Read Koonzime 1 Timotɛ̂ 6 Bible Online

1 Timotɛ̂ 6 - Koonzime bible

1 Timotɛ̂ 6

¹Bʉr bɨ́bɛ̂h o dí bitúʼǎ bá, bé ɨ́ jala le eláa ójwɨ́ɨ́ bɔ́ɔ́ ó, bé ó ɨ́ sɔ́má bʉ̂r o jálá le edwáawɔɔ bá. Nó ó bʉ̂r ngá di, aswêʼ díé mé Nzyɛ̌m, nkʉ̂ lɛ́ʼlá mɨ́ná dí edwe bʉ̂r wɨ́ yɨ́.

²Nó, bitúʼǎ bi dí ejóʼo le obûʼla mé Nzyɛ̌m bí, byé ajala le epyêh ójwɨ́ɨ bɔ́ɔ́ dɔɔ́ le ebe ó, bé ó bɨ́ɔɔ́ ɨ́ búʼó tʉ́ŋlʉ̌. Byé séaa bé syɛ́ɛ́ túʼǎ yɔ́ɔ́ mbɨ̂mbɨá, bɨ́ɛ lɨ́ egʉ́a ó, bʉr o dí edira mínyɔm ɨ́ bisyɛ́ɛ́ byaá bá, bé ntémé, bé ó obûʼla, bɨ́ɔɔ́ bɔ́ɔ́ be dí ekpɛl bá. Bisá bîʼ ó gó jálá le elɛ̂ʼle le etɨ́e bʉ̂r bí.

³Tî gá wɨ́ná Yésʉs-Krîst á si kʉ líʼe mɨná gá e lɛ́ʼlá mpâ mɨ́ná dí edû wɨ́, bé le olɛ̂ʼla dí edwáawǒ Nzyɛ̌m bá. Mʉ̂r bé akam mílɛ́ʼlá mínɨ̌, kǎ tó dwe yɨ́ɛ milɛ́ʼlá míswîh nó, lɛ́ɛ́, nyɨ́haá nkɛ́ɛ́ ó nyʉ̂l.

⁴Nyɨɛ ntémé agʉ́ǎ sɔ̂ʼ. Nyě le ekpaa. Ekpaa laá, lé nyɨ́n ó, ɨ́ jɔʼ nyé dí edo e bʉr, le egœ́a ɨ́ lɔ̌b mílɔ́ɔ yɨ́. Sá dí eduho tɨ̂ʼ yɨ́, yé ó: nzwíí, megô, nkěh e Nzyɛ̌m, tómlá.

⁵Bisyɛ́ɛla byaá, byé duduho ó, lɨ́ ekpaa lé laá. Nyě sɨ́sá bísyɛ́ɛla byaá ó, bé e bʉr o dí e bibol mípahlá, baá o dí agʉ́a ótyeetye bá. Nyě jaá gʉ́a ó, njɨ edwě Nzyɛ̌m kûm, lé ó gúú mbi nzɨ́ esáa bímɔnɨ́.

⁶Tó kœb ó, mʉ̂r dyɛ́nwá le edwě Nzyɛ̌m kûm, le edi e bisʉhʉʉ ɨ́ léme nó, mʉr waá ókʉ́ bi mínyɔm ɨ́ buo buo tɨ̂.

⁷Ebě, ɨ́ jɔʼ mɨ́ná bé á byɛ̂l gá ɨ́ sí yɨ̂ʼ yɨ́, mɨná bé á bé anze gá e sɔ̂ʼ. Nó ntémé, jɔʼ mɨ́ná ólaa gá tɨ̂ʼ yɨ́, mɨná bé abe e nkul enʉa gá yʉ́ʉ́ sɔ̂ʼ, tô e yê.

⁸Nó ɨ́ jɔʼ mɨ́ná dí ebi gá mede, ti e mimbôr yɨ́, mɨná jaá lɨlɛ́ɛ gá ɨ́ jɔʼ yaá ó: «Milémé gá míná, myé mû ó sí sula sí.»

⁹Tó kœb ó, bʉr o b'á tíʼe ɨ́ milémé myɔ́ɔ́ ó, bé óbi bísâ ɨ́ buo buo bá, bé lɨ́ eduma ɨ́ mebʉ́blá. Bé lɨ́ eswam bé bʉr o tɨ̂ʼ enkɔ́máá ɨ́ twíí. Bé lɨ́ emɛ́rɔɔ ɨ́ mpila bígwɨ́má ɨ́ buo buo. Bʉr o dí edû bígwɨ́má byaá bá, bé dú ó, sá dí ajwɨ̂ʼ yɨ́, le yaá dí edulo mítúú ɨ́ nyʉ̂l mʉr yɨ́. Bé e mbi bígwɨ́má dí edímle mʉ̂r, le ejʉ̂ nyé wɨ́.

¹⁰Ebě, enkpɔɔ é mɔnɨ́, lé ó etín é bísá bí ébébe bíbyɛ̂h. Tó kœb ó, bʉ́ʉ́ bʉ̂r ó sɔ́má gá yɨ́ná, bé á be ɨ́ nyɛɛ́ bûʼlǎ Nzyɛ̌m, bé ntɔ̂ʼ kǎ lʉ́ŋa ɨ́ bɨ́ bígwɨ́má. Bɨ́ dîm. Bé mû ó sí dyɛ̂l ɨ́ nzɨ̌ swîh. Nó ɨ́ báánâ, bɨ́haá, bé mû ó sí dulo mítúú ɨ́ buo buo ɨ́ menyʉ́l mɔ́ɔ́.

¹¹Gua mʉr mé Nzyɛ̌m, gwá syɛ̂hle bísá bínɨ̌ bíbyɛ̂h. Dúʼóó njɨ bisyɛ́ɛla bi dí tîtyěl bí. Jwááwáá Nzyɛ̌m, le edyɛ̂ʼwo e né, le ekpɛl bʉ̂r. Diʼee mʉ̂r bíhwó. Talaa ntémé njwɨr.

¹²Bɨ̌n e bʉr o dí edyɛ̂ʼwo e Nzyɛ̌m bá, lwímláá gá mpǎŋ dɔ̂m. Dɔm laá, lé ó, laá é búʼó. Mɛ́rɨ́ɨ́ gá twǐʼ njʉ̌m dǐ ɨ́ kpɨ́ɨ́ɨ́. Nzyɛ̌m á jébe go ó, go níʼee ɨ́ twǐʼ njʉ̌m dǐ yaá. Yé á be ó, ɨ́ jɔʼ gó á boʼlo mpǎŋ mboʼlá ɨ́ míh mé óbea yɨ́.

¹³Mě káálé ɨ́ míh mé Nzyɛ̌m, mʉr dí edwe bísá bíbyɛ̂h twiʼ nyá, ndu e maá mé Yésʉs-Krîst, mʉr á dwe nkam mbɨ̂mbɨá ɨ́ mpǒm mé Pɔ́ŋtus Pilátos nyá ó,

¹⁴go bâʼlaa etié énɨ̌. Sá antaa lé ɨ́ jɔʼ gwár. Diʼee mʉ̂r dí, abe e nkul edweŋɔɔ mébě nyá, tó pyâl pyáláa ɨ́ móhó Tî gá wɨ́ná Yésʉs-Krîst óbáʼǎ nze wɨ́.

¹⁵Tî Yésʉs ónyɨ̂n ɨ́ jɔ̌ʼ Nzyɛ̌m mʉr tɨ̂ʼ á boo tyêl ó, nye ónyɨ̂n yɨ́. Ebě, Nzyɛ̌m waá ó dí Njwɨ́ɨ mɨ́ná dí egúmlo, dí Njwɨ́ɨ ojwɨ́ɨ, Tî otî nyá.

¹⁶Njɨ nye omér ó dí abe e nkul edwe. Nyě dǐ ó, ɨ́ myɛ́n tʉ́ŋlʉ̌, mbǐ myɛ́n nyʉ́ʉ́ mʉ̂r dí abe e nkul ekúnwo e tɨ̂ʼ wɨ́. Mʉr ngwár, nyé apǎ bee nyê. Mʉr ntémé, nyé abe e nkul ebee nyê. Kûm, ndu e nkul, byé dwéŋɔɔ nye njʉ̌m dǐ e njʉ̌m dǐ. Amɛn.

¹⁷Lɛ́yɨ́ɨ́ óbil o bísâ ɨ́ jɔʼ yɨ̂ʼ ó, bé sá ankɛ́ɛ ményʉ̂l. Bé sá adyɛ̂ʼwo le okúm le ogbaa wɔ́ɔ́, ebě, mbi ókúm wɔ́ɔ́, wé abe lɨ́ ebea. Milémé myɔ́ɔ́, myé lónaa ɨ́ mpûʼla ɨ́ lɔ̌b mé Nzyɛ̌m, nyɨɛ mʉr dí epǎ dwe mɨ́ná gá bisá bíbyɛ̂h ɨ́ ntʉʉʉ́ nyá. Nyě sá nó ó, nye gbâʼ mɨná gá bisʉhʉʉ ɨ́ miléme.

¹⁸Lɛ́yɨ́ɨ́ óbil o bísâ baá ó, bé sâʼ embɨa. Bisyɛ́ɛla bí émbɨa byɔ́ɔ́ bíɛ, byé díʼee ɨ́ buo buo. Bé díʼee ɨ́ cǎr ó, bé súʼaa bʉr, le etô bé e mingúlá myɔ́ɔ́.

¹⁹Bé kʉ̂komaa bé bʉr o tɨ̂ʼ ekʉ̌m empâ, lɨ́ esú é mélû me dí enze má. Bé sá nó ó, bé nkʉ̂ mɛ̂r twiʼ ɨ́ kpɨ́ɨ́ɨ́, yaá dí kwahaá mpǎŋ twiʼ yɨ́.

²⁰Nó ó, Timotɛ̂, baʼlaǎ lɛ́ʼlá Nzyɛ̌m á dwe go wɨ́. Go e syɛ́hlé ólɛblɛ̂b o mpyóó, bʉ̂r sɨ̂seʼle ó, «ngwɨ́á» wɨ́.

²¹Mbǐ ngwɨ́á waá, bʉ́ʉ́ bʉ̂r, bé á si kam wê, ntɔ̂ʼ bîr búʼó yɔ́ɔ́. Ncwɨ́ncwɨ́a mé Nzyɛ̌m díʼee e bɨ̌n óbɛ̂h.