Read Koonzime Títos 3 Bible Online

Títos 3 - Koonzime bible

Títos 3

¹Jɨ́mɨ́ɨ́ bʉ̂r bitɔŋlá ɨ́ milɔ̌b mî: bé díʼee ɨ́ jwɨ́ɨ́ bʉ̂r o dí e nkul jwɨ́ɨ bá. Bé sâʼ bé mejóʼo. Bé díʼee ntémé ɨ́ cǎr lɨ́ esú lé ésâ bísyɛ́ɛla bimpâ mimbi mímyɛ̂h.

²Bé sá asâ nyʉ́ʉ́ mʉ̂r mesyɛ́ɛla. Bé ayɨ́ di báányâ-bitɔm. Bé díʼee e lémé mpâm, ɨ́ tyɛ̌ʼ njwɨr ɨ́ nkǒ páʼ bʉ̂r bɨ́bɛ̂h.

³Ebě, mɨná gá bɨɛ á nyɛɛ be ó nó: bigʉʼlʉgʉ́, baajóʼo-mélɨ́, sí dîm. Mɨná bé á didi gá ó, bitúʼǎ bígwɨ́má mimbi mimbi. Mɨná bé á títíʼe gá ó, lɨ́ esâ bʉ̂r ebébe é léme le nzwíí. Bɨ́ɛ ntémé lɨ́ esíe bɨ́ná gâ. Mɨná bɨɛ ntémé, bé á si nwimla páʼ gá nyɨ́ná.

⁴Jɔʼ yaá ó Nzyɛ̌m, Tiʼbʉr gá wɨ́ná á ka lɛ̂ʼle mɨná mpam nyé yɨ́.

⁵Nye á tíʼ mɨná gá ó, ɨ́ nzɨ̌ njɨ́ʼá nkóó wé. Nye á bé atíʼ mɨ́ná ɨ́ lɔ̌b bísyɛ́ɛla bimpâ mɨ́ná bé á sâ lɨ́ otîtyěl gá wɨ́ná bí. Nye á tíʼ mɨná ó, ɨ́ pubá nyé á pubo mɨná gá e Sísǐm wé wɨ́. Pubá waá, wé ó b'á dwe mɨná gá mbyɛ́lá dwân, le esâ ó, mɨná díʼee medwán mé bʉ̂r. Nye á si kab mɨná gá Sísǐm wé ɨ́ ntʉʉʉ́ ɨ́ nzɨ̌ mé Yésʉs-Krîst, Tiʼbʉr gá wɨ́ná.

⁷Nye á si tíʼ mɨná, sâ ó, mɨná bíʼee gá nkam ɨ́ míh mé ɨ́ nzɨ̌ mpam nyé. Mɨná bé ódi gá ntémé ɨ́ baá nyé á dwe twǐʼ njʉ̌m dǐ, jala e nkɔb líʼe nyɔ́ɔ́ bá. Mpûʼla, nye mɨná gá ɨ́ miléme ó, mɨná bé óbi gá nkɔb nyaá.

⁸Lwǐb nɨ̌, yé ó yaá jálá le ebúʼlɔɔ yɨ́. Mě kpɛl ó, go nkʉ̂ gʉ́a dwe bʉ̂r milɛ́ʼlá mínɨ̌. Ɨ́ gúmo yaá ó bʉ̂r o b'á dyɛ̂ʼwo e Nzyɛ̌m bá, bé ósɨsâ bísyɛ́ɛla bimpâ yɨ́. Bisyɛ́ɛla byaá, byé e nyɔm ɨ́ nkǒ páʼ bʉ̂r bɨ́bɛ̂h.

⁹Diʼeě e mpaŋ ncɛ́rá e bʉr o dí elwib bísá mílɔ̌b mi dí abe e nyɔm, le myaá dí dwêh mí. Bé lɨ́ edǒ mpʉ bígʉ̌, le epére mékǎn, lɨ́ edǐ gʉ́ǎ lɔ̌b lɔ́ɔ́ ntán wɔ́ɔ́. Bé lɨ́ ekpɛl égœ́a e bʉr, ti e l'esâ míngamla ɨ́ lɔ̌b métié mé Nzyɛ̌m.

¹⁰Mʉr kpɛ́l ésâ mpɔ́ʼá menkɔ̌m nyá, go e cɨ́l nyé jɔʼ gwár, nkʉ̂ nzɔʼ bá. Píe tɨ̂, bɨ̌n bé ayɨ́ kǎ be e ndwáala e né.

¹¹Go ɨ́ jala le egʉ́a ó, mbi mʉ̂r waá, wé lɨ́ edû kʉ̌ tyen dí lɨ́ onzyɛ́h ónzyɛ́h wɨ́. Nye ó syɛ̂l misyóm. Lwǐb yé, yé mʉr tɨ̂ʼ ó dí edwe nyé mebě.

¹²Páʼ Artémas bé e Tisikôs, me ólómlo gó mʉr ngwár ɨ́ sɔ́má yɔ́ɔ́. Ɨ́ jɔʼ mʉ̂r tɨ̂ʼ ókumo kwá nyǒ yɨ́, go e sá mímbi mímyɛ̂h ó, go tôʼ kœb mé ɨ́ Nikɔ́pɔlis, ebě, mɨ́ tíʼe ɨ́ lémé wâm ó, kóló, yé ólaa mé ó gʉ̂.

¹³Gbáʼ nkûl lɨ́ esúʼǒ Zénas, kɔmlʉ gá wɨ́ná, bé e Ápolos, ɨ́ tyen yɔ́ɔ́. Sáʼ ó, sɔ̂ʼ ayɨ́ gwíi bé téme-nzɨ̌.

¹⁴Yé jɨ ó, bʉr o dí ɨ́ páʼ gá wɨ́ná bá, bé jɨ́ʼɨɨ elóŋlo bísyɛ́ɛla bimpâ. Nó yaá ó bɨ́n ngá gwá súʼo báántéʼenteʼe ompâ yɨ́. Mʉ̌r sá abîr ó, nye tíʼaa ɨ́ sí yɨ̂ʼ, agúmo mpúmó.

¹⁵Sɔ́má yâm yɨ́yɛ̂h, yé lɨ́ esoho gô. Sohaa ósó gá bɨ́ná, baá o dí ɨ́ buú kpɛl bɨ́h ɨ́ mpúhlá gá nyɨ́ná bá. Nzyɛ̌m sʉ́ʼoo bɨ̌n óbɛ̂h metyɛʼ me mpóm mé.