Read Koonzime Ebrœ̂ 3 Bible Online

Ebrœ̂ 3 - Koonzime bible

Ebrœ̂ 3

¹Bɨ́ɔɔ́ bɨ́h le okɛ́l bɨ́h dí egúmo e Nzyɛ̌m bá, mɨná gá ó bé á bi gá nkɔb mpwár: njɨ́blɨ́ Nzyɛ̌m á ntɨh mɨná gá, duho ɨ́ jʉ́o kʉ́ wɨ́. Jwɛ́ʼɛ́ɛ́ gá sɔ̂ʼ njɨ Yésʉs mpʉ nyé dí yɨ́: nye ó mʉr milʉ́mlʉ́ mé Nzyɛ̌m, báʼǎ be ntémé njwɨ́ɨ opara gá wɨ́ná mpʉ mɨ́ná dí ekam gá yɨ́.

²Nzyɛ̌m ó b'á tyêl Yésʉs ɨ́ dǐ njwɨ́ɨ opara gá wɨ́ná. Yésʉs, nye ó mʉr ebúʼlɔɔ, ɨ́ mpʉ̌ Moyɨ̂z á bûʼlɔɔ, nzě tyélɔɔ ɨ́ dǐ yé tʉ́ŋlʉ̌ mbɛ̌r bʉ̂r mé Nzyɛ̌m yɨ́.

³Yésʉs nyɨɛ ó dí ejala e kûm ɨ́ buo buo, laǎ Moyɨ̂z, jwɨʼ gwár e gwár e mpʉ swîm mbɛ̌r dí ɨ́ buú gúmlɔɔ, laǎ mbɛ̌r wé, wé mʉr tɨ̂ʼ yɨ́.

⁴Abe e mbɛ̌r dí e nkul edi, abe e swim. Tó kœb ó, Nzyɛ̌m ó b'á sumo sá yɨ́yɛ̂h.

⁵Ɨ́ páʼ mé Moyɨ̂z, nye á be ó mʉr ebúʼlɔɔ ɨ́ nkǒ páʼ bísá bíbyɛ̂h bi dí tʉ́ŋlʉ̌ mbɛ̌r bʉ̂r mé Nzyɛ̌m bí. Nye á tyélɔɔ syɛ̂l mesâ ó, nye bôʼlaa sá yɨ́yɛ̂h Nzyɛ̌m á be ó, nye ólɛ́ɛ bʉ̂r yɨ́.

⁶Tó kœb ó, Krîst nyɨɛ á si tyélɔɔ ɨ́ dǐ Mwân á jala le edǐ lʉ́ mbɛ̌r bʉ̂r waá nyá. Mbɛ̌r bʉ̂r waá, wé gúmó ntémé ó e né. Mɨ́ná bé ódi gá e mpûʼla ɨ́ miléme, le ekʉ́ gʉ́ǎ sá mɨ́ná dí ebúʼla gá yɨ́, abáawǒ sɔ̂ʼ nó, lɛ́ɛ́, mɨná gá ó dí bʉ̂r ó mbɛ̌r bʉ̂r wé waá.

⁷Sɨ́ǎ yaá ó, Sísǐm mé Nzyɛ̌m dí elɛ́ɛ ɨ́ Mekaná mé Nzyɛ̌m ó: «Bɨ́n sí jóʼo twíí mé Nzyɛ̌m mûh nɛ́ɛ:

⁸mʉr asâ élele é lʉ̂ mpʉ bímpám bín á sâ ɨ́ jɔʼ byé á gbɔba e Nzyɛ̌m, lɨ́ ebóblo nyé ɨ́ lʉá yɨ́.

⁹Bimpám bín, byé á si bóblo me gʉ̂, lɨ́ esáa égʉ́ǎ nkʉ̂ me ó dí mpǎŋ Nzyɛ̌m. Bé á si bee bisyɛ́ɛla byâm mimbû mekám ménâ.

¹⁰Mpʉ bé á bóblo me nó yɨ́, me á si jóʼo ebúʼ e myǎ bʉ̂r waá. Nó ó mé á lɛ́ɛ ó: Bé lɨ́ eboó tô le edîm. Bé dína lɨ́ ekʉ́ jéʼe édû nzɨ́ mé dí etɨ́e bé nyɨ́.

¹¹Ɨ́ nkpaa nyǎm, me nzě káale ó: Bʉr ópǎ bee gá nkʉ̂ bé ókǎ báʼǎ nî lɨ́ egbalá lâm!»

¹²Bɨ́ɔɔ́ bâm! Okɛ́l bâm! Gwá di gá le ocwóó, ó mʉr ɨ́ sɔ́má yɨ́n ayɨ́ be e lémé dí ɨ́ lele lɨ́ ebúʼla wɨ́. Nyě sá agbɔba e Nzyɛ̌m dí kublakúbla nyá.

¹³Dyɛ́m bɨ́n dína mûh sɔ́má yɨ́, yé mbɨa ó, bɨ̌n dwîdweelaa melɨ́ páʼ nyɨ́n móhó wɨ́wɛ̂h. Sá tɨ̂ʼ ó mísyóm, myé óbe, alɨl bɨ́n miléme, nkʉ̂ dímle nyʉ́ʉ́ mʉ̂r ɨ́ sɔ́má yɨ́n ɨ́ nzɨ̌ mikóo yɨ́.

¹⁴Sá dí tɨ̂ʼ yɨ́, yé ó: mɨ́ná ódi gá ɨ́ bidǐ gá bíná, apʉʼa tɨ̂, tó pyâl ɨ́ mesíé nó, go ó, mɨná gá be ó bʉr ó njoo mé Krîst ó tɨ̂ʼ yɨ́.

¹⁵Ebě, yê cɛmá ó: «Bɨ́n jóʼó twíí mé Nzyɛ̌m mûh nɛ́ɛ: mʉr asâ élele é lʉ̂ mpʉ bímpám bín á sâ ɨ́ jɔʼ byé á gbɔba e Nzyɛ̌m yɨ́.»

¹⁶Onzé bé á jóʼo twíí mé Nzyɛ̌m, nzě gbɔba e né bá? Yé á be ó bʉr bɨ́bɛ̂h bé á duhǒ sí Egɨ̂ptɛn ɨ́ sɔ́má mé Moyɨ̂z bá.

¹⁷Ɨ́ mimbû mekám ménâ myaá, Nzyɛ̌m á jóʼo ebúʼ le onzé? Nye á jóʼo ebúʼ ó e bʉr o b'á sâ syóm bá. Bɨ́haá ó b'á dwe, ntɔ̂ʼ debe ɨ́ lʉá e lʉá wɛ̂h.

¹⁸Nzyɛ̌m á káale ó: «Bʉr ópǎ bee gá nkʉ̂ bé ókǎ nî lɨ́ egbalá lâm!» Bʉr o nyé á lwib ɨ́ lɔ̌b wɔ́ɔ́ bá, bé onzé? Bé ó baá bé á sâ nye ebɨ̌h bá!

¹⁹Sá tɨ̂ʼ ó mɨ́ná dí ebee gá ó, bé á bé anî lɨ́ egbalá lé yɨ́, ebě, bé á bé adyɛ̂ʼwo e né.