Read Koonzime 2 Timotɛ̂ 2 Bible Online

2 Timotɛ̂ 2 - Koonzime bible

2 Timotɛ̂ 2

¹Mwân wǎm, go náǎ ó e nkul dí eduho ɨ́ metyɛʼ me mpóm Nzyɛ̌m á sʉ go, ɨ́ nzɨ̌ mé Yésʉs-Krîst má nyɨ́.

²Lɛ́ʼlá wɨ́wɛ̂h gó á jóʼo me lɨ́ edwě buobuo oboʼlo wɨ́, pɛ́hɛ́ɛ́ bʉ̂r o jálá le ebúʼlɔɔ bá, go e lɛ́ɛ́ bé wǎ. Bé bʉr o tɨ̂ʼ ósûʼla ó, bʉr o ngá tô le elɛ́ɛ bʉ́ʉ́ bʉ̂r wǎ bá.

³Gua ntémé, siaǎ e mitúú mpʉ mê. Diʼeě mpǎŋ nkɔ́ɔ́ dɔ̂m mé Yésʉs-Krîst.

⁴Mʉr á tyélɔɔ ɨ́ dǐ nkɔ́ɔ́ dɔ̂m nyá, nyé abe lɨ́ esyɛŋa ɨ́ milɔ̌b mí sí yɨ̂. Nyě yéʼwó sɔ̂ʼ ó, njɨ syɛ́ɛ́ yé, lɨ́ esáa ó, mʉr á tyêl nye tɨ̂ʼ nyá, nkʉ̂ sêʼle nyê.

⁵Bʉ̂r obá sá nzwámlá nó, mʉr ngá bórɔɔ̌ káráá mpʉ myɛ́na nyá, óbe ó njɨ waá ngá sila nyʉ́ʉ́, dû mpʉ bé á pa tyêl metié mé éjwɨʼla ménkul maá yɨ́ nyá.

⁶Lóbila dí egwá séa yɨ́ ó jálá le enyɛɛ́ bi méde me dí epâh ɨ́ pemé má. Mé ó dí ejala e nkɔb nyé.

⁷Kʉ́ gwá baʼle ékǎn mê lɛ́ɛ́ gó lɨ̂, ebě, Nzyɛ̌m ódwe gó ocwóó ɨ́ mipáʼ mímyɛ̂h.

⁸Sísímsáá Yésʉs-Krîst, nta mé David, á pah nyá, mpʉ̌ Mbɨambɨa Lɔ́ɔ́ wâm dí elɛ́ɛ yɨ́.

⁹Bʉr, bé á si kâʼ me menkara mpʉ̌ sá lɛ́ɛ́, me ó syɛ̂l ebébe. Mě jaá sia e mitúú ó, njɨ ɨ́ lɔ̌b Mbɨambɨa Lɔ́ɔ mé dí etúno wɨ́. Damá jóʼo nó, ntʉ̌ Mbɨambɨa Lɔ́ɔ́ mé Nzyɛ̌m wɨ́ɛ á káʼɔɔ.

¹⁰Mě dúhwó mítúú mímyɛ̂h ó, lɨ́ esú é bʉ̂r Nzyɛ̌m á twâr bá. Nye á twâr bé ó, bé bíʼee twiʼ, ti e kûm dí edǐ njʉ̌m dǐ e njʉ̌m dǐ nyɨ́, ɨ́ nzɨ̌ mé Yésʉs-Krîst.

¹¹Ekǎn lɨ̂, lé ó sá ébûʼlɔɔ: «Mɨ́ná púhlá gá e Krîst lɨ́ eswie lé nó, mɨná tíʼe gá ntémé e né jwɨʼ gwár e gwár yaá.

¹²Mɨ́ná dúhwó gá mitúú nó, mɨná gá le onɔ́ɔ́ di ntémé ojwɨ́ɨ. Mɨ́ná kɛ́lá gá nye nó, nye ntémé kɛ́la mɨ́ná gâ.

¹³Mɨ́ná damá be gá baabûʼlɔɔ, nyɨɛ ɨ́ wé pâʼ, nye ó mʉr jálá le ebúʼlɔɔ nyá. Nye ákóʼó sóŋlo nyé mʉr tɨ̂.»

¹⁴Símsáá bʉ̂r milɔ̌b mî: go e gbá bé mpéné ɨ́ míh mé Nzyɛ̌m ó, bé ayɨ́ kǎ gœ́a njɨ ɨ́ lɔ̌b mékǎn. Megô maá, mé abe e nyɔm. Mé ámû ndáma bʉ̂r o dí ejóʼo mégô maá bá miléme.

¹⁵Léme díʼee go ɨ́ báná báná ó, go ódǐ mbi mʉ̂r Nzyɛ̌m óbóblo, ntɔ̂ʼ bee ó, wé e nyɔm wɨ́. Sáŋáá ó, go díʼee syɛ̂l mesâ dí abi ésɔ́m ɨ́ syɛ́ɛ́ yé nyá. Jɔʼ gó ólwilwib e bʉr ɨ́ sá dí edumo le otyeetye mé Nzyɛ̌m yɨ́, dúʼóó ntɨ̂n. Go e syɛ́hlé mímbóó.

¹⁶Syɛ́hláá olɛblɛ̂b o mpyóó ó dí abe e nyɔm ɨ́ búʼó wɨ́. Bʉr o dí egbâ ményʉ́l mɔ́ɔ́ ɨ́ nzɨ̌ nyaá bá, bé sóʼló bʉ̂r ó, bé sâʼ Nzyɛ̌m nkěh.

¹⁷Lwǐb yɔ́ɔ́, yé óbe ó mpʉ pɨ́ɨ́ mû sí bwaʼ, nye mû ɨ́ dɨ dɨ nyɨ́. Ɨ́ sɔ́má bʉ̂r o dí elwib nó bá, yé e Iménaus, bé e Filétos.

¹⁸Bɨ́ sâ ébébe énɨ́nɨ́ɨ́. Bé amɛ̂r ótyeetye. Bé lɛ́ɛ́ ó, Nzyɛ̌m, nyɨ́ boó pɛh ódwe kɔ́m. Lɔ́ɔ́ wɔ́ɔ́ waá, wɨ́ dímle bʉ́ʉ́ óbûʼla búʼó yɔ́ɔ́.

¹⁹Damá jóʼo nó, nkǎn Nzyɛ̌m á tyêl nyɨ́, nye dína ó, lɨ́ etyɛ̂b ɨ́ sɨŋ. Mekǎn nyé á cɛma, dumo e nkan nyaá má ó mâ: Nzyɛ̌m, nye lɨ́ egʉ́ǎ baá o dí egúmo e né bá. Mʉ́ʉ́ mé tɨ̂, mé ó: Mʉr dí ekɛn díé mé Tî gá wɨ́ná nyá, nye ɨ́ jala le esyɛ̂hle ébébe!

²⁰Ɨ́ ntwǎŋ mbɛ̌r, yé e bisʉ́á mimbi mimbi. Ntʉ bíbyɛ̂h dí misɛ́á ɨ́ gʉ̂l, nkʉ̂ ɨ́ nkóhó mɔnɨ́. Bisʉ́á bínɨ̌, byé e nyɔm ɨ́ jɔʼ bísyɛ́ɛ́ bí dúu mû lɨ́ esáŋɔɔ yɨ́. Byúú bísʉ́á bíɛ, byé ó mikpɛʼá ɨ́ bilɨ́. Byúú ntémé, mimeá e deʼé. Bíhaá bísʉ́á, byé biŋɔɔ ó, njɨ ɨ́ bisyɛ́ɛ́ bi dí ɨ́ buú pyéhɔɔ bí.

²¹Mʉ̂r syɛ́hlé bísyɛ́ɛla bʉ̂r jálá le ebene bí nó, Nzyɛ̌m ópɛ̂h nyé lɨ́ esú é bísyɛ́ɛ́ bí dúu, le etyêl nyé ɨ́ tyé mʉ̂r wé dí tí nyá. Mʉr waá ókʉ́ tíʼě ntinɨ̂ e ntinɨ̂ lɨ́ esú lé émbɨa mé Nzyɛ̌m, lɨ́ edi ɨ́ cǎr ó, nyě séá ó nye syɛ́ɛ́ yɨ́yɛ̂h nyé ótɨ́e nyé yɨ́.

²²Diʼeě e mpaŋ ncɛ́rá e bigwɨ́má bí óntwǒm. Dúʼóó njɨ bisâ bi dí tîtyěl bí. Dyɛ́ʼwáá e Nzyɛ̌m. Sáʼ bʉ̂r mpam. Sáʼ ó, bʉr bíʼee mepyɛbla. Sɨ́sáʼ nó, bɨ̌n e bʉr bɨ́bɛ̂h o dí ejɨʼla e Nzyɛ̌m e miléme ɨ́ sɔ́ɔ́ɔ́ bá.

²³Diʼeě e mpaŋ ncɛ́rá e bʉr o dí egœ́a mpʉ bígʉʼlʉgʉ́, nkʉ̂ baá o dí abe lɨ́ enʉa mílɛ́ʼlá bá. Go ɨ́ jala le egʉ́a ó, milɔ̌b myaá, myé jaá byâ sɔ̂ʼ ó njɨ bitɔm.

²⁴Tó kœb ó, yé ajala ó, syɛ̂l mesâ mé Nzyɛ̌m gœ́aa. Nye ɨ́ jala le edi ɨ́ nzahwa nzahwa páʼ bʉr bɨ́bɛ̂h, le egʉ́a édwe bé milɛ́ʼlá, le edûhwo ébébe.

²⁵Yé jala ó, nye gwâ tɨ́e bʉ̂r o dí edû nyé e megô bá, e njwɨr ɨ́ tala tala. Nyé sá nó wá, Nzyɛ̌m óbɛ̌m dib bé nzɨ̌ ó bé túmaa mikoo e misyóm myɔ́ɔ́, le edwira míléme. Bé ogʉ́a ótyeetye ɨ́ jɔʼ yaá.

²⁶Bʉr o dí ɨ́ mpila mé sɔ́ŋ meleme bá, bé ó lɨ́ bi ó, bé sâʼ mpʉ nyɨ́ɛ dí egwɨ̂m yɨ́. Sâ gwár, otyeetye mé Nzyɛ̌m, wé óbɛ̌m sâ ó, bé dúhaa ɨ́ mpila yaá.