Read Koonzime 1 Timotɛ̂ 4 Bible Online

1 Timotɛ̂ 4 - Koonzime bible

1 Timotɛ̂ 4

¹Sísǐm mé Nzyɛ̌m lɛ́ɛ́ ɨ́ hwɨ́m ó: ɨ́ melú mé ósûʼla má, yé óbe ó e bʉr o ngá gbɔba e búʼó yɨ́ná bá. Bé ójôʼlo mísísǐm míkóo, le ebúʼla mílɛ́ʼlá méleme, mé á nyɛɛ kûhlo mí.

²Bé óbe ó baányâ-mikóo, le olɛ́a o bíbɛr. Syóm dí ejwɨ́ɨ bé wɨ́, wé óndɨndáma milémé myɔ́ɔ́ ó, tó pyâl ɨ́ jɔʼ bé óbe, bé mû akǎ tʉ sôn yɨ́.

³Bé lɨ́ ekamle bʉ̂r lɨ́ ebâ, le etíl bé mʉ́ʉ́ méde. Tó kœb ó, Nzyɛ̌m á komlo mede maá ó, lɨ́ esú lé édeŋɔɔ. Bʉr o dí egʉ́a ótyeetye le ebúʼla wé bá, bé óde mé ó, bé osí pǎ jɨʼla e Nzyɛ̌m, le edwe nyé nzyǒo tɨ̂.

⁴Ebě, sá yɨ́yɛ̂h Nzyɛ̌m á komlo yɨ́, yé ɨ́ mbɨa. Mʉ̂r sí dwě Nzyɛ̌m nzyǒo, dumo e sâ swîh, nkʉ̂ sâ kɛl nó, sâ yaá, yé ajala le etílɔɔ mʉ̂r.

⁵Ebě, lwǐb mé Nzyɛ̌m le minjɨʼla mû ó sí boó pubo méde maá.

⁶Gó sí dwe bɨ́ɔɔ́ bô milɛ́ʼlá mîʼ nó, go bě mpǎŋ syɛ̂l mesâ mé Yésʉs-Krîst! Go ódwidwe mílɛ́ʼlá ɨ́ nzɨ̌ nyaá ó, ɨ́ milɔ̌b mí búʼó gá yɨ́ná, ti e mpǎŋ lɛ́ʼlá gó á jóʼo wɨ́.

⁷Gó ajala le edû nzɨ́ bikɨkɛna bi dí elɛ̂ʼle bʉ̂r ó, bé sâʼ Nzyɛ̌m nkěh, byaá ótɔ́má bʉ́bá dí esâ bí. Gbáʼ nkûl lɨ́ ekubla ɨ́ milɔ̌b mé Nzyɛ̌m.

⁸Ebě, pɨ́ʼá nyʉ̂l wɨ́ɛ, wê mʉr tɨ̂, wé ó e mâ nyɔm. Edwáawǒ Nzyɛ̌m lɨ́ɛ, lé e nyɔm ɨ́ páʼ bísá bíbyɛ̂h, ebě, mʉr dí edwáawǒ Nzyɛ̌m nyá, nyɨ́ bi ménkɛ̌ʼ ɨ́ páʼ twiʼ, yaá báánâ, ti e yaá ngá tô dóló njʉ̌m dǐ e njʉ̌m dǐ yɨ́.

⁹Lɔ́ɔ́ wɨ̂ʼ, wé ó tyeetye. Wɨ́ɛ ó dí waá bʉ̂r bɨ́bɛ̂h jálá le enʉa, le ekam wɨ́. Wé ó:

¹⁰Nzyɛ̌m wɨ́ná dí kublakúbla, waá dí Tiʼbʉr ɨ́ páʼ bʉ̂r bɨ́bɛ̂h nyá ó b'á gbâ mpûʼla ɨ́ milémé míná. (Náǎ yé ó, nyě tǐʼ ó, baá o dí edyêʼ koo e né bá!) Lɔ́ɔ waá wé omér ó dí esâ ó, bɨ̌h kámaa túú syɛ́ɛ́, ti e dɔm bɨ́h dí elwímla lɨ́.

¹¹Lɛ́yɨ́ɨ́ bʉ̂r milɔ̌b mî. Go e lɛ́ʼlé bé myǎ.

¹²Anyamlě kam ó, mʉr pyéhee go ɨ́ lɔ̌b gó dína loʼo. Lɨlɛ́ʼláá óbûʼla mveʼle édû. Sáʼ nó e bisyɛ́ɛla bî: lwǐb yô, twiʼ yô, kpɛ̌l yô, búʼó yô, lɨ́ edwe nyʉ̂l nyǒ medile ɨ́ míh mé Nzyɛ̌m.

¹³Tó pyâl ɨ́ jɔʼ mé ngá nze gʉ̂ʼ kwá nyǒ yɨ́, sáʼ sɨ́n lɨ́ eláa Mékaná mé Nzyɛ̌m ɨ́ kpɛŋlɛm, le egbâ bʉ̂r nkul ɨ́ miléme, le elɛ̂ʼle bê.

¹⁴Anyamlě sâ lěh ɨ́ lɔ̌b ndwéá Nzyɛ̌m á dwe go ɨ́ jɔʼ ógwíha o mílɔ̌b mé Nzyɛ̌m bé á lwib, dumo e go yɨ́, púhlá le kɛlá mébô ótyɛ̂b bé ésôʼ ó Mbɛ̌r-Nzyɛ̌m bé á kɛl go wɨ́.

¹⁵Sáʼ sɨ́n lɨ́ elóŋlo bísyɛ́ɛ́ byaá, le egbâ lémé gô tɨ̂ʼ ɨ́ dwííí. Nó bʉ̂r bɨ́bɛ̂h ngá beě mpʉ gó ótô e byé dóló yɨ́.

¹⁶Gwá dwɛ̂ʼ gó mʉr tɨ̂ʼ ndu e lɛ́ʼlá gó dí edwe bʉ̂r wɨ́. Sɨ́sáʼ sɨ́n lɨ́ edû mílɔ̌b mínɨ̌. Gó ósâ nó wá, go ótíʼ gó mʉr tɨ̂, tíʼ ntémé baá o dí ejôʼlo gó bá.