Read Koonzime 1 Timotɛ̂ 2 Bible Online

1 Timotɛ̂ 2 - Koonzime bible

1 Timotɛ̂ 2

¹Sá ésôʼ mé nyɛ́ɛ́ lɛ́ɛ gó yɨ́, yé ó, go jɨ̂ʼlaa e Nzyɛ̌m lɨ́ esú é bʉ̂r bɨ́bɛ̂h. Go e jáʼ nyé sá yɨ́yɛ̂h lɨ́ esú é bʉ̂r oswîh. Go e dwé nyé ntémé nzyǒo.

²Jɨʼlaa ntémé lɨ́ esú lé ójwɨ́ɨ, ndu e baá bɨ́bɛ̂h dí e nkul jwɨ́ɨ bá. Sá tɨ̂ʼ ó mɨ́ná ódû gá kʉ̌ tyen dí abe e ntɨ́ʼá wɨ́, le edi ntémé ɨ́ puuu yɨ́. Ɨ́ bicwiʼ gá bíná, mɨná bé ódwáawǒ Nzyɛ̌m le edwe ményʉ́l mɨ́ná medile.

³Nzyɛ̌m, Tiʼbʉr gá wɨ́ná, nye lɨ́ ebeě syɛ́ɛla yaá mbɨ̂mbɨá; nye lɨ́ ekpɛl yê.

⁴Nyě kpɛ̌l ó, bʉr bɨ́bɛ̂h níʼee ɨ́ twǐʼ njʉ̌m dǐ, le egʉ́a mílɔ̌b mi dí tyeetye mí.

⁵Ebě, Nzyɛ̌m, nye ó njɨ ngwár. Nó ntémé, bʉr, bé ó njɨ e mesaádɔm ngwár dí páʼ bé e boo Nzyɛ̌m nyá. Nye mʉr tɨ̂, nye ó mʉr: Yésʉs-Krîst,

⁶mʉr á pa dwe twiʼ yé lɨ́ etáǎ góo, le edwih bʉ̂r bɨ́bɛ̂h ɨ́ mpila ébébe nyá. Nó ó, lɔ́ɔ waá, wé á ka lɛ́ɔɔ ó, ɨ́ jɔʼ wé á jala le elɛ́ɔɔ yɨ́.

⁷Nzyɛ̌m nzě tyêl mé ɨ́ bidǐ bibá: yaá lɛ́a lɔ́ɔ wé, ti e yaá mʉ̂r milʉ́mlʉ́ wé. (Mě lɛ́ɛ́ ó, otyeetye; mé alɛ́ɛ bíbɛr.) Me ó lɛ̂ʼla lɨ́ esú é bʉ̂r o dí abe óYúden bá, lɨ́ edwe bé metwɨ́ɨ́ ɨ́ nzɨ̌ búʼó yɨ́ná, le otyeetye mé Nzyɛ̌m.

⁸Sá tɨ̂ʼ ó mé dí ekpɛl ó, ɨ́ gúmó yɨ́yɛ̂h, bʉrʉ̂m díʼee tí yɨ́. Bé jɨ̂ʼlaa e Nzyɛ̌m, lɨ́ ebɨ̂r mébó mé tí kʉ́, abe e nkpaa nkʉ̂ mesónó ɨ́ miléme.

⁹Mě kpɛl ntémé ó, bʉbá bwáraa mimbór mímpâ mî: bé dwêʼ menyʉ́l mɔ́ɔ́ medile, le edi e dúu. Abe e misíné mí jáálé, nkʉ̂ binkohó bí gʉ̂l, nkʉ̂ mindwé métwaʼlé ndu e mikán mi dí ɨ́ bwaʼ tâŋ mí.

¹⁰Bé ɨ́ jala le elɛ̂ʼle bʉ̂r kʉ̌l ó, bisyɛ́ɛla bimpâ bi dí ejala e bʉbá dí ekam ó, bé lɨ́ edwě Nzyɛ̌m kûm bá bí.

¹¹Yé jala ó, mʉmá díʼee ɨ́ puuu ɨ́ jɔʼ nyé dí ejɨ̂ʼ mílɛ́ʼlá yɨ́. Nye sâʼ lɛ̂ʼla wé mejóʼo e menzɨ̌ mɨ́mɛ̂h.

¹²Mé adwe nkûl ó, mʉmá dwêʼ bʉrʉ̂m milɛ́ʼlá, nkʉ̂ nʉa nkûl jwɨ́ɨ ɨ́ bʉrʉ̂m. Nye díʼee yɨ́ɛ ɨ́ puuu.

¹³Ebě, Ádam ó b'á nyɛɛ komlɔɔ; píe tɨ̂, kǎ bɔma Éfa.

¹⁴Nó ó Ádam nyɨɛ á bé abûʼla míkóo. Mʉmá ó b'á kʉ́ŋɔɔ. Nó nyé á duma, ntɔ̂ʼ dwir nyé mʉr tɨ̂ʼ syɛ̂l misyóm.

¹⁵Mʉ́má ódyɛ̂ʼwo e Nzyɛ̌m, le ekpɛl bʉ̂r, dǐ tí ɨ́ páʼ mé Nzyɛ̌m, le edwe nyʉ̂l nyé medile nó, nye óbǐ twiʼ lɨ́ ebyá nyé dí ebyâ lɨ́.