Read Koonzime Ebrœ̂ 1 Bible Online

Ebrœ̂ 1 - Koonzime bible

Ebrœ̂ 1

¹Ɨ́ mimbú mí píhe, Nzyɛ̌m á lwilwib e bimpám gá bíná [1] ó, cɨɨ ɨ́ nzɨ̌ ogwíha o mílɔ̌b. Nye á lwilwib e byé ó, mimbi mimbi, le ɨ́ bijɔʼ ɨ́ buo buo.

²Ɨ́ yɨ̂ʼ jɔʼ mpʉ mélú mé mpóʼo sí yɨ̂ʼ mû lɨ́ ekɔ́a yɨ́, nye mû kǎ lwib e mɨná gá ó, cɨɨ ɨ́ nzɨ̌ Mwân wé. Nye ó waá Nzyɛ̌m á kɛʼ ó, nye ónʉa bílíʼé bí sí yɨ̂ʼ bíbyɛ̂h nyá. Nzyɛ̌m á kuho kʉ́ e sí ndu e l'ekomlǒ sá yɨ́yɛ̂h dí tɨ̂ʼ yɨ́ ó, ɨ́ nzɨ̌ nyé.

³Nye ó dí e mentyɛnwa ndu e kûm mé Nzyɛ̌m. Nye ó dí gulo dí elɛ̂ʼlě mpʉ̌ Nzyɛ̌m mʉr tɨ̂ʼ dí yɨ́ nyá. Nyě baʼlé sá yɨ́yɛ̂h ó, ɨ́ nzɨ̌ lwǐb yé, dí e nkul yɨ́. Nye á si sîl ekomlo nzɨ̌ epubo bʉ̂r misyóm myɔ́ɔ́. Nye nzě bɨ́nɔɔ ɨ́ jʉ́o kʉ́, tó di sí ɨ́ mbó éjʉ́m mé Nzyɛ̌m kûm nɨ́nɨ́ɨ́.

⁴Sá tɨ̂ʼ ó Mwân wé mû mbɨ́ná kʉ́, laa bééngeles yɨ́. Sá tɨ̂ʼ ntémé ó Nzyɛ̌m á dwe nye dǐ nɨ́nɨ́ɨ́, yaá dí ɨ́ bwaʼ, laa yaá yɔ́ɔ́ yɨ́. Nye á nʉa dǐ yaá ó, jala e nkɔb nyé.

⁵Kâr éngeles ngwár Nzyɛ̌m dí ɨ́ pǎ lɛ́ɛ e né ó: Go ó mwân wǎm. Mɨ́ byâ gó mûh! Nye ntémé, nyé apǎ lɛ́ɛ, dumo e nyʉ́ʉ́ éngeles ó: Me óbe ó sɔ́ŋ lɨ́ esú lé. Nyɨɛ óbe ó mwân lɨ́ esú lâm.

⁶Jɔ̌ʼ Nzyɛ̌m á tyêl nye ɨ́ dǐ dí ɨ́ buú bwaʼ dúu yɨ́, nye á nze lɛ̂ʼle beéngeles bɨ́bɛ̂h nyǎ. Nye á lɛ́ɛ ó: Beéngeles bɨ́bɛ̂h ɛ̌! Bɨʼɨɨ gá nye mebóó sí lɨ́ edwe nyé kûm.

⁷Nzyɛ̌m á lɛ́ɛ, dumo e beéngeles baá ó, Nyě sá bééngeles o mílʉ́mlʉ́ bé ó, bé díʼee mpʉ̌ pubó. Nye ó b'á sâ ó, osyɛ̂l o mésá bé baá, bé díʼee ntémé mpʉ mínjʉl mí siʼe.

⁸Sâ gwár, nye á lɛ́ɛ, dumo e Mwân wé nyɨɛ ó: Nzyɛ̌m ɛ́! Go ó dí edi ɨ́ mecwɨ́ɨ́ mé jwɨ́ɨ́ yô njʉ̌m dǐ e njʉ̌m dǐ. Go ó dí ejwɨ́ɨ lɨ́ otîtyěl.

⁹Gǒ kpɛl ó, sá dí tîtyěl yɨ́, bene yaá dí onzyɛ́h ónzyɛ́h yɨ́. Sɨ́ǎ yaá ó dí ó, Nzyɛ̌m ɛ̌! Nzyɛ̌m gǒ á si lœm go múló mé jwɨ́ɨ, lɨ́ edwe gó nkul jwɨ́ɨ, le elóŋlǒ lémé gô e bisʉhʉʉ, laa bʉ̂r ó njoo yô.

¹⁰Yé ntémé, yê cɛmá, dumo e Mwân wé ó: Dâ ɛ̌, go ó b'á kuho sí yɨ̂. Le jʉ́o, le ejwoo, byé ó syɛ́ɛ́ mébó mô.

¹¹Bisâ byaá bíbyɛ̂h, byé ódîm. Gua, go ódi ó, njɨ̌ njʉ̌m dǐ e njʉ̌m dǐ. Bisá bíbyɛ̂h bíɛ jwɨ̌m mpʉ míkán.

¹²Go óbâʼ byé mpʉ bé dí ebâʼ dur, nɛŋ yé lɨ́ empah yɨ́. Yé ó nó. Go ócéne bísá bíbyɛ̂h mpʉ mʉ̂r dí ecéne míkán myé yɨ́. Sâ gwár, ɨ́ gó pâʼ, gua go ójaá di ó, njɨ jwɨʼ gwár, ajwɨmjwɨm.

¹³Nzyɛ̌m á bé alɛ́ɛ ɨ́ lʉ́ʉ́ dʉ́o, dumo e nyʉ́ʉ́ éngeles wé ó: Diʼee sí wâ, ɨ́ mbó éjʉ́m wâm. Bónáá ɨ́ puuu náǎ, tó pyâl ɨ́ jɔʼ mé ósâ óntɨ̂m le obɨn bô ó, bé díʼee tyélátyéla mékʉ̌ yô yɨ́.

¹⁴Beéngeles bɨ́ɛ, bê onzé? Bɨ́bɛ̂h, bé ó misísǐm mi dí eséǎ Nzyɛ̌m syɛ́ɛ́ mí. Nyě lómló mɨ́ná gá bǎ ntémé ó, bé ntáa súʼo bʉ̂r o ngá bǐ twǐʼ njʉ̌m dǐ, jala e nkɔb líʼe nyɔ́ɔ́ bá.