Read Koonzime 1 Timotɛ̂ 5 Bible Online

1 Timotɛ̂ 5 - Koonzime bible

1 Timotɛ̂ 5

¹Antuhlo tɔ́má mʉr ɨ́ lɔ̌b syɛ́ɛla ébébe yé. Go ɨ́ jala le etɨ́e nyé yɨ́ɛ ó mpʉ sʉ́ŋ. Tɨ́áá duo yô, biloʼo, mpʉ bɨ́ɔɔ́ bô.

²Tɨ́e ntémé otɔ́má bʉ́bá mpʉ ónyʉ̌ŋ. Tɨ́e méséhé mé bʉ́bá ntémé mpʉ ókɛ́l bô, lɨ́ edwe nyʉ̂l nyǒ medile ɨ́ míh mé Nzyɛ̌m.

³Jwááwáá míkúhó mí bʉ́bá mi dí myaá mimpâ mí.

⁴Gúú kúho, bé e bwân, nkʉ̂ onta nó, bwán bé baá nyɛ́ɛ jɨ̂ʼ éséǎ Nzyɛ̌m syɛ́ɛ́ ɨ́ mbɛ̌r bʉ̂r wɔ́ɔ́ tʉ́ŋlʉ̌. Bé nkʉ̂ jána ósɔ́ŋ le onyɔ̌ŋ bɔ́ɔ́ mpʉ́lá bisyɛ́ɛla bɨ́ɛ, bé á pa sâ bé bí, ebě, syɛ́ɛla yaá, yé ɨ́ mbɨa ɨ́ míh mé Nzyɛ̌m.

⁵Nó ó, waá dí kúho tyeetye ɨ́ ntɛ̂ʼ wé omér wɨ́, wé lɨ́ ekʉ́ sâ sɨ́n lɨ́ ejɨʼla e Nzyɛ̌m móhó e pum, ó nye súʼaa wê. Nzyɛ̌m nye omér ó dí egbâ wé mpûʼla ɨ́ léme.

⁶Kúho dí etíʼe ɨ́ gwɨ́má bísâ wɨ́, wɨ́haá, wɨ́ boó dwe yé kɔ́m, damá be ó, wé dína ó lɨ́ ekubla.

⁷Lɛ́yɨ́ɨ́ myé ntémé milɔ̌b mîʼ mímyɛ̂h. Myé díʼee bʉr o dí, abe e nkul edweŋɔɔ mébě bá.

⁸Nyʉ́ʉ́ mʉ̂r bé abaʼle mímbyɛ́l myé, kʉ́ buú be, baá ó mbɛ̌r bʉ̂r wé nɛ́ɛ: nye mʉr tɨ̂, nyɨ́ beně búʼó. Nye ɨ́ bébe, laa hááden.

⁹Go ócɛmǎ kúhó mʉ́má ɨ́ mekaná míé míkúho ó, waá mû e mimbû mekám mésaman wɨ́. Wé díʼee ntémé waá á be e njʉ̂m ngwár wɨ́.

¹⁰Go ócɛmǎ kúho díe ó, waá wé óbe, wé mû sí gúmo ɨ́ páʼ bísyɛ́ɛla bimpâ wɨ́. Wé díʼee mbi mʉ́má wɨ̂: waá á gwɨ̂l bwân, nʉa ójwóo mbɨ̂mbɨá, waá á jwɨɨ bʉr o mé Nzyɛ̌m mekʉ̌, kɛm bʉ̂r o dí esia e mitúú bá, gbâ nkûl lɨ́ esâ bísyɛ́ɛla bimpâ mimbi mímyɛ̂h wɨ́.

¹¹Yé ókǎ be míkúho mi dína meséhe mí nó, acɛma míé mɔ́ɔ́ ɨ́ mekaná míkúho maá, ebě, bé gwɨ́m étô ɨ́ mebâ nó, bé ótúmǒ koo e Krîst, ntɔ̂ʼ tô ɨ́ mʉ́ʉ́ mébâ meswîh.

¹²Bé lɨ́ edulo mébě ɨ́ menyʉ́l mɔ́ɔ́, ebě, bɨ́ syěl tí mínkâl bé á pa ntaa mí.

¹³Nó ntémé, bé ámû jaá jɨ̂ʼ édi lɨ́ ontwii. Bé ámû jaá tô le etô mímbɛ̌r e mímbɛ̌r myɛ̂h, le esâ mpǔʼ, le elwib bílwǐb bi dí asiŋa bí.

¹⁴Sá tɨ̂ʼ ó mé dí ekpɛl ó, mikúhó mí bʉ́bá dína mempɨ̂h mí, myé tôʼ ɨ́ mebâ yɨ́. Myé nkʉ̂ byâ bwân, le ebaʼle mímbɛ̌r myɔ́ɔ́. Myé ayɨ́ dwe bʉ̂r o dí elwímla e mɨná gá bá jɔʼ dí ó, bé swéʼee díé é sɔ́má gá yɨ́ná yɨ́.

¹⁵Ebě, damá jóʼo ɨ́ báánâ, myúú, mí duho ɨ́ nzɨ̌ mpâ, dyɛ́lɔɔ ɨ́ nzɨ̌ swîh, lɨ́ etó dû Sátan.

¹⁶Mbûʼla mʉmá óbe e mbyɛ̂l, kúho ɨ́ mbɛ̌r bʉ̂r wé nó, nye súʼaa kúho waá. Mbûʼla mʉmá sá antúŋlǒ Mbɛ̌r-Nzyɛ̌m e mbeʼ waá, ebě, Mbɛ̌r-Nzyɛ̌m jaá susúʼo míkúho ó, njɨ myaá mi dí ɨ́ ntɛ̂ʼ mí.

¹⁷Otyɛ̂b bé ésôʼ dí ejwɨ́ɨ̌ Mbɛ̌r-Nzyɛ̌m mbɨ̂mbɨá bá, bé ɨ́ jala le ebi myɛ́na mebá. Baá dí etúno mílɔ̌b mé Nzyɛ̌m, le edwe bʉ̂r milɛ́ʼlá bá ó ngá bi mé, sahle.

¹⁸Ebě, yê cɛmá ɨ́ Mekaná mé Nzyɛ̌m ó: Bɨ̌n sá apɨ̌r ntœœ num ó, yé ayɨ́ de ɨ́ jɔʼ yé dí eséǎ syɛ́ɛ́ blê yɨ́. Ntémé: Lóbila jala le edweŋɔɔ ó myɛ́na mé.

¹⁹Akam ó, mʉr ngwár e ngwár dwêʼ tyɛ̂b esôʼ Mbɛ̌r-Nzyɛ̌m mebě. Kamaǎ njɨ ɨ́ jɔʼ óboʼlo dí obá, nkʉ̂ olɛ̂l yɨ́.

²⁰Baá dí etô le esâ syóm dóló bá, cɨ́lɨ́ɨ́ bé ɨ́ kpɛŋlɛm. Jɔʼ yaá ó bʉ́ʉ́ bʉ̂r ó sɔ́má yaá ngá jóʼo bʉ́á yɨ́.

²¹Mě lɛ́ɛ́ gó ɨ́ míh mé Nzyɛ̌m, le Yésʉs-Krîst, bé e mitwárá bééngeles ó, go bâʼlaa metwɨ́ɨ́ mâ. Gǒ sá asâ ménkɔ̌m ɨ́ jɔʼ gó tíʼé lɔ̌b yɨ́. Akʉ́a nyʉ́ʉ́ mʉ̂r ɨ́ nkɔb.

²²Alɨ̌ kɛl mʉ̂r mebô, lɨ́ etyêl nyé ɨ́ dǐ ɨ́ Mbɛ̌r-Nzyɛ̌m. Nó ntémé, anʉa ntœ́b ɨ́ bisyɛ́ɛla bí ébébe byé onkán. Ɨ́ páʼ kʉ̌ tyen gó dí edû wɨ́, wé díʼee abe e mebě.

²³Akǎ dɨdě njɨ medíbé mé omér. Déʼ bá ményoʼ, lɨ́ esú é mo gô, le ɨ́ lɔ̌b métyɛʼ me nyʉ̂l me dí esâ gó ɨ́ jɔʼ yɨ́yɛ̂h má.

²⁴Misyóm mí bʉ́ʉ́ bʉ̂r, sɨ́sá ó nyɨnyɨ̂n ɨ́ ponó, bʉr baá dína apǎ dweŋɔɔ mébě. Bʉ́ʉ́ bʉ̂r bɨ́ɛ, misyóm myɔ́ɔ́, myé lɨ́ ekǎ nyɨ́n ɨ́ kpɛŋlɛm ó, njɨ epíhe.

²⁵Jwɨʼ gwár e gwár yaá ntémé ó bísyɛ́ɛla bimpâ dí enyɨ̂n ɨ́ sʉ́lʉ́lʉ́ yɨ́. Byé damá di anyɨ̂n ɨ́ sʉ́lʉ́lʉ́, byé abe e nkul eswab.