Read Koonzime Ebrœ̂ 10 Bible Online

Ebrœ̂ 10 - Koonzime bible

Ebrœ̂ 10

¹Metié, mé ó sisîm dí elɛ̂ʼlě mpʉ bísá bí émbɨa, byé ójala le ebe ɨ́ jɔʼ byé ngá pyâl yɨ́ wɨ́. Metié maá, mé adila míkuó bísâ byaá. Opara, bé dwídwé míndwéá mimpwár ó, ɨ́ mbú wɨ́wɛ̂h lɨ́ esú é bʉ̂r o dí egwɨ̂m ó, bé díʼee mbɨ̂mbɨá bá. Sâ gwár, mindwéá myɔ́ɔ́, myé ákóʼó sâ ó, bʉr baá díʼee mbɨ̂mbɨá ɨ́ mipáʼ mímyɛ̂h.

²Bʉ̂r o dí edîʼ Nzyɛ̌m mindwéá bá, sí pubɔɔ lɨ́ otyeetye nó, lɛ́ɛ́, bé akǎ be e mipahlá mí ébébe ɨ́ milémé myɔ́ɔ́. Lɛ́ɛ́ ntémé ó, bé abe lɨ́ ekǎ tô dóló le edwidwe nyé mindwéá mí tɨ̂.

³Tó kœb ó, yé abá be nó. Ɨ́ mbú wɨ́wɛ̂h, mindwéá myaá, myé jaá jɨjɨm bítɔŋlá bí ébébe byɔ́ɔ́ ó, jɨ̌m jɨmɨ́ɨ,

⁴ebě, metié bíntœœ ndu e maá mé óntamakǎ, mé ákóʼó sâ ó, Nzyɛ̌m tɨ́ʼee baa ébébe nyé á pa niʼe mʉr yɨ́.

⁵Ɨ́ tɨ̂, ɨ́ jɔ̌ʼ Krîst á be, nye mû kúno enî ɨ́ sí yɨ̂ʼ yɨ́, nye á lɛ́ɛ e Nzyɛ̌m ó: «Gó agwɨ̂m ó, bé díʼɨɨ go otír, nkʉ̂ dwe gó yʉ́ʉ́ sɔ̂ʼ dí etáa mébyaʼ yɨ́. Go á komlo nyʉ̂l nyǎm ó, nye búraa e mpɨŋ bʉr.

⁶Lémé gô, wé á bé akpɛl ó, bé tíʼaa go otír. Wé á bé akpɛl ó, bé dwêʼ go yʉ́ʉ́ sɔ̂ʼ mpʉ mítɔ́ɔ.

⁷Me nzě lɛ́ɛ e go ó: «Me ó nyâ! Mʉr dí elwibɔɔ ɨ́ lɔ̌b wé ɨ́ mekaná métié mô nyá, me bê! Dâ Nzyɛ̌m ɛ̌, me nzé ó, me sâʼ bigwɨ́má byô!»

⁸Sá Krîst á lɛ́ɛ yɨ́, yé á be ó: «Gó agwɨ̂m ó, bé tíʼaa go otír, nkʉ̂ dwe gó yʉ́ʉ́ sɔ̂ʼ, nkʉ̂ dîʼ gó tír ntinɨ̂, nkʉ̂ dwe gó yʉ́ʉ́ sɔ̂ʼ mpʉ mítɔ́ɔ. Go á bé agwɨ̂m byê. Byé á bé abe ɨ́ lémé gô.» Nzyɛ̌m á bé akpɛl míndwéá myaá, damá jóʼo ó, metié nyé á tyêl má, mé á lɛ́ɛ ó, myé sáŋɔɔ.

⁹Krîst ntɔ̂ʼ lɛ́ɛ ó: «Me ó nyâ. Me á nze ɨ́ sí yɨ̂ʼ ó, me sâʼ bigwɨ́má byô.» Nye á pɛʼ mindwéá mí ésôʼ ɨ́ diá ó, nye nkʉ̂ dila myé e myaá myé á ka bɔma mi.[3]

¹⁰Ɨ́ gwɨ́má yé yaá ó mɨ́ná bé á pubɔɔ gá jɔʼ gwár lɨ́ esú é bíjɔʼ bíbyɛ̂h yɨ́. Mɨná mû pubɔɔ gá ó, ɨ́ lɔ̌b ndwéá Yésʉs-Krîst á dwe Nzyɛ̌m nyʉ̂l nyé tâŋ ndwéá wɨ́.

¹¹Opara, bé sɨ́séá ó, mimóhó mímyɛ̂h. Bé lɨ́ etyɛ̂b mítîtyěl lɨ́ edîʼ míndwéá ɨ́ ti ti ti, lɨ́ esáa étáa mébyaʼ, damá bě mpʉ míndwéá myɔ́ɔ́ dí abe e nkul esâ ó, Nzyɛ̌m tɨ́ʼee baa ébébe gwár yɨ́.

¹²Tó kœb ó, Krîst nyɨɛ á si dwe wé ndwéá ngwár ɨ́ kpɔ́ŋ lɨ́ edwih mísyóm lɨ́ esú é bíjɔʼ bíbyɛ̂h. Nye nzě tó di sí ɨ́ mbó éjʉ́m mé Nzyɛ̌m.

¹³Yé jaá kǎ lîʼ nyé sɔ̂ʼ ó, njɨ sâ gwár: ebónǒ jɔ̌ʼ Nzyɛ̌m ngá liŋ óntɨ̂m le obɨn bé tyélátyéla mékʉ̌ yé yɨ́.

¹⁴Nyɨɛ á jaa dwe ó njɨ ndwéá ngwár, bʉr o b'á be ó, bé púbɔɔ bá, bé ntɔ̂ʼ pubɔɔ mbɨ̂mbɨá ɨ́ mipáʼ mímyɛ̂h. Bé ódidi nó ó, njʉ̌m dǐ e njʉ̌m dǐ.

¹⁵Ɨ́ lɔ̌b ngwár waá, Sísǐm mé Nzyɛ̌m boʼlo ntémé ɨ́ mɨná gá ó:

¹⁶«Dâ Nzyɛ̌m, nyě lɛ́ɛ́ ó: “Jɔʼ, yé lɨ́ enze. Ɨ́ jɔʼ yaá, me ókǎ sâ sáá páʼ nyɨ́h le onɔ́ɔ́ ó, ɨ́ mbi wɨ̂: Me ólíʼe métié mâm ɨ́ milémé myɔ́ɔ́. Me ócɛma mé ɨ́ milʉ́ myɔ́ɔ́.”»

¹⁷Píe jɔʼ nyé á lwib nó yɨ́, nye nzě lɛ́ɛ ntémé ó: «Me ákǎ símsa mébébé ndu e mebyaʼ mɔ́ɔ́.»

¹⁸Jɔʼ bíbaa bí ébébe, byé mû sí láŋɔɔ, epɛʼɔɔ yɨ́, mindwéá mi dí epubo mʉ̂r mí, myé akǎ báʼǎ be.

¹⁹Bɨ́ɔɔ́ bɨ́h le okɛ́l bɨ́h! Mɨná mû ó sí nʉa gá pîm ɨ́ búʼó lɨ́ eswɨɨ e métié mé Yésʉs mé á swɨɨ sí lɨ́. Nó, mɨná sîhlaa gá, tó pyâl ɨ́ ntɔ́ɔ dí ɨ́ buú buǒ tí nyɨ́.

²⁰Yésʉs á dib mɨná gá edwán é nzɨ́ ó, mɨná ntáŋaa gá kán wé á nyɛɛ be tyelá lɨ́ ela ébê wɨ́. Mɨná bi gá twiʼ ó tɨ̂. Náǎ yé lɛ́ʼlé ó, mɨná bi gá twiʼ ó, ɨ́ jɔʼ mɨ́ná cɨ́ɨ́ gá ɨ́ nyʉ̂l nyé yɨ́.

²¹Mpʉ mɨ́ná gá mû e njwɨ́ɨ oparǎ nɨ́nɨ́ɨ́ dí lʉ̂ sá yɨ́yɛ̂h ɨ́ mpáh Nzyɛ̌m nyá yɨ́,

²²nó mɨ́ná jálá le esîhle gá bǎʼ e Nzyɛ̌m, abe e mesónó ɨ́ miléme, e milémé lwɨ́ŋlá e búʼó yɨ́. Milémé gá míná, myé mû ó mipubá. Menyʉ́l gá mɨ́ná mɨ́ɛ, mé mé ó minjwɨá e medíbé me dí ɨ́ ntyɛ́h ntyɛ́h má.

²³Mɨná bôʼlaa gá sá mɨ́ná dí ekam gá yɨ́. Milɔ̌b myaá ó dí egbâ mɨ́ná gá mpûʼla ɨ́ miléme. Mʉ̌r sá apɨ́ŋla, ebě, mʉr á dwe mɨná gá menkɛ̌ʼ ɨ́ buo buo nyá, nye ó mʉr ebúʼlɔɔ.

²⁴Mʉr nyɨnyɛ̂h, nye kpɛ́lɨɨ mɨ́ɔɔ́, lɨ́ esâ nyé mpam. Yé ó ngá sâ ó, mɨ́ɔɔ́ waá tôʼ le ekpɛl bʉ̂r oswîh, le ekɛm bê.

²⁵Adû gá tum bʉ́ʉ́ bʉ̂r mû e né nyɨ́: lɨ́ ekpɛ́ɛ bígwɨ́hlá gá bíná. Gbáʼ gá nkul ɨ́ dwííí lɨ́ esisyɛŋa. Kʉ́ gbáʼ gá nkul ɨ́ miléme páʼ nyɨ́n ɨ́ mpʉ mɨ́ná mû lɨ́ ebee gá dʉ́ó é Tî gá wɨ́ná mû lɨ́ enze yɨ́.

²⁶Yé bé mɨná bɨ́ gʉ́a gá otyeetye ɨ́ pébébé, mɨná ntɔ̂ʼ kʉ́ gbáa gá ó, mɨná tó gá ó dóló le esâ syóm nó, lɛ́ɛ́, yé abe e mindwéá myé óbɛ̌m pubo mɨ́ná gá e misyóm myaá.

²⁷Mʉr dí egbah métié nó nyá, yé jaá kǎ lîʼ nyé ó, njɨ ejóʼo bʉ́á le ebóno ébeě mbi mébě Nzyɛ̌m ódwe nyé wɨ́. Nyé otô ɨ́ bɨ́ siʼe dí ɨ́ díʼa díʼa, yaá ngá dîʼ bʉ̂r o dí egbɔba e Nzyɛ̌m bá yɨ́.

²⁸Mʉr nyɨnyɛ̂h gbáh métié mé Moyɨ̂z nyá, nye jʉ́ŋɔɔ ó jʉ́ʼóo, ajɨ́ʼɔɔ nyé nkoó. Bé sá nyé nó ó, ɨ́ jɔʼ bʉ̂r obá, nkʉ̂ olɛ̂l, dí esyɛŋa lɨ́ eboʼlo nyé mboʼlá ngwár yɨ́.

²⁹Bʉr pǎ nyɛɛ́ jʉ́ŋɔɔ ɨ́ lɔ̌b ébɨ̌h bé sá métié mé Moyɨ̂z lɨ́, á dwɛʼra e mʉr dí etyéele Mwân mé Nzyɛ̌m sí mebo mé nyá! Nye ókʉ́ jala e bibɨ́bla bíntɨ́ʼá, laa náǎ, ɨ́ lɔ̌b jwɨʼ yé yɨ̂: metié Krîst á pyêl, lɨ́ esâ édwán é sáá e mé má, mé mû nye ó tʉ̂toʼó, nyɨɛ yɨ́ɛ sí pǎ pubɔɔ e tɨ̂! Bɨ̌n jwɨʼ nyá ɨ́ lɔ̌b mʉ̂r á pya Sísǐm mé Nzyɛ̌m wé á nyɛɛ sâ nye mpam wɨ́ nyá? Mʉr tɨ̂ʼ ókǎ sáŋɔɔ nyá ɛ́?

³⁰Mɨná bé lɨ́ ekʉ́ gʉ́a gá mʉr á lɛ́ɛ ó: «Me óbɔla ébébe. Me ójána bé myɛ́na me tɨ̂ʼ» nyá. Nye ntémé ó b'á baʼa lɛ́ɛ ó: «Dâ mʉr tɨ̂ʼ ótíʼe bʉ̂r bé milɔ̌b.»

³¹Nzyɛ̌m, nye ó kʉ́ bě kublakúbla. Yé ɨ́ buú sâ ékɛ̂n lɨ́ etó twe ɨ́ mebó mé, nyɨɛ e léme lwɨ́ŋlá le ebúʼ ɨ́ lúrúdú!

³²Símsáá gá mpʉ bɨ́n á be, ɨ́ jɔʼ bɨ́n á nyɛɛ bûʼla yɨ́. Bɨ̌n bé á nyɛɛ bi ó, twǐʼ Nzyɛ̌m dí egbâ bʉ̂r ɨ́ miléme yɨ́. Bɨ̌n nzě sia e mitúú ɨ́ buo buo e bíhwó.

³³Ɨ́ jɔʼ yaá, bâʼ bʉ̂r, bé á be lɨ́ elwɨ́ɔɔ le etíblɔɔ ɨ́ kpɛŋlɛm. Bʉ́ʉ́ bʉ̂r bɨ́ɛ, bé á kam ó, bé súʼó ó bʉr o b'á sáŋɔɔ nó bá.

³⁴Bɨ̌n e mimbʉʼ bé á si sia e mitúú mímpwár. Jɔʼ bʉ̂r bé á dɛn mebi mɨ́n yɨ́, bɨ̌n bé á si bîr byé e bisʉhʉʉ, ebě, bɨ̌n bé á be ɨ́ kʉ́ gʉ́a ó, bɨ̌n bé óbánǎ bi bídimé bísâ. Bisâ byaá, byé ɨ́ buú mbɨa, laa byaá bé á nyɛɛ dɛn bí. Byé ntémé, byé ó bisá bi dí edi bí.

³⁵Mʉ̌r sá amyǎh búʼó dí elɛ́ɛ nyé ó, nye óbɛ̌m sîhle kwá mé Nzyɛ̌m yɨ́. Búʼó yaá, yé óbe nyé ó e myɛ́na ménɨ́nɨ́ɨ́.

³⁶Sá dí ejɨŋɔɔ ɨ́ páʼ wɨ́n yɨ́, yé ó bíhwó. Bɨ́n ósâ bíhwó nó, bɨ̌n bé ósâ gwɨ́má mé Nzyɛ̌m ɨ́ jɔʼ yaá. Bɨ̌n bé obǐ sá nyé á kɛʼ bɨ̌n yɨ́.

³⁷«Ebě, yɨ́ lîʼ njɨ mâ jɔʼ tîtííǎ, mʉr nzê nyá, nyé opyâl; nye ádeʼ.

³⁸Mʉr wǎm ngá bi nkâm ɨ́ lɔ̌b búʼó yé nyá, óbǐ twǐʼ njʉ̌m dǐ, duho tɨ̂. Yé sí kǎ pyâl ó, nyɨ́ bwóolo ntúʼó nó, lémé wâm, wé l'akǎ bee nyé mbɨ̂mbɨá.»

³⁹Sâ gwár, mɨná gá bɨ́ɛ bé abe bʉ̂r o dí ebwóolo ntúʼó, ntɔ̂ʼ dîm bá. Mɨná gá bé ó bʉr o dí e búʼó bá. Ndumló tɨ̂, wé ó, ebaʼle bícwiʼ gá bíná.