Read Koonzime Ebrœ̂ 11 Bible Online

Ebrœ̂ 11 - Koonzime bible

Ebrœ̂ 11

¹Búʼó, yé ó sá gó dí ebúʼla ó, yé ósyɛ́ɛ, yɨ́ɛ dína apǎ syɛ́ɛlɨ yɨ́. Búʼó, yé ó sá gó dí egʉ́a ɨ́ léme ó, yé ó tɨ̂, yɨ́ɛ apǎ nyɨ̂n yɨ́.

²Nzyɛ̌m á sêʼle bʉr o mélú mé épíhe ó, ɨ́ lɔ̌b búʼó yɔ́ɔ́.

³Ɨ́ nzɨ̌ búʼó gá yɨ́ná ó mɨ́ná dí egʉ́a gá ó, Nzyɛ̌m ó b'á kuho kʉ́ e sí ɨ́ nzɨ̌ lwǐb yé yɨ́. Nó ó, sá yɨ́yɛ̂h dí enyɨ̂n yɨ́, yé á duho ó, ɨ́ yaá dí anyɨ̂n yɨ́.

⁴Búʼó mé Ábɛl ó b'á sâ ó, nye dwêʼ Nzyɛ̌m mpǎŋ ndwéá, laa waá mé Kayɨ̂n. Nzyɛ̌m á si sêʼle nye ɨ́ lɔ̌b búʼó yé, le elɛ́ɛ ó, nye ó tîtyěl mʉr, le ekam ntémé ndwéá wé. Ɨ́ búʼó yé, Ábɛl dína ó lɨ́ elwib e mɨná gâ, damá jóʼo ó, nyɨ́ dwe.

⁵Búʼó mé Énɔk ó b'á sâ ó, nye ayɨ́ dwe. Nye á si bana bɨ́nɔɔ kʉ́, kumo ɨ́ kwár mé Nzyɛ̌m. Yé á bé abe e mʉr á baʼa bee nye, ebě, Nzyɛ̌m á si nʉa nye. Yê cɛmá ó, Énɔk apǎ bére kʉ́, Nzyɛ̌m á si boo bee nye mbɨ̂mbɨá.

⁶Nzyɛ̌m ákóʼó kpɛl mʉ̂r dí abe e búʼó nyá. Búʼó ó dí esâ ó, mɨná gʉ́ŋaa gá ó, Nzyɛ̌m, nye ó tɨ̂ʼ tyeetye. Búʼó ntémé ó dí elɛ̂ʼle mɨ́ná gá ó, nyě dwé myɛ́na mé émbɨa ó, njɨ bʉr o dí edû nyé bá. Abe e búʼó yaá nɛ́ɛ: lɛ́ɛ́, yé abe e mʉr ngwár ngá sîhlě nkǒ Nzyɛ̌m dí yɨ́.

⁷Ɨ́ lɔ̌b búʼó, Nóe á si jóʼo Nzyɛ̌m jɔʼ nyé á cɨ̂l nye ɨ́ lɔ̌b sá yé á be ó, yé ósyɛ́ɛ yɨ́. Nye dína apǎ bee yé e dîh, nye nzě gbâ lwǐb mé Nzyɛ̌m yaá ɨ́ dúu, ntɔ̂ʼ kpaʼ byɛ̂l, dû mpʉ̌ Nzyɛ̌m á tɨ́e ó, nye sâʼ yɨ́. Nye nzě nî tɨ̂, bé e mbɛ̌r bʉ̂r wé, bɨ́bɛ̂h ntɔ̂ʼ tíʼe. Ɨ́ lɔ̌b búʼó yé ó nyé á lɛ̂ʼle ó, syɛ́ɛla bʉ́ʉ́ bʉ̂r, bé á sâ yɨ́, yé á be ɨ́ bébe yɨ́. Bɨ́ɛ bé á bé adyɛ̂ʼwo e Nzyɛ̌m. Nye á bi nkam ó, tâŋ nkɔb nyé, ɨ́ lɔ̌b búʼó yé.

⁸Ɨ́ lɔ̌b búʼó, Abraham á si sâ Nzyɛ̌m mejóʼo ɨ́ jɔʼ nyé á jébe nye ó, nye tôʼ di ɨ́ sí Nzyɛ̌m á be ó, nyě dwé ó nye yɨ́. Nye á tô ó, apʉgʉ́ gʉ́ǎ titii gúmó nyé á be ó, nye tôʼ di yɨ́.

⁹Ɨ́ lɔ̌b búʼó yé ó nyé á tíʼe ɨ́ sí Nzyɛ̌m á kɛʼ nye yɨ́, damá jóʼo ó, nye á tíʼe tɨ̂ʼ ó mpʉ njwóo. Nye á didi tɨ̂ʼ ó, ɨ́ mbɛ̌r kán. Isaac, bé e Yákɔb, bʉr o bé e boo nɔ́ɔ́ bé á kɛʼɔɔ sí yaá bá, bé á di ntémé ó, ɨ́ mbi mímbɛ̌r myé á be ɨ́ nwɨɨla e wɨ́haá mí. Bɨ́bɛ̂h, bé á si bóno ebi mémbɨǎ Nzyɛ̌m á kɛʼ Abraham má. Mé ó b'á be nkɔb líʼe nyɔ́ɔ́.

¹⁰Abraham ntémé á sâ nó ó, nyɨɛ lɨ́ ebóno ó, nye ódi ɨ́ mpǎŋ nkanǎ Nzyɛ̌m á bono le esumo, dí e melele yɨ́.

¹¹Ɨ́ lɔ̌b búʼó, Abraham á si dwe Sara ebum, nyé osí laǎ jɔʼ nyé á be ó, nye díʼee sɔ́ŋ mwân yɨ́. Sara ntémé kǔn mʉ́má. Abraham á bě e búʼó ó, Nzyɛ̌m ókʉ́ bánǎ lóŋlo nkɛ́ʼ nyé.

¹²Nzyɛ̌m nzě dwě Abraham nkul ebono mpóʼo dí ɨ́ buú buo bʉ̂r nyɨ́, damá jóʼo ó, nye á be ó mpʉ ndwê. Bʉr o mpóʼo nyé, bé óbuǒ mpʉ ócwícwén, nkʉ̂ osɨ́ǎ o mâŋ, abe e tólɔ́ɔ.

¹³Bʉr baá bɨ́bɛ̂h, bé á dwe ó, bɨ́ɛ lɨ́ edyɛ̂ʼwo e Nzyɛ̌m. Jɔʼ bé á dwidwe nó yɨ́, bé á bé apǎ bǐ sá nyé á kɛʼ bé yɨ́. Sâ gwár, bé á bee nkɛ̌ʼ nyaá ó, nye dína ká ká lɨ́ ejaa. Bê nzě soho nyê. Bé bʉr o tɨ̂, bé á si gʉ́a lɨ́ otyeetye ó, bé ó ojwóo ti e milaa-nkpǎʼ ɨ́ sí yɨ̂.

¹⁴Bʉr o dí elɛ́ɛ nó bá, bé lɛ́ʼlé tɨ̂ʼ ó, bé sáá ó, mpóʼo nyɔ́ɔ́ bé bʉr o tɨ̂.

¹⁵Yé bé bé á be lɨ́ esímsa mpóʼo bé á duho tɨ̂ʼ nyɨ́ nó, mpa bé á si búla, swîʼ, tô píhe.

¹⁶Sâ gwár, bé á be ó e dwéh édi ɨ́ mpǎŋ mpóʼo, nyaá dí ɨ́ jʉ́o kʉ́ nyɨ́. Sá tɨ̂ʼ ó Nzyɛ̌m dí ajóʼo sôn ɨ́ jɔʼ bé dí egbân nyé yɨ́. Nyɨ́ komlo bé mpǎŋ nkana yaá.

¹⁷Ɨ́ búʼó, Abraham á si kam ɨ́ jɔ̌ʼ Nzyɛ̌m á bóblo nye yɨ́. Abraham nzě sâ ó, nyě jʉ́ ó nye Isaac, tâŋ ndwéá. Nyɨɛ Abraham ó b'á bi menkɛ̌ʼ ménɨ́nɨ́ɨ́ mé Nzyɛ̌m. Nye ntémé ó b'á be ɨ́ cǎr ó, nye díʼɨɨ nye etíʼé é mwân lé laá tâŋ ndwéá,

¹⁸damá jóʼo ó, Nzyɛ̌m á si boo lɛ́ɛ Abraham ó: «Go óbono mpóʼo nyǒ ó, cɨɨ le Isaac.»

¹⁹Nye á jwɨʼ ó, Nzyɛ̌m óbɛ̌m pɛ̌ʼ Isaac lɨ́ odwe. Mɨná bé óbɛ̌m lɛ́ɛ gá ó, nye á si baʼa nʉa Isaac píe nyé á dwe yɨ́.

²⁰Ɨ́ búʼó, Isaac á si syɛɛ Yákɔb, bé le Esô metyéelé. Nye á si boo gwîh sá yé á be ó, yé ngá syɛ́ɛlɨ yɨ́.

²¹Ɨ́ búʼó, Yákɔb, ɨ́ jɔʼ nyé á be, nye mû kúno edwe yɨ́, nye nzě syɛɛ bwán óbá mé Yóseb metyéelé. Nye nzě gbɔlwa sí, kúrwo ɨ́ ntúm wé, nzě dwě Nzyɛ̌m kûm.

²²Ɨ́ búʼó, Yóseb á si lɛ́ɛ bʉr o b'Ɨ́zraɛ̂l, lɨ́ esíé é twiʼ yé ó, bé óduhǒ sí Egɨ̂ptɛn, swîʼ. Nye nzě lɛ́ɛ bé ntémé sá bé ósâ e bidwehé byé yɨ́.

²³Ɨ́ búʼó, obyɛ́l mé Moyɨ̂z, bé á si baʼle nye lɨ́ esǒ ongɔn olɛ̂l píe l'ebyɛ́l lé. Bé á bee ó, nye á be ó mbɨambɨa tyéé. Bé á si pɛʼ bʉ́á ɨ́ milémé myɔ́ɔ́, ntɔ̂ʼ ntaǎ lɛ́á mé njwɨ́ɨ Egɨ̂ptɛn.

²⁴Ɨ́ búʼó mé Moyɨ̂z, ɨ́ jɔʼ nyé á be, nye mû tɔ́má mʉr yɨ́, nye nzě bene ékǎ sêʼlɔɔ ó, «mwân mé sile mé Faraɔ̂ŋ».

²⁵Nye á kpɛl ó, nye síaa e túú, bé e bʉr o mé Nzyɛ̌m, laa ó, nye díʼee e bisʉhʉʉ tâŋ mâ jɔʼ, nyɨɛ lɨ́ esâ mísyóm.

²⁶Nye á kpɛl ó, bé pyéhee bé e Krîst sɔ́má, laa ó, nye bíʼee okúm ɨ́ sí Egɨ̂ptɛn. Nye á si bee myɛ́na Nzyɛ̌m á komo nye má.

²⁷Ɨ́ búʼó yé, nye á si duhǒ sí Egɨ̂ptɛn, akpɛ́ɛ ébúʼ mé njwɨ́ɨ Egɨ̂ptɛn. Nye á kʉ tyɛ̂b ó, ɨ́ píʼi, le esâ mpʉ̌ sá lɛ́ɛ́, nye á bɨbee ó Nzyɛ̌m, mʉr dí abeɔɔ nyá.

²⁸Ɨ́ búʼó yé ó nyé á komlo nzɔɔ Páska, mimyɛʼ métié ɨ́ meníŋlɨ́ mébê yɨ́. Nye á sâ nó ó, éngeles sá ajʉ̂ médwéʼé mé bwán bɔ́ɔ́.

²⁹Ɨ́ búʼó, Moyɨ̂z, bé e dyɛɛ́ yé, bé á si ntaa Mâŋ mé Ácʉʼ. Bé á ntaa ó e mekʉ̌ mɔ́ɔ́ mpʉ bʉ̂r dí etye ɨ́ nzwâh yɨ́. Mpʉ bʉ̂r o b'Egîpten bɨ́ɛ, bé á gwa ntaa nó yɨ́, medíbé nzě búblo bê. Bê nzě síe ɨ́ twíilɨ̌.

³⁰Ɨ́ búʼó, bʉr o b'Ɨ́zraɛ̂l, bé á si lie Yerikô bijɔʼ bísaman, jɔʼ gwár ɨ́ móhó. Nó ó, ɨ́ móhó nzaangbá, bipǎb bí kóʼ Yerikô nzě duma sí.

³¹Ɨ́ búʼó mé Rahâb, sadága mʉ́má, nye á bé adwe ɨ́ jɔʼ bʉ̂r oswîh, bé á jʉ́ŋɔɔ yɨ́. Bé á si sâ Nzyɛ̌m ebɨ̌h. Nyɨɛ ó b'á gʉ́a ebaʼle bʉr o b'á nze byamle sí Kanân bá.

³²Wáǎ lɔ́ɔ mé ókǎ báʼǎ lɛ́ɛ bɨ́n wɨ́? Yé kǎ sáa mé ó jɔʼ, ó me lɛ́yɨɨ bɨ̌n milɔ̌b mé Gedeyɔ̂n, bé e Barâk, ndu e Samsɔ̂n, Yɛftâ, David, Samuel, le ogwíha o mílɔ̌b mé Nzyɛ̌m.

³³Ɨ́ nzɨ̌ búʼó yɔ́ɔ́ ó bé á lwímla e mesí meswîh, ntaŋɔɔ mé yɨ́. Bé á si tíʼe bʉr milɔ̌b lɨ́ otîtyěl ɨ́ nzɨ̌ búʼó yɔ́ɔ́. Bé á si bi nkɛ̌ʼ mé Nzyɛ̌m ɨ́ nzɨ̌ búʼó yɔ́ɔ́. Bé á si pɨr mingbampɨɨ minum ɨ́ nzɨ̌ búʼó yɔ́ɔ́.

³⁴Bé á si díme medíʼe, le ekɨ̂ŋ ópasoŋ ebě búʼó yɔ́ɔ́. Bé á nyɛɛ be ɨ́ tyɛʼ, ntɔ̂ʼ bi pîm ɨ́ menyʉ̂l ebě búʼó yɔ́ɔ́. Bé á lwímla mɔm ntémé, le eso bísɔ́má bí mɔ̂m bíbyɛ̂h ó, ɨ́ nzɨ̌ búʼó yɔ́ɔ́.

³⁵Bʉ́ʉ́ bʉ́bá, bé á baʼa nʉa bʉr bɔ́ɔ́ bé á nyɛɛ dwe, kǎ pah bá ó, ɨ́ nzɨ̌ búʼó yɔ́ɔ́. Bʉ́ʉ́ bʉ̂r, bé á si bɔma e bintɨ́ʼá ɨ́ lɔ̌b búʼó, akam ó, bé dwíhɔɔ lɨ́ okómó, ebě, bé á kpɛl ó, bé páhaa lɨ́ odwe, mbǐ pahá dí ɨ́ buú mbɨa wɨ́.

³⁶Bʉ́ʉ́ bʉ̂r, bé á si kam elwɨ́ɔɔ le ebíŋɔɔ ɨ́ lɔ̌b búʼó yɔ́ɔ́. Bâʼ, bé á si káʼɔɔ e mikʉ̂kɔ̌b, tyenɔɔ lɨ́ okómó ɨ́ lɔ̌b búʼó yɔ́ɔ́.

³⁷Bʉ́ʉ́, bé á si lúmɔɔ mekóʼ, jʉ́ŋɔɔ. Bâʼ, tíʼɔɔ bípéh bíbá e menziʼ; bʉ́ʉ́, jʉ́ŋɔɔ le opasoŋ; bʉ́ʉ́ bɨ́ɛ, bé á si soŋɔɔ ɨ́ mimbɛ̌r myɔ́ɔ́, didiŋɔɔ̌ kʉ̌l e kʉ̌l. Bé á jaa tyeele ó, njɨ bikʉ́r bítab lɨ́ odyɛ́m. Bʉr, bé á si bu tíble bé, le esáŋɔɔ bé jélé ɨ́ lɔ̌b búʼó yɔ́ɔ́.

³⁸Bé á títye ó, ɨ́ lʉá e lʉá ndu e ɨ́ mecwɨ̂ʼ. Bé á jɨjâ ó, ɨ́ mekul ndu e bibáh mékóʼ, tó kœb ó, bé á be ɨ́ mbɨa bʉ̂r. Yé á bé ajala ó, bé díʼee ɨ́ bébe bébe sí yɨ̂.

³⁹Nzyɛ̌m á si kam bʉr baá bɨ́bɛ̂h ɨ́ lɔ̌b búʼó yɔ́ɔ́, bɨ́ɛ yɨ́ɛ apǎ bǐ sá nyé á kɛʼ bé yɨ́.

⁴⁰Mpʉ nyé á cwɨ́a e mɨná gá, laa bé yɨ́, nó nyé á lɛ́ɛ ó, nye ójaá komlo bícwiʼ byɔ́ɔ́ ɨ́ mipáʼ mímyɛ̂h ó, njɨ ɨ́ jɔʼ nyé ókomlo byaá gá bíná le onɔ́ɔ́ bíbyɛ̂h yɨ́.