Read Koonzime Títos 2 Bible Online

Títos 2 - Koonzime bible

Títos 2

¹Gua, lɨ́lɛ́ʼláá sá yɨ́yɛ̂h dí ejala e lɛ́ʼlá mpâ mɨ́ná dí edwe gá wɨ́ yɨ́.

²Lɛ́yɨ́ɨ́ ótɔ́má ó bʉ̂r ó Mbɛ̌r-Nzyɛ̌m ó: bé ajala le ede ményoʼ, puro. Bé dwêʼ menyʉ́l mɔ́ɔ́ medile, le etíʼě mpʉ bʉ̂r o dí epahle bá jálá le esâ yɨ́. Sá bé dí ebúʼla yɨ́, yé díʼee mpʉ mɨ́ná dí elɛ̂ʼle gá yɨ́. Bé díʼee bʉr o dí ecwɨ́a e bʉ́ʉ́ bʉ̂r bá. Bé dûhwaa ntémé mitúú.

³Lɛ́yɨ́ɨ́ mísile mi bʉ́bá jwɨʼ gwár ó, bé dúʼoo mbǐ kʉ̌ tyen dí ejala e mʉr dí edwáawǒ Nzyɛ̌m nyá. Bé sá aswêʼ míé mé bʉ́ʉ́ bʉ̂r. Bé ayɨ́ lɔ̂ʼwa ɨ́ ndéá ményoʼ, nkʉ̂ di bítúʼǎ bi tɨ̂. Bé dwêʼ bʉr mimpaŋ mélɨ́,

⁴lɨ́ esú lé élɛ̂ʼle méséhé mé bʉ́bá mpʉ mé jálá le ekpɛl ójʉ́m bɔ́ɔ́, ti e bwán bɔ́ɔ́ yɨ́.

⁵Meséhe maá, mé dwêʼ menyʉ́l mɔ́ɔ́ medile, le ebaʼle ményʉ́l mɔ́ɔ́ lɨ́ esú mé Nzyɛ̌m. Mé séaa ɨ́ mimbɛ̌r myɔ́ɔ́, le ecwɨ́a e bʉr. Mé sâʼ ojʉ́m bɔ́ɔ́ mejóʼo. Sá tɨ̂ʼ ó bʉ̂r, bé óbe, akǎ pyǎ lɔ́ɔ́ mé Nzyɛ̌m yɨ́.

⁶Tɨ́áá mísohó ntémé ó, myé gʉ́ŋaa epahle mbɨ̂mbɨá.

⁷Kʉ̌ tyen gô, wé díʼee mbɨ̂mbɨá ɨ́ mipáʼ mímyɛ̂h, lwɨ́ŋlá e bisyɛ́ɛla bimpâ. Dwéʼ bʉ̂r milɛ́ʼlá e léme dí abě mbáʼrá e mikóo wɨ́. Bé béyɨɨ go ntémé e medile.

⁸Lwǐb yô, yé díʼee lwɨ́ŋlá e lɛ́ʼlá mpâ mɨ́ná dí edwe gá wɨ́. Ɨ́ tɨ̂, bʉ̂r bé óbe, akœ̌b sá ébébe bé ólɛ́ɛ, dumo e lwǐb yô yɨ́. Bʉr o dɔ̂m ónɨ̌, bé ókǎ jóʼo sôn ntémé, bé l'abe e sá ébébe bé ólɛ́ɛ, dumo e mɨná gâ.

⁹Bitúʼǎ, byé ɨ́ jala le edi ɨ́ jwɨ́ɨ́ ósɔ́ŋ bɔ́ɔ́ ó, ɨ́ bijɔʼ bíbyɛ̂h. Byé sáŋaa menzɨ̌ ó, ojwɨ́ɨ́ bɔ́ɔ́, bé béyɨɨ bisyɛ́ɛla byɔ́ɔ́ mbɨ̂mbɨá. Byé ayɨ́ do e bê.

¹⁰Byé ajala le ejaa mébô ɨ́ páʼ bísá bí ójwɨ́ɨ́ bɔ́ɔ́. Byé ɨ́ jala le elɛ̂ʼle ó, bé e nkul ebúʼla byé ntinɨ̂ e ntinɨ̂. Sá tɨ̂ʼ ó bé óbuú gbâ dúu ɨ́ lɛ́ʼlá mɨ́ná dí edwe bé, dumo e Nzyɛ̌m, Tiʼbʉr gá wɨ́ná wɨ́ yɨ́.

¹¹Nó ó, Nzyɛ̌m, nyɨ́ lɛ̂ʼle ɨ́ ponó ó, mpam nyé, nye ó lɨ́ esú lé étíʼ bʉ̂r bɨ́bɛ̂h.

¹²Mpam mé Nzyɛ̌m nyaá ó dí etɨ́e mɨ́ná nzɨ̌ ó, mɨná bírɨɨ gá twiʼ dí ɨ́ bébe yɨ́, ti e bigwɨ́má bí sí yɨ̂, lɨ́ esú lé étíʼě twiʼ pɔ̂hlʉ milɔ̌b. Twiʼ yaá ó dí tîtyěl, yaá dí edû mpʉ̌ Nzyɛ̌m dí ekpɛl yɨ́.

¹³Mɨná bé ótíʼe nó ó, lɨ́ ebóno mʉ̂r dí egbâ mɨ́ná mpûʼla ɨ́ miléme, waá dí esʉ mɨ́ná metyɛʼ me mpóm nyá. Nye ó Nzyɛ̌m nɨ́nɨ́ɨ́: Tiʼbʉr gá wɨ́ná Yésʉs-Krîst, waá ngá báʼǎ lɛ̂ʼle nyé mʉr tɨ̂ʼ e kûm ɨ́ buo buo nyá.

¹⁴Nye á si dwe twiʼ yé nye mʉr tɨ̂ʼ lɨ́ esú lɨ́ná, ó nye dwíhɨɨ mɨná ɨ́ mpila mébébé mɨ́mɛ̂h. Nyɨ́ pubo mɨ́ná gá ó, mɨná díʼee kúl bʉ̂r dí egúmo e né yɨ́. Kûl yaá, yé ódi e léme ɨ́ cǎr ó, yé gbâʼ nyʉ̂l lɨ́ elóŋlo bísyɛ́ɛla bimpâ.

¹⁵Nó ó gó jálá le elwib e bʉr, le tɨ́e bé yɨ́. Lɛ́ʼláá bʉ̂r mebébe mɔ́ɔ́ e nkul jwɨ́ɨ nyǒ nyɨnyɛ̂h. Mʉ̌r sá apyêh gô.