm, bʉr o dí esâ Nzyɛ̌m nkěh bá, baá o dí agúmo e Nzyɛ̌m bá, ojʉ̂l bé ósɔ́ŋ, ojʉ̂l bé ónyɔ̌ŋ, le ojʉ̂l o bʉ̂r,

¹⁰bʉr o dí elœʼ ményʉ́l mɔ́ɔ́ ɨ́ nzɨ̌ bijoó bá, otɛba o bʉ́rʉ̂m, obɛ́ma o bʉ̂r, baányâ-bibɛr, le oboʼlo o bíbɛr. Nzyɛ̌m á tyêl metié ntémé ó, lɨ́ ekamle bísyɛ́ɛla bíbyɛ̂h bi dí ajala e lɛ́ʼlá mpâ mɨ́ná bé á dweŋɔɔ gá wɨ́ bí.

¹¹Lɛ́ʼlá mpâ waá, wé ó waá dí eduho ɨ́ Mbɨambɨa Lɔ́ɔ dí e kûm wɨ́. Nzyɛ̌m mɨ́ná dí esêʼle nyá, mʉr tɨ̂ʼ ó b'á tímle me lɔ́ɔ waá ó, me túnaa wê.

¹²Me lɨ́ edwe Tî gá wɨ́ná Yésʉs-Krîst nzyǒo, mʉr á dwe me nkul ɨ́ syɛ́ɛ́ yâm nyá, ebě, nye á láa ó, me ó mʉr ebúʼlɔɔ, nye ntɔ̂ʼ tyêl mé ɨ́ syɛ́ɛ́ yé,

¹³mɛm yɨ́ɛ mʉr á sɨsâ Nzyɛ̌m nkěh ɨ́ melú mé épíhe nyá. Me á si tíble bʉr bé, le edîʼ mpêl. Damá jóʼǒ mpʉ mé á sâ syɛ́ɛla yaá yɨ́, Nzyɛ̌m á si jɨ̂ʼ me nkoó, nyɨɛ lɨ́ egʉ́a ó, bisyɛ́ɛla mé á sɨsâ bí, byé á jaa tɨtɨ̂ ó, njɨ lɨ́ egʉʼla lâm, le abûʼla wǎm.

¹⁴Sá tɨ̂ʼ ó Dâ á sʉ me metyɛʼ me mpóm ɨ́ nkalá nkalá yɨ́. Nye á si gbâ me ntémé búʼó ti e kpɛ̌l ɨ́ léme, ɨ́ nzɨ̌ mé Yésʉs-Krîst.

¹⁵Lɔ́ɔ́ ébûʼlɔɔ, waá bʉ̂r bɨ́bɛ̂h jálá le ekam wɨ́, wé ó wɨ̂: Yésʉs-Krîst á nze ɨ́ sí yɨ̂ʼ ó, nye ntáa nzě tíʼ ósyɛ̂l o mísyóm. Nó ó, ɨ́ sɔ́má bʉ̂r o b'á sâ misyóm bá, mɛm ó b'á sahle.

¹⁶Me ó b'á jɨ́ʼɔɔ nkoó, ebě, me ó b'á bu sahle. Yésʉs-Krîst á taare elɛ̂ʼle mpuo bíhwó nyé ó, ɨ́ jɔʼ nyé á dûhwo me yɨ́. Yé ó mveʼle nyé dí elɛ̂ʼle bʉ̂r bɨ́bɛ̂h o ngá dyɛ̂ʼwo e né ɨ́ melû me dí enze má bá. Bé ódyɛ̂ʼwo e né, ntɔ̂ʼ bǐ twǐʼ njʉ̌m dǐ.

¹⁷Nzyɛ̌m dí njwɨ́ɨ melú mé mpóʼo mɨ́mɛ̂h, adwidwe nyá, waá dí anyɨ̂n, waá dí Nzyɛ̌m nye omér nyá, dúu e kûm, byé díʼee e né njʉ̌m dǐ e njʉ̌m dǐ. Amɛn.

¹⁸Timotɛ̂, mwân wǎm, mě dwé gó metwɨ́ɨ́ mâʼ ó, lɨ́ edû lɛ́á ógwíha o mílɔ̌b dí elɛ́ɛ, dumo e go wɨ́. Gó óbaʼle métwɨ́ɨ́ mâʼ nó, go ólwímlǎ mbɨambɨa dɔm

¹⁹ɨ́ nzɨ̌ búʼó yô le mipahlá mí lémé myô mi dí ɨ́ pyɛɛɛ mí. Bʉ́ʉ́ bʉ̂r bɨ́ɛ, bé á be ó sí kâr éjwɨ́ɨ mílémé myɔ́ɔ́, búʼó yɔ́ɔ́, yé ntɔ̂ʼ ndáma, nwɨɨla e sitíma dí elʉ́ŋa ɨ́ medíbé, dîm yɨ́.

²⁰Ɨ́ sɔ́má bʉ̂r yaá, yé ó Iménaus ndu e l'Alɛ́kzaŋdros. Bé ó mé á dwe Sátan ó, nye lɛ̂ʼlaa bé túú, bé nkʉ̂ gwâʼ ésâ Nzyɛ̌m nkěh.