Read Koonzime 2 Timotɛ̂ 1 Bible Online

2 Timotɛ̂ 1 - Koonzime bible

2 Timotɛ̂ 1

¹Yé ó mɛm, Pɔ̂l, mʉr milʉ́mlʉ́ mé Yésʉs-Krîst ɨ́ lɔ̌b gwɨ́má mé Nzyɛ̌m ó dí ecɛma gó mekaná mâ. Lʉ́mlʉ́ wâm, wé ó, me lɛ̂ʼlaa twiʼ nyé á kɛʼ mɨná gá yɨ́. Mɨná bé óbi gá twiʼ yaá ó, ɨ́ mpúhlá gá nyɨ́ná e Yésʉs-Krîst.

²Mě cɛmá ó, gua mwâ kpɛ̌l wǎm Timotɛ̂. Metyɛʼ me mpóm, le njɨ́ʼá nkóó, le mepyɛbla, byé díʼee e go, duho e Nzyɛ̌m Sɔ́ŋ wɨ́ná, bé e Tî gá wɨ́ná Yésʉs-Krîst.

³Me lɨ́ edwě Nzyɛ̌m nzyǒo ɨ́ jɔʼ yɨ́yɛ̂h. Me lɨ́ esâ sɨ́n lɨ́ esâ mínjɨʼla ɨ́ lɔ̌b gô, móhó e pum. Mě séá nyé syɛ́ɛ́ yaá ó e mipahlá mí léme mi dí ɨ́ pyɛɛɛ mí, jwɨʼ gwár mpʉ bímpám byâm, byé á sɨsâ nye yǎ yɨ́.

⁴Jɔʼ mé dí esímsǎ mpʉ gó á jɨ yɨ́, lémé wâm, wé lɨ́ ejóʼo ntɔ̂ʼ dwéh ébee gô. Ɨ́ jɔʼ mé óbáʼǎ bee gó yɨ́, bisʉhʉʉ, byé óbe mé ɨ́ léme lwɨ́ŋlá.

⁵Mě sá ntémé ó, sîsimsǎ búʼó yô dí abě mbáʼrá e mikóo yɨ́. Yé ó mbǐ búʼó ngwár e ngwár nyɔ́ŋ mpám gǒ Lɔyîs, bé e nyʉ̌ŋ Eníke, bé á be e yé yɨ́. Me lɨ́ ekʉ́ gʉ́a ɨ́ lémé wâm ó, mbǐ búʼó waá ó dí go ntémé ɨ́ léme wɨ́.

⁶Sá tɨ̂ʼ ó gó dí ɨ́ jala le esímsǎ ndwéá Nzyɛ̌m á lómlo go, waá gó á bi ɨ́ kɛlá mé á kɛl go mebó mâm wɨ́. Nó ó, sáʼ ó, go súʼaa bʉr e ndwéá gô waá.

⁷Ebě, Sísǐm Nzyɛ̌m á ntɨh mɨná gá wɨ́, wé adwe mɨ́ná gá bʉ́á. Wé ó sísǐm nkûl, sísǐm kpɛ̌l ti e waá bíhwó.

⁸Nó, ajóʼo bá sôn ɨ́ lɔ̌b mboʼlá mɨ́ná dí eboʼlo, dumo e Tî gá wɨ́ná wɨ́. Ajéʼe mɛ̂m. Ajóʼo sôn ɨ́ lɔ̌b ménkara mé mû kɛ́ʼá e mé má. Go e dúhwó mítúú mi dí edweŋɔɔ mɨ́ná ɨ́ lɔ̌b Mbɨambɨa Lɔ́ɔ mí. Go e dúhwó e nkǔl Nzyɛ̌m dí edwe nyɨ́.

⁹Nye á si tíʼ mɨná, ntɔ̂ʼ jébe mɨ́ná ó, mɨná díʼee bʉr o dí egúmo e né bá. Nye á bé ajébe mɨ́ná ɨ́ lɔ̌b bísyɛ́ɛla bimpâ bíná. Nye á jébe mɨná gá ó, ɨ́ lɔ̌b bíjwɨʼ byé nye mʉr tɨ̂, le mpam nyé á be e né, nyaá nyé á be ó, nye ólɛ̂ʼle mɨ́ná nyɨ́. Nye á boo cwɨ́a e mɨná ó, kʉ́ e sí apǎ bě kuhá. Jɔʼ yaá ó nyé á nyɛɛ cwɨ́a e mɨná ɨ́ nzɨ̌ mé Yésʉs-Krîst yɨ́.

¹⁰Mpam nyaá á ka nyɨ̂n ɨ́ kpɛŋlɛm ó, lɨ́ epyál mé Yésʉs-Krîst, Tiʼbʉr gá wɨ́ná. Nyɨ́ teʼle nkûl eswie. Nye á lɛ̂ʼle mɨná ɨ́ nzɨ̌ Mbɨambɨa Lɔ́ɔ ntémé ó, mɨná bi gá twiʼ mpâ, yaá dí njʉ̌m dǐ e njʉ̌m dǐ yɨ́ ó, ɨ́ Krîst.

¹¹Mbɨambɨa Lɔ́ɔ waá ó mé dí etúno wɨ̂, ebě, Nzyɛ̌m á si tyêl me ɨ́ dǐ lɛ́a lɔ́ɔ wé, le yaá mʉ̂r milʉ́mlʉ́ wé, le yaá lɛ̂ʼla.

¹²Sɨ́ǎ yaá ó mé dí esia e mitúú yɨ́. Damá jóʼǒ mpʉ mé dí ebi mítúú mí tɨ̂ʼ yɨ́, mé ajóʼo bá sôn, ebe mé dí egʉ́a mʉ̂r mé á dyɛ̂ʼwo e né nyá. Mɨ́ bûʼla ntémé ó, nyě e nkul esâ ó, me bâʼlaa lɛ́ʼlá nyé á dwe me wɨ́. Nye óbaʼlě lɛ́ʼlá waá ó, tó pyâl ɨ́ móhó Yésʉs ngá báʼǎ nze wɨ́.

¹³Gwá baʼle mílɛ́ʼlá mímpâ gó á jóʼo me lɨ́ edwe mí. Myé díʼee go mveʼle, sá gó ótô le ekala bʉ́ʉ́ bʉ̂r yɨ́. Lɨlɛ́ʼláá ɨ́ mbi waá, e búʼó, ti e kpɛ̌l mpʉ mɨ́ná dí ebi byé ɨ́ mpúhlá nyɨ́ná e Yésʉs-Krîst yɨ́.

¹⁴Baʼlaǎ lɛ́ʼlá gó á dweŋɔɔ wɨ́ e nzɨ̌ Sísǐm mé Nzyɛ̌m dí edi ɨ́ mɨná nyá.

¹⁵Go mû ó lɨ́ egʉ́a ó, bʉr ó sí Azía bɨ́bɛ̂h, bɨ́ pɨʼ mê. Fígɛlus, ndu e Ermogɛ̂n, bé ó ɨ́ sɔ́má bʉ̂r yaá tʉ́ŋlʉ̌.

¹⁶Tî Yésʉs lɛ̂ʼlaa mbɛ̌r bʉ̂r mé Onesíforos membɨa mɨ́mɛ̂h, ebě, nye á si bu cwɨ́a e me, nzɔʼ nzɔʼ. Nyé abá jóʼo sôn ebe mé dí ɨ́ mbʉʼ e menkara,

¹⁷ebě, ɨ́ jɔʼ nyé á pyâl Rôm yɨ́, léme, wé á be nye ɨ́ báná báná ó, nyě sáá ó me. Nye á si bana nze bee me.

¹⁸Go lɨ́ egʉ́a ntémé mimbi bísyɛ́ɛla nyé á sâ bʉr Éfɛsɔs mí. Tî Yésʉs sâʼ ó, nye bíʼee njɨ́ʼá nkóó ɨ́ mebó mé ɨ́ móhó nyé óbáʼǎ nze wɨ́.