Read Koonzime Títos 1 Bible Online

Títos 1 - Koonzime bible

Títos 1

¹Yé ó mɛm Pɔ̂l, syɛ̂l mesâ mé Nzyɛ̌m, ndu e mʉr milʉ́mlʉ́ mé Yésʉs-Krîst ó dí ecɛma mékaná mâ. Yésʉs-Krîst á lómo me ó, me tô kɛm bʉ̂r ó Nzyɛ̌m á twâr bá, lɨ́ egbâ bé pîm ɨ́ búʼó. Bé gʉ́ŋaa otyeetye, waá ngá sâ ó, bé dwáawaa Nzyɛ̌m wɨ́.

²Bé lɨ́ etyɛ̂b mekʉ̌ sí ɨ́ sɨ́ŋ ɨ́ lɔ̌b mpûʼla gá nyɨ́ná nyɨ̂: ó, Nzyɛ̌m ódwe mɨ́ná gá twǐʼ njʉ̌m dǐ. Nzyɛ̌m, mʉr dí alɛ́ɛ bíbɛr nyá, á kɛʼ mɨná gá twiʼ yaá ó, jɔʼ kʉ́ e sí, byé á be apǎ bě kuhá yɨ́.

³Nye á ka túno lɔ̌b twiʼ yaá ó, ɨ́ jɔʼ yé á jala le egwíhɔɔ yɨ́. Nzyɛ̌m, Tiʼbʉr gá wɨ́ná á gwîh bʉr lwǐb yé ó, ɨ́ nzɨ̌ nyǎm. Nye á tíʼe ɨ́ léme ó, nyě tyél ó me ɨ́ dǐ lɛ́a lɔ́ɔ wé. Nye á tímle syɛ́ɛ́ yaá ó me.

⁴Mě cɛmá ó, gua Títos, dí mpaŋ mwân wǎm ɨ́ búʼó, yaá dí mɨná bɨ́bɛ̂h ɨ́ miléme yɨ́. Metyɛʼ me mpóm le mepyɛbla, mé díʼee e go, duho e Nzyɛ̌m Sɔ́ŋ, bé e Yésʉs-Krîst, Tiʼbʉr gá wɨ́ná.

⁵Ɨ́ mpʉ mé á líʼe go náǎ ɨ́ tíhé Krɛ̂t yɨ́, yé á be ó, go nkʉ̂ swâhlě syɛ́ɛ́ yé á buʼo gʉ̂ʼ yɨ́. Syɛ́ɛ́ yaá, yé á be ó, go pɛ́hɛɛ otyɛ̂b bé ésôʼ ó Mbɛ̌r-Nzyɛ̌m, tyêl bé bínkana e bínkana byɛ̂h, lɨ́ esâ mpʉ mé á líʼe go etié yɨ́.

⁶Go ópɛ̂h tyɛ̂b esôʼ Mbɛ̌r-Nzyɛ̌m ó, mʉr dí apǎ dweŋɔɔ mébě nyá. Nye díʼee njɨ e mʉmá ngwár. Bwán bé, bé díʼee bʉr o dí edyêʼ koo e Yésʉs bá. Bʉr, bé ajala le elɛ́ɛ, dumo e bwân bé ó, bé lɨ́ elɔ̂ʼwa lɨ́ esâ ébébe. Bé sá alɛ́ɛ ntémé ó, bɨ́ɛ bé asâ sɔ́ŋ wɔ́ɔ́ mejóʼo.

⁷Yé ó nó: yé jɨ ó, mʉr dí epála bʉ̂r ó Mbɛ̌r-Nzyɛ̌m nyá, díʼee waá dí apǎ dweŋɔɔ mébě nyá, ebě, nye ó syɛ̂l mesá mé Nzyɛ̌m. Nyé ajala le esâ pyêh, nkʉ̂ di ɨ́ ŋmaaa, abě nyʉnyóʼ, nkʉ̂ mʉr esweha, nkʉ̂ waá dí esáa bímɔnɨ́ ɨ́ menzɨ̌ me dí onzyɛ́h ónzyɛ́h má nyá.

⁸Nyě mbɨa ó, di mʉ̂r dí egʉ́a énʉa ójwóo nyá. Lémé wé, wé dúʼoo sɔ̂ʼ njɨ embɨa. Nye dwêʼ nyʉ̂l nyé medile. Nye díʼee tîtyěl, e léme ɨ́ sɔ́ɔ́ɔ́ ɨ́ mîh mé Nzyɛ̌m. Nye gʉ́ŋaa emâr léme.

⁹Nye díʼee lará e lɔ́ɔ́ búʼó yɨ́ná, waá bé dí eboó lɛ̂ʼle wɨ́. Nó ó nyé óbe e nkul egwá tɨ́e bʉ́ʉ́ bʉ̂r yɨ́. Lɛ́ʼlá mpâ mɨ́ná dí edwe gá wɨ́, wé ólɛ̂ʼle bʉ̂r o dí epére mékǎn e mɨná bá bigwǐh byɔ́ɔ́.

¹⁰Ɨ́ sɔ́má óYúden o dí ebúʼla bá, yé e bʉr ɨ́ buo buo o dí egbɔba le otyɛ̂b bé ésôʼ bɔ́ɔ́ bá. Bilwǐb byɔ́ɔ́, byé ó dwêh, bé yɨ́ɛ lɨ́ ekʉ́ bánǎ kʉ́a bʉ́ʉ́ bʉ̂r.

¹¹Diblaa bé minum. Bé lɨ́ egbah mímbɛ̌r mi bʉ̂r mintinɨ̂, le edwe mílɛ́ʼlá mbi dí ajala wɨ́. Bé sá nó ó, lɨ́ esú lé ébi bímɔnɨ́ ɨ́ nzɨ̌ lɛ́ʼlá waá. Yé ɨ́ buú sâ sôn lɨ́ ebi bímɔnɨ́ ɨ́ nzɨ̌ nyaá.

¹²Nyʉ́ʉ́ mʉ̂r ɨ́ sɔ́má yɔ́ɔ́, nye ó ngwíha milɔ̌b. Nye mʉr tɨ̂ʼ á lɛ́ɛ ó: «Bʉr ó Krɛ̂t, bé ó baányâ-bibɛr. Bé ó mpʉ ótír ó méntwǐʼ. Bé ó bintwii. Bé jaá kpɛ̌l sɔ̂ʼ ó, njɨ ede.»

¹³Mʉr tɨ̂ʼ á kʉ boʼlo ó otyeetye. Nó ntémé ó mé dí elɛ́ɛ e go ó, lɛ́ʼláá bé bigwǐh byɔ́ɔ́ e lémé ébɨ̌h. Gó ósɨ̂sa nó wá, bé obǐ mpǎŋ lɛ́ʼlá mɨ́ná dí eboó dwe gá wɨ́.

¹⁴Bé gwáʼaa ejôʼlo bíkɨkɛna bí óYúden. Bé gwáʼaa ebaʼle métié le mempéné me dí eduho e bʉr o b'á boo bene otyeetye bá má.

¹⁵Sá yɨ́yɛ̂h, yé mû ó pubá lɨ́ esú é bʉ̂r mû mipubá bá. Sâ gwár, bʉr o b'á lœʼ menyʉ́l mɔ́ɔ́, baá dína apǎ dyɛ̂ʼwo e Nzyɛ̌m bá, yé abe e sâ gwár dí pubá ɨ́ wɔ́ɔ́ pâʼ. Bisá bíbyɛ̂h, byê bé ó, ɨ́ lwaʼwo lwaʼwo, ebě, bé á si lœʼ ocwóó wɔ́ɔ́ le milémé myɔ́ɔ́.

¹⁶Bé sá ó, go ó, bé ɨ́ kpɛ̌l Nzyɛ̌m. Sâ gwár, bisyɛ́ɛla byɔ́ɔ́, bíɛ yɨ́ɛ lɨ́ elɛ̂ʼle ó, bé akpɛl nyê. Bʉr baá, bé ɨ́ lwaʼwo. Bé asâ méjóʼo. Ɨ́ bisyɛ́ɛla bimpâ bíbyɛ̂h mʉ̂r dí e nkul ebɛ̌m sâ bí, abe e syɛ́ɛla gwár bé dí e nkul ekoʼo ésâ.