Read Koonzime Ebrœ̂ 12 Bible Online

Ebrœ̂ 12 - Koonzime bible

Ebrœ̂ 12

¹Ɨ́ páʼ gá wɨ́ná, mɨná gá bé ó tʉ́ŋlʉ̌ bʉr baá. Bé lɨ́ ebɔma mɨ́ná gá ɨ́ nká, lɨ́ eboʼlo mílɔ̌b mé Nzyɛ̌m. Nó ó, mɨná líʼaa gá mimbeʼ médile mímyɛ̂h le syóm dí ekwable mɨ́ná gá wɨ́ wɨ́wɛ̂h. Mɨná sâʼ gá bíhwó lɨ́ eswim míkám, tó pyâl ɨ́ súm Nzyɛ̌m á lyáŋle njɨ ésíé é kám yɨ́.

²Míh gá mɨ́ná, mé dwɛ́ʼɛɛ sɔ̂ʼ njɨ Yésʉs, ebě, nye ó b'á kar nzɨ̌ búʼó. Nye ntémé ó b'á swâhle nye. Nye á kam ó, nye síaa e mitúú, nye tyélɔɔ ɨ́ lɨ́ kʉ́, jʉ́ŋɔɔ. Nye á si pyêh sôn mʉ̂r dí ebɛb ɨ́ mbi éswie laá nyɨ́. Nye á kam ó, nye dwêʼ nó ó, nye nkʉ̂ bi bísʉhʉʉ̌ Nzyɛ̌m á boo komo nye bí. Ɨ́ báánâ, nye mû ó ɨ́ mbó éjʉ́m mé Nzyɛ̌m Sɔ́ŋ ɨ́ mecwɨ́ɨ́ mé jwɨ́ɨ.

³Símsáá gá nye. Bɨ̌n e símsá mpʉ ósyɛ̂l o mísyóm bé á cɨ nye mekǎn mé ébébe, nyɨɛ njɨ lɨ́ edûhwo bé yɨ́. Sísímsáá gá nó, bɨ̌n nkʉ̂ be, akâr mítúú, nkʉ̂ tyɛʼ.

⁴Mpʉ bɨ́n dí elwímla e njwɨr ébébe wɨ́n yɨ́, bɨ̌n bé apǎ gwá lwímla e wé mbɨ̂mbɨá. Sá tɨ̂ʼ ó étó é métié lɨ́n, dína apǎ tɔ́ba sí yɨ́.

⁵Paá bee gá yʉ́ʉ́ sɔ̂ʼ ó: bɨ̌n bɨ́ jɨha mélɨ́ Nzyɛ̌m á dwe mɨná gá má. Nye á dwe bɨ̌n melɨ́ maá ó, ebě, bɨ̌n bé ó bwán bé. Nye á lɛ́ɛ ó: Mwân wǎm, jɔ̌ʼ Dâ Nzyɛ̌m mû lɨ́ esɨ̂ʼ gó lʉ̂ yɨ́, sá asâ épɨ̂h. Jɔʼ nyé mû lɨ́ edwe gó mebě yɨ́, ajóʼo étyɛʼ e nyʉ̂l.

⁶Ebě, Dâ Nzyɛ̌m sɨ́ʼ lʉ̂ ó, mʉr nyé dí ekpɛl nyá, waá nyɨnyɛ̂h nyé dí etɨ̂ʼ bɨr ó: «Nyâʼ, nye ó mwân wǎm» nyá.

⁷Nó ó, dúhwáá gá bintɨ́ʼá byaá. Byé tɨ́aa bɨ̌n mpǎŋ twiʼ. Mpʉ̌ Nzyɛ̌m dí esâ bɨ́n nó yɨ́, yé ó ebe bɨ́n dí bwán bé. Sɔ́ŋ bé asɨ̂ʼ mwân lʉ̂ nó, go ó, nyɨ́haá, nyé abe mwân mpâ.

⁸Nzyɛ̌m titirwo e bwán bé bɨ́bɛ̂h ó nó. Nyé bé asɨ̂ʼ bɨ́n milʉ̂ nó, go ó, bɨ̌n bé abe bwán bé ó tɨ̂ʼ yɨ́. Lɛ́ɛ́, bɨ̌n bé ó bwân o b'á byɛ̂l ɨ́ mbɛ̌r bá.

⁹Yé e yʉ́ʉ́ sɔ̂ʼ: ɨ́ jɔʼ ósɔ́ŋ gá bɨ́ná, bé á byâ mɨná bá, sɨ́ʼ mɨ́ná gá milʉ̂ yɨ́, mɨná sɨ́sá ó, dwe gá bé dúu. Nó ó, Sɔ́ŋ gá wɨ́ná á tíʼ mɨná gá misísǐm nyá, nyé ósɨ̂ʼ mɨ́ná gá ntémé milʉ̂ nó, nzê mɨná bé ajala le edwe gá nye dúu ɨ́ buo buo ɛ̌? Mɨ́ná sí sâ gá nye mejóʼo nó, lɛ́ɛ́, mɨná bé ótíʼe gá ɨ́ nzɨ̌ mejóʼo maá.

¹⁰Osɔ́ŋ gá bɨ́ná, bé á jaa sɨ̂ʼ mɨná gá milʉ̂ ó, njɨ ɨ́ mâ jɔʼ. Bé á si bee embɨa lɨ́ esâ mɨ́ná gá nó. Nó, Nzyɛ̌m Sɔ́ŋ gá wɨ́ná nyɨɛ, nyě jaá sɨ̂ʼ mɨ́ná gá milʉ̂ ó, njɨ lɨ́ esú é nyɔm gá wɨ́ná. Nyě sá nó ó, mɨná nwɨ́ɨlaa gá e né, le edi bʉ̂r o dí tí bá, mpʉ nyé dí yɨ́.

¹¹Jɔʼ mɨ́ná dí edweŋɔɔ gá bintɨ́ʼá byaá yɨ́, yé ɨ́ kpaa ɨ́ léme, anwɨɨla ó, yé ó sá ésoho. Jɔ̌ʼ túú waá ká laa yɨ́, bʉr o dí egʉ́ǎ sâ dí tɨ̂ʼ yɨ́ bá, bé ntɔ̂ʼ kǎ gʉ́a ó, nkúná wɨ́ komlo bé miléme. Bé mû kǎ lîʼ le esâ ó, njɨ bisyɛ́ɛla bi dí tîtyěl bí, bi ntémé mepyɛbla tɨ̂.

¹²Yé bé nó wá, bɨ̌n e gwá lɨl mébó mɨ́n me mû sí jeʼe má. Bɨ̌n e dúhwó élɨl mébóó mɨ́n me mû mindyɛ́má má.

¹³Bɨ̌n e gwá komlo ménzɨ̌, tyêl mé ɨ́ lîm, ó mekʉ̌ me dí e bidyɛ̂m má, mé sá akǎ piha. Bé tíʼaa yɨ́ɛ tíʼáa.

¹⁴Sáʼ gá sɨ́n lɨ́ etíʼe ɨ́ mepyɛbla, páʼ nyɨ́n e bʉr bɨ́bɛ̂h. Sáʼ gá sɨ́n ntémé lɨ́ edi bʉ̂r o dí egúmo e Nzyɛ̌m, baá o dí tí bá. Mʉ̂r óbe, abě tí nó, nye ákóʼó beě Tî Yésʉs.

¹⁵Gwá di gá le ocwóó, ó mʉ̌r sá abɔ́ʼa e Nzyɛ̌m dí e mpam nyá. Kaalé dí ɨ́ dwie dwie wɨ́, wé sá apâh bíntoʼdu, ntɔ̂ʼ lœʼ bʉ̂r ɨ́ buo buo ɨ́ míh mé Nzyɛ̌m.

¹⁶Gwá di gá le ocwóó. Mʉr asâ bímolá. Mʉ̌r sá asâ nkěh ɨ́ nkǒ páʼ mílɔ̌b mé Nzyɛ̌m ɨ́ mpʉ̌ Esô á sâ yɨ́. Nye á si dwɛ́na dǐ tʉ́l yé, dwe ntwóm, lɨ́ esyɛ́ɛla yé lɨ́ esú lé énʉa mâ kǎr méde!

¹⁷Píe tɨ̂, nye nzě kǎ kpɛl ó, sɔ́ŋ syɛ́yɨɨ nye metyéelé, ó nye líʼɨɨ e bilíʼé bí sɔ́ŋ wé. Bɨ̌n bé lɨ́ egʉ́a ó, sɔ́ŋ á si bene esâ syɛ́ɛla yaá. Esô mʉr tɨ̂ʼ á si kʉ jɨ ɨ́ jɨ jɨ jɨ, sâ gwár, nye á bé akǎ be e nkul edwirǎ léme, nkʉ̂ bi métyɛʼ me mpóm maá ɨ́ lɔ̌b myɛ́ɛlé mé maá.

¹⁸Gúmó bɨ́n tyɛ́b ɨ́ míh mé Nzyɛ̌m yɨ́, yé abě mpʉ écwɨ̂ʼ e dí bɛ̌m mɛ́rɔɔ e mebô lɨ́, gúmó bʉ̂r o b'Ɨ́zraɛ̂l, bé á di mélú mé épíhe yɨ́. Bé á si bee siʼe yé á dúo tɨ̂ʼ yɨ́, bee ntémé edúrʉ́ʉ́ ɨ́ gúú pâʼ, lɨ́ɛ abe e bá myɛ́n tɨ̂. Bé á si bee ntémé nkúo lɨ́ ekwoolo.

¹⁹Bé á si jóʼo lwǐb sébé ndu e twíí mé Nzyɛ̌m. Jɔʼ bé á jóʼo twíí nyé yɨ́, bê nzě jóʼo bʉ́á, bê nzě jɨʼla e né ó, nye ayɨ́ kǎ báʼǎ cɨ bé lʉ́ʉ́ ékǎn,

²⁰ebě, sá nyé á lɛ́ɛ bé yɨ́, yé á si ntaa bé ɨ́ nkul. Nye á lɛ́ɛ e bé ó, nkʉ̂ mʉr, nkʉ̂ tír kúná le ecwɨ̂ʼ laá nó, bé e lúmó nyé mekóʼ, nye e dwê.

²¹Sá bé á bee yɨ́, yé á be ó sí gbâ bé ekɛ̂n ɨ́ nyʉ̂l. Moyɨ̂z, nye ó: «Me lɨ́ ebuú sâʼ le ejóʼo bʉ́á.»

²²Bɨ̌n bɨɛ, bé abe nó. Bɨ̌n mû ó sí sîhle kúnókúno le ecwɨ́ʼ é Síon. Yé ó gúmǒ nkana mé Nzyɛ̌m dí kublakúbla nyá dí yɨ́. Yé ó nkanǎ Yerʉ́zalɛm, yaá dí ɨ́ jʉ́o kʉ́ yɨ́. Beéngeles ɨ́ buo buo, bé ó tɨ̂, abe e tólɔ́ɔ. Bé ɨ́ nzɔɔ sʉhʉʉ.

²³Bɨ̌n mû ó bǎʼ e gwɨ́hlá médwéʼé mé bwán mé Nzyɛ̌m. Míé mɔ́ɔ́, mé ó micɛmá ɨ́ jʉ́o kʉ́. Bɨ̌n bé á si sîhle bǎʼ e Nzyɛ̌m Tîʼ milɔ̌b, mʉr ngá pahle bʉ̂r bɨ́bɛ̂h nyá. Bɨ̌n bé á si pyâl gúmó ótîtyěl o bʉ̂r dí yɨ́. Bé mû ó lɨ́ etíʼe mbɨ̂mbɨá, ntinɨ̂ e ntinɨ̂.

²⁴Bɨ̌n bé á si nze kwá mé Yésʉs, mesaádɔm á sâ edwán é sáá páʼ gá nyɨ́ná e Nzyɛ̌m nyá. Bɨ̌n bé á si pyâl, cɨɨ ɨ́ nzɨ̌ metié mé nyé á pubo bɨ̌n e mé má. Metié mé maá jaá lwilwib ó, njɨ mekǎn me dí ɨ́ mbɨa má, laa maá Ábɛl nyɨɛ á cɨ má.

²⁵Nó, gwá di gá le ocwóó, ó bɨ̌n sá abene mʉ̂r mû lɨ́ ecɨ̂l bɨ́n nyá. Ɨ́ mimbú mí píhe, bé á si bene ejóʼo mʉr á nze ɨ́ sí yɨ̂ʼ nyá, akpɛl éjóʼo ɨ́ jɔʼ nyé á boo lɛ́ɛ bé sá nyé óntɨh bé yɨ́. Jɔʼ yé á ka pyâl yɨ́, bé ntɔ̂ʼ sáa ékɨ̂ŋ ntɨ́ʼá. Yé á bé akǎ bána. Mʉr á nze ka lwib e mɨná gá nyá, nyɨ́haá, nyé twíí, nye á duho ó kʉ́. Mɨ́ná bé óbene gá lɔ́ɔ́ wé nó, nzê mɨná bé ókɨ̂ŋ gá ntɨ́ʼá tɨ̂ʼ yɨ́ɛ ɛ̌? Nzyɛ̌m pǎ nyɛɛ́ ntɨ̂ʼ bímpám gá bíná ɨ́ lɔ̌b ajóʼo wɔ́ɔ́, á dwɛʼra e mɨná gá bɨɛ!

²⁶Ɨ́ mimbú mí píhe, twíí nyé, nye á be ó sí pɨ̂ʼ sí. Nó ó, ɨ́ báánâ, nyɨ́ dwe nkɛ́ʼ. Nye ó: «Me óbáʼǎ pɨ̂ʼ sí, kala le jʉ́o, le ejwoo le baántɛ́n ɨ́ sʉʼ gwár.»

²⁷Mpʉ nyé á lɛ́ɛ ó, nye ópɨ̂ʼ byé ɨ́ sʉʼ gwár yɨ́, nó yé lɛ́ʼlé ó, bisá nyé á komlo bí, byé ópɨ̂ʼla; byé odîm. Sá dí ɨ́ píʼi, ɨ́ sɨ́ŋ, apɨ̂ʼla yɨ́, yɨ́haá ó ngá lîʼ.

²⁸Ɨ́ tɨ̂, mɨná lɛ́yɨɨ gá Nzyɛ̌m henárá, ebě, nyɨ́ níŋle mɨ́ná gá ɨ́ mpóʼo nyé dí ejwɨ́ɨ nyɨ́. Mpóʼo nyé, nyé abe e nkul epɨ̂ʼla. Mɨná dwêʼ gá nye kûm, dwáawo nyé, le ejóʼo nyé bʉ́á. Mɨná séaa gá e né mbǐ syɛ́ɛ́ nyé ngá buú kpɛl wɨ́.

²⁹Ebě, Nzyɛ̌m gá wɨ́ná, nye ó mpʉ̌ siʼe dí ɨ́ buú dúo yɨ́.