Read Koonzime 2 Timotɛ̂ 4 Bible Online

2 Timotɛ̂ 4 - Koonzime bible

2 Timotɛ̂ 4

¹Me lɨ́ edî gó ɨ́ hwɨ́m ɨ́ míh mé Nzyɛ̌m Sɔ́ŋ, bé e Yésʉs-Krîst: (Yésʉs waá ó múo nzě tíʼe míkublakúbla le odwe milɔ̌b nyá.) Myúú mímboʼlá mimbá, myé ó: nzéá nyé óbáʼǎ nze wɨ́, le Mpóʼo nyé ójwɨ́ɨ nyɨ́. Mě tyél gó etié ó, ɨ́ míé mé óboʼlo onâ baá ó:

²túnáá Mbɨambɨa Lɔ́ɔ. Diʼee ɨ́ cǎr ó, go túnaa wé ɨ́ bijɔʼ bi dí ejala e túnó waá bí, ti e byaá bi dí ajala e wé bí. Dwéʼ bʉ̂r mebě ɨ́ mebébe mɔ́ɔ́. Lɛ́ʼláá bé mebě mɔ́ɔ́. Gbáʼ bé pîm ɨ́ búʼó. Sáʼ nó e bíhwó, ti e milɛ́ʼlá mímpâ.

³Ebě, jɔʼ, yé lɨ́ enze, jɔʼ bʉ̂r, bé ókâr édûhwǒ lɛ́ʼlá mpâ yɨ́. Bé ójaá jʉjóʼo ó, njɨ milɛ́ʼlá mi dí etíne bé ó, bé tôʼ dóló le elóŋlo bígwɨ́má ményʉ́l mɔ́ɔ́ dí eboó kpɛl ésɨsâ bí mí. Bé ógôhlo éntumo lé ólɛ̂ʼla, lé ójaá dwidwe bé bisá mílɛ́ʼlá byaá lɨ́, lɨ́ esú ó, bé nkʉ̂ gʉ́a soho lɨ́ ejʉjóʼo myé ɨ́ ti ti ti.

⁴Bé ákǎ jóʼo ótyeetye. Bé ójʉ̂joʼo ó, njɨ bikɨkɛna, ti e mikǎn.

⁵Sâ gwár, gua, máráá léme ɨ́ bijɔʼ bíbyɛ̂h. Júhwáá mítúú. Séáá syɛ́ɛ́ étúnǒ Mbɨambɨa Lɔ́ɔ. Lóŋláá syɛ́ɛ́ Nzyɛ̌m á tyêl go tɨ̂ʼ yɨ́ yɨ́yɛ̂h.

⁶Páʼ wâm, me mû ó ndwéá ngá sʉŋɔɔ̌ sí lɨ́ edweŋɔɔ̌ Nzyɛ̌m dúu e tɨ̂ʼ wɨ́. Jɔʼ étô yâm, yé mû ó ɨ́ nérénére.

⁷Nzwamlá nyǎm á be ó mbɨ̂mbɨá. Mɨ́ swim ɨ́ duo bíjʉ́ʉ́, pyâl lɨ́ odumo. Mɨ́ dyɛ̂ʼwo e Nzyɛ̌m, le esâ mpʉ̌ búʼó yɨ́ná dí elɛ́ɛ yɨ́.

⁸Yé jaá kǎ lîʼ mé ó, njɨ ebǐ káráá dí komá lɨ́ esú lâm yɨ́. Káráá yaá ó dí elɛ̂ʼle ó, mɨ́ bi nkâm ɨ́ míh mé Nzyɛ̌m. Tî Yésʉs, mʉr dí etíʼe mílɔ̌b lɨ́ otîtyěl nyá, ódwe mé yǎ lɨ́ elú lé épíhe. Nye ádwe yɨ́ɛ njɨ me e me. Káráá yaá, yé ódweŋɔɔ ntémé ó, bʉr bɨ́bɛ̂h o dí ekpɛl ébee nyé lɨ́ ebáʼǎ nze bá.

⁹Gbáʼ nkûl ó, go kpâhwa nzě kœb mé wâ.

¹⁰Demâs, nyɨ́ pɨʼ mê, ebě, nye lɨ́ ekpɛ̌l sí yɨ̂. Nyɨ́ tô Tesaloníka. Krésaŋ, nyɨ́ tô sí Galásia. Títos, nyɨ́ tô Dalmatía.

¹¹Luc nye omér ó dí wâ. Jébáá Marc; bɨ̌n e nɔ́ɔ́ e nzê. Nyě e nyɔm ɨ́ lɔ̌b syɛ́ɛ́ nyé óbɛ̌m séa e me yɨ́.

¹²Mɨ́ lómǒ Tisikôs Éfɛsɔs.

¹³Jɔʼ gó ónze yɨ́, go e nzé mé e ntɔra ómpíé wâm. Wé á lîʼ ó, Troâs, ɨ́ mbɛ̌r mé Kárpʉs. Nze mé le mekaná mɨ́mɛ̂h ntémé, kʉ́ buú be, maá o dí misɛ́á ɨ́ bikʉ́r bí ótír má.

¹⁴Alexandre, dí lûl melûl nyá, á si bu sâ me ebébe. Tî gá wɨ́ná ókuna mé bisyɛ́ɛla nyé á sâ me bí.

¹⁵Gwá di le ocwóó páʼ mʉ̂r waá, ebě, nyɨ́ buú kamle bɨ́h lɨ́ edwe bʉ́ʉ́ bʉ̂r milɛ́ʼlá gá míná. Nye á si bu pɨr mekǎn mɨ́h.

¹⁶Jɔʼ ésôʼ mé á kar lɔ̌b wâm yɨ́, abe e mʉr á tyɛ̂b bǎʼ e me. Bɨ́bɛ̂h, bé á si líʼe me ɨ́ ntɛ̂ʼ. Nzyɛ̌m sá aláa bé baa ébébe yaá!

¹⁷Tî Yésʉs ó b'á kɛm me, le egbâ mé pîm ɨ́ búʼó. Nye á sâ nó ó, nye nkʉ̂ swâhlě túnó waá ɨ́ nzɨ̌ nyǎm, le esâ ó, bʉr o bíkúl bíbyɛ̂h nkʉ̂ jóʼo wê. Nó ntémé ó mé á pɛʼɔɔ ɨ́ nǔm ngbampɨɨ yɨ́.

¹⁸Tî gá wɨ́ná ótô le etítíʼ mé nó, ɨ́ jɔʼ yɨ́yɛ̂h bé ólɛ́ɛ ó, bé sá ó me ebébe yɨ́. Nye ósâ ó, me pyálaa ɨ́ Mpóʼo nyé, nyaá dí ɨ́ jʉ́o kʉ́ nyɨ́. Nye dwéŋɔɔ kûm njʉ̌m dǐ e njʉ̌m dǐ. Amɛn.

¹⁹Sohaa mé Prǐska, bé le Akílas, ndu e mbɛ̌r bʉ̂r mé Onesíforos.

²⁰Erâst, nyɨ́ lîʼ Kórɨnt. Trofímos á dwoowǒ Míletos ó, ebě, nye á be lɨ́ ejóʼo ékpaa.

²¹Gbáʼ nkûl ó, go pyálaa wâ, kóló dína apǎ pyâl. Ebulus, Púdens, Línɔs, Klodía, bé e bɨ́ɔɔ́ bɨ́ná bɨ́bɛ̂h, bé lɨ́ esoho gô.

²²Tî Yésʉs díʼee e go ɨ́ sísǐm. Nzyɛ̌m sʉ́ʼoo bɨ̌n metyɛʼ me mpóm.