Read Koonzime Ebrœ̂ 2 Bible Online

Ebrœ̂ 2 - Koonzime bible

Ebrœ̂ 2

¹Sɨ́ǎ yaá ó dí ó, milɛ́ʼlá bé á nyɛɛ dwe mɨná gá mí, mɨná díʼee gá ɨ́ puuu lɨ́ egwá jôʼlo myé, lɨ́ esú ó, mɨná sá akǎ tyenɔɔ gá díbé tíe, jɨ́bla.

²Mɨná bé lɨ́ egʉ́a gá ó, mpáŋla bééngeles, bé á nze e né nyɨ́, á be ó e nkul. Mʉr nyɨnyɛ̂h á gbah metié, le waá á sâ mé ajóʼo nyá, á si bi myɛ́na mé á jala le ebɨ̌h lé laá má.

³Mɨná gá bɨɛ bé á be ó sí ntɨhɔɔ̌ lɔ́ɔ́ twiʼ dí elaa mpáŋla bééngeles bé á túno nyɨ́. Mʉr á nyɛɛ lɛ́ɛ lɔ́ɔ waá nyá, á be ó Tî Yésʉs mʉr tɨ̂. Ntémé, bʉr o b'á jóʼo nye bá ó b'á lɛ́ɛ mɨná gá ó, wé ó lɔ́ɔ dí e nkul wɨ́. Á nó, mɨ́ná ópyêh wé nó, mɨná bé okǎ swab gá nkoó?

⁴Nzyɛ̌m, nyɨ́ nzě boʼlo ntémé ó, lɔ́ɔ waá, wé ó tyeetye, ebě, nye á si ntɨh bisyɛ́ɛla bi nkûl, le byaá bí ékâm, le mesimá mimbi mimbi, kumǒ kumáa e mindwéá Sísǐm wé dí entɨntɨh mɨ́ná gá mí, dû mpʉ wé dí ekpɛl yɨ́.

⁵Mpóʼǒ Nzyɛ̌m ngá sûʼlǎ tyêl, nyaá bɨ́h dí elwib, dumo e nye nyɨ́, óbe ó ɨ́ jwɨ́ɨ́ nyʉ́ʉ́ mʉ̂r. Ntʉ bééngeles nyé á tyêl lɨ́ esú lé éjwɨ́ɨ mpóʼo nyaá.

⁶Nyʉ́ʉ́ mʉ̂r á cɛma ɨ́ yʉ́ʉ́ péh Mékaná mé Nzyɛ̌m ó: «Mʉr, nye yé, ó go tóŋlaa nye? Mwân mé mʉr, nye yé, ó go tírwaa e né?

⁷Ɨ́ mâ jɔʼ, go á si sul nye sí. Beéngeles, bé á si nyɨ̂n e dúu, laa nyé bá tîtííǎ. Píe tɨ̂, gʉ́ kǎ dil nyé káráá jwɨ́ɨ ɨ́ lʉ̂, lɨ́ edwe nyé kûm ndu e dúu.

⁸Go á si gbâ sá yɨ́yɛ̂h ɨ́ jwɨ́ɨ́ yé, sí mebo mé.» Mpʉ̌ Nzyɛ̌m mû sí syɛŋ bísá bíbyɛ̂h, gbâ byé ɨ́ jwɨ́ɨ́ yé yɨ́, yé abe e sâ gwár dí abě sulá sí ɨ́ jwɨ́ɨ́ yé yaá. Tó kœb ó, ɨ́ báánâ, mɨná dína apǎ bee gá ó, bíbyɛ̂h, bí sîl égbáŋɔɔ ɨ́ jwɨ́ɨ́ yé.

⁹Sá mɨ́ná dí ekʉ́ gwá bee gá yɨ́, yé ó: ɨ́ mâ péh jɔʼ, Nzyɛ̌m á si nyɛɛ sul Yésʉs sí, beéngeles bá laa nyé ɨ́ dúu. Píe tɨ̂, nyɨ́ kǎ dil nyé káráá jwɨ́ɨ ɨ́ lʉ̂, lɨ́ edwe nyé kûm ndu e dúu, ebě, Yésʉs á si sia e mitúú, ntɔ̂ʼ dwe. Ɨ́ mbi waá ó Nzyɛ̌m á cwɨ́a e bʉr bɨ́bɛ̂h yɨ́, lɨ́ esâ ó, Yésʉs dwêʼ lɨ́ esú lɔ́ɔ́.

¹⁰Sá yɨ́yɛ̂h, yé duho ó kwá mé Nzyɛ̌m. Nzyɛ̌m á kuho sá yɨ́yɛ̂h ó, ɨ́ kpɛ̌l yé nye mʉr tɨ̂. Nzyɛ̌m á si gwɨ̂m etô e buobuo bwán bé, tô tóʼ, tó pyâl pyáláa ɨ́ diá kûm. Sá tɨ̂ʼ ó yé á jala ó, Yésʉs táaraa ekomlo bé nzɨ̌ ebǐ twiʼ, le ntémé ó, nye díʼee lwɨ́ŋlá e nkul etíʼ bé, duho ɨ́ mitúú nyé á sia e myé mí yɨ́.

¹¹Yésʉs, mʉr dí epubo bʉ̂r nyá, bé e bʉr nyé dí epubo bá, bé e boo nɔ́ɔ́ bɨ́bɛ̂h, bé mû ó bʉr o b'á duhǒ gúmo gwár bá. Sá tɨ̂ʼ ó Yésʉs dí ajóʼo sôn lɨ́ ejébe bé «bɨ́ɔɔ́ bâm» yɨ́.

¹²Ɨ́ yʉ́ʉ́ jɔʼ, nye á lɛ́ɛ, cɨɨ ɨ́ nzɨ̌ ogwíha o mílɔ̌b ó: «Me ólɛ̂ʼle bɨ́ɔɔ́ bâm díé lô. Me ótyɛ̂b témé bʉr o gó á syɛŋ bá, mé odwe gó kûm ɨ́ mejéme.»

¹³Nye ntémé, nye lɨ́ ebáʼǎ lɛ́ɛ ó: «Mɛm, me ódyɛ̂ʼwo e Nzyɛ̌m.» Nye ntémé, nye á lɛ́ɛ ó: «Me ó nyâ, bɨ̌h e bwán Nzyɛ̌m á dwe me bá.»

¹⁴Bwán nyé dí elwib, dumo e bé bá, bé e bipúno ndu e bidwehé. Jwɨʼ gwár yaá ntémé ó Yésʉs á tíʼe yɨ́. Nye á si dwe lɨ́ esú ó, nye têʼlaa mʉr á bɨbe e nkul eswie nyá. Mʉr waá, nye ó sɔ́ŋ meleme.

¹⁵Nye á dwe ntémé ó, nye pɛ́ʼɛɛ mɨná gá lɨ́ okómó. Ebě, mɨná bé á nyɛɛ lɛŋ gá bicwiʼ gá bíná ó, kɛ́ʼá lɨ́ okómó. Mɨná bé á didi gá ɨ́ menkara mé ókómó waá ó, ɨ́ kpɛ́ɛ́ éswie.

¹⁶Ebě, lɨ́ otyeetye, nye á bé anze bééngeles ɨ́ nkɔ̌m. Nye á nze kɛm yɨ́ɛ ó, bwá bé ónta mé Abraham.

¹⁷Sá tɨ̂ʼ ó yé á jala ó, nye díʼee kwahaá mpʉ bɨ́ɔɔ́ bé, ɨ́ mipáʼ mímyɛ̂h yɨ́. Nye á nwɨɨla e mɨná gá ó, lɨ́ esú ó, nye nkʉ̂ cwɨ́a e mɨná gá, le edi njwɨ́ɨ opara mɨ́ná ókʉ́ bûʼla gá nyá. Nye ó jálá le eséa ɨ́ páʼ bísâ bi dí edwɛ̂ʼ Nzyɛ̌m bí. Nye ó mʉr á dwe, búra le misyóm mí bʉ̂r bé, le eleʼě Nzyɛ̌m ɨ́ nkpaa nyé nyá.

¹⁸Nyě e nkul ekɛm bʉ̂r ɨ́ bijɔʼ bé dí entaa mébʉ́blá bí, ebě, nye mʉr tɨ̂ʼ á be ó sí sia e mitúú ɨ́ jɔʼ nyɨ́ɛ á bóblɔɔ yɨ́.